diff --git "a/hsenhu.wordpress.com.json" "b/hsenhu.wordpress.com.json"
new file mode 100644--- /dev/null
+++ "b/hsenhu.wordpress.com.json"
@@ -0,0 +1,238 @@
+[
+  {
+    "title": "ဢၼ်ထုၵ်ႇလီ လႅၵ်ႈလၢႆႈ ၼႂ်းတူင်ႇဝူင်းႁဝ်း",
+    "content": "“ယႃႇတွပ်ႇ ၵႂၢမ်းဢူႈမႄႈ တူၵ်းငရၢႆးဢိူဝ်ႈ”\n\n“ပဵၼ်လုၵ်ႈဢွၼ်ႇႁေ တွပ်ႇၵႂၢမ်းၵူၼ်းလူင်ႁိုဝ်ႉ….. လိူင်းဝႃႈလိူင်း လုၵ်ႈဢွၼ်ႇသင် ၸိူင်ႉၼႆ”\n\nတွၼ်ႈတႃႇ ၼႂ်းၾိင်ႈထုင်းႁဝ်းတႄႉ ၶေႃႈၵႂၢမ်းၸိူဝ်းၼႆႉ ဢမ်ႇလၢၵ်ႇလၢႆးသင် တိုၼ်းတေယၢမ်ႈငိၼ်းယူႇၵူႈၵေႃႉ။ ပေႃးၵူမ်ႈႁူဝ် ထွမ်ႇဢဝ် ၵႂၢမ်းၵူၼ်းလူင်ၵူႈၶေႃႈ ႁဵတ်းၸွမ်း ၵူႈဢၼ်  ၸင်ႇဢွၼ်ၵၼ် မၵ်းမၼ်ႈဝႃႈ လုၵ်ႈဢွၼ်ႇ ၵေႃႉၼၼ်ႉ ပဵၼ်ၵူၼ်းဝႃႈငၢႆႈ လၵ်းလႅမ် တိုၼ်းပဵၼ်ၾိင်ႈထုင်းႁဝ်းယဝ်ႉ ဢမ်ႇၸႂ်ႈၶႃႈႁိိုဝ်။\n\nပေႃးၵူၼ်းလူင်ၸႂ်ႉၼႆ မႅၼ်ႈၵေႃႈယဝ်ႉ ဢမ်ႇမႅၼ်ႈၵေႃႈယဝ်ႉ၊ လုၵ်ႈဢွၼ်ႇ လႆႈၸႂ်ၵေႃႈယဝ်ႉ ဢမ်ႇလႆႈၸႂ်ၵေႃႈယဝ်ႉ တိုၼ်းလူဝ်ႇလႆႈႁဵတ်းၸွမ်းယဝ်ႉ။ ဢမ်ႇမီးသုၼ်ႇထဵင်ၶိုၼ်း။ ပေႃးထဵင်ၶိုၼ်းၵေႃႈ ဢမ်ႇၸႂ်ႈၵူၼ်းလီ၊ ဢမ်ႇၸႂ်ႈလုၵ်ႈဢွၼ်ႇ လၵ်းလႅမ်၊ ဢမ်ႇၸႂ်ႈလုၵ်ႈဢွၼ်ႇ ယဵၼ်ႇငႄႈယဝ်ႉဝႃႈ။\n\nပေႃးလုၵ်ႈဢွၼ်ႇႁဵတ်းၽိတ်းၼႆ တႅၼ်းတီႈတေသင်ႇသွၼ် ၼႄတၢင်းလီလီၼၼ်ႉ ဢွၼ်ၵၼ်ပွင်ႉလႃႇထႃႉႁႅမ်၊ ၽိူဝ်ႇၵူၼ်းလူင်ႁဵတ်းသမ်ႉ ယင်းဢမ်ႇယွမ်းၼွမ်း တေႃႇလုၵ်ႈဢွၼ်ႇၵွၼ်ႇ။\n\nပေႃးလုၵ်ႈဢွၼ်ႇ ႁဵတ်းၽိတ်းသေလွင်ႈလွင်ႈၼႆ တိုၼ်းဢမ်ႇထွမ်ႇၶေႃႈၵႄႈလိတ်ႈ၊ ဢမ်ႇပၼ်လုၵ်ႈဢွၼ်ႇလၢတ်ႈၵႂၢမ်းသင်သေ ပေႃႉႁႅမ်ထႃႉလႃႇ လုၵ်ႈဢွၼ်ႇၵမ်းလဵဝ်ယဝ်ႉ။\n\nယွၼ်ႉၼၼ် လုၵ်ႈဢွၼ်ႇႁဝ်းၼႆႉ ၸပ်းတၢင်းယၢမ်ႈမေႃလႅၼ်မႃး၊ ၽိူဝ်ႇယႂ်ႇမႃးသေ ၵႂႃႇယူႇၸွမ်းပိူၼ်ႈၼႆ ပိူၼ်ႈပေႉၵိၼ်ၵေႃႈ ဢမ်ႇႁတ်းလၢတ်ႈ၊ ဢမ်ႇလႆႈၸႂ်ၼႆၵေႃႈ ဢမ်ႇႁတ်းလၢတ်ႈဢွၵ်ႇ၊ ယိူၼ်ႉၵၼ်ႈဝႆႉၼႂ်းၸႂ် ႁဵတ်းၼႆတိၵ်းတိၵ်းသေ ဢဝ်ပဵၼ်ထိုင်ႉၼိုၵ်းၵႂႃႇပႅတ်ႈ။\n\nလွင်ႈတၢင်းၸိူင်ႉၼႆ လုၵ်ႈဢွၼ်ႇ ဢၼ်ယၢမ်ႈထူပ်းမႃးၼၼ်ႉၵွႆး ၸင်ႇတေပွင်ႇၸႂ်လီလီ။\n\nလွင်ႈၸိူဝ်းၼႆႉ လီလႆႈလႅၵ်ႈလၢႆႈယဝ်ႉ လွၵ်းလၢႆးၸိူင်ႉၼႆ မၼ်းဢမ်ႇပဵၼ်ၵၢၼ် ၼႂ်းၵၢပ်ႈပၢၼ်မႂ်ႇၼႆႉယဝ်ႉ။"
+  },
+  {
+    "title": "သွၼ်လုၵ်ႈဢွၼ်ႇ ႁႂ်ႈမေႃၸႂ်ႉၸၢႆႇငိုၼ်းတွင်း",
+    "content": "ၸွမ်းၼင်ႇၶေႃႈၶူၼ်ႉၶႂႃႉၼၼ်ႉလႆႈႁူႉဝႃႈ လုၵ်ႈဢွၼ်ႇၸိူဝ်းဢၼ် ပေႃႈမႄႈၶဝ် သွၼ်ပၼ်၊ လၢတ်ႈၼႄ လွင်ႈငိုၼ်းတွင်း ၸဵမ်မိူဝ်ႈတိုၵ်ႉၵေႃႉလဵၵ်ႉၼၼ်ႉ ပေႃးၶဝ်ယႂ်ႇမႃးၼႆ ၶဝ်မေႃၸတ်းၵၢၼ်ငိုၼ်းတွင်း လႄႈ မီးငိုၼ်းၶဝ်ႈၼမ်လိူဝ် တၢင်ႇၵေႃႉ ၼႆယဝ်ႉ။\n\nၼႂ်းၶေႃႈၶူၼ်ႉၶႂႃႉ လွင်ႈငိုၼ်းတွင်း လႄႈ လုၵ်ႈဢွၼ်ႇၼၼ်ႉ ပိုတ်ႇၼႄဝႆႉဝႃႈ “လုၵ်ႈဢွၼ်ႇၸိူဝ်းဢၼ်မီးတူဝ်ထူပ်းလွင်ႈငိုၼ်းတွင်း ၸဵမ်မိူဝ်ႈတိုၵ်ႉၵေႃႉလဵၵ်ႉၼၼ်ႉ ပေႃးၶဝ်ယႂ်ႇမႃးၼႆ ၶဝ်ပေႃၸတ်းၵၢၼ်ငိုၼ်းတွင်း တႃႇၸူဝ်ႈပၢၼ်ၶဝ်” ၼႆယဝ်ႉ။\n\nမိူဝ်ႈလဵဝ်ၼႆႉ ပဵၼ်ၶၢဝ်းယၢမ်း ဢၼ်မူၵ်းတူဝ်ယူႇႁိူၼ်း ယွၼ်ႉတၢင်းပဵၼ်ၶူဝ်းဝိတ်ႈ – 19 လႄႈ တေလႆႈဝႃႈ ပဵၼ်ၶၢဝ်းယၢမ်းလီတီႈသုတ်း တႃႇတေပူင်သွၼ် ႁႂ်ႈလုၵ်ႈဢွၼ်ႇၶဝ် မေႃႁူႉၵႃႈၶၼ်ငိုၼ်းတွင်း၊ မေႃၸႂ်ႉၸၢႆႇငိုၼ်းၼၼ်ႉ ယူႇယဝ်ႉ။\n\nၼင်ႇႁိုဝ် လုၵ်ႈဢွၼ်ႇႁဝ်း ပေႃးတေမေႃႁူႉ လွင်ႈငိုၼ်းတွင်းၼၼ်ႉ လီၽိုၵ်းပၼ်ၶဝ် ၸဵမ်မိူဝ်ႈလဵၵ်ႉလဵၵ်ႉ၊ တႄႇၸဵမ်မိူဝ်ႈ ဢႃႇယု ၶဝ်လႆႈ သီႇႁႃႈ ၶူပ်ႇၼၼ်ႉ ထုၵ်ႇလီ ဢုပ်ႇဢူဝ်းၶဝ်ဝႃႈ တေၶႂ်ႈသိုဝ်ႉသင်၊ ငိုၼ်းသမ်ႉမီးၵႃႈႁိုဝ် ၼႆၸိူဝ်းၼႆႉယဝ်ႉ။ ယိုင်ႈၶဝ် လႆႈႁူႉၸွမ်း၊ လႆႈတႅပ်းတတ်း ၸွမ်းလွင်ႈၸႂ်ႉၸၢႆႇငိုၼ်းတွင်းၸိူင်ႉၼႆ ၸဝ်ႉၸဝ်ႉ ၼိုင်ႈၶႅၼ်းလီ တႃႇၸူဝ်ႈပၢၼ်ၶဝ်ယဝ်ႉ။\n\nပေႃးၶဝ်ယႂ်ႇမႃး ထႅင်ႈဢိတ်းၼိုင်ႈၵေႃႈ ဢုပ်ႇဢူဝ်း တိူင်ႇပၢင်ႇၶဝ် လွင်ႈၵၢၼ်ၼႂ်းႁိူၼ်း ၼင်ႇၶဝ် ၵိုင်ႇလီႁူႉၼၼ်ႉ ၸိူင်ႉၼင်ႇ ပေႃးဝၼ်းလိုဝ်ႈ တေၵႃႇလႄႇတီႈလႂ် တေသဵင်ႈငိုၼ်းၵႃႈႁိုဝ် ၼႆၸိူဝ်းၼႆႉသေ ပၼ်ၶဝ်ဝူၼ်ႉ ပၼ်ၶဝ်မီးသုၼ်ႇ မီးတတ်းၼႂ်းၵၢၼ် ၸႂ်ႉၸၢႆႇငိုၼ်းတွင်းၽွင်ႈ။\n\nပေႃးဢႃႇယု ၶဝ်လႆႈမႃး မွၵ်ႈ 11 ပီႊၼႆႉတႄႉ လီသွၼ်ၶဝ် ႁႂ်ႈမေႃ ၸႂ်ႉၸၢႆႇ ၵႃႈၶဝ်ႈမုၼ်းၶဝ်ၼၼ်ႉယဝ်ႉ။ လီဢုပ်ႇဢူဝ်း သွၼ်ပၼ် လၢႆးၸႂ်ႉၸၢႆႇငိုၼ်း ​လႄႈ လွင်ႈႁွမ်ငိုၼ်း ၸိူဝ်းၼႆႉယဝ်ႉ။\n\nတီႈၼႆႉ လုၵ်ႈဢွၼ်ႇၸၢႆး လႄႈ လုၵ်ႈဢွၼ်ႇယိင်း ၸၢင်ႈမီးလွင်ႈပႅၵ်ႇပိူင်ႈၵၼ်၊ ပေႃႈမႄႈ ၵမ်ႈၽွင်ႈၼႆႉ ပၼ်ငိုၼ်းၸၢႆႇ လုၵ်ႈၸၢႆး ၼမ်လိူဝ် လုၵ်ႈယိင်း၊ လုၵ်ႈယိင်းသမ်ႉ လႆႈၸွႆႈၵၢၼ်ပေႃႈမႄႈ ၼမ်လိူဝ် လုၵ်ႈၸၢႆး ၼႆၸိူဝ်းၼႆႉ။ မိူၼ်ၼင်ႇ ၵၢၼ်သုၵ်ႉၶူဝ်း၊ ၵၢၼ်မိုဝ်ႉၶဝ်ႈႁုင်ၽၵ်း၊ ၵၢၼ်ပတ်းၽဵဝ်ႈ ၸိူဝ်းၼႆႉ ၵႆႉလႆႈႁၼ် လုၵ်ႈယိင်း လႆႈႁဵတ်းၼမ်လိူဝ် လုၵ်ႈၸၢႆး၊ ၸိူင်ႉၼႆ ဢမ်ႇထုၵ်ႇလီပဵၼ်၊ လီလႆႈဝႆႉ ၽဵင်ႇပဵင်းၵၼ်၊ ငိုၼ်းၸၢႆႇၵေႃႈ လီလႆႈပၼ် ၽဵင်ႇၽဵင်ႇၵၼ်။\n\nလူဝ်ႇ လႄႈ ၶႂ်ႈလႆႈ\n\nသွၼ်ၶဝ် ႁႂ်ႈမေႃ ၸႅၵ်ႇၽႄ ၶူဝ်းၶွင် ဢၼ်လူဝ်ႇ လႄႈ ဢၼ်ၶဝ်ၶႂ်ႈလႆႈ ၼၼ်ႉလႄႈ။ ပေႃးတေသိုဝ်ႉ ၶူဝ်းသေဢၼ်ဢၼ်ၼႆႉ သွၼ်ႁႂ်ႈၶဝ်မေႃဝူၼ်ႉဝႃႈ ဢၼ်လႂ် ၶဝ်လူဝ်ႇၸႂ်ႉတေႉတေႉ လႄႈ ဢၼ်လႂ် ပဵၼ်ဢၼ်ၶဝ်ၶႂ်ႈလႆႈ ၼႆၼၼ်ႉလႄႈ။ သွၼ်ႁႂ်ႈၶဝ် သိုဝ်ႉဢၼ်ၶဝ်လူဝ်ႇတေႉတေႉၼၼ်ႉ ဢွၼ်တၢင်းသေ ဢၼ်ၶႂ���ႈလႆႈၼၼ်ႉ ၸွင်ႇၵွႆႈသိုဝ်ႉပႃႈလိုၼ်းလႄႈ။ ပေႃးသွၼ်ပၼ်ၸိူင်ႉၼႆ ၶဝ်တေႁူႉ တေမေႃၸၢႆႇငိုၼ်းမႃး။ တေမေႃၸၢႆႇ ႁႂ်ႈမီးၽွၼ်းလီၼၼ်ႉၼႃႇ။\n\nၵၢၼ်ၸႂ်ႉၸၢႆ ငိုၼ်းတွင်းၼႆႉ ပဵၼ်လမ်ႇလွင်ႈလူင် ဢၼ်ၼိုင်ႈ ဢၼ်ၵူၼ်းႁဝ်း ၵူႈၵေႃႉ လူဝ်ႇလႆႈမေႃၼၼ်ႉယဝ်ႉ။ ယွၼ်ႉၼၼ် ၵၢၼ်ၽိုၵ်းသွၼ်ပၼ် လုၵ်ႈဢွၼ်ႇ ႁႂ်ႈမေႃၸႂ်ႉၸၢႆႇငိုၼ်း ႁႂ်ႈမီးၽွၼ်းလီတႃႇၶဝ် ၸဵမ်လဵၵ်ႉလဵၵ်ႉၼၼ်ႉၵေႃႈ ပဵၼ်ၵၢၼ်လမ်ႇလွင်ႈလူင်ဢၼ်ၼိုင်ႈယူႇယဝ်ႉ။"
+  },
+  {
+    "title": "ယုမ်ႉၼႄလႄႈ",
+    "content": "ပေႃးပိူၼ်ႈႁၼ်တၢင်းၽိတ်းႁဝ်းၼႆ ယုမ်ႉၼႄလႄႈ။\n\nဢမ်ႇဝႃႈ ၼႂ်းၵၢၼ်ငၢၼ်း၊  ဢမ်ႇဝႃႈ ၼႂ်းၼႃႈႁိူၼ်း တိုၼ်းတေလႆႈၺႃး ပိူၼ်ႈတၢင်ႇတၢင်းၽိတ်းႁဝ်းယူႇၵူၺ်း။\n\nမၢင်ပွၵ်ႈၵေႃႈ  ႁဝ်းၸၢင်ႊၽိတ်းတေႉတေႉယူႇ။ ၵူၺ်းၵႃႈ မၢင်ပွၵ်ႈ ႁဝ်းဢမ်ႇၽိတ်းသေ သမ်ႉလႆႈထုၵ်ႇမၢပ်ႇၼႄးဝႃႈ ၽိတ်းၼႆၵေႃႈ  တိုၼ်းတေမီး၊ တိုၼ်းတေလႆႈၺႃးယဝ်ႉ။ မၢင်ပွၵ်ႈမၢင်လႂ် ႁဝ်းတင်းဢမ်ႇႁူႉတူဝ်၊ ဢမ်ႇၽိတ်းသေဢိတ်းၵေႃႈ တေၸၢင်ႊၺႃး ပိူၼ်ႈမၢပ်ႇၼႄးသႂ်ႇဝႃႈ ႁဝ်းၽိတ်း ၼႆၵွၼ်ႇ။\n\nပေႃးထူပ်းၺႃး ၸိူင်ႉၼႆ ႁဝ်းၸၢင်ႊ ၸႂ်ဢမ်ႇလီ၊ ၸႂ်တူၵ်းၸိူဝ်းၼႆႉယဝ်ႉ။ ၵူၺ်းၵႃႈ ဢမ်ႇပဵၼ်သင်  ၶႂ်ႈယဝ်ႉလႃႈ  ၵၢၼ်ၸိူဝ်းၼႆႉ တေဢမ်ႇပႃးႁဵတ်းႁႂ်ႈ ၸူဝ်ႈပၢၼ်ႁဝ်း တူၵ်းတႅမ်ႇၵႂႃႇ။ ယွၼ်ႉဝႃႈ ၵူၼ်းႁဝ်းၼႆႉ မီးတီႈယူပ်ႈယွမ်း ႁင်းၽႂ်မၼ်းၵူႊၵေႃႉလူး။\n\nယွၼ်ႉဝႃႈ ၵူၼ်းၵူႊၵေႃႉၼႆႉ မီးတီႈယူပ်ႈယွမ်း ႁင်းၽႂ်မၼ်းလႄႈ  ၵူၼ်းၵမ်ႈၼမ်ၼမ်ၼႆႉ ဢမ်ႇႁတ်းလၢတ်ႈဢွၵ်ႇ၊ ၵူဝ်ပိူၼ်ႈႁၼ် လွင်ႈယူပ်ႈယွမ်းၶဝ်လႄႈ  တႃႇတေႁူမ်ႇတူမ်းလႆႈ လွင်ႈယူပ်ႈယွမ်းၶဝ်ၼၼ်ႉ ၶဝ်ၸင်ႇႁႃတၢင်ႇတၢင်းၽိတ်း သႂ်ႇပိူၼ်ႈယဝ်ႉ။\n\nပေႃးဢဝ်ၽူႈလႅင်ႉလႅၼ်ႇ ၽၢႆႇပၢႆးၸႂ်ၶဝ်ဝႃႈတႄႉ ၵူၼ်းၸိူဝ်း ႁႃတၢင်ႇတၢင်းၽိတ်းပိူၼ်ႈၼၼ်ႉ ပဵၼ်ၵူၼ်းၸိူဝ်းၵူၼ် ဢမ်ႇယုမ်ႇယမ် တူဝ်ၸဝ်ႈၵဝ်ႇ၊ ၽၢႆႇပၢႆးၸႂ်ၵေႃႈ ဢမ်ႇမီးလွင်ႈႁူမ်ႇလူမ်ႈ ၸိူဝ်းၼၼ်ႉ ၼႆယဝ်ႉ။\n\nတႃႇတေႁူမ်ႇတူမ်းလႆႈ  လွၵ်းၸုတ်ႈယွမ်းႁဝ်း၊ တၢင်းဢူၼ်ႈဢွၼ်ႇႁဝ်း၊ လွင်ႈဢမ်ႇတဵမ်ထူၼ်ႈႁဝ်းၸိူဝ်းၼၼ်ႉ ၸင်ႇလႄႇႁႃ တၢင်းယူပ်ႈယွမ်း ၵူၼ်းတၢင်ႇၵေႃႉသေ ၸီႉၼႄး တၢင်ႇတၢင်းၽိတ်းၶဝ် ၼႆယဝ်ႉ။ ပေႃးပိူၼ်ႈၵုမ်ႇ တူၺ်းႁၼ် တၢင်းယူပ်ႈယွမ်း တၢင်ႇၵေႃႉယူႇၸိုင် ပိူၼ်ႈတေဢမ်ႇတၼ်း ၶုၵ်းၸႂ်လႆႈတၢင်းယူပ်ႈယွမ်းႁဝ်းလႄႈ ၸင်ႇလႆႈႁဵတ်းၼႆ ၼႆယဝ်ႉ။\n\nယွၼ်ႉၼၼ် ပေႃးထူပ်းၺႃး လွင်ႈဢမ်ႇမိူၼ်ၸႂ် သေဢၼ်ဢၼ်ၸိုင်  လူဝ်ႇလႆႈဝူၼ်ႉတူၺ်းယဝ်ႉဝႃႈ တေႁႃ တၢင်းၽိတ်းပိူၼ်ႈႁႃႉ တေၶူၼ်ႉႁႃႉ ငဝ်ႈႁၢၵ်ႈပၼ်ႁႃႁႃႉ ၼႆ။\n\nၵူၼ်းႁဝ်းၼႆႉ ပေႃးမီးပၼ်ႁႃမႃး ၸၢင်ႈၵႂႃႇႁႃ တၢင်းၽိတ်းပိူၼ်ႈယဝ်ႉ၊ ၵူၺ်းၵႃႈ ၵႆႉလႄႇမီး ၵူၼ်းသေၵေႃႉၵေႃႉ ဢၼ်ဢမ်ႇႁႃ တၢင်းၽိတ်းၽႂ်သေ သိုပ်ႇႁဵတ်းၵၢၼ်မၼ်းၵႂႃႇတိၵ်းတိၵ်းၼၼ်ႉယူႇယဝ်ႉ။\n\nယွၼ်ႉၼၼ် ပေႃးၺႃးပိူၼ်ႈႁႃ တၢင်းၽိတ်းႁဝ်းၼႆ ၶတ်းၸႂ်ယုမ်ႉၼႄသေ လၢတ်ႈဝႃႈ ၸူမ်းယဝ်ႉၶႃႈ ၼႆသေလႄႈ။"
+  },
+  {
+    "title": "ၵူၼ်းၸၢႆးၸႅတ်ႇၸၢင်ႇ ဢၼ်ဝႃႈၼၼ်ႉ",
+    "content": "ၵူၼ်းၸၢႆးၼႆႉ ပေႃးၸႅတ်ႈၸၢင်ႇၼႆ တိုၼ်းပဵၼ်ၸိူင်ႉၼႆယဝ်ႉ။\n\nငိူဝ်ႈ၊ ၶၢၼ်ႉ၊ လႃႈလီႁဵတ်း၊ ႁၵ်ႉပိူၼ်ႈလိူဝ်တူဝ်ၵဝ်ႇ၊ ဢမ်ႇထွမ်ႇၵႂၢမ်းၽူႈယိင်း၊ ပဵၼ်ၵူၼ်းလူင်း တီႈႁိူၼ်း\n\nပေႃးၶႂၢၵ်ႈၵႂၢင်ႈၵႂၢင်ႈသေလၢတ်ႈတႄႉ။\n\nငိူဝ်ႈ။\n\nၵူၼ်းၸၢႆးၼႆႉ ၵမ်ႉၼမ်ၼမ် ၶဝ်ဢိူဝ်ႈၼႃႇ။ ငိူဝ်ႈၸိူင်ႉႁိုဝ်ၼႆ  ပေႃးၽူႈယိင်း ယွမ်ႉၶူၼ်တႃမႃး၊ ၵႂႃႇၵႅတ်းၶူၼ်ႁူဝ်မႃး ၸိူဝ်းၼႆႉ ၶဝ်ဢမ်ႇႁူႉ။ ယႃႇပေၵႂႃႇထၢမ်ၶဝ်ဝႃႈ ၸွင်ႇႁၢင်ႈလီမႃးႁိုဝ်ၼႆ။ တႃႇၶဝ်ၼႆႉ မိူဝ်ႈၶဝ်ႈၵႂႃႇ ၼႂ်းလၢၼ်ႉၵႅတ်းၶူၼ်ႁူဝ် လႄႈ မိူဝ်ႈဢွၵ်ႇမႃး မိူၼ်ၵၼ်ၵွႆး။ မၼ်းဢမ်ႇပိူင်ႈသင်။ ပေႃးထႃႁူဝ်လွမ်ႈသေ ဢွၵ်ႇလၢၼ်ႉမႃးၵွၼ်ႇ ၶဝ်ၸင်ႇတေႁူႉဝႃႈ မၼ်းပိူင်ႈၼႆ။\n\nၶဝ်ယၵ်ႉတူၺ်း သၢဝ်ႁၢင်ႈလီလီ ဢၼ်ဝႃႈၼၼ်ႉၵေႃႈ ၶဝ်တူၺ်းလၢႆလၢႆၵွႆး။ သၢဝ်ၵေႃႉၼၼ်ႉ တိုဝ်းၶႅပ်းတိၼ်ၸိူင်ႉႁိုဝ်၊ ပဵၼ်သီသင်ၼႆ ၶဝ်မႃႇႁူႉ။ မႃႇၾၢင်ႉတူၺ်း။ ပေႃးတူၺ်းၶၢဝ်ႇၵေႃႈ ၶဝ်တူၺ်းၶၢဝ်ႇၵွႆး သၢဝ်ဢွၼ်ႇ ဢၼ်လၢတ်ႈၶၢဝ်ႇၼၼ်ႉ ၼိုင်ႈသိူဝ်ႈသီသင်ၼႆ ၶဝ်မႃႇတၼ်းၶုၵ်းၸႂ်လႆႈတူၺ်း၊ မႃႇတွင်းႁေပွၵ်ႈ။\n\nပေႃးႁႂ်ႈၶဝ် ဢဝ်ၸႂ်သႂ်ႇၼိူဝ် ၵၢၼ်သွင်ဢၼ် မိူဝ်ႈလဵဝ်ၵၼ်ၼႆ ၶဝ်မႃႇမေႃႁဵတ်း။ ႁႂ်ႈၶဝ် လဵၼ်ႈၵဵမ်းသွင်ဢၼ် မိူဝ်ႈလဵဝ်ၵၼ်။  ႁုင်ၽၵ်းႁေ လဵၼ်ႈၵဵမ်းမိူဝ်ႈလဵဝ်ၵၼ် ၸိူဝ်းၼႆႉ ၶဝ်မႃႇမေႃႁဵတ်း။\n\nၶၢၼ်ႉ။\n\nၵူၼ်းၸၢႆးၼႆႉ ၶဝ်ၶၢၼ်ႉလိူဝ်ၸႂ်ယဝ်ႉ။ ၵူၼ်းမိူင်းဝၼ်းတူၵ်းၶဝ်ၼႆႉ ဢၼ်ၼွၼ်းၼိူဝ်  တင်ႇၼင်ႈသူဝ်ႇၽႃႇလႆႈႁိုင်ႁိုင်ၼၼ်ႉၵေႃႈ ပဵၼ်ၵူၼ်းၸၢႆးၵွႆး ၼႆဝႃႇ။ လၢၼ်ႉႁဵတ်း ၶိူင်ႈႁိူၼ်း ဢၼ်ၼိုင်ႈ ၶူင်သၢင်ႈတင်ႇၼင်ႈ ဢၼ်ၶႅမ်ႉၶႅမ်ႉမဵဝ်းၼိုင်ႈ။ တင်ႇၼင်ႈဢၼ်ၼႆႉ ၸိုဝ်ႈလိုဝ်းလင်ၵႂႃႇတေႉတေႉ။  ၸိုဝ်ႈတင်ႇၼင်ႈၼၼ်ႉ ၶဝ်သႂ်ႇဝႃႈ Lazy boy chair (တင်ႇၸၢႆးၶၢၼ်ႉ) ၼႆဝႃႇ။\n\nပေႃးပဵၼ်မဵဝ်းဢၼ်ၶဝ်ပႃးၸႂ်ၼၼ်ႉ​တႄႉ ႁဵတ်းဢမ်ႇယဝ်ႉဢမ်ႇဝၢႆးသေ ပေႃးပဵၼ်မဵဝ်းဢမ်���ႁဵတ်းဢမ်ႇလႆႈသေ ၵႃႈလႆႈႁဵတ်းၼၼ်ႉၵွႆးတႄႉ ၶဝ်ဢမ်ႇသူႈႁဵတ်းႁႂ်ႈၶိုတ်းၶၢဝ်းယၢမ်း။ ၵူၼ်းၸိူဝ်းဢၼ် ၸၢႆႇၵႃႈၼမ်ႉ၊ ၵႃႈၾႆး တူၵ်းလိုၼ်းၼႆႉ ၵႆႉပဵၼ်ၵူၼ်းၸၢႆး ဢၼ်ယူႇၵွႆးၵေႃႉလဵဝ်ၼၼ်ႉ ၼႆဝႃႇ။\n\nပေႃးၶႂ်ႈၸႂ်ႉႁႅင်းၵႂၢႆး ဢဝ်ၵိူဝ်ပၢႆးဢဝ်လႄႈ ၼင်ႇဝႃႈယဝ်ႉ ပေႃးၶႂ်ႈႁႂ်ႈၵူၼ်းၸၢႆး ႁဵတ်းၵၢၼ်သေသေဢၼ် ၶႅမ်ႉၶႅမ်ႉလႅပ်ႈလႅပ်ႈ လူဝ်ႇမီးဢၼ်ၸၼ်ၸႂ်ၶဝ်ယဝ်ႉ။\n\nယွၼ်ႉပိူဝ်ႈၶၢၼ်ႉလႄႈ\n\nတေလႃႈလီႁဵတ်း\n\nဢၼ်လႃႈလီႁဵတ်းၼၼ်ႉတႄႉ ယွၼ်ႉပိူဝ်ႈၶၢၼ်ႉၼၼ်ႉယဝ်ႉ။ တႃႇတေၶိုၼ်းပွၵ်ႈသေ ဢဝ်ၶူဝ်းသေမဵဝ်းမဵဝ်းတီႈႁိူၼ်းၼၼ်ႉ ၶဝ်ၶၢၼ်ႉၼႃႇ။ တႃႇလေလူင်းလၢင်ႈလူင်းလိၼ်သေ ဢဝ်သေမဵဝ်းၼၼ်ႉၵေႃႈ ၶဝ်ၶၢၼ်ႉၼႃႇ ယွၼ်ႉၼၼ်လႄႈ ၶဝ်တေလႃႈလီႁဵတ်း ၼင်ႇၵႃႈမီးၼၼ်ႉၵွႆး။\n\nပေႃးလွင်ႈၶၢၼ်ႉၼႆႉတႄႉ သုတ်းတီႈ တႃႇတေဝူၼ်ႉၵွႆးၶဝ်ယင်း ၶၢၼ်ႉဝူၼ်ႉၵွၼ်ႇယဝ်ႉ။ ဢမ်ႇဝူၼ်ႉဢမ်ႇသွၼ်ႇသင်သေ တေလႃႈလီႁဵတ်းၵႂႃႇယူႇယဝ်ႉ။\n\nၵူၼ်းၸၢႆးၵမ်ႈၽွင်ႈၼႆႉ ယွၼ်ႉၶၢၼ်ႉပႆလူင်းၶိုၼ်ႈလႆလႄႈ ဝႅၼ်တူၵ်းႁူးလႅင်းသေ  ၶႃႁၢၵ်း၊ ၶႃၵႅင်ႉၵႃႇၵေႃႈ မီးယဝ်ႉ။ ပေႃးဝႅၼ်တူၵ်းသုင် ၶႃၸၢင်ႈႁၢၵ်း၊ တေၸဵပ်း၊ တေၵႅင်ႉၼႆ ၽႂ်ၵေႃႈဝူၼ်ႉလႆႈယဝ်ႉ။ ၵူၺ်းၵႃႈ ၶၢၼ်ႉဝူၼ်ႉၼၼ်ႉၼႃႇ။\n\nမၢင်ပွၵ်ႈမၢင်လႂ်ၵေႃႈ  ၸူးတၢင်းၶၢၼ်ႉႁေ ႁဵတ်းၼႆၵေႃႈလႆႈယဝ်ႉ ၼႆႁေ လႃႈလီႁဵတ်းၵႂႃႇၵေႃႈမီးၼၼ်ႉၼႃႇ။\n\nႁၵ်ႉလိူဝ်သေ တူဝ်ၸဝ်ႈၵဝ်ႇ\n\nၵူၼ်းၸၢႆးၼိုင်ႈၵေႃႉၼႆႉ တိုၼ်းမီးဢၼ်ၶဝ်ႁၵ်ႉႁႅင်းၼႃႇၼၼ်ႉ ၼိုင်ႈမဵဝ်းၼၼ်ႉ ၸိူင်ႉၼင်ႇ ၵဵမ်း၊ လူတ်ႉၵႃး၊ ယၢမ်းမူင်း၊ ၵမ်ၸိုမ်း၊ ၵွင်ႈထႆႇ၊ လူတ်ႉထိပ်ႇ ၸိူဝ်းၼႆႉ တိုၼ်းမီးသေမဵဝ်းမဵဝ်းယူႇယဝ်ႉ။\n\nဢမ်ႇထွမ်ႇၵႂၢမ်းၽူႈယိင်း။\n\nထွမ်ႇၵႂၢမ်းၼၢင်းမေး ဢမ်ႇပဵၼ်ၽေး၊ ၵူၼ်းၸၢႆးၶႃလၢႆးသမ်းတိင်း ၽူႈယိင်းၸႂ်ႉပေႃးလႅၼ်ႈတႅင်ႇတႅင်ႇ ပေႃးၽႃႇမေႃႈၽႃႇဢႅင်ႇ ၼႆၸိူဝ်းၼႆႉ ပဵၼ်ၵႂၢမ်းဢၼ် ၽူႈၸၢႆးၶဝ် ယွၵ်ႇၵၼ်လဵၼ်ႈ တႃႇၵူၼ်းၸၢႆး ၸိူဝ်းၵူဝ်မေးၼၼ်ႉယဝ်ႉ။\n\nယွၼ်ႉၼၼ်လႄႈ ၵူၼ်းၸၢႆးၵမ်ႈၼမ်ၼႆႉ ဢမ်ႇသူႈထွမ်ႇၵႂၢမ်း ၽူႈယိင်းၶဝ်၊ ယွၼ်ႉမေးၼၢင်း၊ ၸူႉၸူဝ်းၶဝ် တိုၵ်းသူၼ်းလႄႈ ႁႂ်ႈပေႃးတိုၼ်းလဝ်ႈၵႂႃႇတေႉတေႉ (တိုတ်းၸူဝ်ႈၶၢဝ်းတႄႉ ဢမ်ႇသွၼ်ႇၼေႃႈ) ၼၼ်ႉ မႃႇလႃႈလီမီး။\n\nယွၼ်ႉၼၼ်လႄႈ ပေႃးၶႂ်ႈႁႂ်ႈၽူႈၸၢႆး ထွမ်ႇၵႂၢမ်းႁဝ်းၼႆႉ လူဝ်ႇမေႃႉၸႂ်ႉၺၢၼ်ႇ၊ လူဝ်ႇမေႃလၵ်းလႅမ်တေႃႇၶဝ်ၵွၼ်ႇ။ ႁဵတ်းသင်ႁဝ်းလၢတ်ႈၼႆႉ သူဢမ်ႇထွမ်ႇလႃႇ၊ သူတေဢမ်ႇလႆႈႁဵတ်းၸိူင်��ၼႆ ပေႃးၵႂႃႇလၢတ်ႈတေႃႇၶဝ်ၸိူင်ႉၼႆတႄႉ မိူၼ်ၵၼ်တင်း ၵႂႃႇသုမ်ၽိုၼ်းသုမ်းၾႆး တေႃႇၶဝ်ၵွႆးယဝ်ႉ။"
+  },
+  {
+    "title": "ၵိၼ်မၢၵ်ႇၵႅမ်ႈၶွင်ႇ ပႃးပိူၵ်ႇ",
+    "content": "မၢၵ်ႇၵႅမ်ႈၶွင်ႇ (မၢၵ်ႇ Apple) ၼႆႉ ပေႃးၵိၼ်ၼိုင်ႈဝၼ်းၼိုင်ႈလုၵ်ႈ မၼ်းပၼ်ၽွၼ်းလီ တႃႇၵူၼ်းႁဝ်းတေႉတေႉ။ ပိူၵ်ႇမၼ်းၶႅၼ်းၶိုၵ်ႉၶႅမ်ႉတႃႇပၢႆးယူႇလီလိူဝ် ၼိူဝ်ႉမၼ်းၵွၼ်ႇ။ ၵူၺ်းၵႃႈ ၵူၼ်းၵမ်ႈၼမ်ၼမ်သမ်ႉ ဢွၼ်ၵၼ်ပွၵ်ႇပႅတ်ႈပိူၵ်ႇမၼ်းယဝ်ႉသေ ၸင်ႇၵိၼ်။ ယွၼ်ႉၼၼ်လႄႈ  တေယွၼ်းၶႆႈၼႄဝႃႈ ပေႃးၵိၼ်မၢၵ်ႇၵႅမ်ႈၶွင်ႇ ပႃးပိူၵ်ႇမၼ်းၼႆ မီးၽွၼ်းလီၸိူင်ႉႁိုဝ် ၼႆၵွၼ်ႇ။\n\nမၢၵ်ႇၵႅမ်ႈၶွင်ႇၼႆႉ ပဵၼ်မၢၵ်ႇသႅၼ်းဢၼ် မီးထၢတ်ႈၵိူဝ် လႄႈ ထၢတ်ႈ (ၶႆ) မၼ်းဢေႇသေ သမ်ႉမီးထၢတ်ႈ ဝီႇတႃႇမိၼ်ႇၸီႇ (C) ၼမ် မဵဝ်းၼိုင်ႈယဝ်ႉ။ ယဝ်ႉၵေႃႈ Flavonoid ဢၼ်ပႃးၼႂ်းမၢၵ်ႇၵႅမ်ႈၶွင်ၼၼ်ႉ ၶိုၵ်ႉၶႅမ်ႉတႃႇ ပၢႆးယူႇလီတေႉတေႉ။ သင်ဝႃႈ ႁဝ်းၵွၵ်းပိူၵ်ႇမၼ်းပႅတ်ႈသေ ၵိၼ်ၼိူဝ်ႉတၢင်းၼႂ်းမၼ်းၼၼ်ႉၵွႆးၼႆၸိုင် Flavonoid ၼႆႉ တေယွမ်းလူင်းၵႂႃႇတင်းၼမ်တင်းလၢႆယဝ်ႉ။\n\nပေႃးၵိၼ်မၢၵ်ႇၵႅမ်ႈၶွင်ႇ ပႃးပိူၵ်ႇၼႆ မီးၽွၼ်းလီသင် ၸိူင်ႉႁိုဝ်\n\nၸၢင်ႊႁေႉၵင်ႈပၼ်  ၼင်ႇႁိုဝ်တေဢမ်ႇပဵၼ်တွင်ႉ၊ ၼင်ႇႁိုဝ် တေဢမ်ႇပဵၼ် လွင်ႈတၢင်းၵိၼ်ဢမ်ႇလႅဝ်လႅၵ်ႇ ၸိူဝ်းၼၼ်ႉ။\n\npectin ဢၼ်မီးၼႂ်းပိူၵ်ႇမၢၵ်ႇၵႅမ်ႈၶွင်ႇၼၼ်ႉ မၼ်းၸွႆႈထႅမ်ပၼ် ႁႂ်ႈတၢင်းၵိၼ်ၼႂ်းတွင်ႉႁဝ်းလႅဝ်လႅၵ်ႇ၊ ၸၢင်ႊႁဵတ်းႁႂ်ႈ ပႅၵ်ႇထီးရီးယႃး ဢၼ်မီးၼႂ်းတွင်ႉၼႂ်းသႆႈႁဝ်း ဢၼ်ႁဵတ်းၵၢၼ် တႃႇႁႂ်ႈတၢင်းၵိၼ်လႅဝ်လႅၵ်ႇၼၼ်ႉ မီးႁႅင်းမႃးလႄႈ ၸၢင်ႊႁေႉၵင်ႈလႆႈ တၢင်းပဵၼ်တွင်ႉၵႂႃႇတွင်ႉႁေႈ၊ တၢင်းပဵၼ်ဢၼ်ပဵၼ်ၸွမ်းၼႂ်းသႆႈႁဝ်းၼၼ်ႉယူႇယဝ်ႉ။\n\nထိင်းပၼ်ၼမ်ႉၼၵ်းတူဝ်ႁဝ်း\n\nၼႂ်းမၢၵ်ႇၵႅမ်ႈၶွင်ႇၼႆႉ မၼ်းပႃးဝႆႉထၢတ်ႈၼမ်ႉ တင်းၼမ် လႄႈ မၼ်းၸၢင်ႈထိင်းပၼ်ၼမ်ႉၼၵ်းတူဝ်ႁဝ်းၵွႆးဢမ်ႇၵႃး မၼ်းၸၢင်ႈႁဵတ်းႁႂ်ႈ ထၢတ်ႈမၼ်း ဢၼ်ႁွင်ႉဝႃႈ ၵူဝ်ႇလႅတ်ႈထလေႃး ၼႆၼၼ်ႉ ယွမ်းလူင်းၵႂႃႇၵွၼ်ႇ။\n\nႁဵတ်းႁႂ်ႈ ၺၢၼ်ႇ၊ ဢွၵ်းဢေႃႁဝ်းလီမႃး\n\nၸွမ်းၼင်ႇဢၼ်ၽူႈလူင်ႉလႅၼ်ႇၶဝ် ၶူၼ်ႉၶႂႃႉဝႆႉၼၼ်ႉတႄႉ လၢတ်ႈၼႄဝႆႉဝႃႈ ၸၢင်ႈႁႂ်ႈၺၢၼ်ႇလီမႃး ပိူင်ယႂ်ႇဢၼ်ထဝ်ႈၶဝ် ၵႆႉလိုမ်းၺၢၼ်ႇဢမ်ႇလီ ၸိူဝ်းၼႆႉၵေႃႈ ႁဵတ်းႁႂ်ႈလီမႃးၶိုၼ် းၼႆယဝ်ႉ။\n\nႁဵၻ်းႁႂ်ႈမၢၵ်ႇႁူဝ်ၸႂ် လီၶိုၼ်ႈမႃး\n\nၼႂ်းပိူၵ်ႇမၢၵ်ႇၵႅမ်ႈၶွင်ႇၼႆႉ မၼ်းမီးထၢတ်ႈဢၼ်တေ ႁဵတ်းႁႂ်ႈလိူတ်ႈႁဝ်းယွမ်းလူင်းၵႂႃႇၼၼ်ႉလႄႈ မၼ်းၸၢင်ႈယူတ်းယွမ်းပၼ် ၼင်ႇႁိုဝ်တေဢမ်ႇတၢႆၽၢၵ်ႇ 20 % ၵွႆးဢမ်ႇၵႃး ၸၢင်ႈၵႅတ်ႇၵင်ႈပၼ် ၼႂ်းသၢႆလိူတ်ႈပႃး။ လိူဝ်ၼၼ်ႉ မၼ်းလူတ်းယွမ်းပၼ်လႆႈ ထၢတ်ႈမၼ်း ဢၼ်ႁွင်ႉဝႃႈ ၵူဝ်ႇလႅတ်ႉထလေႃး ၼႆၼၼ်ႉလႄႈ ပဵၼ်တၢင်းၵမ်ႉထႅမ် တႃႇပၢႆးယူႇလီ မၢၵ်ႇႁူဝ်ၸႂ်ႁဝ်းတေႉတေႉ။\n\nၸၢင်ႈလူတ်းယွမ်းပၼ် ၼင်ႇႁိုဝ်တေဢမ်ႇပဵၼ်ယဵဝ်ႈဝၢၼ်\n\nပေႃးၵိၼ်မၢၵ်ႇၵႅမ်ႈၶွင်ႇၼႆ မၼ်းၸၢင်ႈၵုမ်းထိင်းပၼ် ထၢတ်ႈၸဵမ်ၼႂ်းလိူတ်ႈႁဝ်းလႄႈ ၵူၼ်းၵေႃႉဢၼ်ၵိၼ် မၢၵ်ႇၵႅမ်ႈၶွင်ႇ ၼိုင်ႈဝၼ်းၼိုင်ႈလုၵ်ႈၼႆႉ ဢမ်ႇသူႈပဵၼ်ယဵဝ်ႈဝၢၼ် ၼႆယဝ်ႉ။\n\nလိူဝ်ၼၼ်ႉ ၵူၼ်းၸိူဝ်းၵိၼ်မၢၵ်ႇၵႅမ်ႈၶွင်ႇပႃးပိူၵ်ႇၼၼ်ႉ ႁႅင်းၸင်ႈၶၢမ်ႇတူဝ်ၶဝ်ၶႅမ်ႉ၊ ႁေႉၵင်ႈပၼ် တၢင်းပဵၼ်ၸႂ်ၵပ်ႉ၊ လုပ်ႇ၊ ဢဵၼ် ၸိူဝ်းၼႆႉၵေႃႈ တေမီးႁႅင်း ၼႆယဝ်ႉ။\n\nYoung woman bites in a apple\n\" data-medium-file=\"https://hsenhu.files.wordpress.com/2020/06/gettyimages-469999547-1.jpg?w=300\" data-large-file=\"https://hsenhu.files.wordpress.com/2020/06/gettyimages-469999547-1.jpg?w=507\" src=\"https://hsenhu.files.wordpress.com/2020/06/gettyimages-469999547-1.jpg?w=507\" alt=\"\" class=\"wp-image-560\" width=\"785\" height=\"523\" srcset=\"https://hsenhu.files.wordpress.com/2020/06/gettyimages-469999547-1.jpg 507w, https://hsenhu.files.wordpress.com/2020/06/gettyimages-469999547-1.jpg?w=150 150w, https://hsenhu.files.wordpress.com/2020/06/gettyimages-469999547-1.jpg?w=300 300w\" sizes=\"(max-width: 785px) 100vw, 785px\" /> Young woman bites in a apple\n\n*မၢႆတွင်း ၵိၼ်မၢၵ်ႇၵႅမ်ႈၶွင်ႇပႃးပိူၵ်ႇၼႆႉ ၶႅမ်ႉတႃႇ ပၢႆးယူႇလီၼႆသေတႃႉ ထုၵ်ႇလီႁႃၵိၼ်မၢၵ်ႇၵႅမ်ႈၶွင်ႇ ဢၼ်ၽုၵ်ႇၸွမ်းလၢႆး သၽႃႇဝ ဢမ်ႇၼၼ်ႉ သုၵ်ႉလၢင်ႉ ႁႂ်ႈမၼ်းမူတ်းသႂ်လီလီ၊ ယႃႇႁႂ်ႈယႃႈသိတ်းမူင်ႈမႅင်းၵိုတ်းဝႆႉ  သုၵ်ႈလၢင်ႉၵဵင်ႈၵဵင်ႈသႂ်သႂ်ယဝ်ႉ ၸင်ႇၵိၼ်ၼၼ်ႉ လီလိူဝ်ပိူၼ်ႈယဝ်ႉ။\n\nမေႃယႃ Khine Phoo Ngon တႅမ်ႈသေ သႅၼ်ႁူႉ ပိၼ်ႇၽၢႆႇတႆးဝႆႉ။\n\nသင်ဝႃႈ လိၵ်ႈႁူဝ်ၼႆႉ မီးၽွၼ်းလီ၊ ပဵၼ်ပုၼ်ႉႁူႉ တႃႇသူၸဝ်ႈၼႆၸိုင် ၶႅၼ်းတေႃႈ သိုပ်ႇပိုၼ်ၽႄ  ပၼ်ႁႂ်ႈတႆးၵေႃႉ၊ ၵူၼ်းတၢင်ႇၵေႃႉ လႆႈလူလႆႈဢၢၼ်ႇၸွမ်း လႄႈ ႁႂ်ႈပဵၼ်ႁႅင်းၸႂ် တႃႇတေသိုပ်ႇပိၼ်ႇတႅမ်ႈမႃးထႅင်ႈသေၵမ်း။"
+  },
+  {
+    "title": "Face App ဢဝ်ၶေႃႈမုၼ်းသူၵႂႃႇမူတ်းယဝ်ႉ",
+    "content": "ဝူင်ႈဝၢင်ႈၼႆႉ လႆႈႁၼ်ႁၢင်ႈၵူၼ်းၸၢႆး လၢႆႈပဵၼ်ၵူၼ်းယိင်း၊ ၵူၼ်းယိင်းလၢႆႈပဵၼ်ၵူၼ်းၸၢႆး၊ ထဝ်ႈပဵၼ်ၼုမ်ႇ၊ ၼုမ်ႇပဵၼ်ထဝ်ႈ  လၢႆးလူင်ၵႂႃႇ ၼိူဝ်ၾဵတ်ႉပုၵ်ႉ၊ ဢွၼ်ၵၼ်ၸႂ်ႉ FaceApp သေ လၢႆႈႁဵတ်းပဵၼ်ၼၼ်ႉၼႃႇ၊ ၵူၺ်းၵႃႈ App ဢၼ်ၼႆႉ မၼ်းလၵ်ႉဢဝ်ၶေႃႈမုၼ်း ၸိူင်ႉၼင်ႇ ၶႅပ်းႁၢင်ႈ၊ ငဝ်းႁၢင်ႈသဵင် ၸဵမ်ၸိူဝ်းၼႆႉ လူၺ်ႈႁဝ်းဢမ်ႇတၼ်းႁူႉတူဝ် (တီႈတႄႉ ၼႂ်းၶေႃႈပၵ်းပိူင်ၶဝ်ၼၼ်ႉ ၶဝ်ယွၼ်းၶႂၢင်ႉယူႇ ၵူၺ်းၵႃႈ ဢမ်ႇသူႈမီးၽႂ်းဢၢၼ်ႇ လိၵ်ႈဢၼ်ၼၼ်ႉ) တင်းၼမ်ၼႆ ၸွင်ႇႁူႉၶႃႈၼႄႇ။\n\nFace App ၼႆႉ ႁဵတ်းႁိုဝ်လၵ်ႉဢဝ်ၶေႃႈမုၼ်းႁဝ်း။\n\nFaceApp (ဢႅပ်ႉဢၼ်လၢႆႈႁၢင်ႈ ၸၢႆးပဵၼ်ယိင်း၊ ယိင်းပဵၼ်ၸၢႆး၊ ၼုမ်ႇပဵၼ်ထဝ်ႈ၊ ထဝ်ႈပဵၼ်ၼုမ်ႇၼႆႉ) ပဵၼ်ၶမ်ႇပၼီႇ Wireless Lab  မိူင်းရတ်ႉသျႃး ၶဝ်ၶူင်သၢင်ႈဝႆႉ။ ပေႃးတေၸႂ်ႉတိုဝ်း ၾဵတ်ႉဢႅပ်ႉၼႆ မၼ်းတေယွၼ်းၶႂၢင်ႉ တႃႇၶဝ်ႈၸႂ်ႉတိုဝ်းလႆႈ ၵွင်ႈထႆႇ၊ တီႈသိမ်းဝႆႉ ၶႅပ်းႁၢင်ႈၸိူဝ်းၼႆႉ။ ပေႃးႁဝ်းဢမ်ႇပၼ်ၶႂၢင်ႉ မၼ်းၵေႃႈ ဢမ်ႇပၼ်ၸႂ်ႉ။\n\nလုၵ်ႉတီႈၼၼ်ႉသေ ႁဝ်းတေလႆႈ လူင်းၶႅပ်ႈႁၢင်ႈ ဢၼ်ႁဝ်းတေလၢႆႈၼၼ်ႉ ၼႂ်း Cloud Infrastructure၊ ၾဵတ်ႉဢႅပ်ႉၼႆႉ မၼ်းၸႂ်ႉတိုဝ်းဝႆႉ Cloud infra  တီႈ Google လႄႈ  Amazon ဝႆႉ။ လုၵ်ႉတီႈၼၼ်ႉသေ မၼ်းၸင်ႇလၢႆႈႁၢင်ႈႁဝ်းၼၼ်ႉလႆႈ။\n\nယွၼ်ႉၼၼ်ႉ ဢွၼ်တၢင်းသုတ်းၼႆႉ  မၼ်းတေသိမ်းဝႆႉ ၶႅပ်းႁၢင်ႈႁဝ်း၊ ပေႃးယဝ်ႉ ၶေႃႈမုၼ်းဢၼ်ႁဝ်းၶူၼ်ႉႁႃ ၼႂ်းၾဵတ်ႉဢႅပ်ႉ၊ မိူဝ်ႈႁဝ်းတေသျႄး ၶဝ်ႈၶႂ်း ၾဵတ်ႉပုၵ်ႉ၊ ၼႂ်းသိုဝ်ႇတူင်ႇဝူင်းၵူၼ်းၼၼ်ႉ မၼ်းတေၵဵပ်းသိမ်းဝႆႉ ၶေႃႈမုၼ်း ဢၵွင်ႉႁဝ်း ၸိူင်ႉၼင်ႇ ၸိုဝ်ႈသဵင်ႁဝ်း၊ ဢီးမေးႁဝ်း၊ မၢႆၾူၼ်း ဢၼ်ႁဝ်းသႂ်ႇဝႆႉ ၼႂ်းဢၵွင်ႉႁဝ်းၸိူဝ်းၼၼ်ႉ။\n\nလိူဝ်ၼၼ်ႉ မၼ်းတေသိမ်းဝႆႉ ၶေႃႈမုၼ်း ၶွမ်း၊ ၾူၼ်းႁဝ်း ၸိူင်ႉၼင်ႇ ႁဝ်းၸႂ်ႉၶွမ်းမဵဝ်းႁိုဝ်၊ ႁဝ်းၸႂ်ႉၾူၼ်းၸိူင်ႉႁိုဝ်၊ ၶွမ်ႇပၼီႇဢၼ်လႂ် ႁဵတ်းဢွၵ်ႇ၊ ပဵၼ်မေႃႇတႅၼ်ႇသင် ၸဵမ်ၸိူဝ်းၼႆႉ။\n\nတေသိမ်းဝႆႉ Google Advertising ID လႄႈ Apple ID information (တႃႇမႃးပိုၼ်ၽၢဝ်ႇၼႄႁဝ်း) ၊ သိမ်းဝႆႉ တွင်းဝႆႉဝႃႈ ႁဝ်းၸႂ်ႉတိုဝ်း  Browser မဵဝ်းႁိုဝ်၊ သိမ်းဝႆႉ IP Address လႄႈ တီႈယူႇႁဝ်း (Location)၊ ၶေႃႈမုၼ်း ဢၼ်ႁဝ်းၶဝ်ႈၼႂ်း ဝႅပ်ႉသၢႆႉ (Website Data) ၸဵမ်မိူဝ်ႈပႆႇၸႂ်ႉတိုဝ်းၾဵတ်ႉဢႅပ်ႉၼၼ်ႉၵေႃႈပႃး။\n\nမၼ်းတေဢဝ်ၵႂႃႇႁဵတ်းသင်\n\nငၢႆႈငၢႆႈၵွႆး မၼ်းၵေႃႈ တေဢဝ်ၵႂႃႇၶၢႆပၼ် တီႈၵူၼ်းဢၼ်ၶႂ်ႈလႆႈယဝ်ႉ။ ယဝ်ႉၵေႃႈ တေမႃးပိုၼ်ၽၢဝ်ႇ ၶူဝ်းၵႃႉၶူဝ်းၶၢႆ ၼႄႁဝ်း၊ ၶေႃႈမုၼ်းႁဝ်းၼၼ်ႉ ယွၼ်ႉမၼ်းသိမ်းဝႆႉ ၼႂ်း Google၊ Amazon  ၶဝ်ၸိူဝ်းၼႆႉလႄႈ ပိူၼ်ႈတေသွၵ်ႈႁႃလႆႈငၢႆႈငၢႆႈ (တႃႇႁႅၵ်ႇၵႃႇၶဝ်ၶႅၼ်းၸူမ်းယဝ်ႉ)။\n\nမွတ်ႇပႅတ်ႈၶေႃႈမုၼ်း ဢၼ်မၼ်းၵဵပ်းဝႆႉၼၼ်ႉလႄႈ\n\nဢွၼ်တၢင်းသုတ်း ၵႂႃႇတီႈ FaceApp ယဝ်ႉၵေႃႈ ၵႂႃႇတီႈ Settings icon ဢၼ်မီးႁိမ်းၶၢင်ႈ တၢင်းၼိူဝ်မၼ်းၼၼ်လႄႈ။ ယဝ်ႉၵေႃႈ ၶဝ်ႈၵႂႃႇၼႂ်း Support ယဝ်ႉၵေႃႈ တဵၵ်း Request cloud data removal > Delete သေမွတ်ႇပႅတ်ႈ ၶေႃႈမုၼ်းဢၼ်မၼ်းၵဵပ်းဝႆႉၸိူဝ်းၼၼ်ႉ (တေမွတ်ႇလႆႈမူတ်းမူတ်းၼႆတႄႉ ဢမ်ႇၼႄႉၼွၼ်းၶ��ႈ)။ ထႅင်ႈလၢႆးၼိုင်ႈၵေႃႈ ၶဝ်ႈၵႂႃႇ တီႈ faceapp.com/privacy-request-form ၼႆႉသေ ထႅမ်ၾွမ်ႇမၼ်းယဝ်ႉမွတ်ႇပႅတ်ႈၵေႃႈလႆႈယူႇ။\n\n*ႁႂ်ႈပဵၼ်ႁႅင်းၸႂ် တႃႇသိုပ်ႇတႅမ်ႈ တႃႇသိုပ်ႇသွၵ်ႈႁႃ ပိုၼ်ၽႄ တၢင်ႁူႉၸိူင်ႉၼႆထႅင်ႈၼၼ်ႉၼႃႇ ယႃႇလိုမ်း like၊ Share ၶႃႈၼႃႉ။"
+  },
+  {
+    "title": "မႄႈမၢၼ်းၶဝ် ယႃႇပေၵိၼ်ၼမ်ႉဝၢၼ်",
+    "content": "ၼၢင်းယိင်းၵမ်ႈၼမ်ၼမ်  တေဢွၼ်ၵၼ်တွင်းဝႆႉဝႃႈ ပေႃးပုမ်လူင်၊ မၢၼ်းၼႆ ဢမ်ႇထုၵ်ႇလီၵိၼ်လဝ်ႈ၊ ၵိၼ်ပီႇယႃႇ (တၢင်းၵိၼ်ဢၼ်ပႃးထၢတ်ႈ ဢႅဝ်းၵေႃးႁေႃး) ၼႆၵွႆး။ ၼင်ႇႁိုဝ် လုၵ်ႈဢွၼ်ႇၼႂ်းတွင်ႉ လႄႈ ၵေႃႉပဵၼ်မႄႈမၢၼ်း တေယူႇလီၵိၼ်ဝၢၼ်ၼၼ်ႉ ဢမ်ႇၸႂ်ႈဝႃႈ တေလႆဝႄႈ လဝ်ႈ၊ ပီႇယႃႇ ၵွႆး၊  ၼမ်ႉဝၢၼ် ၵေႃႈထုၵ်ႇလီဝႄႈပႃးယူႇ။\n\nမိူဝ်ႈတိုၵ်ႉမၢၼ်းယူႇၼၼ်ႉ ပေႃးၵိၼ်ၼမ်ႉဝၢၼ်ၼႆ ၸွင်ႇလွတ်ႈၽေးႁိုဝ်\n\nၽွင်းတိုၵ်ႉမၢၼ်းယူႇၼႆႉ ၵိၼ်ၼမ်ႉၼူမ်း၊ ၼမ်ႉမၢၵ်ႇမႆႉ ဢၼ်ဢဝ်မၢၵ်ႇမႆႉတေႉတေႉသေ ႁဵတ်းဝႆႉၼၼ်ႉ လီလိူဝ်ပိူၼ်ႈယဝ်ႉ။ ၽွင်းတိုၵ်ႉမၢၼ်းယူႇၼႆႉ တိုၼ်းဢမ်ႇထုၵ်ႇလီၵိၼ်  ၼမ်ႉဝၢၼ် ဢၼ်ပႃးသေႃႇတႃႇ လႄႈ ထၢတ်ႈၵၽဵင်း ၸိူဝ်းၼႆႉ၊ ၼမ်ႉဝၢၼ်  ၽိူမ်ႉထႅမ်ႁႅင်း (Energy  Drink) ၸိူဝ်းၼႆႉ တိုၼ်းထုၵ်ႇလီဝႄႈၵႆၵႆ။\n\nပေႃးမႆႈႁွၼ်ႉႁႅင်းမႃးၼႆႉ  တေဢွၵ်ႇၸႂ် ၶႂ်ႈၵိၼ်ၼမ်ႉဝၢၼ်မႃး၊ ၵူၺ်းၵႃႈ ပေႃးပဵၼ်လႆႈတႄႉ ယိူၼ်ႉဢဝ်လႄႈ ယႃႇပေၵိၼ်၊ ၽွင်းတိုၵ်ႉမၢၼ်းယူႇၼႆႉ ပေႃးၶႂ်ႈၵိၼ် ၼမ်ႉဝၢၼ်ၵတ်းၵတ်း ၼႆၵေႃႈ ႁဵတ်းၵိၼ် ၼမ်ႉမၢၵ်ႇမႆႉတေႉတေႉ ၸိူင်ႉၼင်ႇ ၼမ်ႉမၢၵ်ႇၽႃႈ၊ ၼမ်ႉမၢၵ်ႇဢုၼ် ၸိူဝ်းၼႆႉလီတီႈသုတ်းယဝ်ႉ။ ယွၼ်ႉသင်လႄႈ လႆႈႁၢမ်ႈ ဢမ်ႇပၼ်ၵိၼ် ၼမ်ႉဝၢၼ် ၽွင်းတိုၵ်ႉမၢၼ်းယူႇ ဢၼ်ဝႃႈၼၼ်ႉတႄႉ လူႇဢၢၼ်ႇတူၺ်းတၢင်းတႂ်ႈ ၼႆႉၶႃႈလႄႈ။\n\nၽွင်းတိုၵ်ႉမၢၼ်းယူႇၼႆႉ ပေႃးၵိၼ်ၼမ်ႉဝၢၼ်ၼႆ ၸၢင်ႊပဵၼ်သင်?\n\nၸၢင်ႊလႆႈၶၢမ်ႇ ၽွၼ်းႁၢႆႉ  ၵၽဵင်း\n\nၼမ်ႉၵူဝ်ႇၵႃႇၵူဝ်ႇလႃႇ (Cocacolar – ၼမ်ႉၶူၵ်ႉ) ၼၼ်ႉပႃးထၢတ်ႈၵၽဵင်းဝႆႉ။ ပေႃးၵိၼ်ယဝ်ႉၼႆ မိူၼ်ႁၢင်ႈၸိုၼ်ႈၸၢင်ႇပၢင်ႇသႂ်မႃးဝႆႉ။ ယွၼ်ႉဝႃႈ ထၢတ်ႈၵၽဵင်းၼၼ်ႉ ၽႅဝ်ၵႂႃႇၼႂ်းလိူတ်ႈႁဝ်း ဝႆးဝႆးလႄႈ ႁဝ်းၸင်ႇၸိုၼ်ႈၸၢင်ႇပၢင်သႂ်ၸိူင်ႉၼႆ။ ထၢတ်ႈၵၽဵင်းၼႆႉ မၼ်းဢမ်ႇပၼ်ႇႁွၼ်ႈယူႇ ၼႂ်းသၢႆလိူတ်ႈမႄႈမၢၼ်းၵွႆး မၼ်းၸၢင်ႊထိုင်ၵႂႃႇ တီႈလုၵ်ႈဢွၼ်ႇၼၼ်ႉယဝ်ႉ။\n\nထၢတ်ႈၵၽဵင်းၸိူဝ်းၼႆႉ ၵိၼ်ယဝ်ႉ ႁိုင် 11 ၸူဝ်ႈမူင်းၵေႃႈ မၼ်းတိုၵ်ႉမီးၼႂ်းသၢႆလိူတ်ႈႁဝ်းယူႇ။ လုၵ်ႈဢွၼ်ႇဢၼ်မီးၼႂ်းတွင်ႉမႄႈမၢၼ်းၼၼ်ႉၵေႃႈ မၼ်းလႆႈတိုၵ်းတေႃးပႅတ်ႈ ထ��တ်ႈၵၽဵင်းဢၼ်ၼႆႉ။ ယဝ်ႉၵေႃႈ ထၢတ်ႈၵၽဵင်းၼႆႉ မၼ်းတေႁဵတ်းႁႂ်ႈႁဝ်းၵမ်းၵမ်းၶႂ်ႈယဵဝ်ႈလႄႈ ထၢတ်ႈၼမ်ႉၼႂ်းတူဝ်ႁဝ်းတေႁႅင်ႈ။\n\nၽူႈလူင်ႉလႅၼ်ႇၶဝ်တႄႉ ပၼ်တၢင်းႁၼ်ထိုင်ဝႆႉဝႃႈ မႄႈမၢၼ်းၼိုင်ႈၵေႃႉၼႆႉ ၼိုင်ႈဝၼ်း ဢမ်ႇထုၵ်ႇလီၵိၼ် ထၢတ်ႈၵၽဵင်း ၼမ်လိူဝ် 200 မီႇလီႇၵရမ်ႇ ၼႆယဝ်ႉ။ ထၢတ်ႈၵၽဵင်းၼႆႉ မၼ်းၸၢင်ႊယႃႉတႃၼွၼ်းႁဝ်းလူႉလႄႈ ဢွၵ်းဢေႃႁဝ်းတေဢမ်ႇလႆႈလိုဝ်ႈ၊​ ၼိုင်ႈဝၼ်းၼႆႉ​ ပေႃးၵိၼ်ၵၽဵင်းၼမ်လိူဝ် 300 မီႇလီႇၵရမ်ႇၸိုင် ၸၢင်ႊတုမ်ႉတိူဝ်ႉပႃး လုၵ်ႈဢွၼ်ႇၼႂ်းတွင်ႉၵွၼ်ႇ ဝႃႈၼႆ။ ၼိုင်ႈဝၼ်းၼႆႉ သင်ဝႃႈၵိၼ်ၵၽဵင်း ၼမ်လိူဝ် 500 မီႇလီႇၵရမ်ႇ ၵႂႃႇၸိုင် ႁူဝ်ၸႂ်လုၵ်ႈဢွၼ်ႇၼႂ်းတွင်ႉၼၼ်ႉ တေတွတ်ႇဝႆး၊ တေထူၺ်ႈၸႂ်ဝႆး၊ ဢူၵ်းတေမႆႈ ၸိူဝ်းၼႆႉ ယွၼ်ႉၼၼ် ၽွင်းတိုၵ်ႉမၢၼ်းယူႇၼႆႉ ဢမ်ႇထုၵ်ႇလီၵိၼ် ၼမ်ႉဝၢၼ် ဢၼ်ပႃးထၢတ်ႈၵၽဵင်း။\n\nတေလႆႈၶၢမ်ႇ ၽွၼ်းႁၢႆႉ ယႃႈယႃ  ဢၼ်ႁဵတ်းႁႂ်ႈဝႆႉလႆႈႁိုင်ႁိုင်\n\nၼမ်ႉယႃယွမ်ႉသီ၊ ၼမ်ႉယႃ ဢၼ်ႁဵတ်းႁႂ်ႈတၢင်းၵိၼ်ဝႆႉလႆႈႁိုင်ႁိုင်ၼႆႉ ပေႃးဝႃႈတေႉမၼ်း တေႃႈၵူၼ်းယူႇလီယူႇၵေႃႈ ဢမ်ႇထုၵ်ႇလီၵိၼ်ၵွၼ်ႇ။ မၼ်းပဵၼ်ၽေး တႃႇၵူၼ်းႁဝ်း။ ၽွင်းတိုၵ်ႉမၢၼ်း ၽွင်းလူဝ်ႇလုမ်းလႃးပၢႆးယူႇလီ ႁႂ်ႈလီတီႈသုတ်းၼႆႉၶႅၼ်းၼႃႇယဝ်ႉ။ မၼ်းပဵၼ်ငၢႆႈလိူဝ်သေ ၵူၼ်းၸိူဝ်းယူႇလီယူႇၼၼ်ႉလူး။ ပေႃးၵိၼ်ထၢတ်ႈၸဵမ်းၼမ်ႁႅင်းၼႃႇၸိုင် ၼမ်ႉၼၵ်းတူဝ်ၵေႃႈ တေၶိုၼ်ႈ၊ ၸၢင်ႊပဵၼ်ယဵဝ်ႈဝၢၼ်၊ ၸၢင်ႊပဵၼ်တၢင်းပဵၼ် ဢၼ်ဢမ်ႇထၢင်ႇဢမ်ႇထိူမ်ၼၼ်ႉထႅင်ႈၵွၼ်ႇ။ ၸၢင်ႊတုမ်ႉတိူဝ်ႉ ၵၢၼ်ႁုၼ်ႈမုၼ်းၶိုၼ်ႈယႂ်ႇလုၵ်ႈဢွၼ်ႇထႅင်ႈ။ ၼမ်ႉယႃယွမ်ႉသီၼၼ်ႉ ၸၢင်ႊဢမ်ႇမႅၼ်ႈထၢတ်ႈ လုၵ်ႈဢွၼ်ႇၵွၼ်ႇ။\n\nၵႄႇလူဝ်ႇရီႇ ၸၢင်ႊၼမ်တိူဝ်းမႃး\n\nၽွင်းတိုၵ်ႉမၢၼ်းယူႇၼႆႉ ၸဵမ်မႄႈမၢၼ်း ၸဵမ်လုၵ်ႈဢွၼ်ႇ ၼႂ်းတွင်ႉၼၼ်ႉ လူဝ်ႇထၢတ်ႈဢႃႇႁႃႇရ ႁႂ်ႈမၼ်းၽဵင်ႇၵၼ်၊ ယွၼ်ႉၼၼ်ႉ ထုၵ်ႇလီဝႆႉၾၢင်ႉသေ ၵိၼ်တၢင်းၵိၼ်တၢင်းယႅမ်ႉတေႉတေႉ။ ပေႃးမႄႈမၢၼ်းလႆႈၵိၼ် တၢင်းၵိၼ် ဢၼ်မီး ဢႃႇႁႃႇရ ၽဵင်ႇၵၼ်ၵွၼ်ႇ လုၵ်ႈဢွၼ်ႇၼႂ်းတွင်ႉၵေႃႈ ၸင်ႇတေၶႅၼ်ႇၶႅင်ယဝ်ႉ။\n\nၼမ်ႉဝၢၼ်ၼႆႉ ပႃးၵႄႇလေႃႇရီႇယူႇဝႃႈၼႆသေတႃႉ တွၼ်ႈတႃႇလုၵ်ႈဢွၼ်ႇ တေႁုၼ်ႈမုၼ်းၶိုၼ်ႈယႂ်ႇၼၼ်ႉတႄႉ မၼ်းဢမ်ႇမီးၼမ်ႉၵတ်ႉသင်။ ပေႃးၵႄႇလေႃႇရီႇၼမ်ၵေႃႈ ယင်းၸၢင်ႊႁဵတ်းႁႂ်ႈလုၵ်ႈဢွၼ်ႇ ပီးလူၼ်ႉပီးလိူဝ်သေ ပဵၼ်တၢင်းပဵၼ်ဢၼ်ဢမ်ႇထၢင်ႇဢမ်ႇထိူမ်ၼၼ်ႉၵွၼ်ႇ။\n\nၼမ်ႉလႅမ်ႉ ဢၼ်မ��းၼႂ်းၼမ်ႉဝၢၼ်ၼၼ်ႉ မၼ်းဢမ်ႇၸႂ်ႈၼမ်ႉလႅမ်ႉ ဢၼ်တေႉတေႉမၼ်း၊ ၼင်ႇႁိုဝ် ၼမ်ႉလႅမ်ႉမၼ်းတေၶႅမ်ႉ၊ ၼင်ႇႁိုဝ် မၼ်းတေဝၢၼ်ၼၼ်ႉ ပိူၼ်ႈဢဝ် phosphoric acid သေ ၽိူမ်ႉထႅမ်သၢင်ႈဝႆႉ။ phosphoric acid မၼ်းႁဵတ်းႁႂ်ႈထၢတ်ႈ ၵႄႇသီႇယမ်ႇ ၼႂ်းလုပ်ႇၼႂ်းတူၵ်းလူင်းၵႂႃႇ။ ၽွင်းတိုၵ်ႉမၢၼ်းယူႇၼႆႉ ထၢတ်ႈၵႄႇသီႇ လူဝ်ႇမီးတဵမ်ထူၼ်ႈဝႆႉ။ ၼႆႉလွင်ႈယႂ်ႇတေႉတေႉ။\n\nၸၢင်ႊတုမ်ႉတိူဝ်ႉ ဢွၵ်းဢေႃ လုၵ်ႈဢွၼ်ႇ\n\nၸွမ်းၼင်ႇၶေႃႈၶူၼ်ႉၶႂႃႉၼၼ်ႉ လႆႈႁူႉဝႃႈ ပေႃးမႄႈမၢၼ်း ၵိၼ်ၵိူဝ်ဝၢၼ်ၼမ်ႁႅင်း၊ ၵိၼ်ၼမ်ႉဝၢၼ်ၼမ်ႁႅင်းၼႆၸိုင် ၸၢင်ႊႁဵတ်းႁႂ်ႈ ဢွၵ်းဢေႃလုၵ်ႈဢွၼ်ႇ ဢၼ်ၸၢင်ႊၵေႈလိတ်ႈပၼ်ႁႃၼၼ်ႉ ယွမ်းလူင်းၵႂႃႇ၊ ၵၢၼ်ႁဵၼ်းသွၼ် ​လႄႈ ၵၢၼ်လဵပ်ႈႁဵၼ်းၵေႃႈ တေတူၵ်းလူင်းၵႂႃႇ၊ ႁႅင်းတူင်ႉၼိုင်၊ ႁႅင်းတႃႇလၢတ်ႈၸႃ ၸိူဝ်းၼႆႉၵေႃႈ တေယွမ်းလူင်းၵႂႃႇ ၼႆယဝ်ႉ။"
+  },
+  {
+    "title": "ပေႃးဢမ်ႇတႆႈၾႆးလူတ်ႉၶိုင်ႈသေ ႁေႃႈၵၢင်ဝၼ်း တေၺႃးတၢမ်ႇၼႆဝဝႃႇ",
+    "content": "မိူဝ်ႈလိူၼ်မၢတ်ႈ 26 ဝၼ်းၼၼ်ႉ လုမ်းတႅၼ်းၽွင်း မိူင်းႁူမ်ႈတုမ် မၵ်းမၼ်ႈၵႂႃႇထႅင်ႈ မၢႆမီႈ ၵဵဝ်ႇၵပ်းၵၢၼ်ႁေႃႈလူတ်ႉၶိူင်ႈ ၼႂ်းမိူင်းႁူမ်ႈတုမ်မျၢၼ်ႇမႃႇ။\n\nတႃႇမၵ်းမၼ်ႈၶိုၼ်း မၢႆမီႈလူတ်ႉၵႃးဢၼ်မႂ်ႇၼႆႉ တၢမ်တူဝ်ၸွမ်ၸိုင်ႈ ၵေႃႉလူင်းလၢႆးမိုဝ်း မၵ်းမၼ်ႈႁဵတ်းပဵၼ်သၢၵ်ႈသေႇၵႂႃႇ ၼႆယဝ်ႉ။\n\nမၢႆမီႈၵၢၼ်ႁေႃႈလူတ်ႉၵႃး ဢၼ်လုမ်းတႅၼ်းၽွင်း မိူင်းႁူမ်ႈတုမ် မၵ်းမၼ်ႈၵႂႃႇ 106 ၶေႃႈၼၼ်ႉ မီးပႃး ၶေႃႈဢၼ်ၵဵဝ်ႇၵပ်း ၵၢၼ်ႁေႃႈၶိုင်ႈ ဢၼ်ၵူၼ်းမိူင်းႁူမ်ႈတုမ်ဢမ်ႇယၢမ်ႈႁဵတ်းမႃးသေပွၵ်ႈၼၼ်ႉ။\n\nမၢႆမီႈၼၼ်ႉတႄႉ ပေႃးႁေႃႈလူတ်ႉၶိူင်ႈၵၢင်ဝၼ်း တေလႆႈပိုတ်ႇၾႆးဢွၼ်ႇ လူတ်ႉၶိူင်ႈဝႆႉ၊ ႁေႃႈၵၢင်ၶမ်ႈၵေႃႈ တေလႆႈပိုတ်ႇၾႆးပႃး၊ လူတ်ႉၶိူင်ႈ တေလႆႈမီး  မၢၼ်ႇတႃႇတူၺ်း တၢင်းလင်မႃး ၼႆယဝ်ႉ။\n\nမိူဝ်ႈႁေႃႈလူတ်ႉၼၼ်ႉ ဢမ်ႇဝႃႈ ၵၢင်ၶမ်ႈ ႁိုဝ် ၵၢင်ဝၼ်း ပေႃးဢမ်ႇပိုတ်ႇၾႆးဢွၼ်ႇ လူတ်ႉၶိုင်ႈသေ ႁေႃႈၵႂႃႇၸိုင် တေၺႃး ၽၢႆႇၸဝ်ႈၼႃႈတီႈၶဝ် ၺွပ်းႁ​ေဢဝ်လိူင်ႈ ႁႂ်ႈပဵၼ်တၢင်းၵၢၼ်ၵႂႃႇ။ လိူဝ်ၼၼ်ႉ တေလႆႈတိုဝ်းမၢၵ်ႇႁူဝ်လူတ်ႉၶိူင်ႈသေ ၼဵပ်းသၢႆမၢၵ်ႇႁူဝ်လူတ်ႉၶိူင်ႈႁႂ်ႈမႅၼ်ႈၸွမ်းပိူင်၊ တီႈလူတ်ႉၶိုင်ႈၵေႃႈ တေလႆႈမီး မၢၼ်ႇတႃႇတူၺ်းတၢင်းလင် ႁႂ်ႈၸႅင်ႈလႅင်းသေဢမ်ႇၵႃး တေလႆႈမီးပႃး ၶိူင်ႈထိင်းမူၵ်ႇဢေႇသေႃး လူတ်ႉၶိုင်ႈထႅင်ႈ ၼႆယဝ်ႉ။\n\nပေႃးဢမ်ႇႁဵတ်းၸွမ်းပိူင်ၼႆ  တေၺႃးတၢမ်ႇငိုၼ်း ၼႆၶႃႈဝႃႇ။ ၵွပ်��ၼၼ် ပေႃးႁေႃႈလူတ်ႉၶိုင်ႈၸိုင် ဢမ်ႇဝႃႈ ၵၢင်ၶိုၼ်း၊ ၵၢင်ၶမ်ႈ ႁိုဝ် ၵၢင်ဝၼ်းၵေႃႈယဝ်ႉ တႆႈၾႆးတႅမ်ႇ လူတ်ႉၶိုင်ႈဝႆႉၵူႊၶၢဝ်းလႄႈ။"
+  },
+  {
+    "title": "ပေႃးဢမ်ႇၶႂ်ႈၸႂ်သုၵ်ႉၼႆ ယႃႇဝႆႉၸႂ်ပိယေႇႁိၼႆဝႃႇ",
+    "content": "ၽြႃးပဵၼ်ၸဝ်ႈ ယၢမ်ႈႁေႃးဝႆႉဝႃႈ ယႃႇပေဝႆႉ ၸႂ်ပိယေႇႁိသင်ၼႆယဝ်ႉ။  ၵူၺ်းၵႃႈ ၵူၼ်းႁဝ်းၼႆႉသမ်ႉ လွင်ႈၸႂ်ၸပ်း ၸႂ်ပႅၼ်း မီးၸႂ်ပိယေႇႁိၼႆႉ လႆႈၸႂ်ၼႃႇ။ ဢမ်ႇတတ်းလႆႈသေပွၵ်ႈ။ ၵွပ်ႈၼၼ်လႄႈ ၸင်ႇပဵၼ် တၢင်းမႆႈလူင်လၢင်ယူႇၼၼ်ႉယဝ်ႉ။ ပိယေႇႁိၼႆႉ မၼ်းႁဵတ်းႁႂ်ႈ ၵူၼ်းႁဝ်း လိူတ်ႇလွၼ်ႉႁွၼ်ႉမႆႈတေႉတေႉ။ ပေႃးဝႃႈ ၵူၼ်းၵေႃႉၼၼ်ႉ ပွႆႇၵဝ်ၵႂႃႇ၊ ႁဵတ်းလႆႈၼိူဝ်ၵၼ်ၸိူဝ်းၼႆႉၵေႃႈ ပဵၼ်တၢင်းမႆႈလူင်လၢင်ၵႂႃႇၼၼ်ႉယဝ်ႉ။ ယႃႇဝႃႈသင် တေႃႈၼင်ႇ ယူႇၸွမ်းၵၼ်ၵူၺ်းၵေႃႈ ယင်းပဵၼ်တၢင်းမႆႈ၊ ၶၢတ်ႇၵၼ် ၽၢတ်ႇၵၼ်ၵႂႃႇၵေႃႈ ပဵၼ်တၢင်းမႆႈၼၼ်ႉယဝ်ႉ။ ၵွပ်ႈၼၼ်လႄႈ ယွၼ်ႉၸႂ်ပိယေႇႁိၼႆႉသေ ၸၢင်ႊႁဵတ်းႁႂ်ႈ ၸႂ်ၵူၼ်းဢမ်ႇၸိုၼ်ႈသႂ်သေ ႁဵတ်းႁႂ်ႈမီးၸႂ်သုၵ်ႉသၵ်ႉလိူဝ်မႃးထႅင်ႈၼၼ်ႉယဝ်ႉ။\n\nမိူဝ်ႈႁဵတ်းၵၢၼ်ၵေႃႈ သမ်ႉလႆႈႁဵတ်းၸွမ်း ၵူၼ်းတင်းၼမ်၊ လႆႈသိူၵ်ႈသမ်ႇတေႃႇ ၵူၼ်းၼမ်လႄႈ ထၢတ်ႈၸႂ်ၵူၼ်းၵေႃႉ႞ တင်း ၵေႃႉ႞ၼႆႉ တႃႇတေမႃးငမ်ႇမႅၼ်ႈၵၼ်တင်း ၸႂ်ၸဝ်ႈၵဝ်ႇၼၼ်ႉ ဢမ်ႇငၢႆႈငၢႆႈသႄႈ။ ၵွပ်ႈၼၼ်လႄႈ ထိုင်ပေႃးလႆႈ ၸႂ်သုၵ်ႉယူႇၼၼ်ႉယဝ်ႉ။ ၶႂ်ႈယူႇယဵၼ်ယဵၼ်ႁင်းၵွႆးယူႇသေတႃႉ ဢမ်ႇလွတ်ႈၵၢင်းလႆႈ လွင်ႈသုၵ်ႉၸိူဝ်းၼၼ်ႉလူး။ ပေႃးဝႃႈ ဢမ်ႇလွတ်ႈၵၢင်းလႆႈၼႆၵေႃႈ ၵိူတ်ႇပဵၼ်မႃး တၢင်းမႆႈ၊ တၢင်းလိူတ်ႇ၊ တၢင်းႁွၼ်ႉလူင် ၼႂ်းၸႂ်ယဝ်ႉလႄႈ လႆႈၸႂ်သုၵ်ႉသၵ်ႉၵႂႃႇၼၼ်ႉၼႃႇ။\n\nၵူၼ်းၸိူဝ်းမီးတၢင်းယိူင်းဢၢၼ်း၊ ယိူင်းမၢႆ တႃႇၸၢတ်ႈပၢၼ်ၼၼ်ႉၵေႃႈ မိူဝ်ႈပႆႇႁွတ်ႈထိုင် ယိူင်းဢၢၼ်း၊ ယိူင်းမၢႆၼၼ်ႉ လႆႈလတ်းၽၢၼ်ႇ လွင်ႈမႆႈၸႂ်၊ လွင်ႈသုၵ်ႉၸႂ်ၸိူဝ်းၼႆႉမႃးတင်းသဵင်ႈယူႇ။ ႁဵတ်းသင်ၵေႃႈယဝ်ႉ၊ ႁူပ်ႉၵၼ်တင်းၽႂ်ၵေႃႈလီ ဢၼ်ပၼ်တၢင်းၵတ်းယဵၼ်တေႃႇ ၸဝ်ႈၵဝ်ႇၼႆႉ မီးဢေႇတေႉတေႉ။ ၵုမ်ႇလႆႈႁူပ်ႉလွင်ႈလိူတ်ႇ၊ လွင်ႈမႆႈလၢႆလၢႆၵွႆး။\n\nၸႂ်သုၵ်ႉယွၼ်ႉသင်ၵေႃႈလီ၊ ယွၼ်ႉၽႂ်ၵေႃႈယဝ်ႉ တီႈတူဝ်ၸဝ်ႈၵဝ်ႇၼႆႉ တိုၼ်းလူဝ်ႇမီးဝႆႉ ၾိင်ႈယၢမ်ႈ၊ ၶေႃႈတိုဝ်းၵမ် လီလီယူႇၼိုင်ႈလွင်ႈ။ ၸွမ်းၸႂ်ၵူၼ်းႁႅင်းသေ လႆႈၸႂ်သုၵ်ႉၵႂႃႇလႄႈ ဢၼ်ဢမ်ႇႁဵတ်းပၼ်ၸွမ်းၼင်ႇၵၢင်ၸႂ်ၶဝ်ၼၼ်ႉသေ ပွႆႇပႅတ်ႈဝႆႉၼၼ်ႉၵေႃႈ တႃႇတေႁဵတ်းၸိူင်ႉၼၼ် မီးလၢႆးတၢင်းမၼ်းတင်��ၼမ်ယူႇ။ လမ်ႇလွင်ႈသုတ်းတႄႉ လူဝ်ႇမီးတၢင်းႁတ်းႁၢၼ်ၵွႆး။ လၢႆးတၢင်းမၼ်းတႄႉ လူဝ်ႇတတ်းႁင်ၵေႃႈတတ်း၊ လူဝ်ႇယွမ်းသင်ၵေႃႈယွမ်း၊ လူတ်းပႅတ်ႈ တၢင်းလူဝ်ႇ၊ တၢင်းၶႂ်ႈလႆႈၶႂ်ႈပဵၼ်ၽွင်ႈသေ ႁဵတ်းၵႂႃႇ ဢၼ်လူဝ်ႇႁဵတ်း၊ လၢတ်ႈဢၼ်လူဝ်ႇလၢတ်ႈၵွႆး။ ပေႃးၼႆၸိုင် တေၵတ်းယဵၼ်လီ တွၼ်ႈတႃႇၸဝ်ႈၵဝ်ႇၼၼ်ႉယဝ်ႉ။\n\nပေႃးၸႂ်သုၵ်ႉမိူဝ်ႈၼႆႉၵေႃႈ တေလိူတ်ႇမႆႈမိူဝ်ႈၼႆႉယဝ်ႉ။ လွင်ႈတၢင်းလိူတ်ႇတၢင်းမႆႈၼၼ်ႉ ယႃႇပၼ်ယူႇၸွမ်းၸဝ်ႈၵဝ်ႇႁိုင်ႁိုင်လႄႈ။ ဢဝ်သတိသေ ထိင်းၶိုၼ်းၸဝ်ႈၵဝ်ႇႁႂ်ႈလႆႈလႄႈ။ ဢမ်ႇလႆႈလၢတ်ႈၵႂၢမ်းၼမ်ၵႃႊႁိုဝ်ၵေႃႈ မီးလွင်ႈၵတ်းယဵၼ်ၼမ်ၵႃႊၼၼ်ႉယဝ်ႉ။ ပေႃးလႆႈလၢတ်ႈၵႂၢမ်းၼႆ ပႅၵ်ႉသမ်ႉဝႃႈ ၸဝ်ႈၷဝ်ႇ မီးလွင်ႈၵတ်းယဵၼ်ယူႇသေတႃႉ ယွၼ်ႉၶေႃႈၵႂၢမ်းၵူၼ်းၵေႃႉဢၼ်လၢတ်ႈတေႃႇသူၼၼ်ႉသေ တေၸၢင်ႊပႃးမႃး ၶေႃႈၵႂၢမ်း ဢၼ်မီးလွင်ႈလိူတ်ႇမႆႈၼၼ်ႉယဝ်ႉ။ ပေႃးပဵၼ်ၼၼ်မႃးၸိုင် တေလႆႈၸႂ်သုၵ်ႉသၵ်ႉၸွမ်းၼၼ်ႉယဝ်ႉ။\n\nယွၼ်ႉၼၼ် တေလႆႈဝႄႈ လွင်ႈလၢတ်ႈၵႂၢမ်းၼမ်ၼၼ်ႉယဝ်ႉ။ ဝႄႈလႆႈၵႃႊႁိုဝ်ၵေႃႈ ၶတ်းၸႂ်ဝႄႈလႄႈ။ ၼင်ႇႁိုဝ် ၸႂ်တေၼိမ်ၼၼ်ႉ ၶတ်းၸႂ်လႄႈ ထုၵ်ႇလီၸႂ်ၶၢဝ်းယၢမ်းၵေႃႈ ပၼ်ၶၢဝ်းယၢမ်းသေ ႁဵတ်းၵႂႃႇလႄႈ။ လွင်ႈလွၵ်ႇငိူတ်ႈလူင် ၼႂ်းမိူင်းၵူၼ်းၼႆႉတႄႉ ၵူၼ်းၵေႃႉၵေႃႉ တိုၼ်းတေလႆႈႁူပ်ႉၺႃးယဝ်ႉ။ ပဵၼ်မုၼ်ၸဝ်ႈၵေႃႈလီ ပဵၼ်ၵူၼ်းၵေႃႈယဝ်ႉ သင်ဢမ်ႇယွမ်းလႆႈ တၢင်းလူဝ်ႇလေႃးၽၸိုင် တိုၼ်းတေမီးတၢင်းလိူတ်ႇ တၢင်းမႆႈယူႇသေ ပဵၼ်လွင်ႈၸႂ်သုၵ်ႉယူႇတႃႇသေႇၼၼ်ႉယဝ်ႉ။ ၵွပ်ႈၼၼ် ထုၵ်ႇလီမီး ၵၢၼ်ဢၼ်တေၸၢင်ႊႁဵတ်းႁႂ်ႈ ၸႂ်ၸဝ်ႈၵဝ်ႇၼိမ်ၼၼ်ႉ ၼိုင်ႈလွင်ႈယူႇယဝ်ႉ။\n\nဢွင်ႈတီႈၼွၼ်း၊ ဢွင်ႈတီႈယူႇၸဝ်ႈၵဝ်ႇၸိူဝ်းၼႆႉ ႁဵတ်းႁႂ်ႈမီးလွင်ႈမူတ်းသႂ်ယူႇတႃႇသေႇလႄႈ။ ယဝ်ႉၵေႃႈ ၶတ်းၸႂ် ႁႂ်ႈၸႂ်ၼိမ်ယူႇၵူႊၶၢဝ်းလႄႈ။ လွင်ႈမူၼ်ႈသိူဝ်းၸူဝ်ႈၵႅပ်ႉၵမ်းၼႆႉ ဢမ်ႇၸၢင်ႊပၼ်ၽွၼ်းလီသင် တႃႇႁဵတ်းႁႂ်ႈၸႂ်ၼိမ်လႄႈ ပေႃးဝႄႈလႆႈၵေႃႈ ၶတ်းၸႂ်ဝႄႈပႅတ်ႈၼၼ်ႉ လီတီႈသုတ်းယဝ့်။ ယႃႇပေႁႂ်ႈ မီးလွင်ႈၸႂ်ၸပ်း ၸႂ်ပႅၼ်းၼိူဝ်ၽႂ်ၼၼ်ႉ ၶႅမ်ႉတီႈသုတ်းယဝ်ႉ။\n\nၶတ်းၸႂ်ဢဝ်ၶၢဝ်းယၢမ်းယူႇၵေႃႉလဵဝ်ၼမ်ၼမ်သေ ထတ်းသၢင်ၶိုၼ်း ၸၢတ်ႈပၢၼ်ၸဝ်ႈၵဝ်ႇလႄႈ။ ပေႃးယူႇၸိူင်ႉႁိုဝ်ၸိုင် တေလူတ်းလႆႈ တၢင်းလိူတ်ႇလွၼ်ႉႁွၼ်ႉမႆႈလူင်ၼၼ်ႉ။ ယွၼ်ႉသင်လႄႈ မီးလွင်ႈမႆႈ၊ ပေႃးႁူႉလွင်ႈတၢင်းမၼ်းယဝ်ႉၸိုင် ယႃႇပေသိုပ်ႇႁဵတ်းထႅင်ႈယဝ်ႉ။ လိူဝ်သေလွင်��ၸဝ်ႈၵဝ်ႇယဝ်ႉ ယႃႇပေၶတ်းၸႂ် ၵႂႃႇၸွပ်ႇႁူႉၸွပ်ႇႁၼ် ၶဝ်ႈသုၵ်ႉပႃး လွင်ႈပိူၼ်ႈ။\n\nဢၼ်ႁူႉယူႇလွင်ႈ႞တႄႉ ပေႃးဢမ်ႇၶႂ်ႈလႆႈသင်၊ ဢမ်ႇမီးၸႂ်တိတ်းၸပ်းသင်တႄႉ လွင်ႈၵတ်းယဵၼ်ၼႆႉ တိုၼ်းမီးၼႆၼၼ်ႉယဝ်ႉ။ ၵူၺ်းသင်ဝႃႈ ၸဝ်ႈၵဝ်ႇႁူဝ်ၶႅင်သေ ဢမ်ႇယွမ်းပႅတ်ႈ လွင်ႈၶႂ်ႈလႆႈၶႂ်ႈပဵၼ်၊ ဢမ်ႇလူတ်းပႅတ်ႈ မႃႇၼၸဝ်ႈၵဝ်ႇ၊ ၸႂ်ပိယေႇႁိၸိူဝ်းၼႆႉတႄႉ လွင်ႈမႆႈၼႆႉ တိုၼ်းတေဢမ်ႇၵၢင်းယၢၼ်ၸဝ်ႈၵဝ်ႇၵႂႃႇတၢင်းလႂ်ၼၼ်ႉယဝ်ႉ။ သင်ဝႃႈ ၸဝ်ႈၵဝ်ႇၼႆႉ ႁူဝ်ၵေႃႈၶႅင်၊ ဝူၼ်ႉဝႃႈ ၸဝ်ႈၵဝ်ႇႁဵတ်းၼႆႉ မၼ်းၸိုဝ်ႈမၼ်းၸႂ်ႈ၊ ဢမ်ႇယွမ်းမႃႇၼၸဝ်ႈၵဝ်ႇၼႆၸိုင် ဢမ်ႇၸႂ်ႈဝႃႈ မႆႈဢေႇဢေႇၵွႆး မၼ်းတေမႆႈထိုင် ၵူၼ်ႈမေႃႈငရၢႆးပုၼ်ႉၼႆ ယႃႇလိုမ်းလႃးလႃး။"
+  },
+  {
+    "title": "မႆႈႁႅင်းၼႃႇႁႃႉ ၽုၵ်ႇတူၼ်ႈမႆႉတူၼ်ႈတွၵ်ႇလႄႈ",
+    "content": "မိူဝ်ႈလဵဝ် ၾိင်ႈၾႃႉၵေႃႈ လႅၵ်ႈလၢႆႈ၊ ၵူၼ်းၵေႃႈ တတ်းပႃႇမႆႉ၊ ၸုတ်ႇ၊ ၽဝ်ပႃႇထိူၼ်ႇၸိူဝ်းၼႆႉတိၵ်းတိၵ်းလႄႈ လုမ်ႈၾႃႉလူင်ႁဝ်းၼႆႉၵေႃႈ ပဵၼ်လွႆႁူဝ်လွမ်ႈၵႂႃႇသေ လိူတ်ႇလွၼ်ႉႁွၼ်ႉမႆႈမႃးၵူႊမိုဝ်ႉၵူႊဝၼ်း။\n\nယွၼ်ႉၼၼ် ၼင်ႇႁိုဝ်တေဢမ်ႇမႆႈ လႄႈ ၶဵင်ႇတႃႉၵၼ်တင်း တၢင်ႉႁႅင်းမႆႈၼၼ်ႉ ဢွၼ်ၵၼ်ၽုၵ်ႇပၼ်တူၼ်ႈမႆႈတူၼ်ႈတွၵ်ႇ ဢၼ်ၸၢင်ႊပၼ်လႆႈ ႁူမ်ႈၽူၺ်း တႃႇႁဝ်းၼင်ႈလိုဝ်ႈႁိူဝ်ႉလိုဝ်ႈၸႂ် တႂ်ႈမၼ်း၊ လိူဝ်ၼၼ်ႉ ၽုၵ်ႇပႃး တူၼ်ႈမွၵ်ႇ၊ တူၼ်ႈယႃႈယႃ ၸိူဝ်းမီးသီၶဵသ်ၸိူဝ်းၼႆႉသေ တေႃႇသူႈ ႁႅင်းမႆႈ ဢၼ်ပၼ်တၢင်းလိူတ်ႇလွၼ်ႉ လုမ်ႈၾႃႉၼၼ်ႉၵႂႃႇလႄႈ။ 🌵🌵🌵🌵🌵🌵🌵🌵🌵🌵🌵\n\nသင်ဝႃႈ ၽုၵ်ႇပၼ်တူၼ်ႈဝၢၼ်လိၼ်ႉငိူၵ်ႈ ႁိုဝ် ဝၢၼ်ၾႆးမႆႈၵေႃႈ ၸၢင်ႊႁဵတ်းႁႂ်ႈ တၢင်ႉႁႅင်းမႆႈ လူတ်းလူင်းၵႂႃႇၼမ်တေႉတေႉယူႇ။ လိူဝ်ၼၼ်ႉ တူၼ်ႈဝၢၼ်လိၼ်ႉငိူၵ်ႈၼႆႉ မၼ်းၸၢင်ႊၸုပ်ႇဢဝ်ပၼ် ႁႅင်းမႆႈလႄႈ ႁဵတ်းႁႂ်ႈၼႂ်းႁိူၼ်းၼႂ်းယေး မီးလွင်ႈၵတ်းယဵၼ်လီ ၼႆယဝ်ႉ။\n\nတူၼ်ႈဝၢၼ်လိၼ်ႉငိူၵ်ႈၼႆ့ ပႅၵ်ႉသမ်ႉဝႃႈ ဢမ်ႇမီးသူၼ်ၵႂၢင်ႈၵႂၢင်ႈၵေႃႈ ၸၢင်ႊၽုၵ်ႇလႆႈယူႇ။ ဝၢၼ်လိၼ်ႉငိူၵ်ႈၼႆႉ ၸၢင်ႊၸုပ်ႇဢဝ်တၢင်ႉႁႅင်းမႆႈပၼ်သေဢမ်ႇၵႃး ၸၢင်ႊႁေႉၵင်ႈပၼ်လႆႈ ယႃႇႁႂ်ႈၵူၼ်းၼႂ်းႁိူၼ်းၼႂ်းယေး သုတ်ႇမႅၼ်ႈၺႃး သႅဝ်ဢၢႆ ဢၼ်ၸၢင်ႊပဵၼ်ၵွင်ႉၼၼ်ႉထႅင်ႈၵွၼ်ႇ ၼႆယဝ်ႉ။\n\nလိူဝ်ၼၼ်ႉ သင်ဝႃႈ ၼႂ်းဝၢင်းႁိူၼ်းၸဝ်ႈၵဝ်ႇၼၼ်ႉ မီးဢွင်ႈတီႈလိၼ်ပဝ်ႇၼႆၸိုင် ယႃႇပေဢဝ်ႁိၼ် ဢဝ်သၢႆးသေ သိူဝ်ႇပႅတ်ႈပိူင်တၢႆမူတ်း။ တႅၼ်းတီႈတေသိူဝ်ႇပႅတ်ႈၸိူင်ႉၼၼ် ပေႃးၽုၵ်ႇတူၼ်ႈယိူဝ်ႈယႃႈပၼ်ၸိုင် ၸၢင်ႊႁဵတ်းႁႂ်ႈ တၢင်ႉႁႅင်းမႆႈယွမ်းလူင်းၵွႆးဢမ်ႇၵႃး ၸၢင်ႊၽိူမ်ႉပၼ်ၶိုၼ်း ထၢတ်ႈၼမ်ႉတႂ်ႈလိၼ်ထႅင်ႈၵွၼ်ႇ ၼႆယဝ်ႉ။\n\n#လူတ်းယွမ်းၵၢၼ်ၸႂ်ႉတိုဝ်း ဢႄးၵႂၼ်း (ၶိူင်ႈၾႆးၾႃႉလႄႈ)၊ ၽုၵ်ႇပၼ်တူၼ်ႈမႆႈလႄႈ ပေႃးၼၼ်ၸိုင် တေၸွႆႈထိင်းသိမ်း သၽႃႇဝသိင်ႇဝႅတ်ႉလွမ်ႉၵွႆးဢမ်ႇၵႃး တေႁဵတ်းႁႂ်ႈ လုမ်ႈၾႃႉႁဝ်းၵတ်းယဵၼ်ၶိုၼ်ႈမႃးလိူဝ်ၵဝ်ႇၵွၼ်ႇ။"
+  },
+  {
+    "title": "ၽၵ်းမီႇၽိူၵ်ႇ မီးၽွၼ်းလီတႃႇ တၢင်းပဵၼ်ႁူဝ်ၸႂ် ၸိူင်ႉႁိုဝ်",
+    "content": "ပေႃးၵိၼ်ပၼ် ၽၵ်းမီႇၽိူၵ်ႇၼႆ ၸၢင်ႊပဵၼ်ၽွၼ်းလီတႃႇ ပၢႆးယူႇလီလႄႈ ၸၢင်ႊႁဵတ်းႁႂ်ႈ တၢင်းပဵၼ်ၵဵဝ်ႇၵပ်းႁူဝ်ၸႂ် ၸိူဝ်းၼႆႉ လူတ်းလူင်းၵႂႃႇတေႉတေႉၼႆယဝ်ႉ။\n\nၸုမ်းလုၵ်ႈႁဵၼ်းၽၢႆႇၶူၼ်ႉၶႂႃႉၶဝ်တႄႉ လဵပ်ႈႁဵၼ်းႁၼ်ဝႆႉလႄႈ ဢဝ်ၽွင်ၽၵ်းမီႇၽိူၵ်ႇ၊ မၼ်းၽၵ်းမီႇၽိူၵ်ႇၸိူဝ်းၼႆႉ ပၼ်ၵူၼ်းၸိူဝ်းမီးတၢင်းပဵၼ် ၵဵဝ်ႇၵပ်းႁူဝ်ၸႂ်ၼၼ်ႉၵိၼ်သေ လႆႈဝႃႈတၢင်းပဵၼ်ၵေႃႈ ၶႅၼ်းၵႂႃႇယူႇၼႆယဝ်ႉ။\n\nၽူႈလဵပ်ႈႁဵၼ်း ၽၢႆႇၵၢၼ်ၶူၼ်ႉၶႂႃႉ လွင်ႈပၢႆးယူႇလီၶဝ်တႄႉလၢတ်ႈဝႆႉဝႃႈ ပေႃးဢဝ်တၢင်းၵိၼ်ဢၼ်ပႃး ၽၵ်းမီႇၽိူၵ်ႇၼၼ်ႉ ၼိုင်ႈဝၼ်းလႂ် 300 တေႃႇ 900 မီႇလီႇၵရႅမ်ႇ လဵင်ႉပၼ် ၵူၼ်းမီးတၢင်းပဵၼ်လိူတ်ႈသုင် (တူၺ်းတူဝ်း) ၼၼ်ႉၸိုင် တၢင်းပဵၼ်ၼႆႉၵေႃႈ ၸၢင်ႊၶႅၼ်းၵႂႃႇၵမ်ႈၽွင်ႈ ၼႆယဝ်ႉ။"
+  },
+  {
+    "title": "လိူၼ်ၵျူႇလႅင်ႇ 21 ဝၼ်းၼႆႉ တေပိုတ်ႇၶိုၼ်းႁူင်းႁဵၼ်းယဝ်ႉ",
+    "content": "ပေႃးထိုင်လိူၼ်ၵျူႇလႅင်ႇ 21 ဝၼ်းမႃး တေပိုတ်ႇၶိုၼ်း ႁူင်းႁဵၼ်းၸၼ်ႉသုင် ဢွၼ်တၢင်းသေ ဝၢႆးလင်ၼၼ်ႉထႅင်ႈသွင်ဝူင်ႈ ဢိင်ၼိူဝ်ငဝ်းလၢႆးယဝ်ႉ ၸင်ႇပိုတ်ႇၶိုၼ်း ႁူင်းႁဵၼ်းၸၼ်ႉၵၢင် လႄႈ ၸၼ်ႉဢွၼ်ႇ ၼႆယဝ့်။\n\nမိူဝ်ႈတႄႇ ထၢၼ်ၽွင်းလူင် ၽၢႆႇပၢႆးပၺ်ႇၺႃႇၶဝ် ႁၢင်ႈႁႅၼ်းဝႆႉ တႃႇတေ တႄႇပိုတ်ႇတီႈ ႁူင်းႁဵၼ်းၸၼ်ႉဢွၼ်ႇဢွၼ်တၢင်းသေတႃႉ ယွၼ်ႉၶေႃႈၼႄႉၼမ်း ၽူႈၵိူဝ်းၵုမ်ၸိုင်ႈမိူင်းလႄႈ ၸင်ႇလႆႈႁၢင်ႈႁႅၼ်းတႃႇပိုတ်ႇႁူင်းႁဵၼ်းၸၼ်ႉသုင် ဢွၼ်တၢင်း ႁူင်းႁဵၼ်းၸၼ်ႉဢွၼ်ႇ ၼႆယဝ်ႉ။\n\nၵဵဝ်ႇလူၺ်ႈလွင်ႈၼႆႉသေ ၵႅမ်ၶုၼ်ၵွၼ်း ႁွင်ႈၵၢၼ်ၽၢႆႇပၢႆးပၺ်ႇၺႃႇ တွၵ်ႇတႃႇတိၼ်ႇမွင်ႇဝိၼ်း လၢတ်ႈၼႄဝႆႉဝႃႈ “လုၵ်ႉတီႈ ၵေႃႇမတီႇငဝ်ႈငုၼ်းႁေ ဢွၵ်ႇၶေႃႈၸီႉသင်ႇမႃးယဝ်ႉ ဝႃႈႁႂ်ႈပိုတ်ႇ ၼႂ်းဝၼ်းတီႈ 21 လိူၼ်ၵျူႇလႅင်ႇၼႆ။ ယဝ်ႉၵေႃႈ ၼႂ်းၼၼ်ႉ ၸီႉသင်ႇလူင်းမႃးထႅင်ႈဝႃႈ ႁႂ်ႈတႄႇပိုတ်ႇတီႈ ႁူင်းႁဵၼ်းၸၼ်ႉသုင်ဢွၼ်တၢင်းၼႆထႅင်ႈယူႇ။ ယွၼ်ႉဝႃႈ လုၵ်ႈႁဵၼ်းၸိူဝ်းၶိုၼ်ႈ ႁူင်းႁဵၼ်းၸၼ်ႉသုင်ၼႆႉ မီးဢေႇလိူဝ် လုၵ်ႈႁဵၼ်းၸၼ်ႉဢွၼ်ႇလႄႈ ပေႃးဝႃႈ တေႁဵတ်း Social Distancing ပၼ်ၶဝ်ၵေႃႈ သၢင်ႇထုၵ်ႇလိူဝ် လုၵ်ႈႁဵၼ်းၸၼ်ႉဢွၼ်ႇၶဝ်လႄႈ ၸင်ႇတႅပ်းတတ်းၸိူင်ႉၼႆ” ၼႆယဝ်ႉ။\n\nလႆႈႁူႉဝႃႈ မၢႆမီႈၶေႃႈဢၼ်လုၵ်ႈႁဵၼ်းၶဝ် တေလႆႈႁဵတ်းၸွမ်းၼၼ်ႉတႄႉ တေပိုၼ်ၽၢဝ်ႇပၼ်ႁူဝ်ယွႆႈမၼ်းသေ မၢႆမီႈၸိူဝ်းဢၼ်တမ်းဝၢင်းပၼ်ၼႆႉ လိူဝ်သေႁူင်းႁဵၼ်းလူင်ပွင်ၸိုင်ႈယဝ်ႉ ႁူင်းႁဵၼ်းသုၼ်ႇတူဝ် လႄႈ ႁူင်းႁဵၼ်းၸိူဝ်းပိုတ်ႇၸွမ်း ၵျွင်းမုၼ်ၸဝ်ႈၸိူဝ်းၼၼ်ႉၵေႃႈ တေလႆႈႁဵတ်းၸွမ်းၵႂႃႇ။ သင်ဢမ်ႇႁဵတ်းၸွမ်းၼင်ႇ တမ်းဝၢင်းမၢႆမီႈဝႆႉပၼ်ၼၼ်ႉၸိုင် တေဢဝ်လိူင်ႈၵႂႃႇ ပဵၼ်တၢင်းၵၢၼ် ၼႆယဝ်ႉ။"
+  },
+  {
+    "title": "ၸွင်ႇယုမ်ႇႁိုဝ် ဝႃႈတၢင်းႁၵ်ႉၼႆႉ ဢမ်ႇမီးတႃၼႆ",
+    "content": "ပေႃးၵဵဝ်ႇလူၺ်ႈတၢင်းႁၵ်ႉၼႆ့ မီးၶေႃႈတိုဝ်းၵမ် လႄႈ ၶေႃႈယုမ်ႇယမ်ယူႇၶေႃႈ႞။ ၼၼ်ႉၵေႃႈပဵၼ် လွင်ႈဝႃႈ တၢင်းႁၵ်ႉၼႆႉ ဢမ်ႇမီးတႃၼႆၶႃႈဝႃႇ။ ၵူၼ်းၸိူဝ်းႁဵတ်းၼႄၵႂႃႇ ႁႂ်ႈၵႂၢမ်းၶေႃႈၼႆႉ မီးလၵ်းထၢၼ်ၵေႃႈ ယၢမ်ႈမီးမႃးတင်းၼမ်ယဝ်ႉ။ ၵွပ်ႈၼၼ်လႄႈ ၸင်ႇၶႂ်ႈမႃးၶႆႊၼႄလွင်ႈဝႃႈ ယွၼ်ႉသင်လႄႈ တၢင်းႁၵ်ႉၼႆ့ ဢမ်ႇမီးတႃဢၼ်ဝႃႈၼၼ်ႉယူႇ…။\n\nၵူၼ်းၸၢႆး လႄႈ ၼၢင်းယိင်းၼႆႉ ဢမ်ႇမိူၼ်ၵၼ်သေလွင်ႈ မိူၼ်ၵၼ်တင်း ၵူၼ်းၵေႃႉ႞ တင်းၵေႃႉ႞ ပိူင်ႈၵၼ်ၼၼ်ႉယဝ်ႉ။ ၼမ်ႉၸႂ်၊ ထၢတ်ႈၸႂ် လႄႈ ႁၢင်ႊၽၢင်ၵေႃႈ ဢမ်ႇမိူၼ်ၵၼ်သေဢိတ်းၼၼ်ႉယဝ်ႉ။ လိူဝ်ၼၼ်ႉ တၢင်းႁၼ်ထိုင်ၵေႃႉ႞ လႄႈ ၵေႃႉ႞ၵေႃႈ ဢမ်ႇမိူၼ်ၵၼ်။ ၵူၼ်းၸၢႆး ဢမ်ႇၼၼ် ၼၢင်းယိင်းၼိုင်ႈၵေႃႉၼႆႉ ပႅၵ်ႉသမ်ႉဝႃႈ ႁၢင်ႊၽၢင်တူဝ်ၶိင်းၽၢႆႇၼွၵ်ႈမၼ်းဢမ်ႇႁၢင်ႊလီသေတႃႉၵေႃႈ ၵူၼ်းၵေႃႉဢၼ်ယၵ်ႉမုင်ႈႁၼ်မႅၼ်ႈၵႂႃႇ တၢင်းႁၢင်ႊလီ ၼႂ်းၸႂ်လိုၵ်ႉလိုၵ်ႉဢၼ်မီးတီႈမၼ်းၼၼ်ႉတႄႉ တိုၼ်းတေႁၵ်ႉမႅၼ်ႈၵႂႃႇယူႇ။\n\nမၢင်ၸိူဝ်းသမ်ႉ ႁၢင်ႊၽၢင်တူဝ်ၶိင်းၽၢႆႇၼွၵ်ႈ ႁၢင်ႊလီ လဝ်းလုတ်း လီတူၺ်းတေႉတေႉၼၼ်ႉၵေႃႈ ပေႃးထူပ်းႁၼ်မႅၼ်ႈၵၼ်တင်း ၵူၼ်းၵေႃႉဢၼ် သူင်မၵ်ႉ မိုတ်ႈၵိုဝ်း လႆႈၸႂ် ႁၢင်ႊၽၢင်တူဝ်ၶိင်းတၢင်းၼွၵ်ႈမၼ်းၼၢင်းၼၼ်ႉၵေႃႈ တင်းသွင်ၵေႃႉ တိုၼ်းႁၵ်ႉမႅၼ်ႈၵၼ်ၵႂႃႇယူႇ။\n\nၵွပ်ႈပိူဝ်ႈၼၼ်လႄႈ ပိူၼ်ႈၸင်ႇဝႃႈ တၢင်းႁၵ်ႉၼႆႉ ဢမ်ႇမီးတႃၼႆယူႇယဝ်ႉ။"
+  },
+  {
+    "title": "လၢႆးသုၵ်ႈလၢင်ႉ ၽၵ်းယိိူဝ်ႈၼၢင်းၶဵဝ် ၼႂ်းၶၢဝ်းတၢင်းပဵၼ်ၶူဝ်းဝိတ်ႈ-19",
+    "content": "ၼႂ်းၶၢဝ်းတၢင်းပဵၼ်ပွတ်ႇၵႂ်ႈ ၶူဝ်းဝိတ်ႈ-19 ၼႆႉ ဢၼ်ၵူၼ်းႁဝ်း ဢ���ၼ်ၵၼ်မႆႈၸႂ် ထႅင်ႈလွင်ႈၼိုင်ႈၵေႃႈ  ပေႃးသိုဝ်ႉၽၵ်းၶဵဝ်မႃးၼႆ ၸွင်ႇမႅင်းတၢင်းပဵၼ် ၸၢင်ႊၸပ်းမႃးၼႆၼၼ်ႉယဝ်ႉ။ ယွၼ်ႉၼၼ် ၵမ်ႈၽွင်ႈၼႆႉ ဢဝ်ၽွင်သၵ်ႉ၊ ၵွၼ်ႈသီ သုၵ်ႈလၢင်ႉၽၵ်းၶဵဝ် ဢၼ်ႁဝ်းသိုဝ်ႉမႃးၼၼ်ႉ။  ယင်းလႆႈႁၼ် ၵမ်ႈၽွင်ႈဢဝ်ယႃၶႃႈမူင်ႈမႅင်းၼၼ်ႉ သိတ်းၽၵ်းၶဵဝ်ၵွၼ်ႇ။ ယွၼ်ႉၼၼ် တေလၢတ်ႈၼႄၵႂႃႇဝႃႈ ပေႃးႁဝ်းႁဵတ်းၼၼ် ၸွင်ႇမႅင်းတၢႆတေႉႁိုဝ်၊ ပေႃးႁဵတ်းၸိူင်ႉၼႆ မႅင်းတၢင်းပဵၼ်ဢမ်ႇၸပ်းယဝ်ႉႁႃႉ ၼႆၸိူဝ်းၼႆႉ။\n\nမႅင်းတၢင်းပဵၼ်ၼႆႉ လုၵ်ႉတီႈၽၵ်းၶဵဝ်သေ ၽႄႈၸပ်းၵၼ်လႆႈယူႇႁႃႉ။\n\nတေႃႇထိုင်မိူဝ်ႈလဵဝ် (လိူၼ်မေႇ ပီႊ2020) ၼႆႉတႄႉ ပႆႇႁၼ်ၶေႃႈမုၼ်း ဢၼ်ဝႃႈ  မႅင်းတၢင်းပဵၼ်ၼႆႉ ၸၢင်ႊလုၵ်ႉတီႈၽၵ်းၶဵဝ်သေ ၽႄႈၸပ်းၵၼ်ၼႆၼင်ႇၵဝ်ႇ။ ပိူင်ယႂ်ႇမၼ်း လုၵ်ႉတီႈ သၢႆတၢင်းလူမ်းထူၺ်ႈၸႂ်သေ ၽႄႈၸပ်းၵၼ်။ ပေႃးဢဝ်မိုဝ်း ယိပ်း၊ တိူဝ်ႉမႅၼ်ႈ မူင်ႈမႅင်း၊ ဢမ်ႇၼၼ် မူင်ႈမႅင်းတိတ်းၸပ်းတီႈၼႃႈတႃ ႁဝ်းၸိုင် ၸၢင်ႊ ၽႄႈၸပ်းၵၼ်ယူႇ။ ယွၼ်ႉၼၼ်ႉ ဢမ်ႇလူဝ်ႇဢဝ် ယႃႈၶႃႈမႅင်း သိတ်းၽၵ်းၶဵဝ်ၼင်ႇၵဝ်ႇ။\n\nၸွင်ႇထုၵ်ႇလီဢဝ် ၵွၼ်ႈသီ၊ ၽွင်သၵ်ႉ သုၵ်ႈလၢင်ႉ ၽၵ်းၶဵဝ်ႁိုဝ်\n\nၽၵ်းၶဵဝ်ၼႆႉ ဢမ်ႇထုၵ်ႇလီဢဝ် ၵွၼ်ႈသီ၊ ၽွင်သၵ်ႉ ၸိူဝ်းၼႆႉသေ သုၵ်ႈလၢင်ႉ၊ ယႃႈၶႃႈမႅင်းၵေႃႈ ဢမ်ႇထုၵ်ႇလီဢဝ် သိတ်းၽၵ်းၶဵဝ်။ ဢၼ်ဝႃႈ ပေႃးဢဝ်ၵွၼ်ႈသီ၊ ၽွင်သၵ်ႉ ၸိူဝ်းၼႆႉ သုၵ်ႈလၢင်ႉ၊ ဢဝ်ယႃႈၶႃႈ မူင်ႈမႅင်း ၸိူဝ်းၼႆႉ သိတ်းတီႈၽၵ်းၶဵဝ်ၼႆႉ မူင်ႈမႅင်းတေတၢႆၵႂႃႇ ဢၼ်ဝႃႈၼၼ်ႉၵေႃႈ ဢမ်ႇမီးလၵ်းထၢၼ် မၼ်းၼင်ႇၵဝ်ႇ။ ဢမ်ႇသၢင်ႇထုၵ်ႇ ၽွၼ်းၸႃႉ တေၼမ်လိူဝ်သေ ၽွၼ်းလီၵွၼ်ႇ။ ၵွၼ်ႈသီ၊ ၽွင်သၵ်ႉ ၸိူဝ်းၼႆႉၵေႃႈ ဢမ်ႇၸႂ်ႈတႃႇ သုၵ်ႈလၢင်ႉ ၽၵ်းၶဵဝ်။ သုၵ်ႈလၢင်ႉလႆႈယူႇၼႆၵေႃႈ ၶမ်ႇပၼီႇ ဢၼ်ႁဵတ်းဢွၵ်ႇ ၵွၼ်ႈသီ၊ ၽွင်သၵ်ႉ ၸိူဝ်းၼႆႉ ဢမ်ႇယိုၼ်ႁပ်ႉဝႆႉ။ ယႃႈၶႃႈမႅင်း ၶႅၼ်းၼႃႇယဝ်ႉ။\n\nသင်သမ်ႉ ဢမ်ႇၶိုၼ်းသုၵ်ႉလၢင်ႉ ၽၵ်းၶဵဝ်ႁဝ်းလီလီၸိုင်၊ ၵွၼ်ႈသီ၊ ၽွင်သၵ်ႉ၊ ယႃႈၶႃႈမႅင်း ၸိူဝ်းတိတ်းၸပ်းယူႇတီႈၽၵ်းၶဵဝ် ၸိူဝ်းၼၼ်ႉ ၸၢင်ႊႁဵတ်းႁႂ်ႈၵူၼ်းႁဝ်းတုၵ်ႉၶထႅင်ႈၵွၼ်ႇ။ ၵူၼ်းဢၼ်မီးႁႅင်း ၸင်ႈၶၢမ်ႇ ၵႅၼ်ႇၶႅင်ၼၼ်ႉ ဢမ်ႇပဵၼ်သင်သေတႃႉ  လုၵ်ႈဢွၼ်ႇ၊ ၵူၼ်းထဝ်ႈ၊ ၵူၼ်းၸိူဝ်းပဵၼ်ႁူင်းၶဝ်ႈၸဵပ်း ၸိူဝ်းၼၼ်ႉ တေၺႃးတၢင်းယၢပ်ႇ။ ယွၼ်ႉၼၼ်ႉ ဢမ်ႇထုၵ်ႇလီသုၵ်ႈလၢင်ႉၸိူင်ႉၼႆ။\n\nပေႃးၼႆ သမ်ႉတေႁဵတ်းႁိုဝ် သုၵ်ႈလၢင်ႉ ၽၵ်းၶဵဝ်ႁဝ်းလႃႇ?\n\nလၢႆးသုၵ်ႈလၢင���ႉ ၽၵ်းၶဵဝ်\n\nလၢႆးသုၵ်ႈလၢင်ႉ ၽၵ်းၶဵဝ် ဢၼ်ၸုမ်း FDA မိူင်းဢမႄႇရီီႇၵၢၼ်ႇၶဝ် ပၼ်တၢင်းႁၼ်ထိုင်ဝႆႉၼၼ်ႉတႄႉ…\n\nမိူဝ်ႈပႆႇယိပ်း ၽၵ်းၶဵဝ်ၼၼ်ႉ ဢဝ်ၵွၼ်ႈသီ လုၵ်ႈလၢင်ႉမိုဝ်း ႁႂ်ႈႁိုင်မွၵ်ႈ 20 ၸႅၵ်ႉၵၢၼ်ႉ ဢွၼ်တၢင်းလႄႈ။ ဢဝ်ပႅတ်ႈ ၽၵ်းၶဵဝ် ၸိူဝ်းဢၼ်လိူင်၊ ဢၼ်ၼဝ်ႈ ၸိူဝ်းၼၼ်ႉပႅတ်ႈဢွၼ်တၢင်းလႄႈ။ သုၵ်ႈလၢင်ႉ ၽၵ်းယိူဝ်ႈၼၢင်းၶဵဝ် ၸိူဝ်းၼၼ်ႉ ဢွၼ်တၢင်းယဝ်ႉ ၸင်ႇသွႆး၊ ၸင်ႇလိူၵ်ႈလႄႈ။ ဢဝ်ၼမ်ႉသုၵ်ႈလၢင်ႉၼႆႉ လီလိူဝ်ပိူၼ်ႈယဝ်ႉ။ ဢမ်ႇလူဝ်ႇၸႂ်ႉ  ၵွၼ်ႈသီ။ ဢဝ်ၼမ်ႉသုၵ်ႈလၢင်ႉၼႆႉ မၼ်းလၢင်ႉပၼ်ပႃး မႅင်းပႅၵ်ႉတီးရီးယႃး​ လႄႈ ယႃႈၶႃႈမႅင်း ၸိူဝ်းၼၼ်ႉၵွၼ်ႇ။ ပေႃးပဵၼ် မဵဝ်းဢၼ်တေၵိၼ်လိပ်း ၸိူင်ႉၼင်ႇ တႅင် ၸိူဝ်းၼႆႉတႄႉ ပွတ်ႈပၼ်၊ သုၵ်ႈပၼ် လီလီယဝ်ႉ ၸင်ႇၵိၼ်လ​ႄႈ။ ဢၼ်ၽႅတ်းပႅတ်ႈ၊ ၸိူဝ်းဝႆႉ ႁႂ်ႈၼမ်ႉမၼ်းယူတ်းၵႂႃႇ ၸိူဝ်းၼႆႉၵေႃႈ ၸၢင်ႊလူတ်းယွမ်းပၼ် မႅင်းပႅၵ်ႉတီးရီးယႃးယူႇ။ ပေႃးပဵၼ် မူင်ႇလႃႇထုၵ်ႈ၊ ၽၵ်းၵၢတ်ႇ ၸိူဝ်းၼႆႉတႄႉ ၵွၵ်းပႅတ်ႈဝႂ်ထၢပ်ႈၼွၵ်ႈမၼ်းၼၼ်ႉလႄႈ။\n\nလိူဝ်သေ လၢႆးၼႆႉယဝ်ႉ ၵမ်ႈၽွင်ႈၵေႃႈ ႁဵတ်းၸိိူင်ႉၼႆ…\n\nၸေႈၼမ်ႉၵိူဝ်\n\nၵမ်ႈၽွင်ႈၵေႃႈ ပေႃးသုၵ်ႈလၢင်ႉ ၽၵ်းယိူဝ်ႈၼၢင်းၶဵဝ်ႁဝ်းၼၼ်ႉယဝ်ႉယဝ်ႉၸိုင် တေၸေႈၵိူဝ်ဝႆႉၵမ်ႉၼိုင်ႈ။ ၸွမ်းၼင်ႇၶေႃႈၶူၼ်ႉၶႂႃႉတႄႉ ပေႃးဢဝ်ၽၵ်းၶဵဝ် ၸေႈၼမ်ႉ ဢၼ်ပႃးၵိူဝ်မွၵ်ႈ 10 ဝၢၵ်ႈၼႆႉ ႁိုင်မွၵ်ႈ 20 မဵတ်ႉၸိုင် မႅင်းပႅၵ်ႇတီးရီးယႃး ဢွၵ်ႇၵႂႃႇတင်းၼမ် ၼႆယဝ်ႉ။\n\nမိူဝ်ႈလဵဝ်တႄႉ ယင်းမီးၼမ်ႉတႃႇသုၵ်ႈလၢင်ႉ ၽၵ်းယိူဝ်ႈၼၢင်းၶဵဝ်ၼႆ ႁင်းၵွႆးၶေႃၶႃၵွၼ်ႇ။ ၵူၺ်းၵႃႈ ၽူႈလူင်ႉလႅၼ်ႇၶဝ်တႄႉ လၢတ်ႈဝႃႈ ဢဝ်ၼမ်ႉတႃႇလၢင်ႉၽၵ်းၶဵဝ် လႄႈ ဢဝ်ၼမ်ႉလိပ်း သုၵ်ႈလၢင်ႉၼႆႉ ဢမ်ႇပိူင်ႈသင်ၵၼ် ၼႆယဝ်ႉ။\n\nပိူင်ယႂ်ႇမၼ်းတႄႉ ၶႂ်ႈလၢတ်ႈတႄႉ ၼႂ်းၶၢဝ်းတၢင်းပဵၼ် ပွတ်ႇၵႂ်ႈ ၶူဝ်းဝိတ်ႈ -19 ၼႆႉ ဢမ်ႇလူဝ်ႇဢဝ် ၵွၼ်ႈသီ၊ ယႃႈၶႃႈမူင်ႈမႅင်း ၸိူဝ်းၼႆႉသေ သုၵ်ႈလၢင်ႉၼင်ႇၵဝ်ႇ။ ၽွွၼ်ႉႁၢႆႉ ၸၢင်ႊၼမ်လိိူဝ် ၽွၼ်းလီယဝ်ႉ။ ဢဝ်ၼမ်ႉလိပ်း သုၵ်ႈလၢင်ႉပၼ်ၵေႃႈ လႆႈယဝ်ႉ။ ႁဵတ်းၸွမ်းၼင်ႇ လွၵ်းလၢႆး ဢၼ်လၢတ်ႈမႃး တၢင်းၼိူဝ်ၼႆႉၵေႃႈ လႆႈယူႇ။ ဢၼ်လီသေ ပိူၼ်ႈ လႄႈ  ငၢႆႈသေပိူၼ်ႈတႄႉ ဢဝ်ၼမ်ႉလိပ်းသုၵ်ႈလၢင်ႉၼၼ်ႉယဝ်ႉ."
+  },
+  {
+    "title": "ပဵၼ်ၵူၼ်း လူဝ်ႇလႆႈမေႃႁူႉၶေႃႈ",
+    "content": "ပေႃးပိူၼ်ႈဢမ်ႇႁပ်ႉၾူၼ်း ယႃႇပေသိုပ်ႇတိၵ်းတိၵ်း။\n\nဝူၼ်ႉဝႃႈ မၼ်းမီးၵၢၼ်လွင်ႈယႂ်ႇလိူဝ်သေ တႃႇႁပ်ႉၾူၼ်းႁဝ်းၼၼ်ႉၼႆလႄႈ။ လူဝ်ႇလၢတ်ႈသင်ၵေႃႈ တႅမ်ႈလိၵ်ႈပွတ်းဝႆႉ ဢဝ်လႄႈ။\n\nပေႃးၵူႈငိုၼ်းပိူၼ်ႈၼႆ ​ၼမ်ႁိုဝ်ဢေႇၵေႃႈယဝ်ႉ တိုၼ်းလူဝ်ႇသၢႆႈတႅၼ်းယဝ်ႉ။ ၶိူင်ႈၶူဝ်းပိူၼ်ႈၵေႃႈ ပေႃးယိမ်မႃးယဝ်ႉ တိုၼ်းလူဝ်ႇသူင်ႇၶိုၼ်း။ ၶဵမ်ဢွၼ်ႇမၢၵ်ႈၼိုင်ႈ ၵွႆးၵေႃႈယဝ်ႉလႃႈ တိုၼ်းလူဝ်ႇသူင်ႇပၼ်ၸဝ်ႈမၼ်းၶိုၼ်းယဝ်ႉ။ ပေႃးႁဝ်း ဢဝ်ႁၢႆ၊ ဢဝ်လႅဝ် မႅၼ်ႈၸိုင်  မႄးပၼ်၊ သိုဝ်ႉပၼ် ၶိုၼ်းလႄႈ။ ယႃႇႁႂ်ႈၵႃႈၶၼ် မၼ်းပေႃးသေ ဢၼ်ၸဝ်ႈမၼ်းသိုဝ်ႉဝႆ့ၼၼၼ်ႉ။\n\nယႃႇတတ်းၼႃႈပိူၼ်ႈ။ ႁဵတ်းသင်ၵေႃႈလီ ယႃႇၵႂႃႇတတ်းၼႃႈပိူၼ်ႈ။ ၵၢၼ်ဢၼ်လႅၼ်ႈၵႂႃႇတတ်းၼႃႈ ပိူၼ်ႈဢွၼ်တၢင်းၼၼ်ႉ ပဵၼ်ၵၢၼ်လိူင်းၸိူင်းတေႉတေႉ (ဢဝ်ၸဵမ် တႃႇၶဝ်ႈႁွင်ႈၼမ်ႉ တီႈၵူၼ်းၼမ်၊ ၵၢၼ်ၶပ်းၵႃး ၸိူဝ်းၼႆႉ)။ ၽိုၵ်းႁႂ်ႈမေႃ ၶပ်ႉထႅဝ်ၸွမ်းပိူၼ်ႈလႄႈ။\n\nၶေႃႈထၢမ် ဢၼ်တေၵမ်ႉၵၢင်းပိူၼ်ႈၼၼ်ႉ ယႃႇပေထၢမ်။  ၸိူင်ႉၼင်ႇ “ပႆႇတႄႇၼႃႈႁိူၼ်းႁႃႉ” “ငိုၼ်းလိူၼ်သူလႆႈၵႃႈႁိုဝ်” ၼႆၸိူဝ်းၼႆႉ။\n\nပေႃးမီးၵူၼ်းၶဝ်ႈၽၵ်းတူမႃးၸွမ်းလင်ႁဝ်းၼႆႉၸိုင် ပိုတ်ႇၽၵ်းတူပၼ်ဝႆႉတႃႇၶဝ်လႄႈ။ ၸိူင်ႉၼၼ်ၼင်ႇၵဝ်ႇ ၵေႃႈပိူၼ်ႈပိုတ်ႇၽၵ်းတူဝႆႉတႃႇႁဝ်းၵေႃႈ လၢတ်ႈၵႂၢမ်းၶွပ်ႈၸႂ်တီႈၶဝ်လႄႈ။\n\nပေႃးၼင်ႈလူတ်ႉၸၢင်ႈ၊ ၵိၼ်တၢင်းၵိၼ် ၸွမ်းၵၼ်ၸိုင် မိူဝ်ႈၼႆႉ ပေႃးတႆးၵေႃႉ ႁဝ်းၵေႃႉၸၢႆႇၵေႃႈ မိူဝ်ႈၼႃႈမႃး ႁဝ်းတိုၼ်းလူဝ်ႇပဵၼ်ၵေႃႉၸၢႆႇၵႃႈမၼ်းယဝ်ႉ။\n\nႁႂ်ႈမေႃၼပ်ႉယမ် တၢင်းယုမ်ႇယမ်  တၢင်းႁၼ်ထိုင် ၵူၼ်းတၢင်ႇၵေႃႉလႄႈ။\n\nပေႃးဢမ်ႇလွင်ႈယႂ်ႇႁႅင်းၼႃႇ ယႃႇၵပ်းၾူၼ်းၸူးပိူၼ်ႈ ၵၢင်ၶမ်ႈၵၢင်ၶိုၼ်းလိုၵ်းလိုၵ်း။\n\nပေႃးပိူၼ်ႈတိုၵ်ႉလၢတ်ႈၵႂၢမ်းယူႇ ယႃႇပေတတ်းၵႂၢမ်းပိူၼ်ႈသေ ၶဝ်ႈလၢတ်ႈၸွမ်း။\n\nပေႃးပိူၼ်ႈဢမ်ႇလႆႈၸႂ် လွင်ႈဢၼ်ႁဝ်းယဝ်ႉယွၵ်ႇၶဝ်ၼၼ်ႉၵေႃႈ ယႃႇသိုပ်ႇယဝ်ႉယွၵ်ႇထႅင်ႈယဝ်ႉ။ တွင်းဝႆႉသေ မိူဝ်းၼႃႈမႃးၵေႃႈ ယႃႇပေသိုပ်ႇယဝ်ႉယွၵ်ႇထႅင်ႈယဝ်ႉ။\n\nပေႃးပိူၼ်ႈၸွႆႈထႅမ်ႁဝ်းၼႆ လွင်ႈသင်ၵေႃႈယဝ်ႉ ႁႂ်ႈမေႃ ၶွပ်ႈၸႂ်ၼိူဝ်ၶဝ်တႃႉ။\n\nတႃႇယွင်ႈတႄႉ  လၢတ်ႈၵႂၢမ်းယွင်ႈယေႃးၼႄ ၽၢႆႇၼႃႈပိူၼ်ႈလႄႈ။ တႃႇမူၼ်ႉမႄးတႄႉ ၸွင်ႇၵွႆႈလၢတ်ႈၵၼ် ဝၢႆးလင်ပိူၼ်ႈၵေႃႈလႆႈ။\n\nပေႃးယိမ်လူတ်ႉ၊ ၵႃးပိူၼ်ႈၼႆ သႂ်ႇပၼ်ၼမ်ႉမၼ်း တဵမ်တဵမ်ၶိုၼ်းလႄႈ။\n\nတိုၼ်းယႃႇပေၸႂ်ႉၵၢၼ်ပိူၼ်ႈလွၵ်ႇလွၵ်ႇလၢႆလၢႆ။ (ၶဝ်လႆႈ ဢဝ်ၶၢဝ်းယၢမ်း၊ ဢဝ်ငိုၼ်းတွင်း ယိုၼ်းသေ ၽိုၵ်းႁဵၼ်းမႃးၼႆ ယႃႇပေလိုမ်း)"
+  },
+  {
+    "title": "ပေႃးသၢဝ်ႁဝ်း တၢင်ႇပၼ်ၸိုဝ်ႈလဵၼ်ႈၼႆတႄႉ ပွင်ႇဝႃႈ …",
+    "content": "ၸိုဝ်ႈလဵၼ်ႈဢၼ်ဝႃႈၼႆႉ ပဵၼ်ၸိုဝ်ႈဢၼ်လီထွမ်ႇ၊ ဢၼ်ၼႃႈလီႁၵ်ႉ ဢမ်ႇၼၼ် လီၶႂ်ႈၶူဝ်ၸိူဝ်းၼၼ်ႉယဝ်ႉ။ ၵူၺ်းၼႃႇ ၸိုဝ်ႈၸိူင်ႉၼႆ  မၼ်းၼႄဢွၵ်ႇထွၵ်ႇပၼ်လႆႈ တၢင်းႁၵ်ႉဢၼ်သၢဝ်ႁဝ်း မီးတေႃႇႁဝ်းၼၼ်ႉၼႆယဝ်ႉ။ ပေႃးသၢဝ်ၵေႃႉၼိုင်ႈ တၢင်ႇပၼ်ၸိုဝ်ႈလဵၼ်ႈႁဝ်းယဝ်ႉၼႆတႄႉ ပွင်ႇဝႃႇ မၼ်းမီးၸႂ်ၼိူဝ်ႁဝ်း၊ မၼ်းလၵ်ႉႁၵ်ႉႁဝ်းယဝ်ႉဝႃႇ ပိူၼ်ႈဝႃႈတႄႉ (ၶႃႈတႄႉပႆႇႁူႉၼႃႇ တိၵ်ႉၵေႃႉလဵၵ်ႉယူႇ 😁😁😁) ။  ယွၼ်ႉၼၼ်ႉ ႁဝ်းၵေႃႈ ထုၵ်ႇလီႁပ်ႉဢဝ် ၸိုဝ်ႈၼၼ်ႉယူႇ။ ပေႃးၼၼ် မၼ်းၸင်ႇတေၸူမ်းသိူဝ်းၼၼ်ႉၼႃႇ။ ပေႃးမီး သၢဝ်ဢွၼ်ႇၵေႃႉၼိုင်ႈ ႁၵ်ႉႁဝ်းၸိူင်ႉၼႆယဝ်ႉၼႆတႄႉ ဢမ်ႇထုၵ်ႇလီ ပၼ်လုတ်ႈမိုဝ်း၊ ဢမ်ႇထုၵ်ႇလီပၢၵ်ႈထဵင်ႈပႅတ်ႈ၊ ပိူၼ်ႈၸွၵ်းပၼ်ၼေႃႇၵေႃႈ ႁဝ်းလူဝ်ႇႁေႃႇပၼ်ၵိူဝ်ၶိုၼ်းၼၼ်ႉၼႃႇ။\n\nပေႃးသၢဝ်ဢွၼ်ႇၵေႃႉၼိုင်ႈ တၢင်ႇပၼ်ၸိုဝ်ႈလဵၼ်ႈႁဝ်း  ၸိိူင်ႇၼင်ႇ “မူႇဢွၼ်ႇ႟ (သင်ႁဝ်းပဵၼ်ၵူၼ်းပီး) “ၵူၼ်းႁၢႆႉဢွၼ်ႇ႟ (သင်ႁဝ်းတိုဝ်ဢိတ်းဢိတ်း)” ဢမ်ႇၼၼ် ၵေႃႈ ၸိုဝ်ႈမၼ်းၼၢင်းလႆႈၸႂ်သေသေယဝ်ႉပေႃးၼႆၸိုင်  ပွင်ႇဝႃႈ မၼ်းယွမ်းႁပ်ႉ တႃႇႁႂ်ႈႁဝ်းၶဝ်ႈၵႂႃႇ ၼႂ်းၸၢတ်ႈပၢၼ်မၼ်းၼၢင်းယဝ်ႉၼႆဝႃႇ (ပိူၼ်ႈဝႃႈတႄႉ 😀😀)။ မၼ်းၼပ်ႉထိုဝ်  လႄႈ လၵ်ႉလွမ်ႁၵ်ႉႁဝ်းဝႆႉယဝ်ႉ။ ၵွပ်ႈၼႆလႄႈ ထုၵ်ႇလီယွမ်းႁပ်ႉဢဝ် ၸိုဝ်ႈလဵၼ်ႈၼၼ်ႉ လီလီၼႆယဝ်ႉ။\n\nၸိုဝ်ႈလဵၼ်ႈၼႆႉ မၼ်းၸၢင်ႈပဵၼ်ၸိုဝ်ႈဢၼ်ႁၢင်ႈလီ၊ ဢၼ်ၼႃႈလီႁၵ်ႉ ဢမ်ႇၼၼ် ဢၼ်ႁၢႆႉၸႃႉ၊ ဢၼ်ၼႃႈလီၸင်း ၸိူဝ်းၼႆႉယူႇ။ ၵူၺ်းၼႃႇ ၸိူင်ႉႁိုဝ်ၵေႃႈ ၸိုဝ်ႈၼၼ်ႉ မၼ်းတိုၼ်းလုၵ်ႉတီႈ ၼႂ်းမၢၵ်ႇႁူဝ်ၸႂ်  တၢင်းႁၵ်ႉၼၼ်ႉမႃးယဝ်ႉ။\n\nၸိုဝ်ႈၼႆႉ လဵၼ်ႈၼႆႉ သမ်ႉဝႃႈ ဢမ်ႇလႆႈမႃးတီႈသၢဝ်၊ လႆႈမႃးတီႈတႆးၵေႃႉတႆးသေႈ ႁဝ်းၵွႆးၵေႃႈ ပွင်ႇဝႃႈ ႁဝ်းပဵၼ်ၵူၼ်းလွင်ႈယႂ်ႇ၊ ပဵၼ်တႆးၵေႃႉလီ၊ ပဵၼ်တႆးၵေႃႉ ဢၼ်ၵိၼ်သုၵ်းၵိၼ်လိပ်းၵၼ်ၼၼ်ႉယဝ်ႉ။ ပေႃးဢမ်ႇၸႂ်ႈၸိူင်ႉၼၼ် ၶဝ်သမ်ႉတေႁဵတ်းႁိုဝ်ႁတ်းပၼ် ၸိုဝ်ႈလဵၼ်ႈႁဝ်းလႆႈလႃႇ။ ဢမ်ႇၸႂ်ႈႁႃႉ။\n\nပီႈၼွင်ႉႁဝ်းၶဝ်ၼႃႇ ၸိုဝ်ႈလဵၼ်ႈႁွင်ႉဝႃႈႁိုဝ်၊ ပဵၼ်ၽႂ်ၵေႃႉတၢင်ႇပၼ်ၼႆ ၶွမ်ႇမႅၼ်ႉပၼ်တၢင်းတႂ်ႈၼႆႉၽွင်ႈၶႃႈ။"
+  },
+  {
+    "title": "ထႆႇၶႅပ်းႁၢင်ႊပၢင်ၶႅၵ်ႇ ၼႂ်းၶွမ်ႇ",
+    "content": "ၵူၼ်းတီႈမိူင်းသိင်ႇၵႃႇပူႇၵူႊၼိုင်ႈၼႆႉ ၶႃၵႂႃႇထႆႇၶႅပ်းႁၢင်ႊ လူင်ႈၼႃႈတႃႇ ပွႆးပၢင်ၶႅၵ်ႇၶႃ ၼႂ်းၵွမ်ႇၵူၼ်းတၢႆ ၼႆယဝ်ႉ။\n\nဝၢႆးၶႃသွင်ၵေႃႉ ဢဝ်ၶႅပ်းႁၢင်ႊၶႃ ဢၼ်ထႆႇဝႆႉၼႂ်းၵွမ်ႇၼၼ်ႉ လူင်းၼႂ်းဢွၼ်ႇလႅင်းယဝ်ႉ ပိူၼ်ႈဢွၼ်ၵၼ် သျႄးလႄႈ လိုဝ်းလင်ၸွတ်ႇတူဝ်ႈၵႂႃႇ ၼိူဝ်ဢွၼ်ႇလႅင်းၵမ်းၼိုင်ႈ ၼႆယဝ်ႉ။"
+  },
+  {
+    "title": "ၵူၼ်းၶပ်းၶိူင်ႈမိၼ် လူင်းလိၼ်ၶပ်းလူတ်ႉၶိူင်ႈသူင်ႇတၢင်းၵိၼ် ယွၼ်ႉၶူဝ်းဝိတ်ႈ-19",
+    "content": "Thanun Khantatatbumroong ၵူၼ်းၶပ်းၶိူင်ႈမိၼ် တီႈမိူင်းထႆးၼႆႉ မိူဝ်ႈလဵဝ် ယွၼ်ႉတၢင်းပဵၼ်ၶူဝ်းဝိတ်ႈ-19 ၼႆႉသေ ဢမ်ႇပဵၼ်ၵၢၼ်လႄႈ  လႆႈၶပ်းလူတ်ႉၶိုင်ႈသေ ႁဵတ်းၵူၼ်းသူင်ႇတၢင်းၵိၼ်တၢင်းယႅမ်ႉ ၼႆယဝ်ႉ။\n\nမၼ်းၼႆႉ မိူဝ်ႈဢွၼ်တၢင်းတႄႉ ပဵၼ်ၵူၼ်းၶပ်းၶိူင်ႈမိၼ် တီႈသၢႆၵၢၼ်မိၼ် မိူင်းၼွၵ်ႈၵေႃႉၼိုင်ႈ၊ မိူဝ်ႈလဵဝ်တႄႉ ယွၼ်ႉၵသၢႆၵၢၼ်မိၼ်ၶဝ် ဢမ်ႇပဵၼ်ၵၢၼ်လႄႈ ၸင်ႇလႆႈၶပ်းလူတ်ႉၶိူင်ႈသူင်ႇတၢင်းၵိၼ် ၸိူင်ႉၼႆ ၼႆယဝ်ႉ။\n\nမၼ်းတွပ်ႇလၢတ်ႈတီႈ သိုဝ်ႇၶၢဝ်ႇ EFe ဢွၵ်ႇၶၢဝ်ႇဝႆႉဝႃႈ “မိိူဝ်ႈလိူၼ်ပူၼ်ႉမႃးၼႆႉ ၶႃႈၶဝ်ထုၵ်ႇတတ်းငိုၼ်းလိူၼ် 75 %။ လႆႈငိုၼ်းလိူၼ် 25 % ၵွႆး။ တေပဵၼ်ၸိူင်ႉၼႆ ႁိုင်ထႅင်ႈမွၵ်ႈႁူၵ်းလိူၼ်ၼႆႉၵွၼ်ႇ။ ယွၼ်ႉၼၼ်လႄႈ ၸင်ႇလႆႈတႅပ်းတတ်းသဵၼ်ႈၸႂ် မႃးႁဵတ်းၵၢၼ်ၸူဝ်ႈၶၢဝ်း ႁဵတ်းၼႆ” ၼႆယဝ်ႉ။\n\nThanun Khantatatbumroong ၼႆႉ ႁဵတ်းၵၢၼ်ၶပ်းၶိူင်ႈမိၼ်မႃး ႁိုင် 18 ပီႊယဝ်ႉ။ ၸွမ်းၼင်ႇ သိုဝ်ႇၶၢဝ်ႇ ၼႂ်းမိူင်းထႆးၶဝ်ဝႃႈတႄႉ ၵူၼ်းႁၢမ်းၵၢၼ် ယွၼ်ႉတၢင်းပဵၼ်ၶူဝ်းဝိတ်ႈ -19 ၼႆႉ မီးမွၵ်ႈ 10 လၢၼ်ႉၵေႃႉ ၼႆယဝ်ႉ။\n\nSource: Efe Ref: Back down to earth: pilot turns to food deliveries Phoro: EFE/EPA/RUNGROJ YONGRIT"
+  },
+  {
+    "title": "ႁူင်းႁဵၼ်းၸၼ်ႉဢွၼ်ႇ တီႈဝဵင်းယွင်ႁူၺ်ႈ ၺႃးလူမ်းပတ်ႉႁႅင်းလႄႈ လူႉလႅဝ်ၵႂႃႇ",
+    "content": "မိူဝ်ႈဝၼ်းတီႈ 21 လိူၼ်ဢေႇပရႄႇ ယၢမ်းတၢမ်းၶမ်ႈၼၼ်ႉ ၾူၼ်လူမ်းႁႅင်းၼႃႇလႄႈ ႁူင်းႁဵၼ်းၸၼ်ႉဢွၼ်ႇ တီႈဝၢၼ်ႈသယႅတ်ႉဢူၵ်ႉ ၸေႊဝဵင်းယွင်ႁူၺ်ႈ လူႉၵွႆၵႂႃႇ ၼႆယဝ်ႉ။\n\nႁူင်းႁဵၼ်းၸၼ်ႉဢွၼ်ႇ ဢၼ်လူႉလႅဝ်ၵႂႃႇ ယွၼ်ႉၾူၼ်လူမ်းၽတ်ႉႁႅင်းၼၼ်ႉ တၢင်းယၢဝ်းမီး 72 ထတ်း၊ တၢင်းၵႂၢင်ႈမီး 24 ထတ်းသေ မႆႉ လႄႈ ၽႅၼ်ႇလဵၵ်းမူင်းၸိူဝ်းၼၼ်ႉလူႉၵွႆၵႂႃႇသေတႃႉ ၵူၼ်း လႄႈ တူဝ်သတ်းတႄႉ ဢမ်ႇတုမ်ႉတိူဝ်ႉၺႃးၼင်ႇၵဝ်ႇ ၼႆယဝ်ႉ။\n\nလႆႈႁူႉဝႃႈ တၢင်းၼမ်ၵႃးၶၼ် လွင်ႈလူႉသုမ်း ႁူင်းႁဵၼ်းၸၼ်ႉဢွၼ်ႇၼၼ်ႉ ႁူမ်ႈသဵၼ်ႈမီးမွၵ်ႈ 2800000 သႅၼ်ပျႃး ၼႆယဝ်ႉ။"
+  },
+  {
+    "title": "တီႈဝဵင်းတူၼ်ႈတီး မီးၵူၼ်းၸပ်းတၢင်းပဵၼ် ၶူဝ်းဝိတ်ႈ-19 လိူဝ်မႃးထႅင်ႈၵေႃႉ႞ယဝ်ႉ",
+    "content": "မိူဝ်ႈဝၼ်းတီႈ 21 လိူၼ်ဢေႇပရႄႇ ယၢမ်းၵၢင်ၶမ်ႈ 8 မူင်း ထၢၼ်ၽွင်းလူင် ၵၢၼ်လဵၼ်ႈႁႅင်း လႄႈ ပၢႆးယူႇလီ ပိုၼ်ၽၢဝ်ႇဢွၵ်ႇဝႃႈ တီႈၼႂ်းမိူင်းမၢၼ်ႊၼႆႉ မီးၵူၼ်းၸပ်းတၢင်းပဵၼ် ၶူဝ်းဝိတ်ႈ-19 ၽိူမ်ႉထႅင်ႈ သွင်ၵေႃႉ။ ၼႂ်းသွင်ၵေႃႉၼၼ်ႉ ပႃးၵူၼ်းဢၼ်ယူႇတီႈ ၼႂ်းဝဵင်ႈတူၼ်ႈတီး ပွၵ်ႉမျူဝ်ႉမႃႉၼၼ်ႉၵေႃႉ႞ ၼႆယဝ်ႉ။\n\nၵူၼ်းၵေႃႉၸပ်းတၢင်းပဵၼ် ၶူဝ်းဝိတ်ႈ-19 မၢႆ (121) ဢၼ်ယူႇတီႈဝဵင်းတူၼ်ႈတီးၼႆႉ ပဵၼ်ၼၢင်းယိင်း ဢႃႇယု 21 ပီႊ။ ပိုၼ်းလင် ၵူၼ်းၵေႃႉၼႆႉတႄႉ လိူဝ်သေ ယၢမ်ႈၵႂႃႇမိူင်းဢိင်ႇၵလၼ်ႇပွၵ်ႈမႃးၶိုၼ်းၼႂ်းမိူင်းယဝ်ႉ ဢမ်ႇယၢမ်ႈတုမ်ႉတိူဝ်ႉၸွမ်း ၵူၼ်းဢၼ်ထုၵ်ႇမၵ်းမၼ်ႈဝႃႈ မီးမႅင်းၶူဝ်းဝိတ်ႈ-19 တီႈၼႂ်းမိူင်း ၼႆယဝ်ႉ။\n\nလႆႈႁူႉဝႃႈ မိူဝ်ႈမၼ်းၼၢင်း လုၵ်ႉတၢင်းမိူင်းဢိင်ႇၵလၼ်ႇပွၵ်ႈမႃးၼၼ်ႉၵေႃႈ လႆႈထုၵ်ႇၸဝ်ႈၼႃႈတီႈၶဝ် ၵုမ်းၶင်ယူႇဝႆႉၵွႆးၶေႃၶေႃ တႃႇ 14 ဝၼ်းသေ ၸင်ႇပွၵ်ႈမႃးတီႈဝဵင်းတူၼ်ႈတီးၶိုၼ်းသေ ယူႇႁိူၼ်းတီႈၼႂ်းပွၵ်ႉမျူဝ်ႉမႃႉ ဝဵင်းတူၼ်ႈတီး ၼႆယဝ်ႉ။\n\nႁၢၼ်ႉတေႃႇဝၼ်းမိူဝ်ႈၼႆႉ လိူၼ်ဢေႇပရႄႇ 21 ဝၼ်း ယၢမ်းၵၢင်ၶမ်ႈ 8 မူင်း ၵူၼ်းၸပ်းတၢင်းပဵၼ် ၶူဝ်းဝိတ်ႈ-19 ၼႂ်းမိူင်းႁူမ်ႈတုမ်မျၢၼ်ႇမႃႇၼႆႉ ႁူမ်ႈသဵၼ်ႈ မီးၵႂႃႇ 121 ၵေႃႉ၊ ၼႂ်းၼၼ်ႉ တၢႆၵႂႃႇ 5 ၵေႃႉ၊ ၵူၼ်းၸိူဝ်းၸပ်းတၢင်းပဵၼ်ယဝ်ႉသေ ႁပ်ႉၵၢၼ်ယူတ်းယႃႁၢႆၶိုၼ်းၼၼ်ႉတႄႉ မီးၵႂႃႇ 9 ၵေႃႉ။ ၼႂ်းမိူင်းတႆးသမ်ႉ ၵူၼ်းၸပ်းတၢင်းပဵၼ်ၶူဝ်းဝိတ်ႈ-19 မီးၵႂႃႇ 6 ၵေႃႉ ၼႆယဝ်ႉ။."
+  },
+  {
+    "title": "ၶိူင်ႈၵူတ်ႇထတ်း မႅင်းၶူဝ်းဝိတ်ႈ-19 ႁွတ်ႈၽႅဝ်ဝႆႉတီႈ မျႃႉဝတီႇယဝ်ႉ",
+    "content": "ၶိူင်ႈထတ်းသၢင် မႅင်းတၢင်းပဵၼ်ၶူဝ်းဝိတ်ႈ-19 Cobas 6800 M PCR ဢၼ် AA Medical Product လူႇတၢၼ်းပၼ်ၼၼ်ႉ ယၢမ်းလဵဝ်ႁွတ်ႈၽႅဝ်ဝႆႉတီႈ မျႃႉဝတီႇ ဢွင်ႈတီႈလႅၼ်လိၼ် မိူင်းမၢၼ်ႊ- မိူင်းထႆး ၼႆယဝ်ႉ။\n\nလႆႈႁူႉဝႃႈ ၶိူင်ႈၵူတ်ႇထတ်းတၢင်းပဵၼ် ၶူဝ်းဝိတ်ႈ-19 ပိူဝ်ႈတႃႇႁူႉၶေႃႈတွပ်ႇလႆႈဝႃႈ မီးမႅင်းၶူဝ်းဝိတ်ႈႁိုဝ် ဢမ်ႇမီးၼၼ်ႉ မိူဝ်ႈၼႆႉ ယၢမ်းဝၢႆးဝၼ်း မွၵ်ႈ 2 မူင်း ၽၢႆႇၸဝ်ႈၼႃႈတီႈၶဝ် ဢဝ်ၵႃးလူင်တၢင်ႇ ၶၢမ်ႈၶူဝ်မၢႆ (2) တီႈမျႃႉဝတီႇမႃး ၼႆယဝ်ႉ။\n\nလႆႈႁူႉဝႃႈ ၶိူင်ႈၸၢၵ်ႈလူင် ဢၼ်ၵူတ်ႇထတ်းပၼ်လႆႈဝႃႈ ၸွင်ႇမီးမႅင်းၶူဝ်းဝိတ်ႈ-19 ႁိုဝ် ဢမ်ႇမီးၼႆႉ ပဵၼ်မိူင်းသိတ်ႇသလၼ်ႇ ၶမ်ႇပၼီႇ Roche Diagnostics ၶဝ် ႁဵတ်းဢွၵ်ႇမႃး။ ၼႂ်းၶၢဝ်းတၢင်းပႅတ်ႇၸူဝ်ႈမူင်းၼႆႉ ၶိူင်ႈၸၢၵ်ႈလူင်ၼႆႉ ၵူတ်ႇထတ်းပၼ်လႆႈ ၵူၼ်းၸိူဝ်းထၢင်ႇထိူမ်ဝႃႈ မီးတၢင်းပဵၼ်ၶူဝ်းဝိတ်ႈၼၼ်ႉ တႃႇ 380 ၵေႃႉ လႄႈ ၼႂ်းၶၢဝ်းတၢင်း 24 ၸူဝ်ႈမူင်း ႁိုင်ၼိုင်ႈဝၼ်းၼႆႉ ၸၢင်ႊၵူတ်ႇထတ်းပၼ်လႆႈ တႃႇႁူဝ်ၼပ်ႉၵူၼ်း မွၵ်ႈ 1300 ၵေႃႉ ၼႆယဝ်ႉ။"
+  },
+  {
+    "title": "တၢင်းပဵၼ်ၶူဝ်းဝိတ်ႈ-19 ၼႆႉ ၸပ်းၸွမ်းတၢင်းၵိၼ်ယူႇႁႃႉ ?",
+    "content": "ၼင်ႇႁိုဝ်တေဢမ်ႇၸပ်းတၢင်းပဵၼ်ၼၼ်ႉ ႁႂ်ႈဢွၼ်ၵၼ် ယူႇႁိူၼ်း၊ ႁႂ်ႈဢွၼ်ၵၼ် ႁဵတ်းၸွမ်း ၶေႃႈၼႄႉၼၢမ်း ၽူႈမီးပုၼ်ႈၽွၼ်းၶဝ်ၼႆ ဢွၼ်ၵၼ်ပၢဝ်ႇႁွင်ႉတူၵ်ႇတူင်ႉၵၼ်ယူႇ၊ မိူဝ်ႈလဵဝ် ဢၼ်ၵူၼ်းႁဝ်းၶႂ်ႈႁူႉထႅင်ႈဢၼ်ၼိုင်ႈ​ၵေႃႈ မႅင်းတၢင်းပဵၼ်ၼႆႉ လုၵ်ႉတီႈတၢင်းၵိၼ်တၢင်းယႅမ်ႉသေ ၽႄႈၸပ်းၵၼ် လႆႈယူႇႁႃႉ ၼႆၼၼ်ႉယဝ်ႉ။\n\nႁဝ်းၵၢၼ်ႉ သႂ်ႂ်ႇၽႅၼ်ႇပူၵ်ႉသူပ်း၊ ၵမ်းၵမ်းသုၵ်ႉလၢင်ႉမိုဝ်းယူႇသေတႃႉ ပေႃးသမ်ႉမႅင်းတၢင်းပဵၼ်  ၸပ်းမႃးၸွမ်းတၢင်းၵိၼ်တၢင်းယႅမ်ႉ ဢၼ်ႁဝ်းသိုဝ်ႉၼႂ်းၵၢတ်ႇမႃးၼၼ်ႉၼႆ တေႁဵတ်းႁိုဝ်။\n\nၵဵဝ်းၵပ်းလွင်ႈၼႆႉ ပေႃးတူၺ်းၸွမ်းၼင်ႇ ၶေႃႈမုၼ်း ၸုမ်းပၢႆးယူႇလီလုမ်ႈၾႃႉ (WHO) ဝႃႈတႄႉ  မႅင်းတၢင်းပဵၼ်ၼႆႉ ဢမ်ႇသူႈလႃႈလီၸပ်းတီႈ တၢင်းၵိၼ်တၢင်းယႅမ်ႉ ဢမ်ႇၼၼ် တီႈဢၼ်ပူၵ်ႉဢၼ်ႁေႃႇ  တၢင်းၵိၼ်တၢင်းယႅမ်ႉ ၸိူဝ်းၼၼ်ႉ ၼႆယဝ်ႉ။\n\nယွၼ်ႉသင်လႃႇ\n\nတၢင်းပဵၼ်ၶူဝ်းဝိတ်ႈ-19 ၼႆႉ မၼ်းပဵၼ်တၢင်းပဵၼ် ဢၼ်ၵဵဝ်ႇလူၺ်ႈလူမ်းထူၺ်ႈၸႂ်၊ တီႈတႄႇၽႄႈၸပ်း တၢင်းပဵၼ်ၼႆႉၵေႃႈ လုၵ်ႉတီႈၵူၼ်းၼင်ႇၵၼ် ထိႉတိူဝ်ႉၵၼ်၊ မိူဝ်ႈၵူၼ်းပဵၼ် ဢႆ၊ ၶီႈၸၢမ် ၸိူဝ်းၼၼ်ႉ မႅင်းတၢင်းပဵၼ် တေဢွၵ်ႇမႃးသေ ၽႄႈၸပ်းတၢင်ႇၵေႃႉၵႂႃႇ ၸိူဝ်းၼႆႉ။\n\nတေႃႇထိုင်မိူဝ်ႈလဵဝ် ပႆႇႁၼ်လၵ်းထၢၼ်တႅတ်ႈတေႃး လွင်ႈဝႃႈမႅင်းတၢင်းပဵၼ်ၼႆႉ ၸပ်းတီႈတၢင်းၵိၼ်တၢင်းယႅမ်ႉ၊  တီႈဢၼ်ပူၵ်ႉဢၼ်ႁေႃႇ တၢင်းၵိၼ်တၢင်းယႅမ်ႉသေ လၢမ်းၽႄႈၵႂႃႇၼၼ်ႉ။ မႅင်းၶူဝ်းဝိတ်ႈၼႆႉ မၼ်းဢမ်ႇၸပ်း တီႈတၢင်းၵိၼ်တၢင်းယႅမ်ႉလႆႈ ယွၼ်ႉဝႃႈ တႃႇမႅင်းၼႆႉ တေယူႇလႆႈၼႆႉ မၼ်းလူဝ်ႇမီး ဢၼ်ႁပ်ႉမၼ်း ၸိူင်ႉၼင်ႇ တူဝ်သတ်း လႄႈ တူဝ်ၵူၼ်း ၸိူဝ်းၼႆႉၵွၼ်ႇ။\n\nၵူၺ်းၵႃႈ ထုၵ်ႇလီၾၢင်ႉယူႇ\n\nမႅင်းတၢင်းပဵၼ်ၼႆႉ ဢမ်ႇၸပ်းလႆႈ တီႈတၢင်းၵိၼ်တၢင်းယႅမ်ႉႁေး ၼႆသေ ႁွင်ႉပၢဝ်ႇ၊ ၵိၼ်ၵွၼ်လူင်ၵႂႃႇ တိၵ်းတိၵ်းတႄႉ ပႆႇမႅၼ်ႈၼင်ႇၵဝ်ႇ။ ထုၵ်ႇလီၾၢင်ႉဝႆႉယူႇၼႆတႄႉ ယႃႇပေလိုမ်း။\n\nၸွမ်းၼင်ႇ ၶေႃႈၶူၼ်ႉၶႂႃႉ ဢၼ်ႁဵတ်းယူႇမိူဝ်ႈလဵဝ်ၼႆႉ လႆႈႁူႉဝႃႈ မႅင်းၶူဝ်းဝိတ်ႈ-19 ၼႆႉ မၼ်းယူႇလႆႈ ၼိူဝ်ထူင်ၸေႈလိူမ်ႈ (ပလၢတ်ႈသတိၵ်ႉ) ႁိုင် 72 ၸူဝ်ႈမူင်း၊ ၼိူဝ်ၵေႃႇ ဢၼ်မၢင် ႁိုင် သီႇၸူဝ်ႈမူင်း၊ ၼိူဝ်ၸေႈဢၼ်ၼႃ ႁိုင် 24 ၸူဝ်ႈမူင်း ၼႆယဝ်ႉ။ (ၵူၺ်းၼႃႇ ယွၼ်ႉၶဝ် ၶူၼ်ႉၶႂႃႉ၊ ၸၢမ်းတူၺ်း ၼႂ်းႁွင်ႈ ၵူတ်ႇထတ်းဢၼ် မၵ်းတတ်းဝႆႉ တၢင်ႉမႆႈ၊ ၵတ်း ၼၼ်ႉလႄႈ တင်းတၢင်းၼွၵ်ႈတေႉတေႉတႄႉ တေပိူင်ႈၵၼ်ယူႇ)။\n\nယွၼ်ၼၼ်ႉ  သင်ဝႃႈ ၵူၼ်းပဵၼ်ၼၼ်ႉ ထိႉတိူဝ်ႉမႅၼ်ႈ တၢင်းၵိၼ်တၢင်းယႅမ်ႉၸိူဝ်းၼၼ်ႉသေ ႁဝ်းသမ်ႉၵႂႃႇၶိုၼ်းၵႂႃႇ ယိပ်းမႅၼ်ႈယဝ်ႉၵေႃႈ ဢမ်ႇသုၵ်ႈမိုဝ်းၼႆတႄႉ ယၢပ်ႇၸႂ်ယဝ်ႉလေႃႇ။\n\nၼင်ႇႁိုဝ်  မႅင်းတၢင်းပဵၼ် တေဢမ်ႇၽႄႈၸပ်းၵၼ်ၼၼ်ႉ ၵူၼ်းၶၢႆ လႄႈ ၵူၼ်းသိုဝ်ႉ ထုၵ်ႇလႆႈႁဵတ်းၸိူင်ႉၼႆ…\n\nၵူၼ်းၶၢႆ၊ ၵူၼ်းတေႃႉသူင်ႇ –\n\nၵွၼ်ႇပႆႇယိပ်း၊ ပႆႇႁေႃႇ တၢင်းၵိၼ်ၸိူဝ်းၼၼ်ႉ  ႁႂ်ႈႁဵတ်းလွင်ႈမူတ်းသႂ်၊ ယွၼ်ႉတၢင်းၵိၼ် ၸိူဝ်းၼႆႉသေ ယႃႇႁႂ်ႈမႅင်းၽႄႈၵႂႃႇ။ (ၾၢင်ႉ မိူဝ်ႈဢႆ၊ မိူဝ်ႈၶီႈၸၢမ် ၸိူဝ်းၼႆႉ)။ မိူဝ်ႈၵႂႃႇသူင်ႇ တၢင်းၵိၼ်ၼၼ်ႉၵေႃႈ ႁႂ်ႈၵႅတ်ႇၶေဝႆႉ တဵမ်တဵမ်ထူၼ်ႈ ၸိူင်ႉၼင်ႇ ပႃး ယႃႈလၢင်ႉမိုဝ်း၊ ယႃႈၶႃႈမႅင်း၊ ၽႅၼ်ပူၵ်ႉသူပ်း ၸိူဝ်းၼႆႉ။ ႁႂ်ႈၾၢင်ႉ လွင်ႈယူႇၵႆ၊ ၸမ် ၵၼ်တင်းၵူၼ်းသိုဝ်ႉ။\n\nၵူၼ်းသိုဝ်ႉ  –\n\nမိူဝ်ႈၸွၵ်း တၢင်းၵိၼ်ၼၼ်ႉ ယူႇၵႆၵၼ် တင်းၵူၼ်းၶၢႆမၼ်း မွၵ်ႈ သၢမ်ထတ်းၼႆႉလႄႈ။ ပူၵ်ႉသူပ်းဝႆႉလႄႈ။ ယႃႇဢဝ်မိုဝ်းယိပ်းၼႃႈ။ ပေႃးပွၵ်ႈမႃးထိုင်ႁိူၼ်းၵေႃႈ ႁဵတ်းလွင်ႈမူတ်းသႂ် တူဝ်ႁဝ်းၵမ်းလဵဝ်လႄႈ။ တၢင်းၵိၼ်ႁဝ်းၸိူဝ်းၼၼ်ႉၵေႃႈ လၢင်ႉပႅတ်ႈ ဢၼ်ပူၵ်ႉဢၼ်ႁေႃႇ မၼ်းၸိူဝ်းၼၼ်ႉလႄႈ။ သုၵ်ႈမိုဝ်းယဝ်ႉ ၸင်ႇၵိၼ်ၶႃႈလႄႈ။ ယႃႇယူႇၸမ် ၵူၼ်းၸိူဝ်းမႃးသူင်ႇ တၢင်းၵိၼ်ၼၼ်ႉႁႅင်းၽႅဝ် (ႁႂ်ႈၶဝ်ဝၢင်းဝႆႉ တီႈၵႆဢိတ်းၼိုင်ႈ ၵေႃႈလႆႈ)။ ပူၵ်ႉသူပ်းသေ ၸင်ႇၵႂႃႇဢဝ် တၢင်းၵိၼ် ဢၼ်ပိူၼ်ႈမႃးသူင်ႇ ၸိူဝ်းၼႆႉ။\n\nပေႃးႁဝ်းၵႅတ်ႇၵင်ႈဝႆႉ လီလီၸိုင် ဢမ်ႇတၢပ်ႈလူဝ်ႇၵူဝ် တၢင်းပဵၼ်ၶူဝ်းဝိတ်ႈၼင်ႇၵဝ်ႇ။ ဢၼ်လီသေပိူၼ်ႈတႄႉ မိုဝ်ႉၵိၼ်၊ ႁုင်ၵိၼ် ႁင်းၵွႆး ၼၼ်ႉယဝ်ႉ။"
+  },
+  {
+    "title": "ၽွင်းလႆႈယူႇႁိူၼ်းၼႆႉ ၸႂ်ႉၶၢဝ်းယၢမ်း ႁႂ်ႈမီးၽွၼ်းလီလႄႈ",
+    "content": "ယွၼ်ႉတၢင်းပဵၼ် ပွတ်ႇၵႂ်ႈ ၶူဝ်းဝိတ်ႈ-19 ၼႆႉလႄႈ ႁဵတ်းႁႂ်ႈၵူၼ်းႁဝ်း ဢမ်ႇႁတ်းဢွၵ်ႇႁိူၼ်း၊ ဢမ်ႇၸၢင်ႊၵႂႃႇဢႅဝ်ႇလႄႇၵၼ်၊ ဢမ်ႇႁတ်းၵႂႃႇတီႈ ၵူၼ်းၵိုၼ်းၶွၼ်ႈၸိူဝ်းၼႆႉ။ ပေႃးယူႇႁိူၼ်းႁိုင်ႁိုင်ၸိုင် ၵူၼ်းႁဝ်းတေဢွၼ်ၵၼ်ၶၢၼ်ႉ၊ ၸႂ်တေသုၵ်ႉသၵ်ႉ၊ ၸႂ်တေၵႅပ်ႈၵိၼ်း ၸိူဝ်းၼႆႉယဝ်ႉ။ ၵူၺ်းၵႃႈ ၼင်ႇႁိုဝ် တေဢမ်ႇပဵၼ်ၸိိူင်ႉၼၼ်ႉ မီးလၢႆးတၢင်းမၼ်းယူႇ။ ႁဝ်းလူဝ်ႇမေႃၸႂ်ႉတိုဝ်း ၶၢဝ်းယၢမ်း ဢၼ်လႆႈၵဵပ်းတူဝ်ယူႇတီႈႁိူၼ်းၼႆႉ ႁႂ်ႈမီးၽွၼ်းၵွႆး။\n\nၸၢမ်းႁဵတ်းတူၺ်း တၢင်းၵိၼ်ဢၼ်မႂ်ႇမႂ်ႇ\n\nၶၢဝ်းယၢမ်းၼႆႉ ပဵၼ်ၶၢဝ်းယၢမ်းလီ တႃႇႁဝ်းတေၸၢမ်းႁဵတ်းတူၺ်း ဢၼ်မႂ်ႇမႂ်ႇၼၼ်ႉယဝ်ႉ။ ယွၼ်ႉဢမ်ႇလႆႈဢွၵ်ႇႁိူၼ်းၼႆသေယႃႇပေ ၶီငဝ်ယူႇ။  ၸၢမ်းႁဵတ်းၵိၼ် တၢင်းၵိၼ်ဢၼ်ႁဝ်းၶႂ်ႈၵိၼ်ၼၼ်ႉ ႁင်းၵွႆးလႄႈ။ ပေႃးဢမ်ႇႁူႉလၢႆးမၼ်းၵေႃႈ ႁႃၼိူဝ်ဢွၼ်ႇလႅင်း၊ ၵပ်းၾူၼ်းထၢမ် တႆးၵေႃႉတႆးသေႈႁဝ်းလႆႈယူႇ။ ပေႃးႁဝ်းႁဵတ်းၼႆၸိုင် ၶၢဝ်းယၢမ်းတၼ်းသဵင်ႈၵႂႃႇမိူဝ်ႈလႂ်ၵေႃႈ တေဢမ်ႇတၼ်းႁူႉၵွၼ်ႇ။ ႁဝ်းၵေႃႈ တေမေႃႁဵတ်းတၢင်းၵိၼ်ၵႂႃႇတေႉတေႉ ၼၼ်ႉၼႃႇ။\n\nPhoto by Min An on Pexels.com\n\" data-medium-file=\"https://hsenhu.files.wordpress.com/2020/04/pexels-photo-1639047.jpeg?w=300\" data-large-file=\"https://hsenhu.files.wordpress.com/2020/04/pexels-photo-1639047.jpeg?w=1024\" src=\"https://hsenhu.files.wordpress.com/2020/04/pexels-photo-1639047.jpeg?w=750\" alt=\"\" class=\"wp-image-310\" srcset=\"https://hsenhu.files.wordpress.com/2020/04/pexels-photo-1639047.jpeg?w=750 750w, https://hsenhu.files.wordpress.com/2020/04/pexels-photo-1639047.jpeg?w=1500 1500w, https://hsenhu.files.wordpress.com/2020/04/pexels-photo-1639047.jpeg?w=150 150w, https://hsenhu.files.wordpress.com/2020/04/pexels-photo-1639047.jpeg?w=300 300w, https://hsenhu.files.wordpress.com/2020/04/pexels-photo-1639047.jpeg?w=768 768w, https://hsenhu.files.wordpress.com/2020/04/pexels-photo-1639047.jpeg?w=1024 1024w\" sizes=\"(max-width: 750px) 100vw, 750px\" /> Photo by Min An on Pexels.com\n\nလူပပ်ႉလိၵ်ႈ ဢၼ်ႁဝ်းလႆႈၸႂ်\n\nၽိူဝ်ႇႁဝ်း တေၵုမ်ႇတူၺ်းၶၢဝ်ႇငၢဝ်းသေ မႆႈၸႂ်၊ ၵူဝ်ႁေ ယူႇတိၵ်းတိၵ်းၼၼ်ႉ တႃႉႁဝ်းႁႃလူပပ်ႉလိၵ်ႈ၊ ပပ်ႉၸိိူင်း ဢၼ်ႁဝ်းလႆႈၸႂ်၊ ဢၼ်တေမီးၽွၼ်းလီ တႃႇႁဝ်းၼၼ်ႉလႃႈ။  ဢမ်ႇတူၺ်းၶၢဝ်ႇငၢဝ်းသေဢိတ်းၼႆတႄႉ ဢမ်ႇဝႃႈ ၼင်ႇၵဝ်ႇ။ လူဝ်ႇတူၺ်း၊ လူဝ်ႇထွမ်ႇ၊ လူဝ်ႇႁူႉၶၢဝ်ႇငၢဝ်း  ႁႂ်ႈၶိုတ်းတၼ်းယူႇ။ ၵူၺ်းၵႃႈ ၶၢဝ်ႇငၢဝ်း ၸိူဝ်းၼၼ်ႉ ၸၢင်ႊႁဵတ်းႁႂ်ႈၸႂ်ႁဝ်းသုၵ်ႉသၵ်ႉလႄႈ တႃႇတေႁႃၸႂ်၊ တႃႇလိိုမ်းပႅတ်ႈမၼ်းၸူဝ်ႈၵႅပ်ႈၼၼ်ႉ ႁႃပပ်ႉလိၵ်ႈ၊  ပပ်ႉၸိူင်း မႃးလူဢၢၼ်ႇၼႆႉ လီလိူဝ်ပိူၼ်ႈယဝ်ႉ။\n\nPhoto by JESHOOTS.com on Pexels.com\n\" data-medium-file=\"https://hsenhu.files.wordpress.com/2020/04/pexels-photo-1040160.jpeg?w=300\" data-large-file=\"https://hsenhu.files.wordpress.com/2020/04/pexels-photo-1040160.jpeg?w=1024\" src=\"https://hsenhu.files.wordpress.com/2020/04/pexels-photo-1040160.jpeg?w=1024\" class=\"wp-image-359\" srcset=\"https://hsenhu.files.wordpress.com/2020/04/pexels-photo-1040160.jpeg?w=1024 1024w, https://hsenhu.files.wordpress.com/2020/04/pexels-photo-1040160.jpeg?w=150 150w, https://hsenhu.files.wordpress.com/2020/04/pexels-photo-1040160.jpeg?w=300 300w, https://hsenhu.files.wordpress.com/2020/04/pexels-photo-1040160.jpeg?w=768 768w, https://hsenhu.files.wordpress.com/2020/04/pexels-photo-1040160.jpeg 1880w\" sizes=\"(max-width: 1024px) 100vw, 1024px\" /> Photo by JESHOOTS.com on Pexels.com\n\nတူၺ်းၸိူင်းငဝ်း ၸွမ်းၵေႃႉႁၵ်ႉတီႈႁိူၼ်း\n\nတူၺ်းၸိူင်းငဝ်းၼႆႉ ၵမ်ႈၽွင်ႈဝူၼ်ႉဝႃႈ ဢမ်ႇလီ၊ သုမ်းၶၢဝ်းယၢမ်း လၢႆလၢႆၵွႆး ၼႆယူႇ။ တီႈတေႉဢမ်ႇၸႂ်ႈၸိူင်ႉၼၼ် ၸိူင်းငဝ်းၼႆႉ ၸၢင်ႊပၼ်လႆႈ  လွင်ႈၶုၺ်ႉႁၼ်၊ လွင်ႈၸေႃႈၸႂ်၊ တၢင်းဝူၼ်ႉ၊ ပၢႆးႁၼ် တီႈၵူၼ်းတူၺ်းမၼ်းယူႇ။ ၸိူင်းမၢင်ဢၼ်ၼႆႉ ယွၼ်ႉမၼ်းဢိင်ၼိူဝ် ပိူင်ပဵၼ်တေႉမီးတေႉသေ ၸတ်းပဵၼ်ၸိူင်းငဝ်းမႃးလႄႈ ၵူၼ်းတူၺ်းမၼ်း လႆႈတၢင်းႁူႉၼမ်တေႉတေႉ။ ယဝ်ႉၵေႃႈ တေတိူဝ်းၸမ်ၸႂ်  ၵၼ်တင်းၵေႃႉႁၵ်ႉႁဝ်းထႅင်ႈၵွၼ်ႇ။  ယွၼ်ႉၼၼ်ႉ ၼႂ်းၶၢဝ်းယၢမ်းဢၼ် ထုၵ်ႇလီၵဵပ်းတူဝ်ဝႆႉၼႂ်းႁိူၼ်းၼႆႉ ၸႂ်ႉတိုဝ်း ႁႂ်ႈမီးၽွၼ်းလီတႃႉ။\n\nPhoto by Jan Kopu0159iva on Pexels.com\n\" data-medium-file=\"https://hsenhu.files.wordpress.com/2020/04/pexels-photo-3811731.jpeg?w=200\" data-large-file=\"https://hsenhu.files.wordpress.com/2020/04/pexels-photo-3811731.jpeg?w=683\" src=\"https://hsenhu.files.wordpress.com/2020/04/pexels-photo-3811731.jpeg?w=683\" alt=\"\" class=\"wp-image-296\" srcset=\"https://hsenhu.files.wordpress.com/2020/04/pexels-photo-3811731.jpeg?w=683 683w, https://hsenhu.files.wordpress.com/2020/04/pexels-photo-3811731.jpeg?w=100 100w, https://hsenhu.files.wordpress.com/2020/04/pexels-photo-3811731.jpeg?w=200 200w, https://hsenhu.files.wordpress.com/2020/04/pexels-photo-3811731.jpeg?w=768 768w, https://hsenhu.files.wordpress.com/2020/04/pexels-photo-3811731.jpeg 867w\" sizes=\"(max-width: 683px) 100vw, 683px\" /> Photo by Jan Kopu0159iva on Pexels.com\n\nၽိုၵ်း၊ လိုမ်ႉၼမ်ႉၵတ်ႉ တူဝ်ၵဝ်ႇ\n\nၼႂ်းၶၢဝ်းယၢမ်း ၸိိူင်ႉၼႆ ပဵၼ်ၶၢဝ်းလီ တီႈသုတ်း  ဢၼ်ထုၵ်ႇလီၽိုၵ်း၊ လိုမ်ႉၶိုၼ်း ၼမ်ႉၵတ်ႉႁဝ်းၼၼ်ႉယဝ်ႉ။ မိူၼ်ၼင်ႇ ပေႃးႁဝ်းလႆႈၸႂ် တွႆႇတိင်ႇၼႆၵေႃႈ   ဢဝ်ၶၢဝ်းယၢမ်းၼႆႉသေ ၽိုၵ်း ဢမ်ႇၼၼ် ၼင်ႇႁိုဝ် ၼမ်ႉၵတ်ႉႁဝ်း  တေဢမ်ႇတူၵ်းလူင်းၵႂႃႇၼၼ်ႉ ဢဝ်ၶၢဝ်းယၢမ်းဢၼ်ၼႆႉသေ လိုမ်ႉၶိုၼ်းလႃႈ။\n\nPhoto by cottonbro on Pexels.com\n\" data-medium-file=\"https://hsenhu.files.wordpress.com/2020/04/pexels-photo-3171202.jpeg?w=200\" data-large-file=\"https://hsenhu.files.wordpress.com/2020/04/pexels-photo-3171202.jpeg?w=684\" src=\"https://hsenhu.files.wordpress.com/2020/04/pexels-photo-3171202.jpeg?w=684\" class=\"wp-image-361\" srcset=\"https://hsenhu.files.wordpress.com/2020/04/pexels-photo-3171202.jpeg?w=684 684w, https://hsenhu.files.wordpress.com/2020/04/pexels-photo-3171202.jpeg?w=100 100w, https://hsenhu.files.wordpress.com/2020/04/pexels-photo-3171202.jpeg?w=200 200w, https://hsenhu.files.wordpress.com/2020/04/pexels-photo-3171202.jpeg?w=768 768w, https://hsenhu.files.wordpress.com/2020/04/pexels-photo-3171202.jpeg 868w\" sizes=\"(max-width: 684px) 100vw, 684px\" /> Photo by cottonbro on Pexels.com\n\nယူႇၸွမ်းၵူၼ်းတီႈႁိူၼ်း မူၼ်ႈမူၼ်ႈသိူဝ်းသိူဝ်း\n\nၵၢပ်ႈပၢၼ်မိူဝ်ႈလဵဝ် တႃႇတေႁႂ်ႈမီးၶၢဝ်း ယူႇတွမ်ၵွၵ်းၵၼ်တင်း ၵူၼ်းတီႈႁိူၼ်းၼႆႉ ဢမ်ႇငၢႆႈငၢႆႈ၊ ၵူၼ်းၵမ်ႈၼမ်ၼမ်ၼႆႉ ယွၼ်ႉၵၢၼ်ၽႂ်ၵၢၼ်မၼ်းသေ မူႇၶဝ်ႈတီႈႁိူၼ်းၼၼ်ႉ ယင်းဢမ်ႇမီးၵူၼ်းၸေးသေပွၵ်ႈ။ ပွင်ႇဝႃႈ ဢမ်ႇလႆႈၵိၼ်ၶဝ်ႈ  ႁူမ်ႈမူႇၵူၼ်းတီႈႁိူၼ်းၼၼ်ႉယဝ်ႉ။ ယွၼ်ႉၼၼ် ဢဝ်တိုဝ်ႉတၢင်းလီ ဢၼ်ၼႆႉ​ေသ ယူႇသဝ်းၸွမ်းၵူၼ်းတီႈႁိူၼ်း ႁႂ်ႈမီးတၢင်းသိူဝ်းၸႂ်ၶႃႈလႄႈ  လွင်ႈၵၢၼ်ငၢၼ်း ၸိူဝ်းၼၼ်ႉ တမ်းဝႆႉၵမ်းၼိုင်ႈ။ ပေႃးငဝ်းလၢႆး တၢင်းပဵၼ်လီမႃး ၸင်ႇသိုပ်ႇႁဵတ်းထႅင်ႈၼၼ်ႉၶႃႈၼႃႇ။\n\nႁႂ်ႈတၼ်းဝၵ်ႉလႆႈ  တိုဝ်ႉတၢင်းၶၢဝ်းယၢမ်းလီၼႆႉသေ ၸႂ်ႉတိုဝ်း ႁႂ်ႈမီးၽွၼ်းလီတႃႇ တူဝ်ၸဝ်ႈၵဝ်ႇသေၵမ်း။"
+  },
+  {
+    "title": "ၵူၼ်းၸိူဝ်းၵႆႉဢဝ်ၾူၼ်းဝႆႉႁိမ်းႁူဝ်ၼွၼ်းၼၼ်ႉ ထု���်ႇလီလူတေႉတေႉ",
+    "content": "ယွၼ်ႉပၢႆးပၺႃႇ ၵူၼ်းႁဝ်း ၶိုၼ်ႈယႂ်ႇမႂ်ႇသုင်မႃးတိၵ်းတိၵ်းလႄႈ ၵူၼ်းၵၢပ်ႈပၢၼ် မိူဝ်ႈလဵဝ်ၵေႃႈ တႃၼွၼ်းလူႉၸွမ်းမႃး တိၵ်းတိၵ်းယဝ်ႉ။  ၽူႈလူင်ႉလႅၼ်ႇ ၸိူဝ်းၶူၼ်ႉၶႂႃႉ လွင်ႈၼွၼ်းၶဝ် လၢတ်ႈဝႆႉဝႃႈ ၼႂ်းလုမ်ႈၾႃႉၼႆႉ   ၵူၼ်းမွၵ်ႈ 33 ဝၢၵ်ႈ  တေႃႇ 45 ဝၢၵ်ႈၼႆႉ  တႃၼွၼ်းလူႉလႄႈ ၶဝ်ႁိူဝ်ႉဢူၼ်ႈၼူၼ်း ယူႇၵူႊယၢမ်း၊ ၸႂ်ပိတ်း ၸႂ်ပွတ်း၊ ဢီႈသင်ၵေႃႈ ဢမ်ႇသူႈလႃႈလီ မိူၼ်ၸႂ်ၶဝ် ၼႆယဝ်ႉ။  ၸုမ်းၽၢႆႇပၢႆးယူႇလီ လုမ်ႈၾႃႉၶဝ်ၵေႃႈ လၢတ်ႈဝႆႉဝႃႈ  ၵူၼ်းႁဝ်းၼိုင်ႈၵေႃႉၼႆႉ တီႈဢေႇသုတ်း ၼိုင်ႈဝၼ်းလူဝ်ႇလႆႈမီး ၶၢဝ်းယၢမ်းၼွၼ်း ၸဵတ်း ၸူဝ်ႈမူင်း တေႃႇ  ၵဝ်ႈ ၸူဝ်ႈမူင်း ၼႆယဝ်ႉ။\n\nၵူၼ်းၵၢပ်ႈပၢၼ် မိူဝ်ႈလဵဝ်ၼႆႉ ယွၼ်ႉၾူၼ်း၊ ထီးဝီး၊ ထႅပ်ႉလႅတ်ႇ ၸိူဝ်းၼႆႉ မႃးႁိမ်ဢဝ် ၶၢဝ်းယၢမ်းၼွၼ်းႁဝ်းပႅတ်ႈလႄႈ  ႁဵတ်းႁႂ်ႈၶၢဝ်းယၢမ်းၼွၼ်းႁဝ်းယွမ်းလူင်းၵႂႃႇပႅတ်ႈယဝ်ႉ။ ဢၼ်ႁၢႆႉၸႃႉ လိူဝ်ပိူၼ်ႈၼၼ်ႉတႄႉ ပဵၼ်ၾူၼ်းမိုဝ်းထိုဝ်ၼၼ်ႉယဝ်ႉ။\n\nၸွမ်းၼင်ႇၶေႃႈမုၼ်း ဢၼ်ၶူၼ်ႉၶႂႃႉမႃးၼၼ်ႉ လႆႈႁူႉဝႃႈ ၵူၼ်းမွၵ်ႈ 50 ဝၢၵ်ႈၼႆႉ ဢဝ်ၾူၼ်းမိုဝ်းထိုဝ် ဝႆႉႁိမ်းႁူဝ်ၼွၼ်းၶဝ် ၼႆယဝ်ႉ။ ၵမ်ႈၽွင်ႈၵေႃႈဝႃႈ ယွၼ်ႉၵူဝ် ပီႈၼွင်ႉ တၢင်းၵႆ ၵပ်းမႃးႁႃ၊ ၵမ်ႈၽွင်ႈၵေႃႈ ယွၼ်ႉလူဝ်ႇတင်ႈယၢမ်းမူင်း တႃႇပူၵ်းလုၵ်ႉၵၢင်ၼႂ်  ၸဵမ်ၸိူဝ်းၼႆႉ။\n\nယွၼ်ႉသင်သေ ဢဝ်ၾူၼ်းဝႆႉ ႁိမ်းႁူဝ်ၼွၼ်းၵေႃႈယဝ်ႉ ပေႃးၾူၼ်းမႃး ၵၢင်ၶိုၼ်း၊ ပေႃးလိၵ်ႈပွတ်း ၶဝ်ႈမႃး ၸိူဝ်းၼႆႉၸိုင် ၼႃႈၵႅဝ်ႈၾူၼ်းႁဝ်းတေလႅင်းမႃးသေ တေႁဵတ်းႁႂ်ႈႁဝ်းတိုၼ်ႇ၊ တႃၼွၼ်းႁဝ်းတေလူႉ ယူႇယဝ်ႉ။\n\nၵူၼ်းၼုမ်ႇ ပၢၼ်မိူဝ်ႈလဵဝ်ၼႆႉ ဢွၼ်ၵၼ်ၸႂ်ႉတိုဝ်း ၾဵတ်ႉပုၵ်ႉ တေႃႇၵၢင်ၶိုၼ်းလိုၵ်း၊ လဵၼ်ႈၵဵမ်းတေႃႇ ၵၢင်ၶိုၼ်းလိုၵ်း၊ တူၺ်းၸိူင်း တေႃႇၵၢင်ၶိုၼ်းလိုၵ်း ၸိူဝ်းၼႆႉယဝ်ႉ။  သႅင်ၾႆး ဢၼ်ႁိူဝ်ႈဢွၵ်ႇမႃး တီႈၼႃႈၵႅဝ်ႈ ၾူၼ်းၼၼ်ႉ မၼ်းမႃးယႃႉတႃၼွၼ်းႁဝ်းယဝ်ႉ။ သႅင်ၾႆးၼၼ်ႉ မၼ်းမိူၼ်ၵၼ်တင်း သၢႆလႅင်း မိူဝ်ႈၵၢင်ဝၼ်းၼၼ်ႉလႄႈ ႁဵတ်းႁႂ်ႈႁေႃႇမုၼ်း  ၼႂ်းတူဝ် ဢၼ်ဢွၵ်ႇၵၢင်ၶမ်ႈ ဢၼ်တေႁဵတ်းႁႂ်ႈႁဝ်းၶႂ်ႈၼွၼ်းၼၼ်ႉ ယွမ်းလူင်းၵႂႃႇ၊ တူဝ်ႁဝ်းၵေႃႈ တေတိုၼ်ႇဝႆႉသေ ဢမ်ႇၶႂ်ႈၼွၼ်းၼၼ်ႉယဝ်ႉ။ ယွၼ်ႉၼၼ် ႁဝ်းတေၼွၼ်းၼၢၼ်းလပ်း။\n\nပေႃးႁဝ်းၶၢၼ်တႃၼွၼ်းႁိုင်မႃးၸိုင် ႁႅင်းၸင်ႈၶၢမ်ႇ ၼႂ်းတူဝ်ႁဝ်း တေယွမ်းလူင်းၵႂႃႇ၊ မူင်ႈမႅင်း တၢင်းပဵၼ်ၵေႃႈ တေၸၢင်ႊၶဝ်ႈမႃးၼႂ���းတူဝ်ႁဝ်းလႆႈငၢႆႈငၢႆႈငႅမ်ႈငႅမ်ႈ။ ယဝ်ႉၵေႃႈ တူဝ်ၶိင်းႁဝ်း တေပီးၶိုၼ်ႈ၊ တေပဵၼ်ယဵဝ်ႈဝၢၼ်ႈ၊ ထၢတ်ႈၸႂ်တူၵ်း  ၸိူဝ်းၼႆႉယဝ်ႉ။\n\nယွၼ်ႉၼၼ်ႉ ပေႃးပဵၼ်လႆႈတႄႉ ယႃႇဢဝ်ၾူၼ်းဝႆႉ ႁိမ်းႁူဝ်ၼွၼ်းႁဝ်း၊ သင်ဝႃႈ တိုၼ်းလူဝ်ႇလႆႈဝႆႉၼႆၵေႃႈ ဢဝ်ၼႃႈၵႅဝ်ႈၾူၼ်းႁဝ်းၼၼ်ႉ ငူပ်ႉလူင်းတၢင်းတႂ်ႈလႄႈ။ တႅၼ်းတီႈ တေၸႂ်ႉတိုဝ်း ၾဵတ်ႉပုၵ်ႉ၊ လဵၼ်ႈၵဵမ်း မိူဝ်ႈၸမ်တေၼွၼ်းၼၼ်ႉ ဢၢၼ်ႇပပ်ႉလိၵ်ႈ ဢၼ်တေပၼ်တၢင်းႁူႉႁဝ်းလႆႈၼၼ်ႉလီလိူဝ်ပိူၼ်ႈယဝ်ႉ။"
+  },
+  {
+    "title": "ယွၼ်ႉတၢင်းပဵၼ် ၶူဝ်းဝိတ်ႈ – 19 လႄႈ ၸၼ်ႉၸွမ် တီႈမိူင်းၵျႃႇပၢၼ်ႇ လႆႈၸႂ်ႉႁုၼ်ႇႁၢင်ႊသေ ႁပ်ႉၸုမ်ႈၶူး",
+    "content": "လုၵ်ႈႁဵၼ်း တီႈၸၼ်ႉၸွမ် ထူဝ်ႇၶျူဝ်ႇ မိူင်းၵျႃႇပၢၼ်ႇ ၸိူဝ်းလႆႈႁပ်ႉၸုမ်ႈၶူး ၼႂ်းပီႊၼႆႉ ဢမ်ႇလႆႈႁပ်ႉၸွမ်းၼင်ႇ ၾိင်ႈထုင်းမိူင်းၵျႃႇပၢၼ်ႇ၊ ယွၼ်ႉတၢင်းပဵၼ် ၶူဝ်းဝိတ်ႈ -19 ၼႆႉလႄႈ လုၵ်ႈႁဵၼ်းၶဝ်လႆႈဢဝ် ႁုၼ်ႇႁၢင်ႊၸၢၵ်ႈသေ မႃးႁပ်ႉၸုမ်ႈၶူးတၢင်ၶဝ် ၼႆယဝ်ႉ။\n\nပၢင်ႁပ်ႉၸုမ်ႈၶူးၼႆႉ ၸတ်းႁဵတ်း မိူဝ်ႈမၢတ်ႈ 28 ဝၼ်း လုၵ်ႈႁဵၼ်းၶဝ် ၸႂ်ႉၾူၼ်း ႁွင်ႉႁဝ်းႁၢင်ႊသဵင် (Zoom video called) သေ ၸႂ်ႉႁုၼ်ႇႁၢင်ႊၸၢၵ်ႈ ႁပ်ႉၶူးဢဝ် ၼႆယဝ်ႉ။\n\nတၢင်းပဵၼ်ပွတ်ႇၵႂ်ႈ ၶူဝ်းဝိတ်ႈ -19  ဢၼ်တႄႇပဵၼ်မႃး တီႈဝဵင်းဝူႇႁၢၼ်ႉ မိူင်းၶႄႇၼၼ်ႉ မိူဝ်ႈလဵဝ်ၽႄႈၸွတ်ႇလုမ်ႈၾႃႉဝႆႉသေ မီးၵူၼ်းတိတ်းၸပ်း ၼပ်ႉႁူဝ်လၢၼ်ႉၵေႃႉ လႄႈ တၢႆ ၼပ်ႉႁူဝ်မိုၼ်ႇၵေႃႉယဝ်ႉ။ ယွၼ်ႉၼၼ်လႄႈ ႁူင်းႁဵၼ်း၊ ပွႆးလၢမ်း၊ တီႈၵူၼ်းၵိုၼ်းၶွၼ်ႈ ၸိူဝ်းၼႆႉ လႆႈဢိုတ်းပႅတ်ႈသဵင်ႈသဵင်ႈ။  ၵွပ်ႈၼၼ် လုၵ်ႈႁဵၼ်းၶဝ် ၸင်ႇႁႃးလၢႆးတၢင်း ႁႂ်ႈလႆႈဢဝ် ႁုၼ်ႇႁၢင်ႊၸၢၵ်ႈၼႆႉတၢင်တူဝ်ၶဝ်သေ ၶဝ်ႈႁပ်ႉၸုမ်ႈၶူး ၼႆယဝ်ႉ။\n\nမိူင်းၵူၼ်းၼႆႉ ပေႃးႁႃးလၢႆးတၢင်းတိၵ်းတိၵ်း၊ ၶတ်းၸႂ် တိၵ်းတိၵ်းၼႆ တိုၼ်းပဵၼ်မႃးလႆႈယူႇၼႆ ၼႆႉပဵၼ်လၵ်းထၢၼ် ဢၼ်ၼိုင်ႈယဝ်ႉ။"
+  },
+  {
+    "title": "ပေႃးပဵၼ်ၵူၼ်းၸၢႆး ႁႃႈလၢႆးၼႆႉ တိုၼ်းလူဝ်ႇမေႃ",
+    "content": "ယိုင်ႈၵၢပ်ႈပၢၼ်ၼႆႉ ၶိုၼ်ႈယႂ်ႇမႃး ယိုင်ႈႁဝ်းၶႃႈ ၶႅၼ်းလူဝ်ႇမေႃ တၢင်းမေႃၼမ်တိၵ်းတိၵ်းၼၼ်ႉယဝ်ႉ။ လိူဝ်တေ မီးတၢင်းႁူႉတဵမ်ထူၼ်ႈၼၼ်ႉ ၵူၼ်းၸၢႆးၼႆႉ ယင်းလူဝ်ႇမီးတၢင်းမေႃထႅင်ႈၵွၼ်ႇယဝ်ႉ။\n\nတၢင်းမေႃမၢင်မဵဝ်းၼႆႉ ဢမ်ႇတၢပ်ႈလူဝ်ႇၵႂႃႇ ႁဵၼ်းသွၼ်ဢဝ်တီႈႁူင်းႁဵၼ်းၵေႃႈ ၸၢင်ႊမေႃလႆႈယူႇ။ တၢင်းမေႃ ႁႃႈမဵဝ်း ဢၼ်တေလၢတ်ႈၼႄၵႂႃႇၼႆႉၵေႃႈ ပဵၼ်တၢင်းမေႃ ၽူႈၸၢႆးၵူႊၵေႃႉ ထုုၵ်ႇလီမေႃ လႄႈ ၸႂ်ႉတိုဝ်���လႆႈ ၼႂ်းၸၢတ်ႈပၢၼ်ႁဝ်းတေႉတေႉၼၼ်ႉယဝ်ႉ။\n\nလၢႆးၶႅၼ်ႉ\n\nၵေႃႉၸၢႆးဢၼ်ဝႃႈၼႆႉ ပဵၼ်ၵူၼ်းမဵဝ်းဢၼ်ဢမ်ႇပေႉၵိၼ် ၵူၼ်းဢၼ်ႁႅင်းဢူၼ်ႈ၊ ႁႅင်းၼွႆႉလိူဝ်မၼ်း ယဝ်ႉၵေႃႈ ပဵၼ်ၵူၼ်းဢၼ်ဢမ်ႇၵူမ်ႈႁူဝ်ၶၢမ်ႇ  လွင်ႈပိူၼ်ႈတဵၵ်းတဵင် ၼၼ်ႉယဝ်ႉ။ ၵူၼ်းၸၢႆးၼိုင်ႈၵေႃႉၼႆႉ ၼင်ႇႁိုဝ် တေၵႅတ်ႇၶႄတူဝ်ၵဝ်ႇလႆႈ ၼင်ႇႁိုဝ်  တေၸၢင်ႊၸွႆႈထႅမ် တၢင်ႇၵေႃႉၼၼ်ႉ ထုၵ်ႇလီမေႃ လၢႆးၶႅၼ်ႉ ယူႇယဝ်ႉ။\n\nမိုဝ်ႉႁုင်\n\nၵူၼ်းမိုဝ်ႉႁုင်ၼႆႉ ဢမ်ႇၸႂ်ႈၵၢၼ် တႃႇၽူႈယိင်းၵွႆး၊ ၵူၼ်းၸၢႆးၸိူဝ်းမေႃ မိုဝ်ႉမေႃႁုင်ၼၼ်ႉ ၸၢင်ႊပဵၼ်ၸဝ်ႈၽူဝ်လီ လႄႈ ၸၢင်ႊပဵၼ်တႆးၵေႃႉလီ တႃႇၼၢင်းယိင်းၶဝ်ၵွၼ်ႇယဝ်ႉ။ ထႅင်ႈလွင်ႈၼိုင်ႈတႄႉ ပေႃးႁဝ်းၵူၼ်းၸၢႆး ၵႂႃႇမိုဝ်ႉႁုင်၊ ၵႂႃႇၸွႆႈမေးၼၢင်းႁဝ်း မိုဝ်ႉႁုင်ၸိုင် တေႁဵတ်းႁႂ်ႈႁဝ်း တိူဝ်းၸမ်ၸႂ်ၵၼ်တင်း မေးၼၢင်းႁဝ်း ​ႄလႄႈ ၵူၼ်းၼႂ်းႁိူၼ်း ယူႇယဝ်ႉ။\n\nႁူႉလွင်ႈလူတ်ႉၵႃး\n\nၵွမ်ႉမၢၵ်ႇၵႃးပွင်ႇ၊ ၼမ်ႉမၼ်းမူတ်း၊ လူမ်းၶမ်ၼႂ်းလွတ်ႇၼမ်ႉမၼ်းၸၢၵ်ႈ မွၵ်ႈၼၼ်ႉၵွႆး ဢမ်ႇထုၵ်ႇလီလႆႈ ပႂ်ႂ်ႉပိူၼ်ႈတၢင်ႇၵေႃႉ မႃးၸွႆႈထႅမ်သႄႈ။ ၼႆႉ ၸင်ႇပဵၼ်ၵူၼ်းဢၼ်ၸႅတ်ႈၸၢင်ႇယဝ်ႉ။ ၸဵမ်လၢႆႈ မၢၵ်ႇသႅင်ၾႆး၊ လွတ်ႈၼမ်ႉ၊ ၶိူင်ႈၸႂ်ႉၶူဝ်း တႃႇၼႂ်းႁိူၼ်းႁဝ်းၵွႆးတႄႉ ဢမ်ႇထုၵ်ႇလီလႆႈၵႂႃႇပိုင်ႈဢိင်ပိူၼ်ႈၼင်ႇၵဝ်ႇ။\n\nမေႃၶဝ်ႈဢွၵ်ႇပိူၼ်ႈ\n\nၵၢၼ်ဢၼ်မေႃၶဝ်ႈၵႄႈဢွၵ်ႇၵၢင်ပိူၼ်ႈၼႆႉ တိုၼ်းပဵၼ် တၢင်းမေႃ ဢၼ်ၵူၼ်းႁဝ်း ၵူႊၵေႃႉ ထုၵ်ႇလီမေႃယူႇယဝ်ႉ။ ပေႃးႁဝ်း မေႃၶဝ်ႈဢွၵ်ႇပိိူၼ်ႈ၊ မေႃလၢတ်ႈမေႃၸႃ၊ မေႃၼိုင်ႈမေႃဝႆ၊ မေႃယူႇမေႃသဝ်းၸိုင် ၵုင်ႇမုၼ်ႁဝ်းၵေႃႈ တေၶိုၼ်ႈမႃးယဝ်ႉ။\n\nမေႃမိုဝ်း\n\nပေႃးမေႃ ႁဵတ်းၽိူၼ်၊ ႁဵတ်းၼင်ႇတင်ႈ၊ ႁဵတ်းၶိူင်ႈတႃႇ ၸႂ်ႉတိုဝ်းတီႈႁိူၼ်းႁဝ်း ႁင်းၵွႆးၶေႃၶေႃၸိုင် တိုၼ်းၶဝ်ႈတၢင်းတိုဝ်းယဝ်ႉ။ ၸၢင်ႊလူတ်းယွမ်း ငိုၼ်းၸႂ်ႉၸၢႆႇ ၼႂ်းႁိူၼ်းၵွႆး ဢမ်ႇၵႃး ပဵၼ်ပၢႆးယူႇလီပႃးၼၼ်ႉၼႃႇ။"
+  },
+  {
+    "title": "ၼင်ႇႁိုဝ် ၵူၼ်းႁိူၼ်းႁဝ်း တေဢမ်ႇၸပ်း တၢင်းပဵၼ် ယွၼ်ႉႁဝ်းၼၼ်ႉ ႁဵတ်းၸိူင်ႉၼႆလႄႈ",
+    "content": "မိူဝ်ႈလဵဝ် တၢင်းပဵၼ်ပွတ်ႇၵႂ်ႈ ၶူဝ်းဝိတ်ႈ-19  ၼႆႉလႄႈ ႁဵတ်းႁႂ်ႈၵူၼ်းႁဝ်း ဢွၼ်ၵၼ်တိုၼ်ႇသၢၼ်ႈ ၵူဝ်ႁေယူႇ။\n\nယွၼ်ႉၵူဝ်တၢင်းပဵၼ်လႄႈ ၵူၼ်းၵမ်ႈၼမ်ၼမ်ဢွၼ်ၵၼ် ႁဵတ်းၵၢၼ်တီႈႁိူၼ်းၵွႆး။ ၵူၼ်းၸိူဝ်း​ဢမ်ႇၸၢင်ႊႁဵတ်းၸိူင်ႉႁိုဝ်ၵႃႈလႆႈၵႂႃႇၵၢၼ်၊ ၵႂႃႇလုမ်းၼၼ်ႉၵေႃႈ မီးယူႇ။ ယွၼ်ႉၼၼ် ၼင်ႇႁိုဝ် ၵူၼ်းၼႂ်းႁိူၼ်းႁဝ်း တေဢမ်ႇၸပ်း တၢင်းပဵၼ်ယွၼ်ႉႁဝ်းၼၼ်ႉ ႁဵတ်းၸွမ်းၸိူင်ႉၼင်ႇ တၢင်းတႂ်ႈၼႆႉၶႃႈလႄႈ။\n\nၼင်ႇႁုိဝ် ၵူၼ်းၼႂ်းႁိူၼ်းႁဝ်း တေဢမ်ႇၸပ်း တၢင်းပဵၼ်ယွၼ်ႉႁဝ်းၼၼ်ႉ…\n\nၵႂႃႇတၢင်းၼွၵ်ႈမႃး မိူဝ်ႈလႂ်သေဢမ်ႇဝႃႈ …\n\nယႃႇပေ ယိပ်းသင်– မိူဝ်ႈတႄႇၽႅဝ်မႃးၶိုၼ်း တီႈႁိူၼ်း ယႃႇၽုုမ်ႈယိပ်းသင်၊ ယွၼ်ႉဝႃႈ တီႈမိုဝ်း တီႈတူဝ်ၶိင်းႁဝ်း ၸိူဝ်းၼႆႉ မႅင်းတၢင်းပဵၼ် ၸၢင်ႊၸပ်းမႃးၸွမ်းၼၼ်ႉယဝ်ႉ။ သုၵ်ႈမိုဝ်း ဢွၼ်တၢင်းၵွၼ်ႇလႄႈ။\n\nထွတ်ႇၶႅပ်းတိၼ်/သွၵ်းတိၼ်းဝႆႉ တၢင်းၼွၵ်ႈႁိူၼ်း – ၶႅပ်းတိၼ်/သွၵ်းတိၼ်ႁဝ်းၼႆႉ ယဵပ်ႇၺႃးၵူႊမဵဝ်းလႄႈ ၸၢင်ႊမီးမႅင်းတၢင်းပဵၼ်တိတ်းၸပ်းဝႆႉ။ ယွၼ်ႉၼၼ် ဢၼ်လီလိူဝ်ပိူၼ်ႈသုတ်းတႄႉ ထွတ်ႇဝႆႉ တၢင်းၼွၵ်ႈႁိူၼ်းၼၼ်ႉလႃႈ။\n\nဢဝ်ထူင်ပႃးဝႆႉ ႁိမ်းၾၵ်းတူႁိူၼ်းၼၼ်ႉၵမ်းၼိုင်ႈ–  တီႈၾၵ်းတူႁိူၼ်းႁဝ်းၼၼ်ႉ ဝႆႉသႃႉဢၼ်ၼိုင်ႈသေ ထူင်ပႃး၊  ၵႅင်ႉၶဝ်ႈ၊ ယၢမ်းမူင်း ၶိူင်ႈၶူဝ်း ၸိူဝ်းႁဝ်းၸႂ်ႉတိုဝ်း တီႈလုမ်းၸိူဝ်းၼၼ်ႉၵေႃႈ ဢဝ်သႂ်ႇၼႂ်းသွင်းဝႆႉၵမ်းၼိုင်သေ ဢဝ်ၼမ်ႉယႃႈလၢင်ႉမိုဝ်း၊ ၼမ်ႉဢႅဝ်ႇၵေႃႇႁေႃး လၢင်ႉပၼ်ယဝ်ႉ   ၸင်ႇဢဝ်ၶဝ်ႈၼႂ်းႁိူၼ်းၶႃႈလႄႈ။\n\nၸဵတ်ႉၾူၼ်း – ယႃႇလိုမ်းၸဵတ်ႉၾူၼ်း ဢၼ်ႁဝ်းယိပ်းမၼ်းယူႇတင်းဝၼ်းတင်းဝၼ်းၼၼ်ႉ။ ၶွမ်းၵေႃႈပႃးယဝ်ႉ။ ဢဝ်ၼမ်ႉယႃသေ ၸဵတ်ႉလၢင်ႉပႅတ်ႈလီလီငၢမ်းငၢမ်းလႄႈ။ ၵႅဝ်ႈတႃ/မၢၼ်ႇတႃ ႁဝ်းၵေႃႈ သုၵ်ႈလၢင်ႉပႅတ်ႈလႃႈ။\n\nသုၵ်ႈမိုဝ်း -​ ပေႃးၽႅဝ်ႁိူၼ်းမႃးယဝ်ႉၼႆ ယႃႇၽုမ်ႈယိပ်းသင်၊  တေႃႈတူဝ်သတ်း  တီႈႁိူၼ်းႁဝ်းၼၼ်ႉၵွႆးၵေႃႈ ယႃႇၵႂႃႇလုပ်ႈ ၵႂႃႇတိူဝ်ႉ၊ ဢဝ်ၵွၼ်ႈသီ လၢင်ႉမိုဝ်းပႅတ်ႈဢွၼ်တၢင်းၵွၼ်ႇလႄႈ။\n\nလၢႆႈၶူဝ်းပႅတ်ႈၵမ်းလဵဝ် – တီႈသိူဝ်ႈၶူဝ်းႁဝ်းၼၼ်ႉၵေႃႈ မႅင်းတၢင်းပဵၼ် ၸၢင်ႊၸပ်းမႃးၸွမ်းယူႇယဝ်ႉ။ ယွၼ်ႉၼၼ် ပေႃးၽႅဝ်ႁိူၼ်းယဝ်ႉၵေႃႈ ထုၵ်ႇလီဢၢပ်ႇၼမ်ႉ လၢႆႈၶူဝ်းပႅတ်ႈ ၵမ်းလဵဝ်။ ၶူဝ်းဢၼ်ႁဝ်းၼုင်ႈၼၼ်ႉၵေႃႈ ၸေႈၽွင်သၵ်ႉဝႆႉ ၵမ်းလဵဝ်လႄႈ။\n\nမူင်မိုဝ်း၊ ၽႅၼ်ႇတူမ်းသူပ်း ၸိူဝ်းၼႆႉ ပႅတ်ႈလီလီ – ၼင်ႇႁိိုဝ် တေဢမ်ႇၸပ်း တၢင်းပဵၼ်ၼႆသေ သင်တူမ်းသူပ်း၊ တိုဝ်းမူင်မိုဝ်းဝႆႉၸိုင် ပေႃးမႃးထိုင်ႁိူၼ်းယဝ်ႉၵေႃႈ ပႅတ်ႈလီလီ၊ ပႅတ်ႈၼႂ်းပုင်းယုၵ်းယၢၵ်း ဢၼ်မီးၽႃႁူမ်ႇလူမ်ႈလူမ်ႈၼၼ်ႉလႄႈ။\n\nယဝ်ႉၵေႃႈ ၼင်ႇႁိုဝ် တေဢမ်ႇၸပ်း တၢင်းပဵၼ်ၼၼ်ႉ ယႃႇလိုမ်းႁဵတ်းၸိူဝ်းၼႆႉ…\n\n• ပေႃးယိပ်းသေမဵဝ်းမဵဝ်း��ဝ်ႉ သုၵ်ႈမိုဝ်းၵမ်းလဵဝ်လႄႈ။ သုၵ်ႈမိုဝ်းယဝ်ႉ ၸင်ႇၵိၼ်ၶဝ်ႈလႄႈ။ • ၶူဝ်းၶွင်ႁဝ်း ၸိူဝ်းၼၼ်ႉၵေႃႈ ဢဝ်ၼမ်ႉယႃ လၢင်ႉ/ၸဵတ်ႉ ပၼ်ၵူႊဝၼ်းလႄႈ။ • ၵိၼ်တၢင်းၵိၼ် ႁႂ်ႈမီးဢဵၼ်မီးႁႅင်း၊ မီးဢႃႇႁႃႇရ တဵမ်ထူၼ်ႈလႄႈ။ • ၼွၼ်းဢိမ်ႇဢိမ်ႇ။ • ယႃႇၵႂႃႇတီႈၵူၼ်းၼမ်၊ တီႈၵူၼ်းၵိုၼ်း။ • ပေႃးဢႆ၊ ၶီႇၸၢမ်ၼႆ ဢဝ်ၽႅၼ်ႇတူမ်းသူပ်းဝႆႉ လူမ်ႈလူမ်ႈလႄႈ။ ၸေႈၽႅၼ်ႇၼၼ်ႉၵေႃႈ ထိုမ်ႈပႅတ်ႈ ၼႂ်းပုင်းယုၵ်းယၢၵ်း လီလီ။ • ပေႃးပဵၼ်လႆႈ ယူႇႁၢင်ႇၵႆၵၼ် သၢမ်ထတ်းလႄႈ။ • သင်ၼၢဝ်ႁႅင်း၊ ဢႆ၊ ဢမ်ႇပေႉတူဝ်ပေႉၶိင်း ၸိူဝ်းၼႆႉၸိုင် ပွင်ႇၶၢဝ်ႇပၼ်ၸဝ်ႈၼႃႈတီႈ၊ ၵႂႃႇယူတ်းယႃ ၵမ်းလဵဝ်ၶႃႈလႄႈ။\n\nၵႆၽေး ႁႂ်ႈဝေႈၽေး ၼႆလႄႈ ၾၢင်ႉဝႆႉၼႆႉ လီလိူဝ်သေ ပဵၼ်ယဝ်ႉၸင်ႇယူတ်းယႃ။"
+  },
+  {
+    "title": "မိူဝ်ႈလႆႈလိုဝ်ႈၵၢၼ် ဝၼ်းႁိုင်ၼၼ်ႉ ယွၼ်ႉသင်ထုၵ်ႇလီယူႇတီႈႁိူၼ်း",
+    "content": "ၵူၼ်းၵမ်ႈၼမ် ၼႂ်းၵၢပ်ႈပၢၼ်ယၢမ်းလဵဝ်ၼႆႉ မွင်းဝႃႈပေႃးလႆႈဝၼ်းလိုဝ်ႈၵၢၼ် (ဝၼ်းဢိုတ်းၵၢၼ်) ႁိုင် ဢေႇသုတ်းမွၵ်ႈ တႄႇၼိုင်ႈဝူင်ႈ သွင်ဝူင်ႈၵႂႃႇၸိုင် ဢွၼ်ၵၼ်ႁၢင်ႈႁႅၼ်းတႃႇဢွၵ်ႇၶၢဝ်းတၢင်း ၵႂႃႇလႄႇၵမ်းသိုဝ်ႈၼၼ်ႉယဝ်ႉ။ မၢင်ၸိူဝ်းၵေႃႈ ႁၢင်ႈႁႅၼ်းတႃႇဢွၵ်ႇၶၢဝ်းတၢင်းၸွမ်း ၼႃႈႁိူၼ်းၽႂ်မၼ်း၊ မၢင်ၸိူဝ်းသမ်ႉ ၵူၼ်းႁဵတ်းၵၢၼ်ဢွင်ႈတီႈလဵဝ်ၵၼ်၊ တႆးၵေႃႉတႆးသႄႈ ႁူမ်ႈၵၼ်သေ ဢွၵ်ႇၶၢဝ်းတၢင်းၵႂႃႇဢႅဝ်ႇ ၼွၵ်ႈမိူင်း၊ ၼႂ်းမိူင်းၸဵမ်ၸိူဝ်းၼႆႉ။\n\nပေႃးၼၼ်ၸိုင် သင်ဝႃႈလႆႈတိုဝ်ႉတၢင်း မီးသုၼ်ႇလိုဝ်ႈၵၢၼ်ၸိူင်ႉၼၼ်ပွၵ်ႈလႂ်ၵေႃႈ တေႁၢင်ႈႁႅၼ်း ဢွၵ်ႇၶၢဝ်းတၢင်းၵႂႃႇၸိူင်ႉၼၼ်တိၵ်းတိၵ်းယဝ်ႉႁႃႉ။ ၼႂ်းဝၼ်းလိုဝ်ႈၵၢၼ်ၼၼ်ႉ​ ပေႃးဢမ်ႇဢွၵ်ႇၶၢဝ်းတၢင်းၵႂႃႇၸိူင်ႉၼၼ်ၸိုင် ၽွၼ်းလီမၼ်းတေမီးၸိူင်ႉႁိုဝ်ၽွင်ႈၼႆ ဢွၼ်ၵၼ် ဝူၼ်ႉၶပ်ႉၼပ်ႉသွၼ်ႇတူၺ်းသေ လဵပ်ႈႁဵၼ်းတူၺ်းလီလီ၊ ယဝ်ႉၸင်ႇၵွႆႈတႅပ်းတတ်းၵေႃႈလႆႈယူႇ။\n\nၼႂ်းဝၼ်းလိုဝ်ႈၵၢၼ်ၼႆႉ သင်ဝႃႈဢမ်ႇဢွၵ်ႇၶၢဝ်းတၢင်းၵႂႃႇတီႈလႂ်သေ ယူႇတီႈႁိူၼ်းၸိုင် ဢွၼ်တၢင်းသုတ်းၵေႃႈ ငိုၼ်းဢၼ်တေသဵင်ႈ ၼႂ်းၵၢၼ်ဢွၵ်ႇၶၢဝ်းတၢင်းၵႂႃႇလႄႇၼၼ်ႉ တေလိူဝ်ဝႆႉတင်းၼမ် ၼၼ်ႉယဝ်ႉ။\n\nပေႃးဝႃႈတေဢွၵ်ႇၶၢဝ်းတၢင်းၵႂႃႇၼိုင်ႈတီႈၸိုင် မိူဝ်ႈပႆႇၵႂႃႇၼၼ်ႉ တေလႆႈႁၢင်ႈႁႅၼ်း ငိုၼ်းတွင်း ၵႃႈၸႂ်ႉၸၢႆႇ ၽွင်းမိူဝ်ႈဢွၵ်ႇၶၢဝ်းတၢင်း လႄႈ ၵႃႊၸႂ်ႉၸၢႆႇ ဢၼ်တေဢမ်ႇသဵင်ႈဢမ်ႇလႆႈ မိူၼ်ၼင်ႇ ၵႃႊတီႈၼွၼ်း၊ ၵႃႊၵိၼ်ယႅမ်ႉ၊ ၵႃႊၵႃးၵႂႃႇမႃးၸဵမ်ၸိူဝ်းၼႆႉ တင်းသဵင်ႈ ပေႃးမႃးႁူမ်ႈၵၼ်ၸိုင် ၼမ်လႄႈဢေႇ ငိုၼ်းၼႂ်းထွင်းၸဝ်ႈၵဝ်ႇ ဢၼ်ၸုႁွမ်တွမ်ဝႆႉၼၼ်ႉ တိုၼ်းပႃးၵႂႃႇယူႇယဝ်ႉ။\n\nၵူၼ်းႁဝ်းၼႆႉ ပေႃးႁၢင်ႈႁႅၼ်းတေဢွၵ်ႇၶၢဝ်းတၢင်းၵႂႃႇ သေတီႈတီႈယဝ်ႉၼႆၸိုင် ပွင်ႇဝႃႈ ၵူၼ်းၵေႃႉၼၼ်ႉ မၼ်းၶႂ်ႈၵႂႃႇယူႇႁင်းၵွႆး ၵတ်းၵတ်းယဵၼ်ယဵၼ်ၼၼ်ႉယဝ်ႉ။ မိူဝ်ႈလႂ် ဢမ်ႇမိူဝ်ႈလႂ်ၵေႃႈ ၵုမ်ႇၵႂႃႇ လုမ်း လႄႈ ႁိူၼ်း၊ ႁိူၼ်း လႄႈ လုမ်း (ဢွင်ႈတီႈႁဵတ်းၵၢၼ်) ၼႆယူႇတိၵ်းတိၵ်းၸိုင် ယိုင်ႈဝၼ်းမၼ်းႁိုင်မႃးၵႃႊႁိုဝ်ၵေႃႈ ၸႂ်ၵပ်ႉၵိၼ်းမႃးၵႃႈၼၼ်ႉယဝ်ႉ။ ၵွပ်ႈၼၼ်လႄႈ ၵူၼ်းႁဝ်းၼႆႉ ၵႆႉၶႂ်ႈလႄႇ ဝႅၼ်ဢွၵ်ႇပၢႆႈ ၼႂ်းၸၢတ်ႈပၢၼ်ၼၼ်ႉၵႂႃႇ ၸူဝ်ႈၵႅပ်ႉ ၸူဝ်ႈၶၢဝ်းသေ ၸင်ႇလႆႈၸတ်းၽႅၼ်ၵၢၼ် တႃႇတေဢွၵ်ႇၶၢဝ်းတၢင်းၵႂႃႇ သေတီႈတီႈၼၼ်ႉယဝ်ႉ။\n\nၵၢၼ်ဢွၵ်ႇၶၢဝ်းတၢင်းၼႆႉ ပေႃးၵႂႃႇၸူဝ်ႈၵႅပ်ႉၸူဝ်ႈၵမ်းတႄႉၵေႃႈ ဢမ်ႇပေႃးတုမ်ႉတိူဝ်ႉသင်လႄႈ လီတႃႇတူဝ်ၸႂ်ၵူၼ်းႁဝ်းသေ ႁဵတ်းႁႂ်ႈလွင်ႈသုၵ်ႉ၊ လွင်ႈႁူဝ်ၶႆႈ၊ လွင်ႈၼၵ်းၸႂ်၊ ၶမ်ၸႂ်ၵူၼ်းႁဝ်းယွမ်း လူင်းမႃးသေတႃႉ ၵူၺ်းပေႃးၸဝ်ႈၵဝ်ႇမီးဝၼ်းလိုဝ်ႈ ႁိုင် တႄႇၼိုင်ႈဝူင်ႈ ၸဵတ်းဝၼ်းၶိုၼ်ႈၼိူဝ်ၵႂႃႇၸိုင် ၸၢင်ႊႁူပ်ႉတၢင်းယၢပ်ႇ မိူဝ်ႈဢွၵ်ႇၶၢဝ်းတၢင်းၼၼ်ႉမႃးယဝ်ႉ။\n\nမိူဝ်ႈဝၼ်းလိုဝ်ႈၵၢၼ် ဢၼ်မီးဝၼ်းလိုဝ်ႈႁိုင်မွၵ်ႈ ၼိုင်ႈဝူင်ႈၶိုၼ်ႈၼိူဝ်ၵႂႃႇၼၼ်ႉ ၵူၼ်းၸိူဝ်းမီးတၢင်းဝူၼ်ႉမိူၼ်ၵၼ်တင်းၸဝ်ႈၵဝ်ႇ ၶႂ်ႈၵႂႃႇလႄႇ သေတီႈတီႈၼၼ်ႉၵေႃႈ တေၼမ်တေႉတေႉသေ ဢွင်ႈတီႈ ဢၼ်ၸဝ်ႈၵဝ်ႇ ဝူၼ်ႉဝႆႉဝႃႈ တေၵႂႃႇ လိုဝ်ႈႁိူဝ်ႉ လိုဝ်ႈၸႂ်ၼၼ်ႉၵေႃႈ ၵူၼ်းတေၼမ် တဵမ်လူင်ၵႂႃႇ။ ၵွပ်ႈၼၼ် ပေႃးဢွၵ်ႇၶၢဝ်းတၢင်းၵႂႃႇ မိူဝ်ႈၼၼ်ႉၸိုင် ယႃႇဝႃႈတေလႆႈလိုဝ်ႈႁိူဝ်ႈ ၸိုၼ်ႈၸႂ်လီ ယိုင်ႈၶႅၼ်း တေလႆႈလွင်ႈသုၵ်ႉႁူ သုၵ်ႉတႃ သုၵ်ႉၸႂ်မႃးထႅင်ႈၵွၼ်ႇၼၼ်ႉယဝ်ႉ။\n\nပေႃးထိုင်ဝၼ်းလိုဝ်ႈၵၢၼ်မႃးလႄႈ တေဢွၵ်ႇတၢင်းၵႂႃႇသေတီႈတီႈယဝ်ႉၼႆၸိုင် တူၺ်းၵႂႃႇတီႈၵႃးၵိၵ်ႉ၊ တႃႈလူတ်ႉၾႆး၊ ၶူင်ႇၶိူင်ႈမိၼ်ၸိူဝ်းၼႆႉ မီးၵူၼ်းတဵမ်ၵႂႃႇသဵင်ႈ။ မၢင်ၸိူဝ်း လႆႈၸႅၼ်ႇထႅဝ်ၵၼ်ဝႆႉ ပဵၼ်တႅဝ်းလူင်ၵႂႃႇၼၼ်ႉယဝ်ႉ။ ၵွပ်ႈၼၼ်ပေႃးတေၵႂႃႇၼႆ လႆႈႁၢင်ႈႁႅၼ်းၶူဝ်းလဵင်းဝႆႉ ၸဵမ်ၵၢင်ၶမ်ႈသေဢမ်ႇၵႃး ၵၢင်ၼႂ်ၵေႃႈ လႆႈလုၵ်ႉၸဝ်ႉၸဝ်ႉထႅင်ႈလႄႈ ၸဵမ်မိူဝ်ႈပႆႇဢွၵ်ႇႁိူၼ်းၵႂႃႇၼၼ်ႉ သမ်ႉပေႃးလႆႈ သုၵ်ႉသၵ်ႉႁူဝ်ၶႆႈၸွမ်းယူႇၼၼ်ႉယဝ်ႉ။\n\nပေႃးၵူၼ်းၼမ်မႃးၸိူင်ႉၼႆၸိုင် ပၼ်ႁႃဢၼ်ဢမ်ႇၶႂ်ႈႁူပ်ႉ၊ ဢမ်ႇၶႂ်ႈပဵၼ်ၼၼ်ႉၵေႃႈ ၵိူတ်ႇဢွၵ်ႇမႃးၸွမ်းၵမ်းလဵဝ်ၼၼ်ႉယဝ်ႉ။ မၢင်ပွၵ်ႈမၢင်လႂ် ၼႂ်းၸုမး်ႁဝ်းၼင်ႇၵၼ် ၸၢင်ႊတိၵ်ႉတွၵ်ႉၵၼ်ၶိုၼ်း၊ မၢင်ပွၵ်ႈသမ်ႉ ၸၢင်ႊတိၵ်ႉတွၵ်ႉၵၼ်တင်း ပိူၼ်ႈဢိတ်းဢီႈၸိူဝ်းၼႆႉ ၸၢင်ႊမီးမႃးယဝ်ႉ။ သင်ၶႂ်ႈဝႄႈလွင်ႈၸိူဝ်းၼႆႉၸိုင် ပေႃးပဵၼ်လႆႈ ယူႇတီႈႁိူၼ်းၸဝ်ႈၵဝ်ႇသေ လိုဝ်ႈႁိူဝ်ႉၼၼ်ႉတႄႉ ၵတ်းယဵၼ်ၸႂ်ၶေႃးတေႉတေႉၼႆ ၶႂ်ႈပၼ်တၢင်းႁၼ်ထိုင်ၼင်ႇၼႆ။\n\nပေႃးယူႇတီႈႁိူၼ်းသေ လိုဝ်ႈႁိူဝ်ႉၼႆႉ ယႃႇပေထၢင်ႇဝႃႈ မၼ်းၼႃႈလီၶၢၼ်ႉၼႃႇ။ ပေႃးမႃးဝူၼ်ႉတူၺ်းၶိုၼ်းတေႉတေႉၸိုင် ၶၢဝ်းယၢမ်းဢၼ်ၸဝ်ႈၵဝ်ႇလႆႈယူႇၸွမ်း ၵူၼ်းၼႂ်းၼႃႈႁိူၼ်းၸဝ်ႈၵဝ်ႇၵေႃႈ ၼမ်မႃး၊ လႆႈမီးၶၢဝ်းယၢမ်း ႁဵတ်းၶဝ်ႈမုၼ်း တၢင်းၵိၼ်ယႅမ်ႉသေ မူၼ်ႈသိူဝ်းၸွမ်း ၵူၼ်းၼႂ်းၼႃႈႁိူၼ်းၸဝ်ႈၵဝ်ႇၵေႃႈ လိူဝ်မႃးလႄႈ လႆႈႁဵတ်းၸွမ်းၼင်ႇ တၢင်းသူင်ဝႃႇသၼႃႇၸဝ်ႈၵဝ်ႇၼၼ်ႉလီလီပႃးထႅင်ႈၵွၼ်ႇ ၼၼ်ႉယဝ်ႉ။"
+  },
+  {
+    "title": "ၽွင်းမိူဝ်ႈမီးလွင်ႈၶမ်ၸႂ် တေႁဵတ်းႁိုဝ်ယူႇသဝ်းႁႂ်ႈလွင်ႈသုၵ်ႉၸႂ်လူတ်းယွမ်း",
+    "content": "ၼႂ်းၸၢတ်ႈပၢၼ်ၵူၼ်းႁဝ်းၵူႊၵေႃႉ လွင်ႈၶမ်ၸႂ်ဢၼ်ဝႃႈၼၼ်ႉ ၽႂ်ၵေႃႈဝႄႈဢမ်ႇလႆႈ။ မၢင်ၸိူဝ်း ၶမ်ၸႂ်လူၺ်ႈ လႆႈယၢၼ်ၵၼ်တင်း ၵေႃႉႁၵ်ႉၵေႃႉပႅင်း၊ ယွၼ်ႉၵၢၼ်ၼမ်လႄႈၶမ်ၸႂ်၊ ယွၼ်ႉပၼ်ႁႃၼႂ်းၼႃႈႁိူၼ်း ဢမ်ႇၼၼ် ယွၼ်ႉၵၢၼ်ပၢႆးပၺ်ႇၺႃႇလႄႈၶမ်ၸႂ် တႄႇၵႂႃႇၸိူဝ်းၼႆႉ ဢိင်ၼိူဝ်လွင်ႈတၢင်းမၼ်းသေ လွင်ႈတၢင်းဢၼ်ၵူၼ်းႁဝ်း လႆႈၶမ်ၸႂ်ၼၼ်ႉၵေႃႈ ၸင်ႇလႆႈပႅၵ်ႇပိူင်ႈၵၼ်ၵႂႃႇ။\n\nသင်ဝႃႈတူဝ်ၵဝ်ႇမီးလွင်ႈတၢင်းလီၶမ်ၸႂ်ၼမ်မႃးၼႆၸိုင် တၢင်းပဵၼ်လိူတ်ႈသုင်၊ တၢင်းပဵၼ်ႁူဝ်ၸႂ်၊ တၢင်းပဵၼ်တၢႆၽၢၵ်ႇၸိူဝ်းၼႆႉ မေႃၶဝ်ႈမႃးၼႂ်းတူၼ်တူဝ်ၸဝ်ႈၵဝ်ႇသေဢမ်ႇၵႃး ၸၢင်ႊႁဵတ်းႁႂ်ႈၼမ်ႉၼၵ်းတူဝ်ၶိင်းၶိုၼ်ႈႁႅင်းမႃးလိူဝ်ၵဝ် (တၢင်းပဵၼ်ပီးလူၼ်ႉလိူဝ်) လႄႈ တွၼ်ႈတႃႇပၢႆးယူႇလီတူဝ်ၵဝ်ႇၼၼ်ႉ ၸၢင်ႊထူပ်းပၼ်ႁႃယူႇတင်းၼမ်ယူႇ။\n\nလွင်ႈၶမ်ၸႂ်ၼႆႉ ပၼ်ၽွၼ်းႁၢႆႉလႆႈထိုင်တီႈ တီႈတူဝ်တီႈၸႂ်ၵူၼ်းႁဝ်း။ လွင်ႈၶမ်ၸႂ်ၶၢဝ်းယၢဝ်း လႄႈ လွင်ႈၶမ်ၸႂ်ၸူဝ်ႈၵႅပ်ႉၼႆသေ သွင်သႅၼ်း။ သင်တူဝ်ၸဝ်ႈၵဝ်ႇ တေလႆႈမွၵ်ႇလၢတ်ႈၶေႃႈၵႂၢမ်းၽၢႆႇၼႃႈၵူၼ်းတင်းၼမ်လႄႈၸႂ်တိုၼ်ႇတဵၼ်ႈ ဢမ်ႇၼၼ် ယွၼ်ႉလႆႈၶၢမ်ႇတၢင်းပွင်ႉ လႄႈ မီးလွင်ႈသုၵ်ႉၸႂ် ၸိူဝ်းၼႆႉ ပဵၼ်လွင်ႈၶမ်ၸႂ်ၶၢဝ်းပွတ်း (ၸူဝ်ႈၵႅပ်ႉ) သေ သင်ဝႃႈတူဝ်ၸဝ်ႈၵဝ်ႇ ���ုၵ်ႇၼီႈဝႆႉ တႃႇတေသၢႆႈတႅၼ်းၼီႈၶိုၼ်းၼၼ်ႉ ႁႃလၢႆးတၢင်းၵေႈလိတ်ႈပၼ်ႁႃမၼ်း ဢမ်ႇလႆႈၸိုင် ၼႆႉပဵၼ်လွင်ႈၶမ်ၸႂ်ၶၢဝ်းယၢဝ်းယဝ်ႉ။ လွင်ႈၶမ်ၸႂ်ၶၢဝ်းယၢဝ်းၼႆႉ ၸၢင်ႊတုမ်ႉတိူဝ်ႉပၢႆးယူႇလီတူဝ်ၸဝ်ႈၵဝ်ႇ။\n\nၽွၼ်းႁၢႆႉၸႃႉဢၼ်ၸပ်းမႃးၸွမ်းတင်းလင် လွင်ႈၶမ်ၸႂ်ၼၼ်ႉတႄႉ ႁဵတ်းႁႂ်ႈၵူၼ်းႁဝ်း ထူၺ်ႈၸႂ်ဢမ်ႇဢိမ်ႇ၊ ၼွၼ်းဢမ်ႇလပ်း၊ တွင်ႉၼွင်ႇ၊ ၵႅတ်းၶဵဝ်ႈ၊ ၶူပ်းၼဵပ်ႉမိုဝ်း၊ လုပ်ႇၵၢင်းၸဵပ်း၊ ၶေႃးၸဵပ်း၊ သၼ်လင်ၸဵပ်း၊ ႁူဝ်ၶႆႈ၊ ၸႂ်ဢမ်ႇၼိမ် ၸဵမ်ၸိူဝ်းၼႆႉ။\n\nၼင်ႇႁိုဝ်လွင်ႈၶမ်ၸႂ်တေလူတ်းယွမ်း တေလႆႈႁဵတ်းႁိုဝ်?\n\n(1)ဢွၼ်တၢင်းသုတ်း ႁဵၼ်းႁူႉလွင်ႈမေႃပွႆႇဝၢင်း/ပွႆႇၾႃႈ\n\nသင်ဝႃႈ ၼႂ်းၼႃႈၵၢၼ်မီးလွင်ႈႁိပ်ႇႁွမ်ႈလႄႈ ၸဝ်ႈၵဝ်ႇမီးလွင်ႈၶမ်ၸႂ်/သုၵ်ႉၸႂ်ယူႇသေတႃႉၵေႃႈ ယွၼ်ႉလႆႈတူၺ်းထိုင်ၼႃႈႁိူၼ်းလႄႈ တူဝ်ၸဝ်ႈၵဝ်ႇဢမ်ႇဢွၵ်ႇ ၵၢၼ်ဢၼ်ပၼ်လွင်ႈသုၵ်ႉၸႂ် ၸဝ်ႈၵဝ်ႇၼၼ်ႉလႆႈၼႆၸိုင် ၶတ်းၸႂ်ပွႆႇၾႃႈယၢၼ်ပၢႆႊဢွၵ်ႇၵႂႃႇတီႈ လွင်ႈဢၼ်ႁဵတ်းႁႂ်ႈတူဝ်ၸဝ်ႈၵဝ်ႇၶမ်ၸႂ်ၼၼ်ႉလႄႈ။ ၼႂ်းလွင်ႈတၢင်းႁၵ်ႉၵေႃႈတေႃႈၼၼ် ပွႆႇပႅတ်ႈမိုဝ်း ၵူၼ်းဢၼ် ႁဵတ်းႁႂ်ႈၸဝ်ႈၵဝ်ႇမီးလွင်ႈၶမ်ၸႂ်ၸွမ်းၼၼ်ႉသေလႄႈ။\n\n(2) လဵပ်ႈႁဵၼ်းဢဝ်လွင်ႈႁိမ်းႁွမ်း\n\nသင်ဝႃႈ တီႈတူဝ်ၸဝ်ႈၵဝ်ႇမီးလွင်ႈသုၵ်ႉၸႂ်၊ သုၵ်ႉဢွၵ်းဢေႃသေ ဢမ်ႇႁူႉဝႃႈတေလႆႈႁဵတ်းသင်တေႉတေႉၼႆၸိုင် ၽုၵ်ႇတူၼ်ႈမႆႉ တူၼ်ႈမွၵ်ႇၼႂ်းသူၼ်သေ သုတ်ႇသႅဝ်ဢၢႆႊလူမ်းၵတ်းလူမ်းယဵၼ်ပၼ်တႃႉ။ ယူႇသဝ်းတီႈဢၼ်မီးတၢင်းႁၢင်ႊလီၾိင်ႈတိုၼ်းပဵၼ်သေ ထွမ်ႇပၼ်ၽဵင်းၵႂၢမ်း ဢၼ်တေၵတ်းယဵၼ်ၸႂ် တူဝ်ၸဝ်ႈၵဝ်ႇၼၼ်ႉ တေႁဵတ်းႁႂ်ႈၸႂ်တူဝ်ၵဝ်ႇ ယူႇသႃႇမႃးလိူဝ်ၵဝ်ႇ။\n\n(3) ၵၢၼ်ဢၼ်ႁဵတ်းယူႇၼၼ်ႉ ၵိုတ်းလိုဝ်ႈဝႆႉၸူဝ်ႈၵႅပ်ႉ\n\nသင်ဝႃႈ လွင်ႈသုၵ်ႉၸႂ်ၼၼ်ႉၶဝ်ႈမႃးၼႂ်းဢွၵ်းဢေႃ၊ ႁူဝ်ၸႂ်ယဝ်ႉၼႆၸိုင် ၵိုတ်းလိုဝ်ႈဝႆႉ ၵၢၼ်ဢၼ်တူဝ်ၸဝ်ႈၵဝ်ႇႁဵတ်းၼၼ်ႉၸူဝ်ႈၵႅပ်ႉယဝ်ႉ ဝႆႉၸႂ်ၼိမ်ၼိမ်သေ သုတ်ႇပၼ်လူမ်းၵတ်းလူမ်းယဵၼ်။ မိူဝ်ႈယၢမ်းမီးလွင်ႈထဵင်ၵၼ်ယူႇၼၼ်ႉၵေႃႈၵိုတ်းပၼ်သေ ၽွင်းယၢမ်းၼၼ်ႉ ယူႇယဵၼ်ယဵၼ်ပၼ်တင်းသွင်ၽၢႆႇ။ မိူဝ်ႈၽွင်းယၢမ်းတူဝ်ၸဝ်ႈၵဝ်ႇ ၼင်ႈယူႇၽၢႆႇၼႃႈ ၶွမ်း (Computer) တႃႇတေႁဵတ်းၵၢၼ်သေတႃႉ ဝူၼ်ႉသင်ဢမ်ႇဢွၵ်ႇသင်ၼႆၸိုင် ၵိုတ်းလိုဝ်ႈဝႆႉၵၢၼ်ၼၼ်ႉၼိုင်ႈၵမ်းသေ ၸင်ႇသိုပ်ႇၶိုၼ်းၼၼ်ႉ လီတီႈသုတ်းယဝ်ႉ။\n\n(4) ယူႇႁႂ်ႈၸႂ်ၸိုၼ်ႈပၢင်ႇသႂ်\n\nပေႃးမီးၶၢဝ်းယၢမ်းတၼ်းၸိုင် ၵ��ႃႇတႃႈပႆတၢင်းတီႈၵႆတီႈယၢဝ်း၊ ဢၢၼ်ႇလိၵ်ႈ၊ ၼင်ႈသမထိၵေႃႈလႆႈယူႇ။ ၵၢၼ်ၸိူဝ်းၼႆႉ တေႁႂ်ႈၸႂ်ၵူၼ်းႁဝ်းသိူဝ်းသႃႇတေႉတေႉ။\n\nၵၢၼ်တီႈႁဝ်းၶႃႈၵဵပ်းဝႆႉလွင်ႈၶမ်ၸႂ်ႁင်းၵွႆးသေ ဢမ်ႇယွမ်းႁဵတ်းသင်ၼၼ်ႉ ၸၢင်ႊတုမ်ႉတိူဝ်ႉပၢႆးယူႇလီ တူဝ်ၸဝ်ႈၵဝ်ႇလႄႈ ၼင်ႇႁိုဝ်ၸၢတ်ႈပၢၼ်ႁဝ်း တေႁၢင်ႊလီမိူဝ်းၼႃႈ ၼင်ႇႁိုဝ်ၸႂ်တူဝ်ၸဝ်ႈၵဝ်ႇတေၸိုၼ်ႈပၢင်ႇ သႃႇၸႂ်ယူႇငၢႆႈၼၼ်ႉ သင်ဝႃႈတူဝ်ၸဝ်ႈၵဝ်ႇႁဵတ်းသၢင်ႈၸွမ်းၼင်ႇ လွၵ်းလၢႆးဢၼ်လၢတ်ႈမႃးၽၢႆႇၼိူဝ်ၼၼ်ႉၸိုင် လွင်ႈၶမ်ၸႂ်ၽႂ်မၼ်းၼၼ်ႉ ၸၢင်ႊလူတ်းယွမ်းၵႂႃႇယူႇ။"
+  },
+  {
+    "title": "ပၼ်ႁႃၵူႊဢၼ်တိုၼ်းမီးၶေႃႈတွပ်ႇ သွၵ်ႈႁႃလႆႈသဵၼ်ႈတၢင်းဢွၵ်ႇယူႇ",
+    "content": "တႃႇၸုၵ်းမၼ်ႈလႆႈၼိူဝ်တိၼ်ၸဝ်ႈၵဝ်ႇ၊ တႃႇပူၵ်းပွင်ၸၢတ်ႈပၢၼ်တူဝ်ၵဝ်ႇ ႁႂ်ႈၶိုတ်းၸၼ်ႉၶိုၼ်ႈသုင် ၼႆသေ ၵူၼ်းၵူႊၵေႃႉဢွၼ်ၵၼ်ၶတ်းၸႂ်ႁဵတ်းၵၢၼ်ႁင်းၽႂ်မၼ်း။ ၵူၼ်းၸိူဝ်းမီးတိုဝ်ႉတၢင်းလႆႈၶိုၼ်းႁူင်းႁဵၼ်း ႁဵၼ်းသွၼ်လိၵ်ႈလၢႆးၵေႃႈ ၸႂ်ႉဢွၵ်းဢေႃၺၢၼ်ႇတူဝ်ၵဝ်ႇသေႁဵတ်းၵၢၼ်၊ ၵူၼ်းၸိူဝ်းဢမ်ႇပွင်ပဵၼ်လႆႈ ဢၼ်ဢဝ်ၺၢၼ်ႇဢွၵ်းဢေႃႇသေ ႁဵတ်းၵၢၼ်ၵေႃႈ ၸွမ်းၼင်ႇတူဝ်ၵဝ်ႇပွင်ပဵၼ်လႆႈၼၼ်ႉ ၸႂ်ႉဢဵၼ်ႁႅင်းတူဝ်သေ ႁဵတ်းၵၢၼ်။ ၸိူဝ်းဢဝ်ဢွၵ်းဢေႃၺၢၼ်ႇပၺ်ႇၺႃႇသေ ႁဵတ်းၵၢၼ်ၵေႃႈ ၶဝ်ဝႃႈ ၵၢၼ်ဢၼ်ၼႆႉ ယွၼ်ႉဢမ်ႇလႆႈၸႂ်ႉႁႅင်းတူဝ် ဢွၵ်ႇႁိူဝ်ႇ ဢွၵ်ႇၶႆးလႄႈ သၢၵ်ႈသႃႇလိူဝ် ၵၢၼ်ဢၼ်လႆႈၸႂ်ႉႁႅင်းတူဝ်သေ ႁဵတ်းၵၢၼ်ဢၼ်ဢွၵ်ႇႁိူဝ်ႇဢွၵ်ႇၶႆး ၼႆယူႇ။ ၵူၺ်းၵႃႈၸိူင်ႉႁိုဝ်ၵေႃႈလီ ၸႂ်ႉလွၵ်းလၢႆးဢၼ်လႂ် ႁဵတ်းၵၢၼ်သင်ၵေႃႈယဝ်ႉ လွင်ႈၶမ်ၸႂ် လွင်ႈၼၵ်းၸႂ် ႁိူဝ်ႉၸႂ် ဢၼ်ဝႃႈၼၼ်ႉတႄႉ မၼ်းတိုၼ်းမီးယူႇ ႁင်းၽႂ်မၼ်း။ ပေႃးထူပ်းလွင်ႈၶမ်ၸႂ် လွင်ႈၼၵ်းၸႂ် လွင်ႈႁိူဝ်ႉၸႂ် ၸိူင်ႉၼႆမႃးၸိုင် ယႃႇပေဝူၼ်ႉဝႃႈ မီးၸဝ်ႈၵဝ်ႇၵေႃႉလဵဝ်ၵွႆး ထူပ်းၺႃးလွင်ႈၸိူင်ႉၼႆ။ ပၼ်ႁႃဢၼ်ၼႆႉ ၵူၼ်းၵူႊၵေႃႉဢၼ်ႁဵတ်းၵၢၼ် တိုၼ်းလႆႈထူပ်းၺႃးၵူႊၵေႃႉသေ တေပိူင်ႈၵၼ်ၵႂႃႇ ၶၢဝ်းယၢမ်း ဢၼ်လႆႈထူပ်းမၼ်းၵွႆး။ တႃႇႁႂ်ႈမီးလွင်ႈသိူဝ်းၸႂ်ၵူႊၶၢဝ်းယၢမ်း ၼႂ်းတူင်ႇဝူင်းၵၢၼ် ဢၼ်ၸဝ်ႈၵဝ်ႇႁဵတ်းၼၼ်ႉ မၼ်းဢမ်ႇငၢႆႈသႄႈ။\n\nယွၼ်ႉၼၼ်ႉ ပေႃးၶႂ်ႈႁႂ်ႈလွင်ႈၼၵ်းၸႂ် လွင်ႈၶမ်ၸႂ် လွင်ႈႁိူဝ်ႉၸႂ် ဢၼ်လႆႈမႃးၼႂ်းၼႃႈၵၢၼ်ၸဝ်ႈၵဝ်ႇ ၼၼ်ႉလူတ်းယွမ်းသေ ႁႂ်ႈၸၢတ်ႈပၢၼ်တူဝ်ၵဝ်ႇသိူဝ်းၸွမ်းလႆႈၼႂ်းတူင်ႇဝူင်းၵၢၼ်ၸဝ်ႈၵဝ်ႇၼၼ်ႉၸိုင် တေလႆႈႁူႉလွၵ်းလၢ���းၵႄႈလိတ်ႈပၼ်ႁႃ လွင်ႈၶမ်ၸႂ် လွင်ႈၼၵ်းၸႂ်လူင် ၸိူဝ်းၼႆႉယူႇ။\n\nလွင်ႈၼၵ်းၸႂ် လွင်ႈသုၵ်ႉၸႂ် လွင်ႈၶမ်ၸႂ် ဢၼ်လႆႈမႃးယွၼ်ႉၼႃႈၵၢၼ်တူဝ်ၵဝ်ႇၼၼ်ႉ ၸၢင်ႊႁဵတ်းႁႂ်ႈတုမ်ႉတိူဝ်ႉ ၸၢတ်ႈပၢၼ်ၵူႊၸဝ်ႉၼႂ်ဝၼ်းၶမ်ႈတူဝ်ၵဝ်ႇပႃးထႅင်ႈ။ တေၸၢင်ႈတုမ်ႉတိူဝ်ႉၵၢၼ် ၵပ်းသိုပ်ႇသၢၼ် လွင်ႈမိုတ်ႈၵိုဝ်းဢူၺ်းၵေႃႉ လႄႈ ၼႃႈၵၢၼ်တႃငၢၼ်းတူဝ်ၵဝ်ႇသေဢမ်ႇၵႃး လမ်ႇလွင်ႈသုတ်းတႄႉ ၸၢင်ႊတုမ်ႉတိူဝ်ႉ ပၢႆးယူႇလီၸဝ်ႈၵဝ်ႇ ၼၼ်ႉယဝ်ႉ။\n\nလွင်ႈဢၼ်ၸၢင်ႊႁဵတ်းႁႂ်ႈမီးလွင်ႈၶမ်ၸႂ်ၼၼ်ႉ\n\nငိုၼ်းလိူၼ်ဢေႇ လႆႈႁၢပ်ႇပုၼ်ႈၽွၼ်းၼႂ်းၼႃႈၵၢၼ်ၼမ်လိူဝ် တိုဝ်ႉတၢင်းဢၼ်တေႁဵတ်းႁႂ်ႈၸၢတ်ႈပၢၼ်ၸဝ်ႈၵဝ်ႇၶိုၼ်ႈယႂ်ႇဢေႇ ဢမ်ႇလႆႈတူဝ်ထူပ်းမႂ်ႇ ၼႂ်းၼႃႈၵၢၼ် ထုၵ်ႇဢိုတ်းတိုဝ်ႉတၢင်း သုၼ်ႇလႆႈႁဵတ်းသၢင်ႈ တီႈတူင်ႇဝူင်းၼႃႈၵၢၼ် ဢမ်ႇမီးလွင်ႈၽဵင်ႇပဵင်း ဢမ်ႇမီးၵၢၼ်ၸွႆႈထႅမ်ၵၼ် ၼႂ်းၼႃႈၵၢၼ် ဢမ်ႇသူၼ်ၸႂ် လွင်ႈၼႃႈၵၢၼ်  ၸဵမ်ၸိူဝ်းၼႆႉ။\n\nသင်ဢမ်ႇၵုမ်းထိင်းလႆႈ လွင်ႈၶမ်ၸႂ် လွင်ႈသုၵ်ႉၸႂ် ဢၼ်ပဵၼ်မႃးတီႈၼႃႈၵၢၼ်ၼၼ်ႉၸိုင် ၸၢင်ႊတုမ်ႉတိူဝ်ႉပၢႆးယူႇလီတူဝ်ၵဝ်ႇ။ လွင်ႈၶမ်ၸႂ်/သုၵ်ႉၸႂ်/ ၼၵ်းၸႂ်ၼႆႉ ၵူၼ်းၵူႊၵေႃႉၸၢင်ႊႁူပ့်ၺႃးလႄႈ သင်လွင်ႈပၼ်ႁႃဢၼ်ၼႆႉ ယႂ်ႇၶိုၼ်ႈမႃးၸိုင် ၸၢင်ႊတုမ်ႉတိူဝ်ႉပႃးလွင်ႈႁဵတ်းတၢင်းသၢင်ႈၵၢၼ် ဢၼ်ႁဵတ်းယူႇၵူႊမိုဝ်ႉဝၼ်းၼၼ်ႉၼမ်မႃးတိၵ်းတိၵ်း။ လွင်ႈၼၵ်းၸႂ် လွင်ႈၶမ်ၸႂ်ၼႆႉ ယွၼ်ႉဢမ်ႇႁၢႆလႆႈငၢႆႈငၢႆႈလႄႈ ယၢပ်ႇယူႇ။ ၵူၺ်းၵႃႈ သင်ဢမ်ႇမေႃဢဝ်သႂ်ႇၸႂ်ဝႆႉတႄႉ တေတိူဝ်းလီယူႇ။ ပေႃးတေဢဝ်လွင်ႈၶမ်ၸႂ် လွင်ႈသုၵ်ႉၸႂ်ၸိူဝ်းၼႆႉ သႂ်ႇၸႂ်ယူႇတိၵ်းတိၵ်းၸိုင် ၸၢင်ႊတုမ်ႉတိူဝ်ႉပႃး ၼႂ်းၼႃႈႁိူၼ်းတူဝ်ၵဝ်ႇၵွၼ်ႇ။\n\nပၼ်ႁႃဢၼ်ၸၢင်ႊပဵၼ်မႃးလူၺ်ႈ လွင်ႈၶမ်ၸႂ်\n\nပေႃးႁူပ်ႉလွင်ႈၶမ်ၸႂ် လွင်ႈၼၵ်းၸႂ် ၼႂ်းၼႃႈၵၢၼ်ၼမ်မႃးၸိုင် တေၸၢင်ႊထူပ်းပၼ်ႁႃမိူၼ်ၼင်ႇ ႁူဝ်ၶႆႈ၊ တွင်ႉဢဵဝ်ႈ၊ ၼွၼ်းဢမ်ႇဢိမ်ႇ၊ ၸႂ်လမ်ငၢႆႈသေ ပဵၼ်ၸႂ်ပိတ်းၸႂ်ပွတ်း သေဢမ်ႇၵႃး တႃႇတေမီးလွင်ႈပၵ်းၸႂ်ၼိူဝ်ၵၢၼ်ၵေႃႈ ယၢပ်ႇယဵၼ်းမႃး။ လိူဝ်ၼၼ်ႉ တေၸၢင်ႊပဵၼ်ပၼ်ႁႃယႂ်ႇလူင် ၼႂ်းၵၢၼ်ပၢႆးယူႇလီထႅင်ႈလူးၵွၼ်ႇ။\n\nမိူၼ်ၼင်ႇပိူၼ်ႈဢွၼ်ၵၼ်လၢတ်ႈဝႃႈ တတ်းၾႆးႁေႉႁူဝ်လူမ်းၼႆႉ လီလိူဝ်ဢၼ်တေပႂ်ႉဢဝ်ၼမ်ႉႁူတ်းၾႆးႁႂ်ႈမွတ်ႇၼၼ်ႉၼႆလႄႈ ၼင်ႇႁိုဝ်တေဢမ်ႇပဵၼ်ပၼ်ႁႃယႂ်ႇလူင် ၼႂ်းၵၢၼ်ပၢႆးယူႇလီၸဝ်ႈၵဝ်ႇၼၼ်ႉ ဢွၼ်ၵၼ်ႁေႉႁၢမ်ႈ ၾၢင်��ဝႆႉၵွၼ်ႇပႂ်ႇပဵၼ်ၼၼ်ႉ တေလီယူႇ။\n\nယွၼ်ႉလွင်ႈၼၵ်းၸႂ်ေသ ပၼ်ႁႃဢၼ်ၸၢင်ႊပဵၼ်မႃးတီႈတူၼ်တူဝ်ၸဝ်ႈၼၼ်ႉၼၼ်ႉမီးယူႇတင်းၼမ်။ မိူၼ်ၼင်ႇ ပဵၼ်လွင်ႈၸႂ်တူၵ်း၊ ၼွၼ်းဢမ်ႇလပ်း၊ တၢင်းပဵၼ်လိူတ်ႈၶိုၼ်ႈ၊ ႁႅင်းၶၢမ်ႇတူဝ်ယွမ်းလူင်း၊ တူဝ်ၶိင်းပီးၶိုၼ်ႈသေဢမ်ႇၵႃး ေတၸၢင်ႊၸပ်းတၢင်းပဵၼ်ႁူဝ်ၸႂ် ၼႆယဝ်ႉ။\n\nမၢင်ၸိူဝ်းသမ်ႉ ယွၼ်ႉတီႈၼႃႈၵၢၼ်မီးလွင်ႈၼၵ်းၸႂ်လႄႈ ၼင်ႇႁိုဝ်တေပဵၼ်ၵၢၼ်ၵႄႈလိတ်ႈၼၼ်ႉ ၵိၼ်တၢင်းၵိၼ်ၼမ်လူၼ်ႉ၊ မၢင်ၸိူဝ်းသမ်ႉ ဢမ်ႇယွမ်းၵိၼ်သင်၊ မၢင်ၸိူဝ်းသမ်ႉ ႁူႉယူႇဝႃႈ တၢင်းၵိၼ်ဢၼ်ၼႆႉ ဢမ်ႇမႅၼ်ႈၸွမ်းပၢႆးယူႇလီၵေႃႈ ၵိၼ်ယူႇတိၵ်းတိၵ်း၊ လုတ်ႇလႅၼ်းယႃႈ ၊ ၵိၼ်လဝ်ႈ၊ မၢင်ၸိူဝ်းသမ်ႉၸႂ်ႉတိုဝ်းယႃႈမဝ်းၵမ်။ ၸိူဝ်းၼႆႉ ပဵၼ်လၢႆးၶႃတူဝ်ၶႃၸႂ်တူဝ်ၵဝ်ႇၵွႆး၊ ဢမ်ႇၸႂ်ႈလၢႆးၵႄႈပၼ်ႁႃလွင်ႈၶွင်ႈၶမ် လွင်ႈၼၵ်းၸႂ် လွင်ႈၶမ်ၸႂ်သင်ၼႆ ထုၵ်ႇလီႁူႉၵၼ်ယူႇ။\n\nပၼ်ႁႃၵူႊလွင်ႈၼႆႉ မၼ်းတိုၼ်းမီးၶေႃႈတွပ်ႇ\n\nၵူၼ်းၼႆႉ ပဵၼ်သတ်ႉတဝႃႇ ဢၼ်မီးတၢင်းႁူႉၺၢၼ်ႇတၢင်းဝူၼ်ႉ ၼမ်လိူဝ်ပိူၼ်ႈသေ မီးၼမ်ႉၵတ်ႉတႃႇတေၵႄႈလိတ်ႈပၼ်ႁႃဝႆႉၼႂ်းတူဝ်ႁင်းၽႂ်မၼ်းၼႆ ဢမ်ႇထုၵ်ႇလီလူင်လိုမ်းၵၼ်လႃးလႃး။ ႁဝ်းၶႃႈၵွႆးလူဝ်ႇမေႃၸႂ်ႉတိုဝ်းမၼ်းၵွႆး။ ယွၼ်ႉၼၼ် သင်ဝႃႈၸဝ်ႈၵဝ်ႇမီးလွင်ႈၶမ်ၸႂ်/ သုၵ်ႉၸႂ်/ ၼၵ်းၸႂ်မႃးၼႆၸိုင် ဝူၼ်ႉႁၼ်ထိုင်လွင်ႈတၢင်း ၶေႃႈဢၼ်ႁဝ်းလႆႈပဵၼ် လွင်ႈၼၵ်းၸႂ် ယွၼ်ႉမၼ်းၼၼ်ႉဢွၼ်တၢင်းၼၼ်ႉ တေလီယူႇ။\n\nလွင်ႈတၢင်းဢၼ်ႁဝ်းပဵၼ်လွင်ႈၼၵ်းၸႂ်ယွၼ်ႉမၼ်းၼၼ်ႉ ၸွင်ႇမၼ်းလမ်ႇလွင်ႈ၊ မၼ်းလမ်ႇလွင်ႈထိုင်ၸၼ်ႉလႂ်၊ ပေႃးတေၵုမ်ႇဝႆႉလွင်ႈၼၵ်းၸႂ်ၸိူင်ႉၼႆ တေၸၢင်ႊမီးလွင်ႈတုမ်ႉတိူဝ်ႉၸိူင်ႉႁိုဝ်လၢႆလၢႆၼႆ ထုၵ်ႇလီဝူၼ်ႉၶွပ်ႈသွၵ်ႈႁႃ ၶေႃႈမုၼ်းၸိူဝ်းၼႆႉလီလီသေ တႅပ်းတတ်းႁဵတ်းသၢင်ႈၵႂႃႇယူႇ။\n\nပေႃးဝူၼ်ႉထတ်းသၢင်လႆႈလွင်ႈတၢင်းၸိူဝ်းၼႆႉလီငၢမ်းယဝ်ႉၸိုင် တႃႇတေၵေႈလိတ်ႈပၼ်ႁႃ လွင်ႈၼၵ်းၸႂ် / လွင်ႈၶမ်ၸႂ်/ လွင်ႈသုၵ်ႉၸႂ်ၼၼ်ႉ သင်ႁဵတ်းသၢင်ႈပၼ် လွင်ႈတူင်ႉၼိုင် မိူၼ်ၼင်ႇ ဢွၵ်ႇပႆတၢင်း၊ သုတ်ႇလူမ်းၵတ်းလူမ်းယဵၼ် ႁိမ်းႁွမ်းဢွင်ႈတီႈမီးပႃႇမႆႉသီၶဵဝ် ဢမ်ႇၼၼ် တႅမ်ႈလူင်း လွင်ႈတၢင်းဢၼ်ႁဵတ်းႁႂ်ႈၸဝ်ႈၵဝ်ႇပဵၼ်လွင်ႈၼၵ်းၸႂ်ၼၼ်ႉ သဵင်ႈသဵင်ႈ၊ ဢၢၼ်ႇပပ်ႉလိၵ်ႈ၊ ႁဵတ်းပၼ်လွင်ႈတူင်ႉၼိုင်တူဝ်သေလွင်ႈလွင်ႈ ဢၼ်တေၸၢင်ႊႁဵတ်းႁႂ်ႈ မီးလွင်ႈၸႂ်ၸိုၼ်ႈပၢင်ႇ၊ ႁဵတ်းၸွမ်းၼင်ႇ���ႃႇသၼႃႇတၢင်းသူင်ၸဝ်ႈၵဝ်ႇ၊ ႁဵတ်းပၼ်လွင်ႈတူင်ႉၼိုင်ၸွမ်း ၵူၼ်းၼႂ်းၼႃႈႁိူၼ်းၸဝ်ႈၵဝ်ႇ လႄႈ ပိုတ်ႇလၢတ်ႈၼႄလွင်ႈတၢင်းၵူႊလွင်ႈ ဢၼ်ႁဵတ်းႁႂ်ႈၸဝ်ႈၵဝ်ႇမီးလွင်ႈၼၵ်းၸႂ်ၼၼ်ႉ တီႈၵူၼ်းဢၼ်ၸဝ်ႈၵဝ်ႇယုမ်ႇယမ်တမ်းၸႂ်ၼၼ်ႉ ၸဵမ်ၸိူဝ်းၼႆႉ။\n\nလိူဝ်ၼၼ်ႉ ၼင်ႈတြႃးၼိမ်တူဝ်ၼိမ်ၸႂ်ပၼ်ယဝ်ႉ သုတ်ႇလူမ်းၶဝ်ႈလူမ်းဢွၵ်ႇသေ ၽႄမႅတ်ႉတႃႇပၼ်တႃႇသတ်ႉတဝႃႇတင်းသဵင်ႈ ဢမ်ႇၼၼ် ၽွင်းၶၢဝ်းၵၢင်ဝၼ်း ႁိုဝ် ၽွင်းမီးလွင်ႈၼၵ်းၸႂ်ၼၼ်ႉ ထုၵ်ႇလီၵႂႃႇလိုဝ်ႉႁိူဝ်ႉပၼ်ၸူဝ်ႈၵႅပ်ႉ တီႈဢၼ်ဢမ်ႇမီးလွင်ႈဢူၼ်မေႃးသုၵ်ႉယုင်ႈၼၼ်ႉယူႇ။ ဢၼ်လမ်ႇလွင်ႈသုတ်းတႄႉ ထုၵ်ႇလီလိုမ်းဝႆႉၵူႊၸိူဝ်ႉၵူႊလွင်ႈၸူဝ်ႈၵႅပ်ႉသေ ၼွၼ်းပၼ်ႁႂ်ႈတႃၼွၼ်းဢိမ်ႇယဝ်ႉ ၸင်ႇသိုပ်ႇႁဵတ်းၼႃႈၵၢၼ်ဢၼ်လူဝ်ႇႁဵတ်းသၢင်ႈၵႂႃႇထႅင်ႈၼၼ်ႉ ၶႅမ်ႉတီႈသုတ်းယဝ်ႉ။\n\nဢဝ်လွၵ်းလၢႆးၸိူဝ်းၼႆႉသေ ယူတ်းယႃလႆႈတၢင်းပဵၼ်လွင်ႈၼၵ်းၸႂ် လႆႈယူႇ။ ၵူၼ်းၸိူဝ်းဢၼ်ႁဵတ်းလွင်ႈတူင်ႉၼိုင်တူဝ်ၶိင်းၵူႊမိုဝ်ႉဝၼ်းၼႆႉ မီးၼမ်ႉၵတ်ႉတႃႇၵေႈလိတ်ႈပၼ်ႁႃ လွင်ႈၼၵ်းၸႂ် ၶႅမ်ႉတီႈသုတ်းယဝ်ႉ။ ယွၼ်ႉၼၼ်  ယုမ်ႇယမ်ဝႃႈ သင်ႁဝ်းၶႃႈ ဢဝ်ၶေႃႈငၢႆႈငၢႆႈဢွၼ်ၸိူဝ်းၼႆႉသေ ႁဵတ်းသၢင်ႈၵႂႃႇၼႆၸိုင်  တေၵေႈလိတ်ႈလႆႈ လွင်ႈၼၵ်းၸႂ် ဢၼ်ၸၢင်ႊပဵၼ်မႃးလႆႈၸွမ်းၼႃႈၵၢၼ်ၼၼ်ႉ ၵူႊၵေႃႉၽႂ်မၼ်းယူႇ။"
+  },
+  {
+    "title": "လွင်ႈလီမၢႆတွင်းဝႆႉ ၼႂ်းၸၢတ်ႈပၢၼ်",
+    "content": "၁။ ယႃႇပေၶၢၼ်ႉ\n\nလွင်ႈၶၢၼ်ႉၼႆႉ ႁဵတ်းႁႂ်ႈသုမ်းၶၢဝ်းယၢမ်း။ ယႃႇၵုမ်ႉဝူၼ်ႉႁၼ် ၼွၼ်းၾၼ် လွင်ႈဢၼ်ပႆႇပဵၼ်မႃးၼၼ်ႉယူႇတိၵ်းတိၵ်း။ လူဝ်ႇႁဵတ်းသင်ၵေႃႈ လုၵ်ႉႁဵတ်းၵႂႃႇ ၵမ်းလဵဝ်လႄႈ။\n\n၂။ ယႃႇၶတ်းၸႂ် ဝႄႈပႅတ်ႈ လွင်ႈၶဵင်ႇတႃႉ ၼႂ်းၸၢတ်ႈပၢၼ်\n\nဝႆႉၸၢတ်ႈပၢၼ်ၸဝ်ႈၵဝ်ႇၼႆႉ မိူၼ်ပပ်ႉဢပုမ်ႇ ၼိုင်ႈပပ်ႉလႄႈ။ ပေႃးဢမ်ႇမီးၼႃႈလိၵ်ႈ မၢင်ဢၼ်ၼႆႉ တေဢမ်ႇမီးတီႈပွင်ႇ။ ပေႃးဝႃႈ ဢမ်ႇၶၢမ်ႈပူၼ်ႉၼႃႈလိၵ်ႈသေဢၼ်ႁေ သိုပ်ႇဢၢၼ်ႇၵႂႃႇ ၶပ်ႉၶပ်ႉတၢမ်းတၢမ်းၵၼ်ၸိုင် တေလႆႈ ႁပ်ႉႁူႉ လွင်ႈၶုၺ်ႉႁၼ် ၼႂ်းပပ်ႉၼၼ်ႉ တဵမ်ထူၼ်ႈလီ။\n\n၃။ ယႃႇယၢင်ႈပႆသဵၼ်ႈတၢင်း ႁႂ်ႈသိုဝ်ႈလိူၵ်းထိူၵ်း ၼႅၼ်ႇၽႅဝ်\n\nၶတ်းၸႂ် ႁႂ်ႈပဵၼ်သဵင်ငဝ်ႈတိုၼ်းမၼ်းလႄႈ။ ယႃႇၵုမ်ႇမဝ်းမိင်းၸွမ်း ၶေႃႈသဵင်ယွၼ်ႈမၼ်းၼၼ်ႉၵွႆး။ လဵင်ႉလူ တၢင်းႁတ်းႁၢၼ် ဢၼ်တေၶူင်သၢင်ႈဢွၵ်ႇမႃး လွင်ႈၼွၼ်းၾၼ်ၸဝ်ႈၵဝ်ႇၼၼ်ႉ ပဵၼ်ဢၼ်တေႉလႄႈ။\n\n၄။ ယႃႇၵုမ်ႇပႂ်ႉၶၢဝ်းယၢမ်းလီ\n\nလွင်ႈလီ လႄႈ လွင်ႈႁၢႆႉ၊ လွင်ႈဢၼ်ၸဝ်ႈၵဝ်ႇၶႂ်ႈပဵၼ် လႄႈ ဢၼ်ဢမ်ႇၶႂ်ႈပဵၼ်ၼၼ်ႉ မၼ်းၵိူတ်ႇပဵၼ်မႃး ၸွမ်းၶၢဝ်းယၢမ်းမၼ်း။ ယွၼ်ႉၼၼ် ယႃႇၵုမ်ႇပႂ်ႉၶၢဝ်းယၢမ်းလီ။ ၶၢဝ်းယၢမ်းလီ ဢၼ်တဵမ်ထူၼ်ႈဢၼ်ဝႃႈၼၼ်ႉ မၼ်းဢမ်ႇမီးသႄႈ။ လူဝ်ႇႁဵတ်းသင်ၵေႃႈ လုၵ်ႉႁဵတ်းၵႂႃႇ ႁႂ်ႈပဵၼ်လႄႈ။\n\n၅။ ယႃႇႁဵတ်းၵႅင်ႈ\n\nယႃႇၵုမ်ႇဝူၼ်ႉဝႃႈ ပိူၼ်ႈတေထၢင်ႇၼိူဝ်ႁဝ်းၸိူင်ႉႁိုဝ်ၼႆသေ လႅၼ်ၸဝ်ႈၵဝ်ႇၵႂႃႇတိၵ်းတိၵ်း။ သင်ၵုမ်ႇဝူၼ်ႉမႆႈၸႂ်ၸိူင်ႉၼႆတိၵ်းတိၵ်းၸိုင် တူဝ်သူၼႆႉ ဢမ်ႇၸႂ်ႈသူယဝ်ႉ။ ယႃႇယွမ်းႁႂ်ႈတူင်ႇဝူင်းၵူၼ်း ႁိမ်းႁွမ်းသူ ႁူမ်ႇငမ်းၼိူဝ်သူလႆႈ။ ၸုၵ်းမၼ်ႈၼိူဝ် လွင်ႈယုမ်ႇယမ်ၸဝ်ႈၵဝ်ႇလႄႈ။\n\n၆။ ယႃႇႁူမ်ႇလပ်ႉဝႆႉ တၢင်းယၢမ်ႈတေႉၸဝ်ႈၵဝ်ႇ\n\nတႅၼ်းတၢင်တီႈ တေပၵ်းတႃပႂ်ႉတူၺ်း တၢင်းယၢမ်းၸဝ်ႈၵဝ်ႇသေ ၵုမ်းထိင်းၵႂႃႇယူႇၼၼ်ႉ တႃႉပၢၵ်ႇလၢတ်ႈၼႄ တၢင်းယၢမ်းတေႉ ၸဝ်ႈၵဝ်ႇၼၼ်ႉတေတူၵ်းထုၵ်ႇယူႇ။ ၼႆႉပဵၼ်ၾိင်ႈမိူင်းၵူၼ်း ၶူင်းၵၢင်ယဝ်ႉ။\n\n၇။ ယႃႇႁႂ်ႈပဵၼ် မိူၼ်ၼင်ႇ ဢမ်ႇလိူဝ်လႆႈလႄႈ လႆႈႁဵတ်းၼၼ်ႉ\n\nၸၢတ်ႈပၢၼ်ၼိုင်ႈၸူဝ်ႈဢၼ်ဝႃႈၼႆႉ တႃႇတေလႆႈမႃး ဢမ်ႇငၢႆႈငၢႆႈသႄႈ။ သင်ပၵ်းၸႂ်တူၺ်းၼိူဝ် လွင်ႈဢၼ်တႃႇတေလႆႈ ႁဵတ်းသၢင်ႈၼႂ်းၸၢတ်ႈပၢၼ်ၼၼ်ႉၸိုင် တေလႆႈႁပ်ႉ လွင်ႈတၢင်းသိူဝ်း လႄႈ ဢၼ်တေမီးၽွၼ်းလီၼၼ်ႉယူႇ။\n\n၈။ ယႃႇၶတ်းၸႂ် ဢဝ်ပေႉ လွင်ႈတၢင်းမူတ်းၼႆႉ ၵမ်းလဵဝ်\n\nၶၢဝ်းတၢင်း ဢၼ်ယၢဝ်း ဢၢၼ်ႇမိုၼ်ႇ ဢၢၼ်ႇသႅၼ်လၵ်းၼၼ်ႉ တေလႆႈတႄႇယၢင်ႈၵႂႃႇ ၵမ်းယၢင်ႈယၢင်ႈဢိူဝ်ႈ။ ယွၼ်ႉၼၼ် ၶတ်းၸႂ် ယၢင်ႈပႆၵႂႃႇ ၵမ်းယၢင်ႈယၢင်ႈလႄႈ။\n\n၉။ ယႃႇၵုမ်ႇပၵ်းၸႂ်ၼိူဝ် ပၼ်ႁႃဢၼ်ပဵၼ်ပူၼ်ႉၵႂႃႇၼၼ်ႉ\n\nလွင်ႈပိုၼ်းလင်ၵေႃႈ ဝႆႉပႅတ်ႈမႃး တၢင်းလင်ပုၼ်ႉလႄႈ။ ၸၢတ်ႈပၢၼ်ဢၼ်ဝႃႈၼႆႉ တေလႆႈလတ်းၽၢၼ်ႇ လွင်ႈၸၢမ်းၼၼ်ႉယဝ်ႉၵွၼ်ႇ ၸင်ႇၸၢင်ႊဢဝ်လႆႈ ႁူႉလႆႈ တူဝ်ထူပ်း လွင်ႈပိူင်ပဵၼ်တေႉၼၼ်ႉယဝ်ႉ။ ပေႃးမေႃဢဝ် လွင်ႈပိူင်ပဵၼ်ပိုၼ်းလင်ၸဝ်ႈၵဝ်ႇၼၼ်ႉ ပဵၼ်တွၼ်ႈသွၼ်ၵေႃႈ ၵုမ်ႇထူၼ်ႈတႃႇ ၸၢတ်ႈပၢၼ်ယဝ်ႉ။\n\n၁၀။ ယႃႇပေႃးဝူၼ်ႉ ဢၼ်ဝႃႈ တေပဵၼ်သင်မႃးၼႆၼၼ်ႉ\n\nသုၼ်ႇလႆႈ တိုဝ်ႉတၢင်းၼႆႉ ပေႃးထိုင်ၶိင်ႇၶၢဝ်းမၼ်း မၼ်းတေပဵၼ်မႃးႁင်းၵွႆးယူႇ။ ယႃႇၵုမ်ႇဝူၼ်ႉမႆႈၸႂ်ၸွမ်းယူႇ။\n\n၁၁။ ယႃႇၶၢမ်ႇသုၵ်ႉၸွမ်း လွင်ႈတၢင်းဢၼ်ဢမ်ႇလမ်ႇလွင်ႈၼၼ်ႉ\n\nလူဝ်ႇလႆႈႁူႉဝႆႉဝႃႈ တႃႇတေလႆႈႁူႉႁၼ် ႁူပ်ႉမႃး လွင်ႈလီၼႆႉ လႆႈပႂ်ႉၶၢဝ်းယၢမ်းမႃးၼႆၼၼ်ႉလႄႈ။ ယွၼ်ႉၼၼ် ႁဵတ်းသၢင်ႈၵႂႃႇ ႁႂ်ႈလီတီႈ���ုတ်းႁေ မၵ်းမၼ်ႈပၼ် သဵၼ်ႈတၢင်းဢၼ်မႂ်းယၢင်ႈၵႂႃႇၼၼ်ႉ ၵူႊယၢင်ႈလႄႈ။ တၢင်ႇလွင်ႈ ၸိူဝ်းဢမ်ႇၵဵဝ်ႇၶွင်ႈၼၼ်ႉ လိုမ်းဝႆႉႁေလႃႈ။\n\n၁၂။ ယႃႇၶႂ်ႈယိပ်းၵမ် ဝၵ်ႉငမ်ဝႆႉ ဢီႈသင်သေလွင်ႈလွင်ႈ ႁႂ်ႈမၼ်ႈၵိုမ်း\n\nၸၢတ်ႈပၢၼ်ၼႆႉ မၼ်းတိုၼ်းၸၢင်ႊမီးလွင်ႈလႅၵ်ႈလၢႆႈယူႇၵူႊၶၢဝ်းၼၼ်ႉယဝ်ႉ။ လူဝ်ႇၶုၵ်းၸႂ်လႆႈဝႆႉယူႇၵူႊၶၢဝ်းဝႃႈ ဢီႈသင်ၵေႃႈ ဢမ်ႇမၼ်ႈၵိုမ်းယူႇတႃႇသေႇ ၼႆယဝ်ႉ။\n\n၁၃။ ယႃႇပွႆႇပႅတ်ႈ လွင်ႈတၢင်းသိူဝ်း ဢၼ်မီးဝႆႉၼၼ်ႉ\n\nမိူဝ်ႈလဵဝ်မီးဝႆႉယူႇလႄႈ သင်ႁဝ်းဢမ်ႇမၵ်းမၼ်ႈမၼ်းၸိုင် မိူဝ်းၼႃႈ သင်သဵၼ်ႈတၢင်းသုတ်းၵႂႃႇၵေႃႈ ႁဝ်းတေႁႃမၼ်းဢမ်ႇလႆႈထႅင်ႈ။ မုင်ႈမွၼ်း ၸၢတ်ႈပၢၼ်မိူဝ်းၼႃႈဝႆႉ တင်းၼမ်သေ ယႃႇႁဵတ်းႁႂ်ႈ ၸၢတ်ႈပၢၼ်ၸဝ်ႈၵဝ်ႇ ဢၼ်ပဵၼ်ယူႇမိူဝ်ႈလဵဝ်ၼႆႉ လႆႈႁၢင်ႉလႆႈၽၢင်းလႄႈ။\n\n၁၄။ ယႃႇႁဵတ်းပဵၼ် ၽၢႆႇၵေႃႉဢၼ်လႆႈႁပ်ႉယူႇၵွႆး\n\nသင်ၸဝ်ႈၵဝ်ႇ မီးၶူဝ်းၶွင် ဢုၵ်ႉၸႃႇငိုၼ်းၶမ်းၼမ်ႁႅင်းၸိုင် ႁႂ်ႈမေႃၸႅၵ်ႇ ႁဵတ်းၵၢၼ်လီၵုသူဝ်ႇတႃႉ။ သင်ဢမ်ႇမီးငိုၼ်းၶမ်းၼႆၵေႃႈ ဢဝ်ႁူဝ်ၸႂ် ၸဝ်ႈၵဝ်ႇသေ ႁဵတ်းၵၢၼ်လီၵူႉသူဝ်ႇလႄႈ။ ၸႅၵ်ႇပၼ် ၵႃႈၼင်ႇႁဵတ်းသၢင်ႈလႆႈၼၼ်ႉလႄႈ ။\n\n၁၅။ ယႃႇၵုမ်ႇပႂ်ႉမွင်း ႁႂ်ႈၵူၼ်းတၢင်ႇၵေႃႉ မႃးႁဵတ်းပၼ်ၸဝ်ႈၵဝ်ႇ\n\nဢမ်ႇလူဝ်ႇပိုင်ႈဢိင်ပိူၼ်ႈယူႇတိၵ်းတိၵ်း။ လူဝ်ႇလၢတ်ႈသင်ၵေၢႈ လၢတ်ႈလႄႈ။ လူဝ်ႇႁဵတ်းသင်ၵေႃႈ ႁဵတ်းၵႂႃႇလႄႈ။ ယႃႇႁူမ်ႇတူမ်း သူင်ႇသိမ်းဝႆႉ လွင်ႈၶုၺ်ႉႁၼ် ၸဝ်ႈၵဝ်ႇလႄႈ တၢင်းဝူၼ်ႉၸဝ်ႈၵဝ်ႇ။\n\n၁၆။ ယႃႇၶတ်းႁႂ်ႈ ႁဵတ်းသၢင်ႈ ႁႂ်ႈပဵၼ်ဢၼ်မႅၼ်ႈယူႇၵူႊၶၢဝ်း\n\nတႃႇပဵၼ် လွင်ႈမၢၼ်ႇမႅၼ်ႈၼၼ်ႉ သဵၼ်ႈတၢင်းၵႂႃႇမၼ်း မီးတင်းၼမ်။ မၢင်ပွၵ်ႈမၢင်လႂ်ၼႆႉ ၽိူဝ်ႇတႃႉတေ ၶတ်းၸႂ် ႁဵတ်းသၢင်ႈၼႄ ႁႂ်ႈပိူၼ်ႈႁၼ် လွင်ႈတၢင်းမၢၼ်ႇမႅၼ်ႈၼၼ်ႉ တႃႉၶၢမ်ႇယွမ်းသုမ်းပၼ်ႁေလႃႈ။ ပေႃးႁဵတ်းၼၼ် ယင်းၸၢင်ႊ လႆႈယူႇၵတ်းယဵၼ်ၸႂ်လီၵွၼ်ႇ။\n\n၁၇။ ဢမ်ႇပႆႇႁူႉလွင်ႈတၢင်းမၼ်းလီသေ ယႃႇၽူမ်ႈၶၢတ်ႈဢၵေးပိူၼ်ႈ\n\nတေလႆႈလူတ်းယွမ်း ၵၢၼ်တူၺ်း ပိူင်ၶွပ်ႇ ၼွၵ်ႈတူဝ်ပိူၼ်ႈ လႄႈ တၢင်းႁဵတ်းသၢင်ႈပိူၼ်ႈ ၸူဝ်ႈၵႅပ်ႉၼၼ်ႉသေ ၶၢတ်ႈဢၵေးပိူၼ်ႈၼၼ်ႉယဝ်ႉ။ ၶတ်းၸႂ် မေႃဝူၼ်ႉပဵၼ်လွင်ႈလီသေ ႁၵ်ႉႁွမ်ၵၼ်ၼၼ်ႉ လီတီႈသုတ်းယဝ်ႉ။\n\n၁၈။ ယႃႇႁႂ်ႈလွင်ႈတၢင်းၸင်း ၸပ်းၸႂ်ဝႆႉတႃႇသေႇ\n\nသင်ၶႃႈလိုမ်းသေလွင်ႈလွင်ႈ ဢမ်ႇၼၼ် သေၵေႃႉၵေႃႉၸိုင် လိုမ်းလႆႈယူႇ၊ ၵူၺ်း ယႃႇပေၸင်းၶဝ်ၵႂႃႇ တေႃႇၸူဝ်ႈ။ လွင်ႈတၢင်းၸ��်းၼႆႉ ၸၢင်ႊႁဵတ်းႁၢႆႉ တႅင်းသႂ်ႇၶိုၼ်း ႁူဝ်ၸႂ်ႁဝ်းယူႇၵူႊၶၢဝ်းၼၼ်ႉယဝ်ႉ။ ယႃႇပေၸင်း၊ ပွႆႇဝၢင်းပၼ်ႁေလႄႈ။\n\n၁၉။ ၼႂ်းလွင်ႈတၢင်းႁၵ်ႉၼၼ်ႉ ယႃႇပေပေႃးဝူၼ်ႉ လွင်ႈဢၼ်ဢမ်ႇၶဝ်ႈတၢင်းတိုဝ်း\n\nပဵၼ်ငဝ်းလၢႆးၸိူင်ႉႁိုဝ် ၶၵ်ႉတွၼ်ႈလႂ်ၵေႃႈယဝ်ႉ ၵမ်ႈၼမ်ၼႆႉ လႆႈၸႂ် ၵူၼ်းဢၼ်မေႃ ယွမ်းႁပ်ႉလႆႈ လူၺ်ႈဢမ်ႇလူဝ်ႇမီးလွင်ႈတၢင်းသင်ၼၼ်ႉယဝ်ႉ။ ယႃႇၵုမ်ႇဝူၼ်ႉၼမ်ယူႇ၊ ပေႃးတင်းသွင်ၽၢႆႇ မီးလွင်ႈတၢင်းသိူဝ်းမိူၼ်ၵၼ်ၵေႃႈ ၼၼ်ႉပဵၼ် တၢင်းႁၵ်ႉၸႅတ်ႈယဝ်ႉ။\n\n၂၀။ ယႃႇပွႆႇၽႃႈပႅတ်ႈ ဢူၺ်းၵေႃႉၸမ်ၸႂ်သုတ်း\n\nၵပ်းသိုပ်ႇႁႃၵၼ်ယူႇၵူႊၶၢဝ်းလႄႈ။ တေႃႇသူႈပၼ် တွၼ်ႈတႃႇၶဝ်လႄႈ။ ပေႃးၼၼ်ၸင်ႇ ၶဝ်ၵေႃႈ တေမေႃတေႃႇသူႈပၼ် တွၼ်ႈတႃႇသူၼၼ်ႉယဝ်ႉ။ ဢူၺ်းၵေႃႉ ဢၼ်ၸမ်ၸႂ် ႁူႉၸႂ်သူလိူဝ်ပိူၼ်ႈသုတ်းၼၼ်ႉ ၸၢင်းပဵၼ်လႆႈ ယၢင်ဢၼ်တေတိတ်းၸပ်းၸွမ်းသူၵႂႃႇ တင်းၸူဝ်ႈၸၢတ်ႈပၢၼ်ယဝ်ႉ။"
+  },
+  {
+    "title": "တၢင်းၶတ်းၸႂ် မီးတီႈလႂ် လွင်ႈဢွင်ႇပေႉ မီးတီႈၼၼ်ႉ",
+    "content": "သင်တေလဵၼ်ႈၵေႃႉၵူၼ်းၼိုင်ႈၵေႃႉၸိုင် “ၶတ်းၸႂ်” လဵၼ်ႈၵေႃႉမၼ်းလူၺ်ႈ ၼမ်ႉၸႂ်တေႉၸဝ်ႈၵဝ်ႇလႄႈ။ ယႃႇပေ လဵၼ်ႈၵေႃႉမၼ်း ယွၼ်ႉၵေႃႉပုၼ်ႉၵေႃႉၼႆႉ။ ပေႃးၼၼ်ၸင်ႇ ၸဝ်ႈၵဝ်ႇတေၸၢင်ႊႁူႉလႆႈဝႃႈ ၸဝ်ႈၵဝ်ႇၼႆႉ ပဵၼ်ၵူၼ်းဢၼ်ပေႉတူဝ်လႆႈ၊ မေႃတႅပ်းတတ်းႁင်းၵွႆးလႆႈ၊ မေႃဝူၼ်ႉႁၼ် လွင်ႈလီ လွင်ႈၸႃႉလႆႈႁင်းၵွႆး။\n\n“ၶတ်းၸႂ်” ႁႂ်ႈၼမ်ႉၵတ်ႉၸဝ်ႈၵဝ်ႇ ၶိုတ်းၸၼ်ႉ ၶိုၼ်ႈသုင်ႁင်းၵွႆးလႄႈ။\n\n“ၶတ်းၸႂ်” ႁဵတ်းသၢင်ႈ ၽေႃႇၼမ်ႉၼႄတူဝ် ဢၼ်ၸဝ်ႈၵဝ်ႇ ၶႂ်ႈပဵၼ်ၼၼ်ႉ ႁႂ်ႈထိုင်တီႈသုတ်း ၸွမ်းၼင်ႇ ၸဝ်ႈၵဝ်ႇ ပွင်ပဵၼ်လႆႈၼၼ်ႉလႄႈ။\n\n(1) “ၵေႃႉယႂ်ႇယဝ်ႉ ယႃႇၶႂ်ႈႁဵတ်းသၢင်ႈ လႄႈ ဝႆႉၼမ်ႉၸႂ် ဢၼ်တိုၵ်ႉမိူၼ်လုၵ်ႈဢွၼ်ႇ”\n\nၶတ်းပႅတ်ႈၸႂ်ၸဝ်ႈၵဝ်ႇ ဢၼ်မေႃၶႅၼ်၊ ၸႂ်ပိတ်း၊ ၸႂ်ပွတ်း၊ ၸႂ်လမ်ၼိူဝ် ၵေႃႉႁၵ်ႉၸဝ်ႈၵဝ်ႇ လူၺ်ႈဢမ်ႇမီးလွင်ႈတၢင်းၼၼ်ႉလႄႈ။ သင်ဢမ်ႇၶတ်းပႅတ်ႈၸႂ်ၼၼ်ႉႁေ ၸဝ်ႈၵဝ်ႇတေလႆႈႁိူဝ်ႉၸႂ်ၵွႆးဢမ်ႇၵႃး တေလႆႈသုမ်းၶၢဝ်းယၢမ်း ဢၼ်မီးၵႃႊၶၼ် တႃႇသွၵ်ႈႁႃတၢင်းႁူႉတၢင်းႁၼ်ၼၼ်ႉပႃးထႅင်ႈၵွၼ်ႇ။\n\nပၼ်တၢင်းႁၵ်ႉ လႄႈ လွင်ႈယုမ်ႇၸႂ် တီႈၵူၼ်းၵေႃႉဢၼ်ႁဝ်း ပႆႇပဵၼ်ၸဝ်ႈၶွင်မၼ်းလႆႈၼၼ်ႉ လူၺ်ႈ တၢင်းၶတ်းၸႂ် လႄႈ လွင်ႈၼိမ်တဵင်ႈလႄႈ။\n\nလိုၼ်းသုတ်း သင်ၵူၼ်းၵေႃႉဢၼ်သူႁၵ်ႉၼၼ်ႉ ပွႆႇသူဝႆႉပႅတ်ႈၵေႃႉလဵဝ်ၵေႃႈယဝ်ႉ တွၼ်ႈတႃႇတူဝ်သူၼၼ်ႉ မၼ်းတိုၼ်းၵိုတ်းဝႆႉယူႇသေလွင်ႈလွင်ႈယဝ်ႉ။\n\nလုၵ်ႉတီႈ တၢင်းႁၵ်ႉ ဢၼ်သူႁၵ်ႉၵူၼ်းၵေႃႉၼိုင်ႈၼၼ်ႉသေ ၸၢင်ႊႁဵတ်းႁႂ်ႈ တူၼ်တူဝ်ၵဝ်ႇ ႁွတ်ႈၽႅဝ်လႆႈတီႈ သဵၼ်ႈတၢင်းဢွင်ႇပေႉ ၼၼ်ႉယဝ်ႉ။\n\nတီႈတၢင်းႁၵ်ႉၼၼ်ႉ မီးဢဵၼ်ႁႅင်းယႂ်ႇလူင် ဢၼ်ႁဝ်းၶဝ် ဢဝ်သၢႆတႃသေ တူၺ်းဢမ်ႇႁၼ်လႆႈၼၼ်ႉယဝ်ႉ။"
+  },
+  {
+    "title": "တွၼ်ႈတႃႇတေမီး လွင်ႈယုမ်ႇယမ်ၸဝ်ႈၵဝ်ႇသေ ယူႇသဝ်းၵႂႃႇ ႁႂ်ႈမီးတၢင်းႁၢင်ႊလီၼၼ်ႉ…",
+    "content": "1) ယႃႇပေတႅၵ်ႈၼိူင်းၵၼ်တင်း ၵူၼ်းတၢင်ႇၵေႃႉ ၵၢပ်ႈပၢၼ်ယၢမ်းလဵဝ် မီးၵူၼ်းၸႂ်ႉတိုဝ်း သိုဝ်ႇတူင်ႇဝူင်းၵူၼ်း တင်းၼမ်။ ၼႂ်းသိုဝ်ႇတူင်ႇဝူင်းၵူၼ်းၼၼ်ႉ ဢၼ်ၸိုဝ်ႈၸႂ်ႈၵေႃႈမီး၊ လွင်ႈဢမ်ႇၸိုဝ်ႈၸႂ်ႈၵေႃႈမီး။ မၼ်းၶူၼ်းၶဝ်း လေႃးလႄးၵၼ်ဝႆႉ။ ယွၼ်ႉၼၼ်လႄႈ လုၵ်ႉတီႈၼႆႉသေ ယႃႇပေဢဝ်ၸဝ်ႈၵဝ်ႇ တႅၵ်ႈၼိူင်းၵၼ်တင်း ၵူၼ်းတၢင်ႇၵေႃႉ။\n\n2) ၽူႈလႂ်ၽႂ်ၵေႃႈ ဢမ်ႇၸႂ်ႈၵူၼ်းမီးတဵမ်ထူၼ်ႈၵူႊလွင်ႈ ၵူၼ်းၵူႊၵေႃႉၼႆႉ မီးဝႆႉတၢင်းႁၢင်ႊလီ ၸဝ်ႈၵဝ်ႇ ႁင်းၽႂ်မၼ်း။ ၵွပ်ႈပိူဝ်ႈၼၼ် လူဝ်ႇလႆႈႁၵ်ႉသႃ တၢင်းႁၢင်ႈလီ ဢၼ်လႆႈမႃးၸဵမ်မိူဝ်ႈၵိူတ်ႇ။ ၵၢပ်ႈပၢၼ်ယၢမ်းလဵဝ် မီးႁၢၼ်ႉႁဵတ်းႁၢင်ႈတင်းၼမ်လၢႆ။ ၶႂ်ႈမႄးသင်၊ ၸိူင်ႉႁိုဝ်ၼႆၵေႃႈ လႆႈမူတ်း။ ၵူၺ်းၵႃႊ သူၶဝ် တေလႆႈႁူႉ မၢႆတွင်းဝႆႉ လွင်ႈၼိုင်ႈ။ ၶူဝ်းၶွင်သင်သေဢမ်ႇဝႃႈ ဢၼ်ယႃႉသၽႃႇဝသေ မႄးဝႆႉ ႁႂ်ႈပိူၼ်ႈတူၺ်းႁၢင်ႊလီၼၼ်ႉ ဢမ်ႇၵႂႃႇလႆႈၶၢဝ်းၵႆ။ ယွၼ်ႉဝႃႈ ၼႂ်းမိူင်းၵူၼ်းၼႆႉ ဢမ်ႇမီးလွင်ႈမၼ်ႈၵိုမ်းၼၼ်ႉယဝ်ႉ။\n\n3) ႁၢင်ႈၶိူင်ႈပၼ် တူဝ်ၶိင်းၸဝ်ႈၵဝ်ႇလႄႈ ႁဵတ်းႁၢင်ႈ ဢမ်ႇၼၼ် ႁၢင်ႈၶိူင်ႈပၼ် တူဝ်ၶိင်းၸဝ်ႈၵဝ်ႇဢၼ်ဝႃႈၼၼ်ႉ ဢမ်ႇၸႂ်ႈဝႃႈ ၵႂႃႇမႄးၼႃႈ မႄးတႃ မႄးၶိူင်ႈတူဝ်ၶိင်း မဵဝ်းၼိုင်ႈယဝ်ႉ မဵဝ်းၼိုင်ႈ။ ပွင်ႇဝႃႈ ႁႂ်ႈမေႃယူႇ၊ မေႃလိူၵ်ႈသိူဝ်ႈၶူဝ်းသေ ၼုင်ႈႁႂ်ႈမီးလွင်ႈတႅတ်ႈတေႃး၊ ယႃႇပေယူႇဝူၺ်ႇႁင်ႈ ၸဵမ်ၸိူဝ်းၼႆႉ။ ထႅင်ႈလွင်ႈၼိုင်ႈၵေႃႈ ၶတ်းၸႂ်ယူႇသဝ်း ႁႂ်ႈမီးတၢင်းသိူဝ်းသေ ဢဝ်လွင်ႈတၢင်းယုမ်ႉၼၼ်ႉ ႁၢင်ႈၶိူင်ႈပၼ်ၸဝ်ႈၵဝ်ႇၵႂႃႇ ၵူႊဝၼ်းလႄႈ။\n\n4) လုမ်းလႃးၸဝ်ႈၵဝ်ႇလႄႈ ၵၢၼ်တီႈဢၼ်ဝႃႈ လုမ်းလႃးၸဝ်ႈၵဝ်ႇၼၼ်ႉၵေႃႈ ပွင်ႇဝႃႈ တေလႆႈတူၺ်းထိုင် လုမ်းလႃး တူဝ် တင်း ၸႂ် တင်းသွင်လွင်ႈၼၼ်ႉယဝ်ႉ။ တွၼ်ႈတႃႇ ပၢႆးယူႇလီ ၸႂ်တေၶႅမ်ႉလႅပ်ႈသေ မီးလွင်ႈမၼ်ႈၸႂ်ၼၼ်ႉ တေလႆႈႁဵတ်းၵၢၼ် ဢၼ်ၸဝ်ႈၵဝ်ႇ ပႃးဝႃႇသၼႃႇ။ ယဝ်ႉၵေႃႈ တေလႆႈလဵင်ႉထၢတ်ႈၸႂ် ဢၼ်မေႃႁၼ်လီၼိူဝ်ပိူၼ်ႈၼၼ်ႉယဝ်ႉ။ လိူဝ်ၼၼ်ႉ ၼင်ႇႁိုဝ် ပၢႆးယူႇလီ ၽၢင်ႁ���င်ႈတူဝ်ၶိင်း တေၶႅင်လႅင်းလီၼၼ်ႉၵေႃႈ တေလႆႈၵိၼ်ပၼ် တၢင်းၵိၼ် ဢၼ်ငမ်ႇမႅၼ်ႈၸွမ်း ပၢႆးယူႇလီ၊ လဵၼ်ႈဢဵၼ်ႁႅင်းပၼ် ၸဵမ်ၸိူဝ်းၼႆႉ။"
+  },
+  {
+    "title": "ယႃႇၵႂႃႇၶၢဝ်းတၢင်း ၸွမ်းၵူၼ်းၸိူဝ်းၼႆႉ",
+    "content": "ၵူၼ်းၶင်းလႆႈ\n\nၵူၼ်းၸိူဝ်းဢၼ်ၶင်းယူႇတႃႇသေႇ၊ ၶင်းတီႉၶင်းတေႃႉ ၼႆႉ ပေႃးပဵၼ်လႆႈ ဢမ်ႇထုၵ်ႇလီၵႂႃႇၶၢဝ်းတၢင်းၸွမ်းၶဝ်၊ မိူဝ်ႈတိုၵ်ႉလူဝ်ႇၵႂႃႇၶၢဝ်းတၢင်းယူႇၼၼ်ႉ ၶဝ်တေၶင်းဝႃႈ ႁိူဝ်ႉၼႃႇယဝ်ႉ၊ ၶႂ်ႈမိူဝ်းၶိုၼ်းယဝ်ႉဝႃႈ၊ ဢမ်ႇၶႂ်ႈၵႂႃႇယဝ်ႉၵဝ်၊ တွင်ႉမႆႈၶဝ်ႈၼႃႇယဝ်ႉဢေႉ ၼႆၸိူဝ်ႉၼႆတိၵ်းတိၵ်း၊ ပေႃးၵႂႃႇတၢင်းၸွမ်းၵူၼ်းၸိူင်ႉၼႆၸိုင် ၸဝ်ႈၵဝ်ႇတေ ဢမ်ႇတၼ်းလႆႈဢႅဝ်ႇလႄႇ၊ ဢမ်ႇတၼ်းလႆႈလဵပ်ႈႁဵၼ်းသင်သေ တေၵုမ်ႇလႆႈထွမ်ႇသဵင်ၶင်းၶဝ်သေ ႁိူဝ်ႉၸွမ်းၶဝ်ၵွႆး။\n\nၵူၼ်းမေႃၼႄးတီႉၼႄးတေႃႉ\n\nၵူၼ်းၸိူင်ႉၼႆတေၵုမ်ႇၶင်းဝႃႈ ႁွင်ႈၼွၼ်းၵေႃႈ ဢမ်ႇမိူၼ်ၸႂ်သေဢိတ်း၊ ၵႃးၵေႃႈ ဢမ်ႇၶႅမ်ႉ၊ တၢင်းၵေႃႈ ဢမ်ႇလီ ၼႆယဝ်ႉ။ ပေႃးၵႂႃႇၸွမ်းၵူၼ်းၸိူင်ႉၼႆၸိုင် တေၵုမ်ႇလႆႈသပ်းလႅင်းၼေၶဝ်ဝႃႈ ဢမ်ႇၸၢင်ႊႁဵတ်းႁိုဝ်ယဝ်ႉၼႃႇ၊ ၶႂ်ႈယဝ်ႉႁေလႄႈ ၼႆယူႇတိၵ်းတိၵ်းၵွႆး၊ ဢႅဝ်ႇလႄႇၵေႃႈ ၸႂ်ဢမ်ႇသိူဝ်းလႆႈ။\n\nၵူၼ်းၸိူဝ်းမေႃသဵတ်ႈတီႉသဵတ်ႈတေႃႉ၊ မေႃၸွမ်းပိူင်ၼႃႇ ၵူၼ်းၸိူဝ်းၼႆႉသမ်ႉ ၸွမ်းပိူင်ပူၼ်ႉတီႈၼႃႇ၊ ဢီႈသင်ၵေႃႈ လူဝ်ႇႁႂ်ႈမႅၼ်ႈၸွမ်းၶၢဝ်းယၢမ်း၊ လူဝ်ႇႁႂ်ႈမႅၼ်ႈၸွမ်းၼင်ႇ ၽႅၼ်ၵၢၼ်ဢၼ်တမ်းဝၢင်းဝႆႉ၊ လိူဝ်ၵႂႃႇယွမ်းၵႂႃႇဢိတ်းၼိုင်ႈၵေႃႈ လူဝ်ႇလႆႈသႅပ်းလႅင်းၼႄတေႉတေႉဝႃႈဝႃႈ၊ ယဝ်ႉၵေႃႈ ဢၼ်ၼၼ်ႉၵေႃႈ ဢမ်ႇၵိၼ်၊ ဢၼ်ၼႆႉၵေႃႈဢမ်ႇမၵ်ႉ၊ ဢၢႆသႅဝ်ၸိူင်ႉၼႆၵေႃႈ ဢမ်ႇၶၢမ်ႇလႆႈ ၼႆယူႇတိၵ်းတိၵ်းၸိုင် တမ်းၸႂ်လႃႈ ၸဝ်ႈၵဝ်ႇဢမ်ႇတၼ်းလႆႈလႄႇႁႂ်ႈသိူဝ်းၸႂ်လေႃႇ။\n\nၵူၼ်းမီးၸူႉ၊ မီးၼႃႈႁိူၼ်း\n\nၵူၼ်းမီးၸူႉ၊ မီးၼႃႈႁိူၼ်းၼႆႉ တင်းသွင်ၵေႃႉၵေႃႈလီ၊ ၵေႃႉလဵဝ်ၵွႆးၵေႃႈလီ ပေႃးပဵၼ်လႆႈ ဢမ်ႇထုၵ်ႇလီ ၵႂႃႇတၢင်းၸွမ်းၶဝ်၊ ၵမ်ႈၽွင်ႈတႄႉ ၶဝ်ပွင်ႇၸႂ်ပၼ်ၵၼ်လႆႈယူႇၼႆသေတႃႉ၊ ၵူၼ်းၵမ်ႈၼမ်ၼႆႉ သုၵ်ႉသၵ်ႉၼႃႇ။\n\nပေႃးၵႂႃႇၸွမ်း တင်းသွင်ၵေႃႉသမ်ႉ ၸဝ်ႈၵဝ်ႇလူဝ်ႇပဵၼ် ၵူၼ်းၸွမ်းလင်သေ ပႂ်ႉထႆႇပၼ်ႁၢင်ႊ၊ ပေႃးၶဝ်ငေႃးတေႃႇၵၼ်ၵေႃႈ သမ်ႉလူဝ်ႇသႅပ်းလႅင်းၸွႆႈၵေႃႉၼၼ်ႉ၊ လၢတ်ႈၼႄၵေႃႉၼႆႉ၊ ဢမ်ႇထၢင်ႇထုၵ်ႇ တေလႆႈဝွၼ်း တင်းသွင်ၵေႃႉ ယႃႇႁႂ်ႈၶႃၽိတ်းၵၼ်၊ မေႃးၵၼ်ၵွၼ်ႇ။\n\nသင်ၵႂႃႇၸွမ်းၵေႃႉလဵဝ်ၵွႆးသမ်ႉ မၼ်းတေၵုမ်ႇ သူင်ႇလိၵ်ႈ၊ ႁၢႆးငၢၼ်း လၢတ်ႈၼေၸူႉမၼ်းဝႃႈ ႁဵတ်းသင်ယူႇ၊ ထိုင်လႂ်ယဝ်ႉ၊ ၵိၼ်သင်ယူႇ၊ ဝၢၼ်ၵႃႈႁိုဝ်၊ တေၵုမ်ႇ Video call တေႃႇၸူႉမၼ်း၊ တေၵုမ်ႇလၢတ်ႈၾူၼ်းတေႃႇၸူႉမၼ်းတိၵ်းတိၵ်းၵွႆး၊ ပေႃးၵိုင်ႉၵၢင်ႉ မီးၶပ်ႉမၢႆ တႃႇတေၵႂႃႇတၢင်းထႅင်ႈတၢင်ႇတီႈၵေႃႈ မၼ်းတေလူဝ်ႇယွၼ်းၶႂၢင်ႉတီႈၸူႉမၼ်းထႅင်ႈၵွၼ်ႇ၊ မၢင်ပွၵ်ႈၸဝ်ႈၵဝ်ႇ မၼ်းယင်းတေလိုမ်းဝႃႈ မၼ်းၵႂႃႇၸွမ်းသူၵွၼ်ႇ၊ ၼႂ်းၸႂ်မၼ်းၼၼ်ႉ တေမီးၸူႉမၼ်းၵွႆး၊ ယွၼ်ႉၵူၼ်းၸိူဝ်းၼႆႉ ပေႃးတေၵႂႃႇတၢင်းၼႆၸိုင် ထုၵ်ႇလီဢွၼ်ၵၼ်ဝႄႈယူႇယဝ်ႉ။\n\nႁႂ်ႈဢွၼ်ၵၼ် ၵႂႃႇတၢင်း၊ ဢႅဝ်ႇလႄႇလႆႈ မူၼ်ႈမူၼ်ႈသိူဝ်းသိူဝ်းသေၵမ်း။"
+  },
+  {
+    "title": "ပဵၼ်ၽူႈယိင်းႁႃႉ ၽူႈၸၢႆး",
+    "content": "ထၢမ် – ၵူးၵႄး (Google) ၼႆႉ ပဵၼ်ၽူႈယိင်းႁႃႉပဵၼ်ၽူႈၸၢႆးမႃႈ\nတွပ်ႇ – ပဵၼ်ၽူႈယိင်းလေႃႇ ဢမ်ႇတူၺ်းလႃႇ တႅမ်ႈႁႃသင်ၵေႃႈ တႅမ်ႈတမ်ႉပႆႇတၼ်းယဝ်ႉလီ မၼ်းပေႃးပၼ်တၢင်းႁၼ်ထိုင်မႃးယူႇယဝ်ႉ"
+  },
+  {
+    "title": "တွၼ်ႈတႃႇၼႃႈႁိူၼ်းၼိုင်ႈလင်ၼႆႉ သႅတ်ႉၸႃႇလမ်ႇလွင်ႈလိူဝ်ငိုၼ်းတွင်းၼႆ ယႃႇပေလိုမ်းၵၼ်သႄႈ။",
+    "content": "1) မီးဢုၵ်ႉၸႃႇငိုၼ်းၶမ်းၵွႆး ဢမ်ႇယဝ်ႉသႄႈ\nမိူဝ်ႈပႆႇတႄႇၼႃႈႁိူၼ်း၊ သၢင်ႈၼႃႈႁိူၼ်းႁူမ်ႈၵၼ် ၽွင်းတိုၵ်ႉပဵၼ်မၢဝ်ႇသၢဝ်ၼၼ်ႉတႄႉ တၢင်းႁၵ်ႉၼႆႉ တေမီးၼမ်ႉၼၵ်းပိူဝ်ႈတႃႇၵူၼ်းတင်းသွင်သေတႃႉ သင်ဝႃႈ တႄႇၼႃႈႁိူၼ်းႁူမ်ႈၵၼ်ယဝ်ႉၸိုင် မၢင်ပွၵ်ႈ တၢင်းႁၵ်ႉဢၼ်ဝႃႈၼၼ်ႉ ႁၢႆၵႂႃႇလႂ်ၵေႃႈ ဢမ်ႇတၼ်းႁူႉ။ ၵွပ်ႈၼၼ်လႄႈ ၽွင်းမိူဝ်ႈၵူၼ်းသွင်ၵေႃႉယူႇၵႆၵၼ်၊ ၽွင်းမိူဝ်ႈတၢင်းႁၵ်ႉ ႁၢႆလၢႆ ယၢၼ်ၵႆႁဝ်းၵႂႃႇၸူဝ်ႈၵႅပ်ႉၼၼ်ႉ ထုၵ်ႇလီ တိုဝ်းၵမ်ဝႆႉ သႅတ်ႉၸႃႇၼၼ်ႉ မၼ်ႈမၼ်ႈၵိုမ်းၵိုမ်းယဝ်ႉ။ ပေႃးၼၼ်ၸင်ႇ ၼႃႈႁိူၼ်းၼိုင်ႈလင် တေမီးလွင်ႈဢုၼ်ႇၸႂ်ၵႂႃႇၶၢဝ်းယၢဝ်းၼၼ်ႉယဝ်ႉ။ မၢင်ပွၵ်ႈမၢင်လႂ်ၼႆႉ ၼႂ်းၼႃႈႁိူၼ်းၼိုင်ႈလင်ၼႆႉ မီးငိုၼ်းၶမ်းၵွႆးဢမ်ႇပႆႇတဵမ်ထူၼ်ႈၼႆ လီႁူႉၵၼ်ဝႆႉၵူႊၵေႃႉယူႇ။\n\n2) တိုဝ်းၵမ်ဝႆႉ သႅတ်ႉၸႃႇႁႂ်ႈမၼ်ႈၵႅၼ်ႇၵိုမ်းလႄႈ\nၽၢႆႇၼႃႈ ႁိုဝ် ၽၢႆႇလင်ၵေႃႉပဵၼ်ၸဝ်ႈၽူဝ် လႄႈ မေးၼၢင်းၼၼ်ႉ ဢမ်ႇထုၵ်ႇလီ ၼွၵ်ႈၸႂ်တေႃႇၶဝ်။ ၼႃႈႁိူၼ်းဢၼ်ဢဝ် မီးလွင်ႈသႅတ်ႉၸႃႇၼိူဝ်ၵၼ်သေ သၢင်ႈမႃးၼၼ်ႉ လီပဵင်းပေႃးႁၢၼ်ႉၸႂ်တေႉတေႉ။\nယွၼ်းႁႂ်ႈၵူႊၵေႃႈ မီးၼႃႈႁိူၼ်းဢၼ်ဢုၼ်ႇၸႂ်ၼၼ်ႉသေၵမ်း……"
+  },
+  {
+    "title": "မီးၼမ်ႉၵတ်ႉမဵဝ်းလဵဝ်ၵွႆးလႄႇ",
+    "content": "ပေႃႈႁိူၼ်းၼုမ်ႇၵေႃႉ႞ မၼ်းၵႂႃႇၼင်ႈဢွၵ်ႉလဝ်ႈယူႇ ၼႂ်းႁၢၼ်ႉၶ��ႆလဝ်ႈ၊ ၼင်ႈၽၢႆႇၼႃႈ ၵူၼ်းၶၢႆလဝ်ႈသေ ယွင်ႈဢၢမ်း လွင်ႈတၢင်းၵတ်ႉတၢင်းၶႅၼ်ႇ တၢင်းႁူႉ တၢင်းမေႃမၼ်းၼၼ်ႉ ၼႄတီႈၵူၼ်းၶၢႆလဝ်ႈၼၼ်ႉယူႇ တင်းႁိုင်….။\nၽိူဝ်ႇၵမ်ႉ႞ ၵူၼ်းၶၢႆလဝ်ႈၼၼ်ႉ လၢတ်ႈၶိုၼ်းပေႃႈႁိူၼ်းၼုမ်ႇၵေႃႉၼၼ်ႉဝႃႈ “ဢၢႆႈၵေႃႉ႟ လႆႈထွမ်ႇငိၼ်း မႂ်းလၢတ်ႈယွင်ႈဢၢမ်း လွင်ႈတၢင်းၵတ်ႉ တၢင်းၶႅၼ်ႇ ၼႂ်းတူဝ်မႂ်းမႃး ၼမ်ၼႃႇယဝ်ႉသႄႈ။ သႂ်ႇလူး ၵမ်းၼႆႉ ၶႆႊၼႄၵဝ် လွင်ႈဢၼ်မႂ်းဢမ်ႇမီးၼမ်ႉၵတ်ႉ တၢင်းၶႅၼ်ႇ ဢၼ်ႁဵတ်းလႆႈၼၼ်ႉၽွင်ႈလူးဢေႉ” ၼႆသေ ၵူၼ်းၶၢႆလဝ်ႈၼၼ်ႉ ၸင်ႇယွၼ်းႁႂ်ႈမၼ်းၶႆႊၼႄယူႇ။\n\nပေႃႈႁိူၼ်းၼုမ်ႇ ၶိုၼ်းတုမ်ႉတွပ်ႇလၢတ်ႈၼႄဝႃႈ – ဢိူဝ်ႈ ဢၼ်ၵဝ် ဢမ်ႇမီးၼမ်ႉၵတ်ႉတၢင်းၶႅၼ်ႇ ဢမ်ႇမေႃႁဵတ်းၼၼ်ႉတႄႉ မီးမဵဝ်း႞ၵွႆး။ ၼၼ်ႉၵေႃႈပဵၼ် “ၵဝ်ဢမ်ႇမီးၼမ်ႉၵတ်ႉ တႃႇပၼ်ၵႃႊလဝ်ႈမႂ်းလႆႈၼၼ်ႉၵွႆး” ၼႆယူႇယဝ်ႉ……\nယွၼ်းႁႂ်ႈၵူႊၵေႃႉ ႁုၼ်ႉၼူဝ် ၶူဝ်ၸွမ်း လိၵ်ႈပွတ်းဢွၼ်ႇတွၼ်ႈၼႆႉသေ လွတ်ႈၵၢင်း တၢင်းၶီတၢင်းမႆႈသေၵမ်း……….."
+  },
+  {
+    "title": "ထၢင်ႇဝႃႈတေမိၼ်လႆႈတေႉယူႇၼႆၵႃႈ",
+    "content": "ၵူၼ်းပဵၼ်- “ပဵၼ်ႁိုဝ် ပဵၼ်ႁႃႁေ မႃးၽႅဝ်တီႈၼႆႉလႃႇ ဢၢႆႈ” ၼႆသေ မိူၼ်ၼင်ႇႁၢင်ႈ ၵႂင်ပူၵႂင်ပႃႁေ ထၢမ်ဢူၺ်းၵေႃႉမၼ်းယူႇ။\n\nဢူၺ်းၵေႃႉမၼ်း – “ဢိူဝ်ႈ…. ၵဝ်တေလၢတ်ႈၼႄလွင်ႈတၢင်းပိူင်ပဵၼ်မၼ်းလႆ။ မိူဝ်ႈၶမ်ႈဝႃး မႂ်းၵိၼ်ၼမ်ႁႅင်းၵႂႃႇဢိတ်း႞။ ၵမ်းၼႆႉ မႂ်းသမ်ႉ မဝ်းမဝ်းႁေ ပႆၵႂႃႇႁိမ်းၽၵ်းတူႁူးပတႅင်းၼၼ်ႉယိုင်။ ယဝ်ႉၵေႃႈ မႂ်းၶိုၼ်ႈၼိူဝ်ၽင်ႇႁူးပတႅင်းႁေ ပၢဝ်ႇလၢတ်ႈဝႃႈ “ၵဝ်တေမိၼ်ဢိူဝ်ႈ” ၼႆၼၼ်ႉၼႃႇ။\n\nၵူၼ်းပဵၼ် – “ႁဵတ်းသင်မႂ်းဢမ်ႇႁၢမ်ႈၵဝ်လႃႇ၊ မႂ်းၼႆႉ ပဵၼ်ဢူၺ်းၵေႃႉၵဝ် ၸိူင်ႉႁိုဝ်ဝႃႈ” ၼႆသေ လွမ်လွမ်ႁိုတ်းပွင်ႉပၼ်ဢူၺ်းၵေႃႉမၼ်းယူႇ။\n\nဢူၺ်းၵေႃႉမၼ်း – “ဢၢႆႈၼႆႉ…… မႂ်းယႃႇပေပေႃးႁိုတ်းၵဝ် ပွင်ႉၵဝ်လူး၊ ယႃႇပေပေႃးႁွင်ႉသႅၼ်ႇပေႃးထၢၼ်ႇၼၼ်ႉလေႃႇ။ မိူဝ်ႈၶမ်ႈဝႃး ၵဝ်ၵေႃႈ ထၢင်ႇဝႃႈ မႂ်းတေမိၼ်လႆႈတေႉယူႇၼၼ်ႉၼႃႇ…… 😂😂😂😂"
+  },
+  {
+    "title": "ဢဝ်မၢၵ်ႇႁူဝ်ၸႂ် တၢင်းႁၵ်ႉ ၼမ်းၼႃႈသေ ပွင်ႇၸႂ်၊ ဝၢင်းၶႂၢင်ႉပၼ်ၵၼ်",
+    "content": "ယႃႇပေ ၵႂႃႇသူၼ်ၸႂ်ဝႃႈ မိူဝ်ႈၼႆႉ ၸဝ်ႈၽူဝ်ႁဝ်း လႆႈငိုၼ်းမႃးၵႃႊႁိုဝ်ၼႆၵွႆး…. ႁႂ်ႈမေႃဝူၼ်ႉႁၼ် ၸူမ်းသိူဝ်းၸွမ်း ဢၼ်ၸဝ်ႈၽူဝ်ႁဝ်း လွတ်ႈၽေးၶဵၼ်ၵူႊလွင်ႈသေ ပွၵ်ႈမႃးႁႃးႁဝ်းၶိုၼ်းလႆႈၼၼ်ႉလႄႈ။\n\nယႃႇပေၵႂႃႇႁၼ်ဝႃႈ မေးႁဝ်းတီႈႁိူၼ်းၼၼ်ႉ ဢမ်ႇႁၢင်ႊလီမိူၼ်ၵူႊပွၵ်ႈယဝ်ႉၼႆသေ သဵင���ႈၸႂ်ၸွမ်းလွင်ႈၼၼ်ႉယူႇၵွႆး… မိူဝ်ႈပၢၼ်မၼ်းၼုမ်ႇၼၼ်ႉ မၼ်းၶၢမ်ႇပႅတ်ႈ ၵူၼ်းၸၢႆးတင်းသဵင်ႈသေ မႃးယူႇၸွမ်းႁဝ်းၵေႃႉလဵဝ်ၼႆၼၼ်ႉၵေႃႈ ယႃႇပေလိုမ်း။\n\nယႃႇပေ ဢဝ်ၸဝ်ႈၽူဝ်ႁဝ်းၵႂႃႇ တႅၵ်ႈၵၼ်တင်း ၵူၼ်းၸၢႆး၊ ၽူဝ်ပိူၼ်ႈတၢင်ႇၵေႃႉ ၵူၼ်းႁဝ်းၼႆႉ ၵတ်ႉၶႅၼ်ႇႁင်းၽႂ် ႁင်းမၼ်းၼႆ ယႃႇလိုမ်း။\n\nယႃႇၵုမ်ႇတူၺ်းႁၼ်ဝႃႈ ၼၢင်းမေးႁဝ်းၼႆႉ ၵုမ်ႇယူႇၼႂ်းႁိူၼ်းယူႇၵွႆး ဢမ်ႇၵႂႃႇတၢင်းလႂ်၊ ဢမ်ႇႁႃႁဵတ်းၵၢၼ်၊ ဢမ်ႇမီးငိုၼ်းၶဝ်ႈၼႆသေ ပွင်ႉထႃႉလႃႇ ႁင်းၶဝ်ယူႇၵွႆး၊ ယွၼ်ႉမီးမၼ်းၼၢင်းလႄႈ ၵၢၼ်ႁိူၼ်းၵၢၼ်ယေး၊ ၵၢၼ်တူင်ႇဝူင်းၵူၼ်း၊ ၶႅၵ်ႇလီပၢင်ၸႃႉ ၼႂ်းဝၢၼ်ႈသူၼ်ၸိူဝ်းၼၼ်ႉ ၸင်ႇဢမ်ႇလုတ်ႈဢမ်ႇႁၢမ်းၼႆၵေႃႈ ယႃႇပေလိုမ်း။\n\nၼင်ႇႁဝ်း ၵၢၼ်သုၵ်ႉသၵ်ႉ တီႈလုမ်း၊ ၸႂ်သုၵ်ႉသၵ်ႉ လွင်ႈၵၢၼ်ငၢၼ်းၼၼ်ႉ ၸဝ်ႈၽူဝ်၊ ၼၢင်းမေး ႁဝ်းၵေႃႈ မီးတၢင်းယၢပ်ႇဢၼ်ႁဝ်း ဢမ်ႇႁူႉႁၼ်လႆႈၼၼ်ႉယူႇ။ ယွၼ်ႉၼၼ် ႁႂ်ႈမေႃ ဝူၼ်ႉသွၼ်ႇ ပွင်ႇၸႂ်ပၼ် ၽၢႆႇမၼ်းၽွင်ႈ။\n\nတၢမ်တူဝ်ႁဝ်းၵေႃႈ ဢမ်ႇတဵမ်ထူၼ်ႈလႆႈ ၵူႊလွင်ႈ၊ ယွၼ်ႉၼၼ် ယႃႇၵုမ်ႁႃ တၢင်းၽိတ်း တီႈၸဝ်ႈၽူဝ်၊ ၼၢင်းမေးႁဝ်းယူႇ။ တႃႉႁဝ်း ႁူမ်ႈၵၼ် ၶူၼ်ႉသွၵ်ႈႁႃ ငဝ်ႈႁၢၵ်ႈပၼ်ႁႃ မၼ်းသေ ႁူမ်ႈၵၼ်ၵေႈလိတ်ႈၵႂႃႇလႃႈ။\n\nပေႃးပဵၼ်ၼၼ်ၵွၼ်ႇ ႁဝ်းၸင်ႇတေမီးၼႃႈႁိူၼ်း ဢၼ်ဢုၼ်ႇၸႂ်၊ မူၼ်ႈသိူဝ်းၼၼ်ႉယဝ်ႉ။"
+  },
+  {
+    "title": "ၼိူဝ်ႉပွမ်",
+    "content": "ၼိူဝ်ႉပွမ် (ဢတႃးတု) ၼႆႉ ဢဝ်ႁဵတ်းၼႆ ၸွင်ႇယၢမ်ႈႁူႉၶႃႈႁိုဝ်\n\nၼႂ်းမိူင်းႁဝ်းၼႆႉ ဢွၼ်ၵၼ်ၵိၼ်ၼိူဝ်ႉပွမ် (ဢတႃးတု) တေႉတေ့ဝႃႈဝႃႈ ၼႆၵေႃႈ တေဢမ်ႇၽိတ်းၼင်ႇၵဝ်ႇ။ တႄႇဢဝ် ႁဵတ်းၽၵ်း၊ ၶူဝ်ႈႁႅင်ႈၵိၼ်၊ ပိင်ႈၵိၼ်၊ တေႃႈၸွမ်းႁၢၼ်ႉ ၶၢႆႇၼိူဝ်ႉသဵပ်ႇ ၼိူဝ်ႉပိင်ႈဢွၼ်ႇၵေႃႈ ယင်းၶၢႆပႃး ၼိူဝ်ႉပွမ်ၼႆႉယဝ်ႉ။\n\nၼိူဝ်ႉပွမ်ၼႆႉ ဢမ်ႇၵွမ်ႉဝႃႈ မိူင်းႁဝ်းၵွႆးၼင်ႇၵဝ်ႇ ဢၼ်ၵိၼ်၊ မိူင်းမိူင်းဢေးသျႃးဝၼ်းဢွၵ်ႇၼႆႉ ၶႂ်ႈဝႃႈ ၵိၼ်ၼိူဝ်ႉပွမ် ၵူႊမိူင်းယူႇယဝ်ႉ။ တီႈမိူင်းႁဝ်းတႄႉ တေၵႆႉလႆႈႁၼ် တီႈမူႇၶဝ်ႈ ၽိူၼ်ၽၵ်း တႃႇၵူၼ်းၸိူဝ်းၵိၼ် သၢၵ်ႈလွတ်ႈၼၼ်ႉၶႃႈၼႃႇ။\n\nလၢမ်းတူၺ်းၶႃႈလူး ၼိူဝ်ႉပွမ်ၼႆႉ ပိူၼ်ႈဢဝ်သင်ႁဵတ်း ???\n\nတမ်ႉဢမ်ႇႁူႉၶႃႈႁိုဝ်….\n\nတေလၢတ်ႈၼႄ ၶႃႈၼႃႉ…\n\nၼိူဝ်ႉပွမ်ၼႆႉ ပိူင်ယႂ်ႇမၼ်း ဢဝ်ထူဝ်ႇၼဝ်ႈႁဵတ်း ၼႆၶႃႈဝႃႇ။\n\nလႆႈႁၼ်ထူပ်းၵၼ် လၢႆးတႃႇဢဝ် ထူဝ်ႇၼဝ်ႈႁဵတ်း ၼိူဝ်ႉပွမ်ၼႆႉ ၸဵမ်မိူဝ်ႈ ပီႊ 1950 ပုၼ်ႉၼႆၶႃႈဝႃႇ။\n\nပေႃးဢဝ် ၽၢႆႇပၢႆးယူႇလီဝႃႈၵေ���ႈ ထူဝ်ႇၼဝ်ႈၼႆႉ မီးထၢတ်ႈပရူဝ်ႇတိၼ်း တဵမ်ထူၼ်ႈဝႆႉ၊ ႁဵတ်းႁႂ်ႈတၢင်းၵိၼ်ၼႂ်းတွင်ႉႁဝ်း လႅဝ်လႅၵ်ႇ။ ၶႅမ်ႉတႃႇ သႆႈႁဝ်း။ ယွၼ်ႉၼၼ် တႃႇၵူၼ်းၸိူဝ်းဢမ်ႇၵိၼ်ၼိူဝ်ႉၼၼ်ႉ ထုၵ်ႇလီၵိၼ် ၼိူဝ်ႉပွမ်ၼႆႉ ယူႇယဝ်ႉ။"
+  },
+  {
+    "title": "လၢႆလွင်ႈလၢႆတၢင်း လီႁူႉလွင်ႈမၢၵ်ႇလၢင်း",
+    "content": "မၢၵ်ႇလၢင်းၼႆႉ ၶဝ်ႈပႃးၼႂ်းတူၼ်ႈမၢၵ်ႇပီႊယၢဝ်းႁိုင် သႅၼ်း႞၊ ၸွမ်းၼင်ႇပိုၼ်းတႄႉ လႆႈႁူႉဝႃႈ မၢၵ်ႇလၢင်းၼႆႉ တႄႇၽုၵ်ႇမႃး တၢင်းမိူင်းဢိၼ်းတီးပွတ်းၼိူဝ် ၼၼ်ႉ ၼႆယဝ်ႉ။\n\nၼႂ်းမၢၵ်ႇမႆႉ ဢၼ်မၢၵ်ႇၼိူဝ်တူၼ်ႈယႂ်ႇတူၼ်ႈလူင်ၼႆႉ မၢၵ်ႇလၢင်းၶဝ်ႈပႃးဝႆႉဢၼ်႞။ ယဝ်ႉၵေႃႈ ပဵၼ်မၢၵ်ႇဢၼ်ယႂ်ႇလိူဝ်ပိူၼ်ႈ ၼႂ်းမၢၵ်ႇၼိူဝ်တူၼ်ႈ။ မၢၵ်ႇလၢင်းၼိုင်ႈလုၵ်ႈၼႆႉ ၼၵ်း 10 ပွင်ႇ??? တေႃႇ 100 ပွင်ႇ?? ။ မၢၵ်ႇလၢင်းၼႆႉ မီးဢရသႃႇ ဢၼ်ဝၢၼ်၊ ဢၼ်ၸဵမ်း။ ယဝ်ႉၵေႃႈ မီးမၢၵ်ႇလၢင်းၼင်၊ မၢၵ်ႇလၢင်းပိူဝ်ႉ၊ မၢၵ်ႇလၢင်းၶမ်းၼႆ လၢႆလၢႆသႅၼ်းဝႆႉ။\n\nၼႂ်းမၢၵ်ႇလၢင်းၼႆႉ ပႃးဝႆႉထၢတ်ႈ ပရူဝ်ႇတိၼ်း၊ ၵႃႇပူဝ်ႇႁၢႆႉတရဵတ်ႉ (Carbohydrate)၊ ထၢတ်ႈၶႆမၼ်း (Fat)၊ ထၢတ်ႈၼမ်ႉ၊ ထၢတ်ႈၵိူဝ်ဝၢၼ် ဢိၵ်ႇထႅင်ႈ ဝီႇတႃႇမိၼ်ႇ တင်းၼမ်လႄႈ ၶိုၵ်ႉၶႅမ်ႉတႃႇပၢႆးယူႇလီ ၵူၼ်းႁဝ်းတေႉတေႉ ၼႆယဝ်ႉ။\n\nၼႂ်းမၢၵ်ႇလၢင်းၼႆႉ ပႃးဝႆႉ ဝီႇတႃႇမိၼ်ႇ ၸီႇ၊ ဝီႇတႃႇမိၼ်ႇ ဢီး လႄႈ ၸၢင်ႊႁဵတ်းႁႂ်ႈႁႅင်းၸင်ႈတူဝ် ၶႅင်ႁႅင်းမႃးလိူဝ်ၵဝ်ႇယဝ်ႉ။ လိူဝ်ၼၼ်ႉ ယင်းပႃးဝႆႉထၢတ်ႈ မၵ်ႇၵႃႇၼီႇၸီႇယမ်ႇ လႄႈ ၵမ်ႉထႅမ်ပၼ်ႁႂ်ႈလုပ်ႇၵူၼ်းႁဝ်း ၵႅၼ်ႇၶႅင်မႃး ၼႆယဝ်ႉ။\n\nထၢတ်ႈ ပူဝ်ႇတႅတ်ႉၸီႇယမ်ႇ ဢၼ်မီးဝႆႉၼႂ်းမၢၵ်ႇလၢင်းၼၼ်ႉ ႁဵတ်းႁႂ်ႈလိူတ်ႈၼႂ်းတူဝ်လႆၽဵင်ႇၵၼ်လႄႈ တႃႇႁေႉၵင်ႈလႆႈ တၢင်းပဵၼ်လိူတ်ႈ ၵိုင်ႉၵၢင်ႉသုင်၊ ၵိုင်ႉၵၢင်ႉယွမ်းလူင်းၼၼ်ႉလႄႈ တၢင်းပဵၼ်ဢၼ်ၵဵဝ်ႇၵပ်း မၢၵ်ႇႁူဝ်ၸႂ်ၼၼ်ႉၵေႃႈ တေလူတ်းယွမ်းၵႂႃႇ ယူႇယဝ်ႉ။\n\nမၢၵ်ႇလၢင်းၼႆႉ ႁူၺ်ႇမၼ်းၼၼ်ႉၵေႃႈ တူမ်ႈၵိၼ်လႆႈသေ ၼႂ်းႁူၺ်ႇမၢၵ်ႇလၢင်းၼၼ်ႉ ယင်းမီးထၢတ်ႈ ပရူဝ်ႇတိၼ်း၊ ပူဝ်ႇတႅတ်ႉၸီႇယမ်ႇ၊ ၵႄႇၸီႇယမ်ႇ လႄႈ ထၢတ်ႈလဵၵ်း ၸိူဝ်းၼႆႉထႅင်ႈၵွၼ်ႇ ၼႆယဝ်ႉ။\n\nမၢၵ်ႇလၢင်းၼႆႉ ၸွႆႈထႅမ်တႃႇပၢႆးယူႇလီႁဝ်းဝႃႈၼႆသေတႃႉ တႃႇၵူၼ်းၸိူဝ်းမီးယဵဝ်ႈဝၢၼ် ၸိူဝ်းၼၼ်ႉတႄႉ ဢမ်ႇထုၵ်ႇလီၵိၼ်ၼမ်၊ ယွၼ်ႉဝႃႈ ၼႂ်းမၢၵ်ႇလၢင်းၼႆႉ မီးထၢတ်ႈ ၵူိဝ်ဝၢၼ်ၼမ်။ ယဝ်ႉၵေႃႈ မိူဝ်ႈၵိၼ် မၢၵ်ႇလၢင်းၼႆႉ လူဝ်ႇလႆႈယမ်ႉ ႁႂ်ႈမၼ်းဢွၼ်ႇဢွၼ်ႇ ယႃႇ​ေပ လႃႈလီဢိုၼ်လူင်ၵႂႃႇ။ ယွၼ်ႉဝႃႈ ဢမ်ႇယမ်ႉဢွၼ်ႇၸိုင် ၸၢင်ႊပဵၼ်တွင်ႉပုပ်ႈ၊ တွင်ႉၸဵပ်း။ ၵူၼ်းမီးတၢင်းပဵၼ် ႁူင်းၶဝ်ႈၸဵပ်းၶဝ်တႄႉ ဢမ်ႇထုၵ်ႇလီၵိၼ်မၢၵ်ႇလၢင်း ၼႆယဝ်ႉ။"
+  },
+  {
+    "title": "ၸၢမ်မွၼ်း",
+    "content": "လေႃးၵလူင်ၼႆႉ သႅၼ်ပဵၼ်မီး သႅၼ်ငိၼ်းသႅၼ်ႁၼ် သႅၼ်ထူပ်းသႅၼ်ၺႃးတေႉတေႉ။ မၢင်ပွၵ်ႈ ဢွၵ်ႇၸႂ် တွင်ႉမႆႈ ၶႂ်ႈၵိၼ် ၵူၺ်းၼႃႇ ဢမ်ႇႁူႉတေလႆႈၵိၼ်သင်၊ မၢင်ပွၵ်ႈဢွၵ်ႇၸႂ် ၵႂႃႇလႄႇတီႈၵႆၵႆ တီႈဢမ်ႇမီးၽႂ်သေၵေႃႉသေၵူၼ်း တီႈၵတ်းၵတ်းယဵၼ်ယဵၼ် ၵူၺ်းၵႃႈ ဢမ်ႇႁူႉဝႃႈတေလႆႈၵႂႃႇတီႈလႂ်။ ပေႃးၶၢဝ်းၾူၼ်လႄႈ ၾူၼ်သိင်းၶိုၼ်းသိင်းဝၼ်း ၼႆၵေႃႈ ၼႂ်းၸႂ်ၼႆႉႁၢင်ႈလွမ်လွမ်ဢိုၵ်ႉၼိုၵ်ႉဝႆႉ ၵူၺ်းၵႃႈ ပေႃးဝႃႈ ပဵၼ်သင်လီလီ ပဵၼ်ႁိုဝ်လီလီၼႆ ဢမ်ႇမီးၶေႃႈတွပ်ႇ ဢၼ်တႅတ်ႈၼႅတ်ႈ။\n\nမိူၼ်ၼၼ်ယဝ်ႉ မိူၼ်ၼၼ်ယဝ်ႉ ၸၢမ်မွၼ်း႟……  ၵၢင်ၸႂ်ဢၼ်ႁဝ်းမီးတေႃႇသူၼႆႉႁဝ်းၵေႃႈ ဢမ်ႇမေႃလၢတ်ႈ၊ ဢမ်ႇမေႃတွပ်ႇ၊ ဢမ်ႇမေႃပိုတ်ႇတီႈပွင်ႇမၼ်းၼႄလႆႈလီလီ။ ၵူၺ်းၵႃႈ ဢၼ်ႁဝ်းႁူႉ ဢၼ်ႁဝ်းလၢတ်ႈလႆႈ ၸႅင်ႈၸႅင်ႈ လႅင်းလႅင်းတႉ ပေႃးႁၼ်ၼႃႈသူ၊ ပေႃးငိၼ်းသဵင်သူ၊  ပေႃးလႆႈယူႇၸမ်သူၼႆ  ႁဝ်းသိူဝ်းၸႂ်ၼႃႇ။ ယဝ်ႉသမ်ႉ ၶႂ်ႈယူႇၸမ်ၸမ် ၶႂ်ႈလၢတ်ႈတေႃႇ၊ ၶႂ်ႈငိၼ်းသဵင်၊ ၶႂ်ႈႁၼ်ၼႃႈသူ တိၵ်းတိၵ်း။ ပေႃးၸၢမ်မွၼ်းထၢမ်ႁဝ်းဝႃႈ “ၸွင်ႇႁၵ်ႉႁဝ်းၼႄႇ” ၼႆၸိုင် ႁဝ်းတိုၼ်းတေတွပ်ႇဝႃႈ  “ႁၵ်ႉဢိူဝ်ႈ” ၼႆၵွႆးယဝ်ႉ။ ၵူၺ်းၼႃႇ သင်သမ်ႉသိုပ်ႇထၢမ်ထႅင်ႈဝႃႈ “ႁၵ်ႉၸိူင်ႉႁိုဝ်” “ယွၼ်ႉသင်လႄႈႁၵ်ႉ” ၼႆ ၸိူဝ်းၼႆႉတႄႉ ႁဝ်းတေတွပ်ႇလၢတ်ႈ သိုဝ်ႈသိုဝ်ႈဝႃႈ  “ဢမ်ႇႁူႉ” ၼႆၵွႆး။\n\nၽၢတ်ႇယၢၼ်ၵၼ်မႃးၵေႃႈ ႁိုင်ယဝ်ႉလူး ၸႂ်ထိုင်ဢိူဝ်ႈ ၸၢမ်မွၼ်း႟…… ၸႂ်ထိုင်မိူဝ်ႈ ႁဝ်းၵႂႃႇဢႅဝ်ႇလႄႇ ၸွမ်းၵၼ်၊  ၸႂ်ထိုင်မိူဝ်ႈလႆႈၵိၼ် တၢင်းၵိၼ်ၸွမ်းၵၼ်။ မိူဝ်ႈလႆႈႁဵတ်းၵၢၼ်ႁိူၼ်း ၸွမ်းၵၼ်။ မိူဝ်ႈလႆႈ လူင်းႁဵတ်းတူဝ် ထူပ်းၸွမ်းၵၼ်ၸိူဝ်းၼႆႉ။ ၸႂ်ထိုင် မိူဝ်ႈႁဝ်းပႆတၢင်းၸွမ်း၊ ၶီႇလူတ်ႉၸွမ်းၵၼ်၊ ပႆႇလႅပ်ႈၼႂ်းဝဵင်း၊ ၵႂႃႇတူၺ်းၸိူင်းၸွမ်းၵၼ် ၸႂ်ထိုင်…… ၸႂ်ထိုင်………။\n\nၸၢမ်မွၼ်း႟… ပိူင်ပဵၼ်ၼႂ်းလေႃးၵလူင်ၼႆႉ  မၢင်ဢၼ်မၢင်လွင်ႈ ႁဝ်းၸၢင်ႊဝႄႈပႅတ်ႈမၼ်းယူႇသေတႃႉ ၵူၺ်းၼႃႇ ႁဝ်းဢမ်ႇၵုမ်းထိင်းမၼ်းလႆႈမီးတင်းၼမ်။ ၶၢဝ်းၼႃးလူင်တေႉတေႉ လႅတ်ႇလႅင်ႉၵေႃႈ ၸၢင်ႈပဵၼ်လူး။ လိူၼ်ၸဵင် လိူၼ်ၵမ်ၼႆႉ ၶၢဝ်းၵတ်းလူင် တေႉတေႉ ၾူၼ်ယင်းၸၢင်ႈတူၵ်းလႄႇ။ ၼႂ်းၶၢဝ်းလိူၼ်ႁႃႈ လိူၼ်ႁူၵ်းၼႆႉ ၶၢဝ်းမႆႈလ���င်ၵေႃႈ ၾူၼ်မၢၵ်ႇႁဵင်းယင်းၸၢင်ႈတူၵ်း။ ၼင်ႇၼၼ်ယဝ်ႉ ၼႂ်းလေႃးၵလူင်ၼႆႉ  ဢၼ်ယွၼ်းသူး ဢၼ်မုင်ႈမွင်း ၸိူဝ်းၼၼ်ႉသမ်ႉ ဢမ်ႇပဵၼ်မႃး  ဢၼ်ပဵၼ်မႃးၸိူဝ်းၼၼ်ႉသမ်ႉ ဢမ်ႇလႆႈယွၼ်းသူး၊ ဢမ်ႇလႆႈမွင်း။  လွင်ႈၼႆႉ ၸၢမ်မွၼ်းၵေႃႈ တေႁူႉထိုင်ယူႇ။\n\nၸၢမ်မွၼ်း႟…… ၸွင်ႇသူတိုၵ်ႉတွင်းႁိုဝ် ပွၵ်ႈၼိုင်ႈသူယၢမ်ႈလၢတ်ႈႁဝ်းဝႃႈ “မၢင်ပွၵ်ႈမၢင်လႂ်ၼႆႉ တေလႆႈ တမ်းဝၢင်းပႅတ်ႈ ဢၼ်ၶႂ်ႈႁဵတ်း ၶႂ်ႈပဵၼ်ၼၼ်ႉသေ လိူၵ်ႈႁဵတ်းဢၼ်ထုၵ်ႇလီႁဵတ်း ထုၵ်ႇလီပဵၼ်ၼၼ်ႉဢိူဝ်ႈ” ၼႆၼၼ်ႉ။ မိူဝ်ႈဢွၼ်တၢင်း ႁဝ်းၵေႃႈ ဢမ်ႇပွင်ႇၸႂ်ၼင်ႇၵဝ်ႇၵႂၢမ်းၶေႃႈၼႆႉ။ မိူဝ်ႈလဵဝ်တႄႉ ပွင်ႇၸႅင်ႈလႅင်းမႃးယဝ်ႉ။ ဝူင်ႈပူၼ်ႉၼႆႉ တႆးၵေႃႉ ပေႃႈမႄႈႁဝ်းမႃးလႄႇ ပႃးမႃးလုၵ်ႈယိင်းၶဝ်ၵေႃႉၼိုင်ႈ ၸိုဝ်ႈမၼ်းႁွင်ႉဝႃႈ “မူဝ်သႂ်” ၼႆဝႃႇ။  မူဝ်သႂ်ၼႆႉ ပဵၼ် မေႃယႃ၊ ပဵၼ်လုၵ်ႈယိင်း ၵေႃႉလဵဝ်။  မူဝ်သႂ်ၼႆႉ ႁၢင်ႊလီတေႉတေႉ၊ ပဵၼ်ၼၢင်းယိင်း ဢၼ်မီးၾိင်ႈယၢမ်ႈလီ၊ ဢၼ်မီးမႆႇၼႃႈ လီႁၵ်ႉႁၵ်ႉတေႉတႉ။ ပေႃးႁႂ်ႈႁဝ်းလၢတ်ႈသိုဝ်ႈသိုဝ်ႈၸိုင် မၼ်းႁၢင်ႊလီလိူဝ်သူၵွၼ်ႇဢိူဝ်ႈ ၸၢမ်မွၼ်း……။ ၵူၺ်းၵႃႈ ပေႃးထၢမ်ဝႃႈ “ၸွင်ႇႁဝ်းႁၵ်ႉမၼ်း” ၼႆ သင်တေလႆႈတွပ်ႇသိုဝ်ႈသိုဝ်ႈၸိုင် တေဝႃႈ “ဢမ်ႇႁူႉ” ၼႆၵွႆးယဝ်ႉ။  ယွၼ်ႉပိူဝ်ႈသင် ဢၼ်ဝႃႈၼၼ်ႉတႄႉ ႁဝ်းၵေႃႈ ဢမ်ႇႁူႉ။\n\nဝၢႆးၶဝ်ပွၵ်ႈမိူဝ်းၵႂႃႇယဝ်ႉ ပေႃႈမႄႈႁဝ်းလၢတ်ႈၼႄဝႃႈ  “မူဝ်သႂ်ၼႆႉ ပဵၼ်လုၵ်ႈပႂ်ႉမၢႆႁဝ်းဢိူဝ်ႈၸၢႆး ၸွင်ႇႁၢင်ႊ လီႁိုဝ်” ၼႆဝႃႇ။  မၢၵ်ႇႁူဝ်ၸႂ်ၼႆႉ ၵႅၼ်းၸၢတ်းၸၢတ်း မိူၼ်ပိူၼ်ႈဢဝ်မိတ်ႈမႃးထႅၵ်ႇယဝ်ႉ ၸၢမ်းမွၼ်း႟…။ သဵင်မၢၵ်ႇႁူဝ်ၸႂ်တွတ်ႇၼႆႉ မိူၼ်သဵင်ၾႃႉလင်ယဝ်ႉဢိူဝ်ႈ။ မိူၼ်သဵင်ထူၺ်ႈၸႂ် ၵႂၢႆးထိုၵ်းၶမ်ဢုင်ယဝ်ႉဢိူဝ်ႈ။ လိူဝ်သေ သဵင်ထူၺ်ႈယဝ်ႉ ဢမ်ႇလႆႈငိၼ်းသင်ထႅင်ႈ။ ၵႂင်မူတ်းယဝ်ႉ။ ​တေလႆႈလၢတ်ႈသင်။ တေလႆႈတွပ်ႇဝႃႈႁိုဝ်။ ဢမ်ႇႁူႉယဝ်ႉ။  တေလႆႈတွပ်ႇဝႃႈ “ၶႃႈမီးၸူႉယဝ်ႉ။ ၵေႃႉဢၼ်ၶႃႈႁၵ်ႉၼၼ်ႉမီးယဝ်ႉ” ၼႆၼႄႇ။ ဢမ်ႇၼၼ် တေယူႇသူႇသူႇ ဢမ်ႇတၵ်ႉဢမ်ႇသင် ဢမ်ႇတွပ်ႇဢမ်ႇထဵင်သင်ၶိုၼ်းႁႃႉ။ တေလႆႈႁဵတ်းႁိုဝ် ၸၢမ်မွၼ်း႟……။ မိူင်းၵူၼ်းၼႆႉ ၸိုင်ၸၢင်ႈ ပဵၼ်ၼႆ။ မိူဝ်ႈၸမ်တေလုၵ်ႉၵႂႃႇ ၼႂ်းလုၵ်းၼွၼ်းၼၼ်ႉ ပေႃႈသမ်ႉပၢႆဝႃႈ “ၸွမ်းၸႂ်မႂ်းၸၢႆးမႃး တင်းၸူဝ်ႈ။ ပွၵ်ႈၼႆႉတႄႉ ၸွမ်းၸႂ် ႁႃးမႄႈသူ ဢိတ်းၼိုင်ႈလႄႈ။ ၵူၼ်းၸၢႆးၼႆႉ ၽိူဝ်ႇၶၢမ်ႇလူႉ ၵႂၢမ်းၵတိသတ်ႉၸႃႇ တႃႉၶၢမ်ႇၾႃႉၽႃ���တၢႆဝႃႇ မႂ်းၶႂ်ႈႁူႉ” ၼႆထႅင်ႈ။\n\nမူဝ်သႂ်ၼႆႉ ပဵၼ်ၵူၼ်းမီးတၢင်းယၢမ်ႈလီ၊ မေႃၼပ်ႉယမ်ပိူၼ်ႈ၊ မေႃၶဝ်ႈဢွၵ်ပိူၼ်ႈ။ ၼႃႈၵေႃႈ ၼႃႈႁၵ်ႉတေႉတေႉ။ တႆးၵေႃႉတႆးသေႈၵေႃႈ မီးၼမ်တေႉတေႉ။ ပဵၼ်မေႃယႃၼႆသေတႃႉ ပုၼ်ႈၽွၼ်းမႄႈၸဝ်ႈႁိူၼ်းၼႆႉ မၼ်းဢမ်ႇပၼ်လုတ်ႈ ပၼ်ႁၢမ်း။ ၵၢင်ၼႂ်လုၵ်ႉမႃး ႁဵတ်းၶဝ်ႈၽၵ်းၸဵမ်ၸဝ်ႉ ၵိၼ်ၶဝ်ႈၼႂ်ယဝ်ႉၸင်ႇၵႂႃႇၵၢၼ်။ ၼႃႈၵၢၼ်ႁဝ်းတႄႉ ၵၢင်ၼႂ်ၵိၼ်ၶဝ်ႈ ၼႂ်ယဝ်ႉ လူဝ်ႇၵႂႃႇသူင်ႇ မူဝ်သႂ်တီႈၵၢၼ်၊ တၢမ်းၶမ်ႈၵႂႃႇၵေႃႈၶိုၼ်းၵႂႃႇႁပ်ႉ ႁဵတ်းၼႆၵွႆး။ ပွၵ်ႈၼိုင်ႈ ပဵၼ်ဝၼ်း လိုဝ်ႈၵၢၼ်လႄႈ မူဝ်သႂ်ဢမ်ႇၵႂႃႇၵၢၼ်။ ပဵၼ်ၵၢင်ၼႂ်ၸဝ်ႉ ၶၢဝ်းၵတ်း။ ႁဝ်းတိုၵ်ႉၼင်ႈၵိၼ်ၵေႃႇၾီႇသေ ဢွမ်ႇလႅတ်ႇ ဢုၼ်ႇယူႇ။ မူဝ်သႂ်ဢဝ် ၵွၵ်းႁူဝ်ဢွၼ်ႇမၼ်း ဢိင်ၶဝ်ႈမႃးၼႂ်းႁူၵ်းၵဝ်ၶႃႈသေ ထၢမ်သဵင်လွႆးလွႆးဝႃႈ “ပီႈႁၵ်ႉ မူဝ်သႂ်တေႉယူႇႁႃႉၼႆႉ” ၼႆဝႃႇ။\n\nတေလႆႈတွပ်ႇဝႃႈႁိုဝ်လႃႇ ၸၢမ်မွၼ်း႟…။ ႁဝ်းယၢမ်ႈငိၼ်းဝႃႈ ၵွၼ်ႇပႆႇလၢတ်ႈပိူၼ်ႈဝႃႈ ႁဝ်းႁၵ်ႉၶဝ်ၼၼ်ႉ ႁႂ်ႈထၢမ်ၶိုၼ်း တူဝ်ၵဝ်ႇဢွၼ်တၢင်းၼႆဝႃႇ။ ႁဝ်းထၢမ်ယဝ်ႉ။ ယၢမ်ႈထၢမ်ပဵၼ်လၢႆလၢႆပွၵ်ႈ ၵူၺ်းၵႃႈ လႆႈၶေႃႈတွပ်ႇဝႃႈ ဢမ်ႇႁူႉၼႆၵွႆး။ တေႃႇထိုင်ဝၼ်းမိူဝ်ႈၼႆႉ။ ၵူၺ်းၵႃႈ ႁဝ်းတွပ်ႇဢိူဝ်ႈ ၸၢမ်မွၼ်း…။ ႁဝ်းတွပ်ႇ မူဝ်သႂ်ၵႂႃႇဝႃႈ “ႁၵ်ႉၽႅဝ်လေႃႇ” ၼႆယဝ်ႉ။  မိူဝ်ႈၼၼ်ႉ မူဝ်သႂ်လပ်းတႃ ၼိမ်ၸိုင်ႈၸိုင်ႈ ၼႂ်းဢူၵ်းႁဝ်းသေ ယုမ်ႉဝၢၼ် ပဵင်းၸႂ်ဝႆႉယူႇ။ ၵူၺ်းၼႃႇ ႁဝ်းဢမ်ႇၶိုၼ်းထၢမ်။ ဢမ်ႇၶိုၼ်းထၢမ်ဝႃႈ “မူဝ်သႂ်ႁၵ်ႉႁဝ်းတေႉယူႇႁႃႉ” ၼႆၼၼ်ႉ။\n\nမိူင်းၵူၼ်းၼႆႉ လၢၵ်ႇလၢႆးၼႃႇၼေႃ။ မူဝ်သႂ် ဢၼ်ယူတ်းယႃ၊ ပၼ်ႁႅင်းၸႂ်ပိူၼ်ႈယူႇၵူႊဝၼ်းဝၼ်းၼၼ်ႉ မိူဝ်ႈၼႆႉ တၢမ်တူဝ် မၼ်းၵေႃႉၶိုၼ်းဢမ်ႇယူႇလီ။ လႆႈႁၼ် မူဝ်သႂ် ဢမ်ႇယူႇလီၸိူင်ႉၼႆ ၼႂ်းၸႂ်ႁဝ်းပဵၼ်မဵဝ်းၼိုင်ႈ။ ဢမ်ႇသိူဝ်း။ မႆႈၸႂ်ဝႆႉ။ လွမ်ၵူဝ်ဝႆႉ။ မိူၼ်ႁၢင်ႈတူၵ်းၸႂ်ဝႆႉၵေႃႈမီးမီး။ မိူဝ်ႈၼၼ်ႉ ႁဝ်းဢမ်ႇၶႂ်ႈၵႂႃႇတၢင်းလႂ်။ ဢမ်ႇတွင်ႉမႆႈၶဝ်ႈမႆႈၼမ်ႉသင်။ ၶႂ်ႈပႂ်ႉတူၺ်းထိုင်၊ ၶႂ်ႈလုမ်းလႃး မူဝ်သႂ်ၵွႆး။ တၢင်းၵိၼ် ဢၼ်မူဝ်သႂ်မၵ်ႉ၊ မၢၵ်ႇမႆႉ ဢၼ်မၼ်းၵႆႉၵိၼ် ၸိူဝ်းၼၼ်ႉ ႁဝ်းတွင်းလႆႈ သဵင်ႈသဵင်ႈ။ ႁဝ်းၵႂႃႇသိုဝ်ႉမႃးပၼ် မူတ်းမူတ်းဢိူဝ်ႈ။ ယဝ်ႉၵေႃႈ ပေႃးလႆႈႁၼ် မူဝ်သႂ် ၵိၼ်တၢင်းၵိၼ်  ဢၼ်ႁဝ်းၵႂႃႇသို ဝ်ႉမႃး၊ မၢၵ်ႇမႆႉဢၼ်ႁဝ်း ပွၼ်ႈလဵင်ႉမၼ်းၸိူဝ်းၼၼ်ႉ ႁဝ်းသိူဝ်းၸႂ်ၼႃႇ မိူၼ်ႁၢင်ႈလ���ုမ်းမိူင်းၵူၼ်းလူင်ၵႂႃႇ ၼိုင်ႈၵမ်းၼိုင်ႈ ၵမ်းၵွၼ်ႇဢိူဝ်ႈ။\n\nတေယွၼ်းလၢတ်ႈသိုဝ်ႈသိုဝ်ႈၼႃႉ ၸၢမ်မွၼ်းဢူၺ်…… မိူဝ်ႈၽွင်းၼၼ်ႉ ႁဝ်းဢမ်ႇတၼ်းၶုၵ်းၸႂ်လႆႈသူ သေ ဢိတ်း။ ဢမ်ႇတၼ်းၸႂ်ထိုင်သူသေဢိတ်း။ ဢမ်ႇတၼ်းဝူၼ်ႉထိုင်သူ သေဢိတ်းၵွၼ်ႇဢိူဝ်ႈ။ တေလႆႈဝႃႈႁိုဝ်လႃႇ။ ဢမ်ႇႁၵ်ႉသူယဝ်ႉၼႆႁႃႉ… လိုမ်းသူၵႂႃႇယဝ်ႉၼႆႁႃ… ။ ၸိူင်ႉၼၼ်ၵေႃႈ ဢမ်ႇၸႂ်ႈၼင်ႇၵဝ်ႇ။  “ပေႃးၼၼ်ႉ သူတိုၵ်ႉႁၵ်ႉယူႇ ၼေႃႈ”  ၼႆ သူတေၶႂ်ႈထၢမ်ႁဝ်းယူႇ။ ႁဝ်းဢမ်ႇႁူႉ… ႁဝ်းဢမ်ႇႁူႉတေႉတေႉဢိူဝ်ႈ။ လိုမ်းယဝ်ႉႁႃႉၼႆ ဢမ်ႇလိုမ်း တိုၵ်ႉတွင်းယူႇ။ ၸႂ်ထိုင်ယူႇႁႃႉၼႆၸိုင်  ၸၢမ်မွၼ်း႟……တေလၢတ်ႈသိုဝ်ႈသိုဝ်ႈ ဢမ်ႇၸႂ်ထိုင်ယဝ်ႉ။ ဢမ်ႇၶိုၵ်းၸႂ်လႆႈယဝ်ႉ။ ၵူၺ်းၵႃႈ…… ႁဝ်းတိုၵ်ႉတွင်းယူႇ ႁဝ်းပႆႇလိုမ်း………။\n\nဝၼ်းၼိုင်ႈ ၵိၼ်ၶဝ်ႈၶမ်ႈယဝ်ႉ  ႁဝ်းၵႂႃႇၼင်ႈတီႈတင်ႇငႅၵ်ႈ တၢင်းၼႃႈႁိူၼ်းၼၼ်ႉ။ ၶမ်ႈၼႆႉ ၼႃႈၾႃႉ ပၢင်ႇသႂ်ဝႆႉ ၵူၺ်းၼႃႇ ၵတ်းၸိတ်းၸိတ်းဝႆႉ။ ၵူၼ်းၵႂႃႇမႃး ၸွမ်းတၢင်းၵေႃႈ ဢေႇဝႆႉ။ ႁိုင်ႁိုင် ၸင်ႇတေလႆႈႁၼ်လူတ်ႉၵႃး ၼိုင်ႈလမ်း။ ၵူၼ်းပႆတၢင်းၵေႃႈ ယဵၼ်သီႇသီႇဝႆႉ။ မူဝ်သႂ် ဢွၵ်ႇႁိူၼ်းမႃးၼင်ႈၸွမ်းႁဝ်း။ ယုၵ်ႉၶႅၼ်ၽၢႆႇသၢႆႉႁဝ်း တၢင်ႇႁိူဝ်မႃႇမၼ်းယဝ်ႉ ဢဝ်မိၼ်ႁူၸမ်ႈၼႃႈဢူၵ်းသေ ထွမ်ႇတူၺ်းမၢၵ်ႇႁူဝ်ၸႂ်ႁဝ်းတွတ်ႇယူႇ။ ယူႇၵမ်းၼိုင်ႈ ႁႅၼ်ၵၢင်းယၵ်ႉတူၺ်းၼႃႈႁဝ်းယဝ်ႉ လၢတ်ႈလွႆးလွႆးဝႃႈ “ပီႈတေႁၵ်ႉ ၸၢမ်မွၼ်းႁႅင်းၼႃႇၼေႃ” ၼႆဝႃႇ။ ၸၢမ်းမွၼ်း႟… ႁဝ်းတူၵ်းၸႂ်ဢိူဝ်ႈ။ လွင်ႈဝႃႈ ႁဝ်းႁၵ်ႉၸၢမ်မွၼ်း ဢၼ်ဝႃႈၼၼ်ႉ မူဝ်သႂ်ႁူႉယူႇလူး။ မၼ်းႁူႉယူႇၼႃႇ။ မၼ်းႁူႉဢိူဝ်ႈ။ မၼ်းတေႁူႉမႃး ၸဵမ်လႂ်ၵွၼ်ႇ။\n\nၸင်ႇဝႃႈတေႉယဝ်ႉၼေႃ မိူင်းလူင်ၼႆႉ သႅၼ်ပဵၼ်သႅၼ်မီးတေႉလႂ်။ သႅၼ်ပိူင်သႅၼ်ၺႃးတေႉတေႉ။ မိူဝ်ႈလဵဝ်တႄႉ ႁဝ်းၶုၵ်းၶႂ်လႆႈ ၶေႃႈၵႂၢမ်းဢၼ်ၸၢမ်းမွၼ်းလၢတ်ႈဝႃႈ “မၢင်ပွၵ်ႈမၢင်လႂ်ၼႆႉ တေလႆႈ တမ်းဝၢင်းပႅတ်ႈ ဢၼ်ၶႂ်ႈႁဵတ်း ၶႂ်ႈပဵၼ်ၼၼ်ႉသေ လိူၵ်ႈႁဵတ်းဢၼ်ထုၵ်ႇလီႁဵတ်း ထုၵ်ႇလီပဵၼ်ၼၼ်ႉဢိူဝ်ႈ” ၼႆၼၼ်ႉၵွႆးယဝ်ႉ။\n\nၵႅင်လွၼ်း  (27-4-2018)"
+  },
+  {
+    "title": "လုၵ်ႈၸၢႆးၵေႃႉလဵၵ်ႉသုတ်း",
+    "content": "ဢွၵ်းဢေႃၼႆ ႁၢင်ႈဢမ်ႇၸိုၼ်ႈသႂ်၊ ၼႂ်းၸႂ်ၵေႃႈ ဢမ်ႇပေႃးသိူဝ်း။ ၶႂ်ႈၵတ်းၽၢၼ်ႈ၊ ၵတ်းၽိၼ်ႈဝႆႉ။ ဝႃႈလႃးၵေႃႈ တေပဵၼ်ႁႃႇ ၼမ်ႉႁိူဝ်ႇၶဝ်ႈ ၶမ်ႈဝႃးၼၼ်ႉ ပႆႇပေႃးၸၢႆႇလီႁိုဝ်။ ၵူၺ်းၵႃႈ ၸိူင်ႉႁိုဝ်ၵေႃႈလီ ၵဝ်ၶႃႈတႄႉ ယုၵ်ႉတိၼ် ယၢင်ႈတမ်း လမ��းၸွမ်းႁွႆးတိၼ် ဢၢႆႈထိုၵ်း ၵႂၢႆးငၢၼ်ဢွၼ်ႇ ဢၼ်လၢၵ်ႈၸၼ်မွၼ်ႉထႆယူႇၽၢႆႇၼႃႈ ၶႃႈၸၢႆး ၼၼ်ႉယူႇ။\n\n“ႁိုၺ်ႉ!… ႁိုၺ်ႉ!…ယေႃႈ!… ယေႃႈ!… ။ ဢႃႉ !… ၵႂၢႆးတူဝ် ၼႆႉ။ တၢင်းၼႆႉဢိူဝ်ႈ။ လွၵ်းၼိုင်ႈ ပႆႇယဝ်ႉ မႂ်းပေႃး ၶႂ်ႈၵႂႃႇထႅင်ႈ လွၵ်းၼိုင်ႈယဝ်ႉလူင်။ ႁိုၺ်ႉ ! ႁိုၺ်ႉ! “\n\nပဵၼ်သဵင်ၶႃႈၸၢႆးႁွင်ႉလႃႇဢၢႆႈထိုၵ်းၵွၺ်း။ မဵဝ်းၵႂၢႆးၼႆႉ ၵႂႃႇၸွမ်းၼင်ႇ ၸဝ်ႈမၼ်းၸႂ်ႉ၊ ၸဝ်ႈမၼ်းၸၼ်ၵွၺ်းၼႆသေတႃႉ  ပေႃးထႆယွင်း ႁိမ်းၽင်ႇတေးၼႆ ဢၢႆႈထိုၵ်းၼႆႉ မၼ်းၵႆႉၶၢမ်ႈ တေးၼႃးၵႂႃႇၽၢႆႇပုၼ်ႉ၊ ၶိုၼ်းၶၢမ်ႈမႃးၽၢႆႇၼႆႉ ႁဵတ်းၼႆ။ ပေႃးၸမ်ထိုင် ၶၢဝ်းပူတ်းမၼ်း မွၵ်ႈ 8 မူင်း 9 မူင်းၵၢင်ၼႆ ၼႆႉၶႅၼ်းၼႃႇယဝ်ႉ။ ဢၢႆႈထိုၵ်း ဢမ်ႇသူႈၸွမ်းႁွႆးမၼ်းယဝ်ႉ ပေႃးထိုင်ၶၢဝ်းၼႆႉ။ တေႁိူဝ်ႉၵေႃႈ တၢင်းၼိုင်ႈၵႂႃႈ၊ လႆႈလၢၵ်ႈလၢၵ်ႈ ၸၼ်ၸၼ်၊ ၶၢမ်ႇပွင်ႉ၊ ၶၢမ်ႇႁိုတ်းမႃး ၸဵမ်မိူဝ်ႈႁူဝ်မိူင်းၸင်ႇႁႃသႂ်ၼၼ်ႉယဝ်ႉယိုင်။ ပေႃးပဵၼ်ၼၼ် ၵဝ်ၸၢႆး ၶႅၼ်းပွင်ႉၶႅၼ်ႉထႃႉလိူဝ်မႃးယဝ်ႉ။ ဢၢႆႈထိုၵ်းတႄႉလိူဝ်သေၵူမ်ႈႁူဝ် ထွမ်ႇသဵင်ၵဝ်ၸၢႆးယဝ်ႉထူၺ်ႈၸႂ်လူင်မၼ်း ၽိုဝ်ႉ! ၽိုဝ်ႉ! သိုပ်ႇလၢၵ်ႈ သိုပ်ႇၸၼ် မွၼ်ႉထႆထႅင်ႈၼၼ်ႉ ႁိုဝ်တေ ၸၢင်ႊႁဵတ်းသင်ထႅင်ႈ။\n\nၽွင်းတိုၵ်ႉႁိုတ်း၊ တိုၵ်ႉလႃႇ ဢၢႆႈထိုၵ်း ယူႇၼၼ်ႉ မိူၼ်ႁၢင်ႈငိၼ်းသဵင်ၵူၼ်းသေၵေႃႉၵေႃႉ ႁွင်ႉၸိုဝ်ႈၶႃႈၸၢႆးဝႆႉ။ ပႆႇသူၼ်ၸႂ်။ သဵင်တိၼ် ၶႃႈၸၢႆး၊ သဵင်တိၼ် ဢၢႆႈထိုၵ်း၊ သဵင်ၼမ်ႉ၊ သဵင်မွၼ်ႉထႆ ဢၼ်ထၢၵ်ႇၼင်လိၼ်မိူင်းပေႃးပဵၼ်ၽၢၼ်ႈပဵၼ်ၽၢၼ်ႈၼၼ်ႉ ႁႅင်းဝႆႉလႄႈ သဵင်ဢၼ် ႁွင်ႉၶႃႈၸၢႆးၼၼ်ႉ ငိၼ်းဝွႆးဝွႆးၵွၺ်း။ မိူၼ်ႁၢင်ႈ ၼၼ်ႉသဵင်ၼၼ်ႉ လင်ႁႅင်းမႃး တိၵ်းတိၵ်းသေ ၸိုဝ်ႈၶႃႈၸၢႆးၵေႃႈ လႆႈငိၼ်ၸႅင်ႈလႅင်းလီမႃးယဝ်ႉ လႄႈ ၸင်ႇဝၢႆးတူၺ်းတၢင်းထဵင်ၼၼ်ႉ ႁၼ်ၵူၼ်း ၵေႃႉၼိုင်ႈ ယုၵ်ႉမိုဝ်းၵၵ်းၵႆ ပႆမႃးၸူး ၶႃႈၸၢႆးယူႇ။ ယိုင်ႈမၼ်းမႃးၸမ် ယိုင်ႁၼ်ၸႅင်ႈမႃး  တိၵ်းတိၵ်း။ မၼ်းမႃးႁိမ်းၼိူဝ်ႁူဝ်တေးၼႃး ဢၼ်ၶႃႈတိုၵ်ႉထႆ ယူႇၼၼ်ႉသေ ႁွင်ႉလၢတ်ႈဝႃႈ “ဢိူၺ်ႉ!… ပေႃးလႆႈယဝ်ႈ။ ပႃႈႁဝ်းႁႂ်ႈမႃးႁွင်ႉ။ မိူဝ်းႁိူၼ်းၵမ်းလဵဝ်ဝႃႇ” ၼႆ။ ၶႃႈၸၢႆးဢမ်ႇလႆႈငိၼ်းလီလီလႄႈ ၸင်ႇၵိုတ်း ၵႂၢႆးသေ ႁွင်ႉထၢမ်ၶိုၼ်း။\n\n“ဢီႈသင်ၵေႃ !…”\n\n“မိူဝ်းႁိူၼ်းၵမ်းလဵဝ်ဝႃႇ ပႃႈႁဝ်းဝႃႈ။ ပႃႈႁဝ်း ႁႂ်ႈၵဝ်မႃးႁွင်ႉမႂ်းဢိူဝ်ႈ”\n\nသဵင်ပီႈသႅင်ၼႆႉ ဢမ်ႇၶႅင်သေတႃႉ ၼင်ႇႁၢင်ႈ ပဵၼ်ၼၢမ်လူင်မႃးၸူၵ်ႉႁူဝ်ၸႂ် ပေႃးၵႅၼ်းၸၢ��်းၸၢတ်း။ ၼႂ်းၸႂ်ၼႆႉၵေႃႈ ဝူၼ်ႉလူင်ၵႂႃႇလၢႆ လၢႆလွင်ႈ၊ လၢႆလၢႆမဵဝ်း။ လႆႈငိၼ်းၵႂၢမ်းပီႈသႅင် ယဝ်ႉၵေႃႈ ႁူႉၵမ်းလဵဝ်ယဝ်ႉဝႃႈ ဢူႈႁဝ်းဢၼ် ၼွၼ်းၶၢမ်ႇတၢင်းပဵၼ်ယူႇတီႈႁိူၼ်းၼၼ်ႉ တိုၼ်းပဵၼ်သေလွင်ႈလွင်ႈၼႆ။\n\n“ၽႂ်ပဵၼ်သင် ပီႈသႅင်”\n\n” ၵဝ်ဢမ်ႇႁူႉ။ ၵဝ်တိုၵ်ႉၼွၼ်းယူႇ ပႃႈႁဝ်းမႃးလၢတ်ႈႁႂ်ႈမႃးႁွင်ႉမႂ်းဝႆးဝႆးၼႆၼႃႇ။  ၵဝ်တမ်ႉပႆႇလႆႈသုၵ်ႈၵွၼ်ႇဢိူဝ်ႈၼႆႉမႂ်းႁူႉ” ပီႈသႅင်တင်း လၢတ်ႈ တင်းတႆႇၼိူဝ်တေးၼႃး တၢင်းဝၼ်းဢွၵ်ႇထဵင်ၼၼ်ႉသေမႃးၸူးၶႃႈ။ ၶႃႈၸၢႆးၵေႃႈ ၼႅတ်ႈပူတ်းၸိူၵ်ႈဢႅၵ်ႇ ပၼ်ဢၢႆႈထိုၵ်းသေ လမ်းၸွမ်းလင်မၼ်း။\n\nႁႃးသွင်ၵေႃႉ ဢမ်ႇပဵၼ်လၢတ်ႈတေႃႇၵၼ်။ ၼႂ်းၸႂ်ပီႈသႅင် ပဵၼ်ႁိုဝ်ဢမ်ႇႁူႉ။ ၶႃႈတႄႉ လၢတ်ႈသင်ဢမ်ႇဢွၵ်ႇ၊ ဝူၼ်သင်ဢမ်ႇပဵၼ်။ မႆႈၸႂ်ဝႆႉၵေႃႈ မီးမီး၊ ၽိဝ်ၼိူဝ်ႉလၢင်ႈဝႆႉၵေႃႈ မီးမီး၊ မၢင်ၵမ်း ငိၼ်းသဵင်တိၼ် ၶႃႈၸၢႆးၶိုၼ်း၊ မၢင်ၵမ်းငိၼ်းသဵင် တိၼ်ပီႈသႅင်၊ မၢင်ၵမ်းၵေႃႈ ဢမ်ႇငိၼ်းသဵင်သင်၊ မၢင်ၵမ်းငိၼ်းသဵင်မၢၵ်ႇႁူဝ်ၸႂ် ၸဝ်ႈၵဝ်ႇတွတ်ႇ ယူႇ”ၽိုၵ်ႉ!… ၽိုၵ်ႉ…” ၵူၺ်း။ မၢင်းၵမ်းၼႂ်းၸႂ်ၼႆႉ လႅပ်ႈလၢတ်ႈဝႃႈ “ယႃႇႁႂ်ႈၽႂ်ပဵၼ်သင်သေၵမ်း ၸဝ်ႈ ဢိူဝ်ႉ” ၼႆၵေႃႈ မီးမီး။\n\n*                 *                       *\n\n“ၵတ်းၵႃႈ ယင်းမီးမေႃယႃ ၶႃႈလႃႈ။ ႁဝ်းၶႃႈတႄႉဢမ်ႇႁူႉသင် ၸင်ႇဝႃႈယဝ်ႉ။ ၸႂ်ယႂ်ႇမေႃယႃႁဝ်းတင်းပိုၵ်းယဝ်ႉၶႃႈၼႆႉ။ ၸၢင်ႈႁဵတ်းႁိုဝ်ၶႃႈၼႆ။ ၸူမ်းဝႃႈ ၸူမ်းၶႃႈယဝ်ႉ မေႃယႃႁဝ်းမႃးၵမ်းလဵဝ်ၼႆႉ”\n\nသဵင်မႄႈႁဝ်း လၢတ်ႈၵႂၢမ်းယွင်ႈယေႃး၊ ငိၼ်းၸူမ်းတီႈမေႃယူႇ ၼိူဝ်ႁိူၼ်းၼၼ်ႉ။ တိုၵ်ႉမႃး ထိုင်တိၼ်ၶူလႆၵေႃႈ ငိၼ်းသဵင်မၼ်းယူႇယဝ်ႉ။\n\nႁၼ်ၼႃႈၶိုၼ်ႈႁိူၼ်းမိူဝ်းၵေႃႈ မႄႈ လၢတ်ႈၵမ်းလဵဝ်။\n\n“ဢူႈသူ ဢၢင်ႈၵႂႃႇပႅတ်ႈႁဝ်းယဝ်ႉဢိူဝ်ႈ။ ၸင်ႇၸႂ်ႉပီႈသႅင်သူၵႂႃႇႁွင်ႉမႂ်းၼၼ်ႉၼႃႇ။ ၸွင်ႇမၼ်းဢမ်ႇလၵ်ႉၵိၼ်ၼိူဝ်မူထိူၼ်ႇ ဢၼ်ဢၢႆႈၵွၼ်း ဢဝ်မႃးပၼ်မႂ်းၼၼ်ႉႁိုဝ်လႃႇ။ ၵတ်ႉၵႃႈမေႃယႃ တင်းမႃး ၶိုတ်းၵွၼ်ႇဢိူဝ်ႈၼႆႉ”\n\nဢူႈၼႆႉ ယၢမ်ႈပဵၼ်ၵူၼ်းမင်ႈသင်ႈလူင်။ ပဵၼ်မူးသိူဝ်း၊ ပဵၼ်တမ်ႇငႃႈမႃးၸဵမ်မိူဝ်ႈတိုၵ်ႉၼုမ်ႇ တိုၵ်ႉၵမ်၊ ယၢမ်ႈၵိၼ်လႆႈ၊ ႁဵတ်းလႆႈမႃး ၵူႊမဵဝ်းလူး။ မိူဝ်ႈလဵၼ်ယွၼ်ႉတၢင်းပဵၼ်မၼ်းလႄႈ ယႃႇပေၵိၼ်ဢၼ်ၼႆ့၊ ယႃႇပေၵိၼ်ဢၼ်ၼၼ်ႉ၊ ယႃႇပေႁဵတ်းဢၼ်ၼႆႉ၊ ယႃႇပေႁဵတ်း ဢၼ်ၼၼ်ႉၼႆတႄႉ ႁူႉၵႃႈႁဵတ်းယၢပ်ႇယူႇလေႃႇ။ ၶႃႈၵေႃႈ ႁင်းၶႃႈယဝ်ႉ။ ၼိူဝ်မူထိူၼ်ႇ ဢၢႆႈၵွၼ်းမႃ��ပၼ်ၼၼ်ႉ ၵိၼ်ပႅတ်ႈမူတ်း သေပေႃးလီယဝ်ႉ။ သမ်ႉတိုၵ်ႉဝႆႉၸပ်းမေႃႈ၊ ၸပ်းဝၢၼ်ႇယူႇၼႃႇ။ ပေႃးဢူႈႁၼ်မၼ်းၵေႃႈ ႁိုဝ်တေယိူၼ်ႉလႆႈၼင်ႇၵဝ်ႇ။\n\nဢူႈ ပဵၼ်တၢင်းပဵၼ်သင်တေႉတေႉၵေႃႈဢမ်ႇႁူႉ။ မၢင်ပွၵ်ႈၵေႃႈ လႅပ်ႈယူႇလီပီးသၢၼ်းယူႇ။ မၢင်မွၵ်ႈသမ်ႉၶႂ်ႈပဵၼ်သင်ၵေႃႈ ပဵၼ်ၵႂႃႇ။ ၵႅပ်ႉၵႅပ်ႉၵမ်းၵမ်းၵူၺ်းၵေႃႈ ႁၢႆႁူႁၢႆတႃ ဢမ်ႇလႆႈ။\n\nမေႃယႃဝႃႈ တၢင်းပဵၼ်ၼႆႉ ၵဵဝ်ႇလူၺ်ႈ မၢၵ်ႇႁူဝ်ၸႂ်၊ လွင်ႈၸေႃႈၸႂ် ၸိူဝ်းၼႆႉပႃးၼႆၼႃႇ။ မႄႈ တင်း ၶႃႈ တႄႉဢမ်ႇႁူႉ၊ ဢမ်ႇပွင်ႇ လွင်ႈၸိူဝ်းၼႆႉ ပေႃးႁၼ်မၼ်းႁၢင်ႈ ထူၺ်ႈၸႂ်ၵပ်ႉမႃးၵေႃႈ ၵႂႃႇႁွင်ႉမေႃ ယႃႁဵတ်း ၼၼ်ၵွၺ်းၼႃႇ။ ၵမ်ႈၽွင်ႈၵေႃႈဝႃႈ ပဵၼ်လူမ်းတၢင်းၼွၵ်ႈဝႃႇ၊ လူမ်းတၢင်းၼႂ်းဝႃႇ ၸိူဝ်းၼႆႉၵေႃႈပႃး။  လွင်ႈယႃတႄႉ ၸၢမ်းတူၺ်းမူတ်းယဝ်ႉ။ တႆႈတဵၼ်း၊ တႆးဢၢင်း၊ ပၢင်းသြႃႇ ၸိူဝ်းၼႆႉ ၵေႃႈဢမ်ႇၵိုတ်းဢမ်ႇၵႅၼ်ႇ။ ၵူၺ်းၼႃႇ တိုၵ်ႉမိူၼ် ၵဝ်ႇၵွၺ်း။ ပေႃးလႆႈၵိၼ်ယႃ ဢၼ်မေႃယႃ မႃးပၼ်တႄႉ ၶႅၼ်းၵႂႃႇဢိတ်းၼိုင်ႈႁဵတ်းၼႆၵွၺ်း။\n\nဢၼ်ဢူႈၶႂ်ႈပဵၼ်ႁႅင်းႁႅင်းၼႃႇ ဢၼ်ၼိုင်ႈတႄႉ ၶႂ်ႈႁႂ်ႈလုၵ်ႈယိင်း၊ လုၵ်ႈၸၢႆးမၼ်း ဢၼ်ပဵၼ်ပီႈဢၢႆႈ၊ ပီႈၼၢင်းၶႃႈ ဢၼ်မီးယူႇတၢင်ႇ မိူင်းၼၼ်ႉ မႃးလႄႇမႃးၸႂ်းမၼ်းၼၼ်ႉယဝ်ႉ။\n\nႁဝ်းၶႃႈမီးပီႈၼွင်ႉသၢမ်ၵေႃႉ ပီႈဢၢႆႈလူင်၊ ပီႈၼၢင်းၵေႃႉၵၢင် လႄႈ ၶႃႈၸၢႆးၵေႃႉလဵၵ်ႉသုတ်း။ ပီႈဢၢႆႈ ပီႈၼၢင်းၶႃႈတႄႉ ၵႂႃႇယူႇၼႂ်းဝဵင်းလူင်ၸဵမ်လဵၵ်ႉသေ ႁႃၶိုၼ်ႈႁဵၼ်း။ ဝၢႆးမႃး ထိုင်ၵႂႃႇမိူင်းၼွၵ်ႈသေ ဢမ်ႇၶိုၼ်းမႃးသေပွၵ်ႈ။ တေႃႉတႄႉ လႆႈလၢတ်ႈတေႃႇၵၼ် ၼႂ်းၾူၼ်းၵွၺ်း။ တေႃႈၼင်ႇၾူၼ်းၵေႃႈ လႆႈလၢတ်ႈတေႃႇ ၶႃႈ တင်း မႄႈ ၵမ်ႈၼမ်ၼမ်။ ယွၼ်ႉဝၢၼ်ႈႁဝ်း ဢမ်ႇမီးၾူၼ်း။ လႆႈၵႂႃႇသိုပ်ႇတီႈ တၢင်ႇဝၢၼ်ႈ။ ပေႃးတေၵႂႃႇ ၵပ်းၾူၼ်းၸူး ပီႈဢၢႆႈ ပီႈၼၢင်းၼႆ ဢူႈဢမ်ႇတွၼ်ႉၸွမ်းသေပွၵ်ႈ။ ၵူၺ်းလၢတ်ႈဝႃႈ “ထၢမ်တူၺ်းလူး။ ၸွင်ႇၶႃတေမႃးလႄႇၼႆ” ၼႆၵွၺ်း။\n\n*                 *                       *\n\n“ပဵၼ်ဢၢႆႈၸၢႆးႁႃႉၼႆႉ”\n\n“ၸႂ်ႈဢိူဝ်ႈ။ ပဵၼ်ၶႃႈဢိူဝ်ႈ။ ပီႈၼၢင်းႁဝ်းယူႇ လီယူႇၼေႃႈ”\n\n“ယူႇလီယူႇ။ မႄႈဢမ်ႇမႃးႁႃႉ”\n\n“ဢမ်ႇမႃး။ၵဝ်မႃးၵေႃႉလဵဝ်ၵွၺ်း”\n\n“မႂ်းလူဝ်ႇသင် ၸၢႆး”\n\n“ဢမ်ႇလူဝ်ႇသင်။ ပေႃးဢွၵ်ႇဝႃႇၼႆႉ ပီႈၼၢင်း ႁဝ်း တေမႃးယူႇႁႃႉၼႆဝႃႇ မႄႈႁႂ်ႈမႃးထၢမ်ဢိူဝ်ႈ”\n\n“ႁူး… တေႁဵတ်းႁိုဝ်မိူဝ်း။ ငိုၼ်းတမ်ႉဢမ်ႇမီး။ ၸွင်ႇမၼ်းပေႃးဝႆႉၵေႃႈဢမ်ႇၸႂ်ႈၵႃႈၶိူင်ႈမိၼ်”\n\n“ပီႈဢၢႆႈႁဝ်းၼႃႇ ၸ���င်ႇမၼ်းတေမႃး”\n\n“မၼ်းၶႅၼ်းၼႃႇယဝ်ႉယူဝ်ႉ။ ပၢႆမႃးယွၼ်း ငိုၼ်းၵဝ် ၵွၼ်ႇဢိူဝ်ႈဝူင်ႈပူၼ်ႉၼၼ်ႉ ဢမ်ႇမီး ငိုၼ်းၼႆဝႃႇ။ ဢူႈႁဝ်းပဵၼ်ႁိုဝ်မႃး”\n\n“ၶႅၼ်းမႃးယဝ်ႉ။ ဢူႈႁဝ်းၶႂ်ႈႁႂ်ႈၶူဝ်မႃးလႄႇ ႁိူၼ်းၵမ်းၼိုင်ႈဝႃႇ”\n\n“ဢိူဝ်ႈ… ဢိူဝ်ႈ…။ ၵဝ်ၵေႃႈ ၶႂ်ႈမိူဝ်းၼႃႇၼႃႇယဝ်ႉၼႆႉ။ ႁွမ်ငိုၼ်းဢိတ်းၼိုင်ႈၵွၼ်ႇလႄႈ။ လၢတ်ႈဢူႈ ႁဝ်းႁေလႄႈ ၵဝ်တေမႃးယူႇၼႆ”\n\nပီႈၼၢင်းႁဝ်းတႄႉ လႅပ်ႈတေၶႂ်ႈမႃးတေႉယူႇ။ လၢတ်ႈလွင်ႈဢူႈ မိူဝ်ႈလႂ်ၵေႃႈ  သဵင်လွႆးၵႂႃႇပဵၼ်ၵမ်းပဵၼ်ၵမ်းသေ ၵဝ်တေမႃးယူႇ ၼႆတႃႇသေႇ။ ပီႈဢၢႆႈႁဝ်းတႄႉ ဢမ်ႇသူႈလႆႈလၢတ်ႈတေႃႇမၼ်း။ မၼ်းၵေႃႈ ဢမ်ႇလႃႈလီ ၵပ်းၾူၼ်းမႃးၸူးတီႈႁိူၼ်း။ တႃႇတေပၼ်ငိုၼ်းမႃးတီႈႁိူၼ်း ၶႅၼ်းၵႆယဝ်ႉ။\n\n*                                                           *                                                           *\n\nပႆယၢင်ႈၸွမ်း ႁွႆးတိၼ်ဢၢႆႈထိုၵ်းၵေႃႈ တင်းဝၼ်းယဝ်ႉ။ ၼင်ႇယၢင်ႈတိၼ် ဢၢႆႈထိုၵ်းထိူင်းမႃးလွႆးလွႆးၼၼ်ႉ ယၢင်ႈတိၼ်ၶႃႈၸၢႆးၵေႃႈ ၼၵ်းမႃးလွႆးလွႆး။ သၢႆလႅင်းလႅတ်ႇၵေႃႈ ဢူၼ်ႈမႃးတိၵ်းတိၵ်းသေ လုၵ်ႈတႃဝၼ်း ပေႃးၸူမ်လွႆၵႂႃႇ ၶိုင်ႈၼိုင်ႈယဝ်ႉ။ ၸမ်လပ်းသိင်ႇ ယဝ်ႉလႄႈ ၸင်ႇပူတ်းဢႅၵ်ႇပၼ်ဢၢႆႈထိုၵ်း၊ ဢဝ်ဢႅၵ်ႇတၢင်ႇၵိုၵ်းမွၼ်ႉထႆဝႆႉသေ ၸုင်ဢၢႆႈထိုၵ်း ဢွၵ်ႇတူင်ႈၼႃးမႃး။ ထွမ်ႇသဵင်တိၼ် ဢၢႆႈထိုၵ်း လူမ်ႇၼမ်ႉ လူမ်ႇဢုင်သေ ပႆၸွမ်းလင်မၼ်းမိူဝ်းႁိူၼ်း။ မိူဝ်ႈၼႆႉ လႅတ်ႇမႆႈ တင်းဝၼ်းလႄႈ ႁိူဝ်ႉဢူၼ်ႈၼုၼ်း လိူဝ်ၵူႊဝၼ်း။ ဢၢႆႈထိုၵ်းၵေႃႈ တေႁိူဝ်ႉထူၼ်ႈၼင်ႇၵဝ်ႇၵႂႃႈ။ ၵူၺ်းမၼ်းဢမ်ႇမေႃ လၢတ်ႈၵႂၢမ်းလႄႇၼေႃႈ။ ထူၺ်ႈၸႂ်လူင် ၽိုဝ်ႉ…ၽိုဝ်ႉ… သေ လမ်ႇႁူဝ်ပွၵ်ႈႁိူၼ်းယူႇၵွၺ်းယိုင်။ မၢင်ၵမ်း မၢင်ၵမ်း ပေႃးထိုင်တီႈ တၢင်းငႅၵ်းၸိုင် ယင်းယၵ်ႉတူၺ်းၶႃႈၸၢႆး ပဵၼ်ၵမ်းပဵၼ်ၵမ်းၵွၼ်ႇ။\n\nပႆပႆဝူၼ်ႉဝူၼ်ႉ။ မၢင်ၵမ်း ဝူၼ်ႉၺႃးဝႃႈ သင်ၵဝ်လႆႈ ယူႇၼႂ်းဝဵင်းလူင်သေ ႁႃၶိုၼ်ႈႁဵၼ်း ၼင်ႇပီႈဢၢႆႈ၊ ပီႈၼၢင်း ႁဝ်းၼၼ်ႉၸိုင် ႁိုဝ်တေလႆႈပႆၸွမ်းႁွႆးတိၼ် ဢၢႆႈထိုၵ်းယူႇၸိူင်ႉၼႆ။ သင်ၵဝ် လႆႈၵႂႃႇ မိူင်းပိူၼ်ႈ ၸိူင်ႉၼင်ႇ ပီႈဢၢႆႈ၊ ပီႈၼၢင်း ႁဝ်းၼၼ်ႉၸိုင် ႁိုဝ်တေလႆႈႁဵတ်းၵၢၼ်ႁိူဝ်ႉမွႆႈၸိူင်ႉၼႆယဝ်ႉၼႆ​သေ လွမ်ပွင်ႉလွမ်ၶင်းယူႇႁင်းၵွၺ်း။ မိူဝ်ႈထိုင်ႁိူၼ်းသေ ဢဝ်ဢၢႆႈထိုၵ်းၵႂႃႇမတ်ႉဝႆႉ တႂ်ႈသိုင်ႇၼၼ်ႉ ငိၼ်းသဵင်ႈဢူႈ တင်း လုင်းသူႉ ဢုပ်ႇၵၼ်ၼိူဝ်ႁိူၼ်းၼၼ်ႉ။\n\n“မႂ���းတႄႉ ၸၢင်ႈလူဝ်ႇမႆႈၸႂ်သင်ယဝ်ႉ။ လုၵ်ႈလၢင်းၵေႃႈ မီးပဵၼ်သၢမ်ၵေႃႉ။ ဢၼ်မီးမိူင်းပိူၼ်ႈၵေႃႈမီး ဢၼ်ယူႇတီႈႁိူၼ်းၵေႃႈယူႇ။ လူဝ်ႇၼင်ႈပႂ်ႉၵိၼ်ၵွၺ်းၼႃႇ”\n\n“ဢိူဝ်ႈ…။  ၵူၺ်းမၼ်းဢမ်ႇမိူၼ်ၼင်ႇႁၼ်ဢိူဝ်ႈမႂ်းဝႃႈ…။ ၸူဝ်ႈၵဝ်ဢမ်ႇယူႇလီၼႆႉ ၶႅၼ်းၼႃႇယဝ်ႉ။ ၵၢၼ်ၵေႃႈ ဢမ်ႇႁဵတ်းလႆႈ။ ပႂ်ႉၵိၼ်လုၵ်ႈဢွၼ်ႇ တင်း မႄႈၶဝ် ၵွၺ်းၼႃႇ”\n\n“မိူဝ်ႈႁဵတ်းၵေႃႈ ႁဵတ်းမႃးယဝ်ႉၼႃႇ။ သူင်ႇလုၵ်ႈဢွၼ်ႇ ၶိုၼ်ႈႁဵၼ်းပဵၼ်သွင်သၢမ်ၵေႃႉၼႆႉ ငၢႆႈၵေႃႈဢမ်ႇၸႂ်ႈ။ ၵမ်းၼႆႉတႄႉ ထိုင်ပၢၼ်လူဝ်ႇပႂ်ႉၵိၼ်ၵူၺ်းယဝ်ႉၼႃႇ”\n\nၽိူဝ်ႇငိၼ်းလုင်းသူႉဝႃႈၼၼ် ဢူႈယဵၼ်ၵႂႃႇၵမ်းၼိုင်ႈ။ ၵဝ်ၸၢႆးၵေႃႈ ၸုၵ်းယဵၼ်သီႇသီႇသေ ပႂ်ႉထွမ်ႇထႅင်ႈယူႇ။  ယူႇၸူဝ်ႈၼိုင်ႈ ဢူႈၶိုၼ်းတွပ်ႇဝႃႈ “ဢိူဝ်ႈ…… ဢၼ်သူင်ႇၶိုၼ်ႈႁဵၼ်းၵေႃႈၶိုၼ်ႈယဝ်ႉ။ ၶႂ်ႈၵႂႃႇမိူင်းပိူၼ်ႈၵေႃႈ သူင်ႇၵႂႃႇယဝ်ႉ။ ၵူၺ်း…မိူဝ်ႈလဵဝ် ဢၼ်ၵဝ်လႆႈၵိၼ်ၸွမ်းယူႇၼႆႉ မီးဢၢႆႈၵေႃႉလဵၵ်ႉသုတ်း ဢၼ်ဢမ်ႇတၼ်းလႆႈႁဵၼ်းသင်တေႉတေႉၼႆႉ ၵွႆးဢိူဝ်ႈ ထႆၼႃးလဵင်ႉၸႂ်ၵဝ်ယူႇၼႆႉ မႂ်းဝႃႈ…” ။                       ။\n\nၵႅင်လွၼ်း\n\nသႅပ်ႇထႅမ်ႇပႃႇ  30 ဝၼ်း 2018\n\n11 မူင်း ၵၢင်ၼႂ်"
+  },
+  {
+    "title": "ႁူမ်ႈလိုဝ်ႈၸႂ်",
+    "content": "သုၼ်ႇတိုဝ်ႉတၢင်းလီ ဢၼ်ဝႃႈၼၼ်ႉ မၼ်းဢမ်ႇမီးလၢႆပွၵ်ႈ။ ယဝ်ႉၵေႃႈ ဢမ်ႇၸႂ်ႈတႃႇၵူႊၵေႃႉ။  မိူဝ်ႈလဵဝ်တႄႉ တိုဝ်ႉတၢင်းလီဢမ်ႇမႃး၊ ဢမ်ႇၺႃးသင် ပၢႆတေလႆႈၵွင်လင် ဢွၵ်ႇႁၢၼ်ႉတၢင်းၵိၼ်ၵႂႃႇ လူၺ်ႈ တၢင်းသေလၢႆမွင်ၸႂ်ၵွၼ်ႇယဝ်ႉ။\n\nတူၼ်ႈမႆႉၼိုင်ႈတူၼ်ႈ မီးႁႅင်းၶိူင်ႇၶမ်ႉဢၼ် ဝႃႈၼၼ်ႉယွၼ်ႉႁၢၵ်ႈမၼ်းၵိုမ်း။  တႃႇႁၢၵ်ႈမၼ်းတေယင်ႇလႆႈမၼ်ႈ၊ ပၵ်းၶဝ်ႈလိၼ်လႆႈ လိုၵ်ႉလိုၵ်ႉၼၼ်ႉ မၼ်းလႆႈၸႂ်ႉၶၢဝ်းယၢမ်းတင်း ႁိုင်၊ တင်းႁီး။ ၵူၺ်းပေႃးမၼ်းလႆႈယင်ႇႁၢၵ်ႈ မၼ်ႈၵိုမ်းလီယဝ်ႉၼႆတႄႉ တႃႇတေထွၼ်ၶိုၼ်း ၼၼ်ႉၵေႃႈ သမ်ႉပဵၼ်ၵၢၼ်ယၢပ်ႇတေႉတေႉၼင်ႇၵဝ်ႇ။\n\nယူႇလၢႆလၢႆႁႂ်ႈၶႃႈၵႂႃႇၼင်ႈၵိၼ် ၼမ်ႉဝၢၼ်၊ ၼမ်ႉၼဵင်ႈ၊ ၵေႃႇၾီႇ ၼႂ်းႁၢၼ်ႉတၢင်းၵိၼ်ၼႆႉ ၶႃႈႁိုဝ်သူင်ၸႂ်။ ႁိုဝ်တွၼ်ႉ ပႃးၸႂ်သေပွၵ်ႈ။ ယွၼ်ႉ ၵူၼ်းၼမ်၊ သုၵ်ႉသၵ်ႉ။ ယဝ်ႉၵေႃႈ မေႃသွၼ်ဢၼ် မႃးသွၼ်လိၵ်ႈတႆးႁဝ်းမိူဝ်ႈၼၼ်ႉ လၢတ်ႈဝႆႉဝႃႈ “ၽိူဝ်ႇၵႂႃႇၼဵင်ႈတီႈ ႁၢၼ်ႉၼမ်ႉၼဵင်ႈ၊ ၼမ်ႉဝၢၼ် သေပႅတ်ႈလၢႆၶၢဝ်းယၢမ်း၊ ဢုပ်ႇၵၼ် ၽူႇလူမ်းယူႇၽၢဝ်ႉၽၢဝ်ႉၼၼ်ႉ တႃႉလူပပ်ႉ၊ ႁဵတ်းၵၢၼ်ႁိူၼ်း ၸွႆႈပေႃႈမႄႈလေႃႇ တေမီးၽွၼ်းလီ” ၼႆဝႃႇ။ ၼႆႉၵေႃႈ ၸၢင်ႊပဵၼ်တ��င်းဢၼ်႞ ဢၼ်ၶႃႈဢမ်ႇလႆႈ ၸႂ်ၵႂႃႇတီႈ ႁၢၼ်ႉၼမ်ႉၼဵင်ႈ၊ ၼမ်ႉဝၢၼ် ႁိုင်ႁိုင် ၼၼ်ႉယူႇ။\n\nဝႃႈၼၼ်သေတႃႉ တိုၼ်းဢမ်ႇၵႂႃႇသေပွၵ်ႈႁႃႉ ၼႆတႄႉ ဢမ်ႇၸႂ်ႈၼင်ၵဝ်ႇ။ မိူဝ်ႈၶႅၵ်ႇတၢင်ႇဝဵင်းမႃး ဢႅဝ်ႇလႄႇ၊ မိူဝ်ႈၺႃးတင်းတႆးၵေႃႉ တႆးသႄႈ ၸိူဝ်ၼႆႉတႄႉၵေႃႈ ၵႂႃႇယူႇ။ ႁႂ်ႈဢွၵ်ႇၸႂ်ၵႂႃႇ ၼင်ႈႁင်းၵွၺ်းၼၼ်ႉ ဢမ်ႇလႃႈလီဢွၵ်ႇၸႂ်ၼႆၵႂႃႈ။ မိူဝ်ႈၼႆႉ  လၢတ်ႈၵၼ်ဝႆႉ တင်း ဢၢႆႈၸွမ်၊ ဢၢႆႈ မူၼ်း တႆးၵေႃႉၶႃႈ တီႈႁၢၼ်ႉဢၼ်မႃးၽုၺ်ႇမႂ်ႇႁိမ်းႁူဝ် ဝဵင်းႁဝ်းၼႆႉ။\n\nၵဝ်ၶႃႈၽႅဝ်ၵႂႃႇဢွၼ်တၢင်းၶဝ်။ ႁႃတီႈၼင်ႈယဝ်ႉ ဢဝ်တႃလႄႇလဵပ်ႈတူၺ်းၼႂ်းႁၢၼ်ႉၼႆႉ ၵမ်း႞။ လႆႈႁၼ်ပၢႆႉၸိုဝ်ႈႁၢၼ်ႉ ႁွႆႈတီႈ ၽႃတေႃႇၼႃႈ ၶႃႈသိုဝ်ႈသိုဝ်ႈၼၼ်ႉဝႃႈ “ႁူမ်ႈလိုဝ်ႈၸႂ်” ၼႆ။ ႁၢၼ်ႉၼႆႉ ဢမ်ႇၵႅပ်ႈႁႅင်း၊ ဢမ်ႇၵႂၢင်ႈႁႅင်း။ မူတ်းသႂ်လီ၊ ၽိူၼ်၊ တင်ႇ ၼႂ်းႁၢၼ်ႉၸိူဝ်းၼႆႉၵေႃႈၶႅမ်ႉဝႆႉ။ တိုၵ်ႉပဵၼ် ဢၼ်မႂ်ႇၵေႃႈ ႁင်းမၼ်းၵႂႃႈ။\n\nဢၢႆႈၸွမ် တင်းဢၢႆႈမူၼ်း ၽႅဝ်မႃးသေ ႁဝ်းဢွၼ်ၵၼ်ၼင်ႈ  တၢၵ်ႇလူမ်းယဵၼ်။ သင်ႇၵိၼ် မဵဝ်း႞ယဝ်ႉ မဵဝ်း ႞ယူႇ။ တႃၵေႃႈသွၵ်ႈ ၵႂႃႇသွၵ်ႈမႃး၊ ဝၢႆႇၵႂႃႇဝၢႆႇမႃး ၵႂႃႇၺႃးမႅၼ်ႈ ၸဝ်ႈႁၢၼ်ႉတၢင်းၵိၼ် ဢၼ်ၼင်ႈယူႇ တီႈၽိူၼ် (ၵွင်ႇတႃႇ) ၼၼ်ႉ။ မိူဝ်ႈၵဝ်ၶႃႈတႄႇၶဝ်ႈ မႃးၼၼ်ႉတႄႉ ဢမ်ႇလႆႈ ႁၼ်မၼ်းၼၢင်း။  လႅပ်ႈတိုၵ်ႉထိုင်မႃးၵူၺ်း။\n\n“တူၺ်းတၢၼ်ႇတၢၼ်ႇမၼ်းလေႃႇဢေႉ။ ၼမ်ႉ ၵႃႉမႂ်းတေယွႆႉယဝ်ႉၼေႈ”\n\nတိုၵ်ႉယၵ်ႉယဵမ်ႈတူၺ်း တၢင်းႁၢင်ႈလီ သၢဝ်ၸဝ်ႈႁၢၼ်ႉၼၼ်ႉယူႇ။ သဵင်ဢၢႆႈၸွမ်လၼ်ၶဝ်ႈႁူမႃး။ ၶႃႈၵိူဝ်ႉတူၺ်းမၼ်းၼၢင်း ႁိုင်ၵႂႃႇၵႃႊႁိုဝ် ဢမ်ႇႁူႉ။ ထိုင်တီႈ ဢၢႆႈၸွမ်ၶဝ်ပေႃးလႆႈတၵ်ႉ ၼၼ်ႉယိုင်။ မိူဝ်ႈသွၼ်ႇၵႃႈတၢင်းၵိၼ်ယဝ်ႉသေ တေဢွၵ်ႇမႃးၼၼ်ႉ ဢၢႆႈမူၼ်းယွၵ်ႇၶႃႈဝႃႈ\n\n“ယႃႇလၵ်ႉမႃးၼင်ႈၵိၼ် ၵေႃႉလဵဝ်ၵွၺ်းလႃႈ ႁႄႉ”  ၼႆ ႁင်းၶႃႈၵွၼ်ႇ။\n\nထိုင်မႃးႁိူၼ်းယဝ်ႉၵေႃႈ ၸႂ်ၼႆႉႁၢင်ႈတိုၵ်ႉမီး ယူႇၼႂ်ႁၢၼ်ႉ “ႁူမ်ႈလိုဝ်ႈၸႂ်” ၼၼ်ႉႁေး။ ယူႇယူႇ ႁၼ်ၼႃႈ သၢဝ်ၸဝ်ႈႁၢၼ်ႉၼၼ်ႉၼႂ်းတႃ သေ လွမ်လွမ်ယုမ်ႉယူႇႁင်းၵွၺ်း။ မႄႈတေလၵ်ႉႁၼ်ပိူင်ပဵၼ်ၶႃႈယူဝ်ႉ ဝႃႈႁင်းၶႃႈ “ၸၢႆး…မႂ်းပဵၼ်သင်ၼႆႉ ယုမ်ႉႁင်း ၵွၺ်းမႂ်းတိၵ်းတိၵ်းလႃႇ။ ယွင်ႇယဝ်ႉယူဝ်ႉ” ၼႆဝႃႇ။ ႁိုဝ်တေၸၢင်ႈတွပ်ႇသင်ၶိုၼ်း ယုမ်ႉၼႄထႅင်ႈသေယဝ်ႉယဝ်ႉၼႃႇ။ တၢင်းယၢမ်ႈ ဢၼ်ဢမ်ႇၶႆႈဢွၵ်ႇၵိၼ် ၼမ်ႉၼဵင်ႈ၊ ၼမ်ႉဝၢၼ် ၼၼ်ႉၵေႃႈ လႅပ်ႈတေဢမ်ႇယူႇထႅင်ႈႁိုင်ယဝ်ႉ။\n\nႁဵတ်းၼၼ်သေ  ႁၢၼ်ႉတၢင်းၵိၼ် “ႁ���မ်ႈလိုဝ်ႈ ၸႂ်” တင်းၶႃႈၼႆႉ မိုတ်ႈၵၼ်မႃးလွႆးလွႆး။ မၢင်ပွၵ်ႈ ၵေႃႈ ဢၢႆႈၸွမ်၊ ဢၢႆႈမူၼ်းၶဝ် မႃးၼင်ႈၸွမ်း။ မၢင်ပွၵ်ႈၵေႃႈ ၵႂႃႇၵေႃႉလဵဝ်။ ပေႃးလုၵ်ႈလဵင်ႉတီႈႁၢၼ်ႉ ၼၼ်ႉထၢမ်မႃး “ၵိၼ်တေၵိၼ်သင်ၶႃႈ ပီႈဢၢႆႈ ” ၼႆ ၵေႃႈတွပ်ႇၵႂႃႇၼင်ႇဢၼ်မီးၼႂ်းသူပ်းၼၼ်ႉၵွၺ်း။\n\nမၢင်မွၵ်ႈၵေႃႈ “ၼမ်ႉၼဵင်ႈၵွၵ်း႞” ။ မၢင်ပွၵ်ႈၵေႃႈ “ၵေႃႇၽီႇၵွၵ်း႞” ။ ပေႃးပဵၼ်ၶၢဝ်းၵၢင်ဝၼ်း ၵေႃႈ “ၼမ်ႉဝၢၼ်ၵွၵ်း႞” “တမ်သူမ်ႈဝၢၼ်ႇ႞”  ” ၼမ်ႉမၢၵ်ႇ ၽႃႈၵွၵ်း႞” ႁဵတ်းၼႆၵွၺ်း။\n\nၶွင်လၵ်း ၸွင်ႇတွင်ႉမႆႈၶႂ်ႈၵိၼ်တေႉတေႉၵေႃႈ ဢမ်ႇၸႂ်ႈၼႆ။ သင်ႇႁဵတ်းၼႃႈတိူဝ်ႈမၼ်းၵွၺ်းလူး။ လုၵ်ႈလဵင်ႉၶဝ်တႄႉတေဝႃႈ “ပီႈဢၢႆႈ ၼႆႉ သင်ႇၶိုတ်းၸႂ်ၼႃႇ  ဢမ်ႇဢမ်ဢိုတ်း ဢမ်ဢၢတ်းမိူၼ် တၢင်ႇၵေႃႉ ၼႆၵွၼ်ႇၵႂႃႈ”။ မၢင်ၵေႃႉၼႆႉ လႆႈၸုၵ်းပႂ်ႉ တင်းႁိုင်တင်းႁီးယဝ်ႉ ၸင်ႇသင်ႇၼိုင်ႈမဵဝ်းလူင်မေႃႉ။ ၵူၺ်းၼႃႇ တေဝႃႈႁိုဝ်ၵေႃႈ ပိူၼ်ႈၶႂ်ႈၵိၼ်တေႉ တေႉလႄႈမႃးၼႃႇၼေႃႈ ႁူႉလူဝ်ႇဢဝ်ၶဝ်ၶၢဝ်း ယၢမ်းဝူၼ်ႉ ယူႇဢိူဝ်ႈၼႆ။\n\nၼင်ႇၸိုဝ်ႈဝႃႈ”ႁူမ်ႈလိုဝ်ႈၸႂ်” တေႉယဝ်ႉ။ တီႈႁၢၼ်ႉၼႆႉယဵၼ်လီ ၵတ်းလီတေႉတေႉ။ ၵူၼ်းၼမ်သေတႃႉၵေႃႈ ဢမ်ႇဢူၼ်ပၼ်း မိူၼ်တၢင်ႇႁၢၼ်ႉ။ ဢၼ်ႁဵတ်းႁႂ်ႈၶႃႈလႆႈၸႂ်ႁၢၼ်ႉၼႆႉမႃးတိၵ်းတိၵ်းၼႆႉ  လွင်ႈၼႆႉၵေႃႈပႃးယဝ်ႉ။\n\nႁဵတ်းၵႅင်ႈလူပပ်ႉ၊ ႁဵတ်းၵႅင်ႈတႅမ်ႈသေမဵဝ်းမဵဝ်း။ ပေႃးသၢႆတႃ တုမ်ႉၵၼ်တင်းမၼ်းၼၢင်းၵေႃႈ ယုမ်ႉၼႄၵမ်း႞သေ ၸၼ်ဢဝ်ပပ်ႉ မႃးဢၢၼ်ႇ။ ႁဵတ်းၼႆဢဝ်သၢႆတႃ လေႃႇတုမ်ႉတေႃႇ ၵၼ်သေ ယုမ်ႉၼႄၵၼ်ၵွၺ်း။\n\nပေႃးထၢမ်ဝႃႈ “တၢင်းၵိၼ်တီႈႁၢၼ်ႉၼႆႉ ဝၢၼ်ၼႃႇႁႃႉ”ၼႆတႄႉ ၶႃႈတေတွပ်ႇဝႃႈ “ဝၢၼ်ယူႇ”ၼႆၵွၺ်း။ တေဝႃႈ “ဢမ်ႇဝၢၼ်” ၼႆၵေႃႈ သမ်ႉတေဝႃႈ မႃးၵိၼ်ႁဵတ်းသင်လႃႇၼႆ။ ပပ်ႉဢၼ်ၶႃႈ ႁဵတ်းၵႅင်ႈဢၢၼ်ႇယူႇၼၼ်ႉ ပေႃးထၢမ်ဝႃႈ ၶႅမ်ႉယူႇႁႃႉ၊ တႅမ်ႈဝႆႉလွင်ႈသင်၊ ပဵၼ်ၽႂ် တႅမ်ႈၼႆတႄႉ လႅပ်ႈတေဢမ်ႇၸၢင်ႈတွပ်ႇလႆႈလီလီ။\n\nတၢင်းယုမ်ႉ သၢဝ်ၸဝ်ႈႁၢၼ်ႉၼႆႉ ၸပ်းမႅၼ်ႈ ၸႂ်ၵဝ်ၶႃႈတေႉတေႉ။ သီၼိူဝ်ႉၶၢဝ်ၶွင်ႇ။ တူဝ်ၶိင်းၵေႃႈ သုင်မွၵ်ႈၵဝ်ၶႃႈၵွၺ်း။ ယိုင်ႈၵႆႉမႃးတီႈႁၢၼ်ႉၼႆႉ ယိုင်ႈသၢႆတႃမၼ်းၼၢင်း ၸၼ်ၸႂ်ၵဝ်ၶႃႈမႃး တိၵ်းတိၵ်း။ ၼႃႈတႃ၊ သီႈၼိူဝ်ႉ၊ တူဝ်ၶိင်း မၼ်းၼၢင်း ၸိူဝ်းၼႆႉ ၵွတ်ႇႁုတ်ႉဢဝ်မၢၵ်ႇႁူဝ်ၸႂ် ၵဝ်ၶႃႈ ယင်ႇႁၢၵ်ႈတူၵ်းၼႂ်းႁၢၼ်ႉၼႆႉ မႃးလွႆးလွႆး။\n\nႁဵတ်းၼႆ ၸႂ်ဢၼ်ၶႆႈလၢတ်ႈတေႃႇ၊ ၶႆႈဢုပ်ႇ၊ ၶႂ်ႈမိုတ်ႈတင်းမၼ်းၼၢင်းၼႆၵေႃႈ ႁႅင်းမႃးတေႉတေႉ။ သၢႆတႃ ႁဝ်းသွင်ၵေႃႉတႄႉ လႆႈဝႃႈမိုတ်ႈ ၵၼ်ယဝ်ႉ။ မၢၵ်ႇႁူဝ်ၸႂ်ၶႃႈၶႅၼ်းမိုတ်ႈ မၼ်းၼၢင်း လီၼႃႇယဝ်ႉ။ မၢၵ်ႇႁူဝ်ၸႂ်မၼ်းၼၢင်းတႄႉ ဢမ်ႇႁူႉၼႃး။  ၵူၺ်းၼႃႇ ပႆႇႁတ်းၵႂႃႇတၵ်ႉၵႂႃႇ လၢတ်ႈတေႃႇသေပွၵ်ႈ။ ၵၢၼ်ဢၼ်ဢမ်ႇမီးလွင်ႈ မီးတၢင်း၊ ဢမ်ႇမီးႁူးမီးႁွႆးသေ ၵႂႃႇတၵ်ႉလၢတ်ႈ တေႃႇၵူၼ်းပႅၵ်ႇၼႃႈၼႆႉ ၵဝ်ၶႃႈၶုၺ်ႈတေႉတေႉ။ ဢမ်ႇမေႃလမ်တိုဝ်၊ လမ်တၼ်ၵႂႃႇလမ်းလၢတ်ႈ တေႃႇပိူၼ်ႈ ၸိူင်ႉၼင်ႇၵူၼ်းၸၢႆး တၢင်ႇၵေႃႉ။   ပေႃးပိူၼ်ႈလႅပ်ႈဢမ်ႇလႆႈၸႂ်ၼႆၵေႃႈ မေႃႁူႉတူဝ်၊ မေႃဢၢႆသေ ပၢႆႊပၼ်တၢင်းပိူၼ်ႈၼၼ်ႉၼႃႇ။\n\nမၢင်ပွၵ်ႈဢၢႆႈမူၼ်းတင်းဝႃႈ “မဵဝ်းတေလႆႈမေးၵေႃႈဢမ်ႇၸႂ်ႈမႂ်းၼႆႉ” ၼႆၵွၼ်ႇ။  တေဝႃႈ တေႁဵတ်း ၵႅင်ႈၵႂႃႇသွၼ်ႇၵႃႈ တၢင်း ၵိၼ်ၼႆၵေႃႈ ပိူၼ်ႈပေႃးဝႆႉပၼ်လုၵ်ႈလဵင်ႉယဝ်ႉ။ လူဝ်ႇၵၵ်းမိုဝ်းႁွင်ႉၵွၺ်း။ မႃးသွၼ်ႇထိုင်တီႈ။ တေၵႂႃႇ သင်ႇတၢင်းၵိၼ်ၼႆၵေႃႈ မွင်းၶဝ်ႈႁၢၼ်ႉမႃးၵူၺ်း လုၵ်ႉလဵင်ႉပိူၼ်ႈ ပေႃးလီႉၵီႉလၼ်းၵၼ်းလူင်မႃး ၸူးႁဝ်းယဝ်ႉ။ ယၢပ်ႇတေႉႁႄး။\n\nမိူဝ်ႈၼႆႉ တႆးၵေႃႉၶႃႈ ဢၢႆႈၸွမ် တင်း ဢၢႆႈ မူၼ်းၵေႃႈ မႃးၼင်ႈၸွမ်း။\n\n“ႁဵတ်းႁိုဝ်လႃႇဢေႉ ၵူၼ်းဢမ်ႇလႆႈၸႂ် ဢွၵ်ႇ ၵိၼ်ၼမ်ႉၼဵင်ႈၼမ်ႉဝၢၼ်ၶဝ်။ ငိၼ်းၶၢဝ်ႇဝႃႈ မႃး ၵူႊဝၼ်းၼႆႁႃႉ။\n\nဢၢႆႈမူၼ်းငိၼ်းတီႈလႂ်မႃးဢမ်ႇႁူႉ။ ၵိုင်ႉၵၢင်ႉ သေမႃးယွၵ်ႇႁဵတ်းၼႆၵမ်းလဵဝ်လႄႈ ၵဝ်ၶႃႈဝူၼ်ႉ ၵႂင်ၵႂႃႇၵမ်း႞။\n\n“ၵဝ်ဝႃႈ ႁၢၼ်ႉမၢၼ်ႊဢၼ်ပၼ်းၸင်ႇၸင်ႇ ၼၼ်ႉဢိူဝ်ႈ။ ၵဝ်ဢမ်ႇၶႂ်ႈၵႂႃႇ”\n\n“ပေႃးၸိူင်ႉၼႆတေႉ ၶႅမ်ႉၽႅဝ်လေႃႇၼေႃႈ။ ၸဝ်ႈႁၢၼ်ႉမၼ်းၵေႃႈႁၢင်ႈလီၼႃႇလူး။ မၢၵ်ႇလေႃႉ ၵိင်ႈၽၢႆႇလဵဝ်ၼႆႉ မၼ်းၵႂႃႇၵူၺ်းဢၢႆႈ။ ပေႃးလႆႈၸႂ် ၵေႃႈႁုမ်းၵမ်းလဵဝ်လႃႈ။ ၶၢၼ်ႉႁၼ်ဝႃႈ ပႃးၸွမ်း ပိူၼ်ႈၵႂႃႇယဝ်ႉဝႃႈ ၼႆၵွၺ်းၵႂႃႈ”\n\nၸႂ်ႈတႄႉ။ ဢၢႆႈမူၼ်းဝႃႈၼႆႉ ဢမ်ႇၽိတ်း မၢၵ်ႇလေႃႉၼႆႉ မဵဝ်းမၼ်းလူဝ်ႇၵိင်ႈသွင်ၽၢႆႇလူး ၸင်ႇတေၵႂႃႇလႆႈၼေႃႈ။ ၵိင်ႈယူႇႁင်းၶႃႈၽၢႆႇလဵဝ် ၵွၺ်းတႄႉ ႁိုဝ်တေပဵၼ်။ လူဝ်ႇႁဵတ်း၊ လူဝ်ႇႁႃ လၢႆးမၼ်း။ လူဝ်ႇတူင်ႉၼိုင်ယဝ်ႉၼႆ ၵဝ်ၶႃႈပွင်ႇၸႂ် လီလီယဝ်ႉ။\n\nဝၼ်းၼၼ်ႉ ဝၢႆးပွၵ်ႈတီႈႁၢၼ်ႉၼၼ်ႉမႃး ၶႃႈဝူၼ်ႉႁင်းၵွၺ်းၵေႃႉလဵဝ်။ ဝႃႈတေႁဵတ်းႁိုဝ်ၵႂႃႇ တၵ်ႉမၼ်းၼၢင်း။ တေလၢတ်ႈ လွင်ႈသင်၊ တေထၢမ်လွင်ႈသင် ၸိူဝ်းၼႆႉ။ ပဵၼ်ႁိုဝ်ပဵၼ်လႃႈ ပေႃးမိူဝ်ႈၽုၵ်ႈတႄႉ ၵဝ်ၶႃႈတိုၼ်းတေ ၵႂႃႇတၵ်ႉလၢတ်ႈတေႃႇ၊ တေဢၢၼ်းႁႂ်ႈမိုတ်ႈၵုဝ်းၵၼ်ယဝ်။ ဢၢႆႈၸွမ်လၢတ်ႈၼႄတႄႉ ၸိုဝ်ႈမၼ်းၼၢင်းမီးသွင်တူဝ်။ ပႃး “မူဝ်” တူဝ်႞ဢိူဝ်ႈၼႆဝႃႇ။ မူဝ်သင်ၵေႃႈ ဢမ်ႇလၢတ်ႈ။ “ထၢမ်ဢဝ်ႁင်းၵွၺ်း လေႃႇဢေႉ။ ဢမ်ႇႁတ်းႁႃႉတေႃႈဝႃႈ” ၼႆႁင်းၶႃႈ။ တႅပ်းတတ်းၸႂ်ယဝ်ႉ။ မိူဝ်ႈၽုၵ်ႈၼႆႉတိုၼ်းတေထၢမ်။ တိုၼ်းတေႁႂ်ႈလႆႈႁူႉၸိုဝ်ႈတင်းသွင် တူဝ်လႄႈ တိုၼ်းတေဢၢၼ်းမိုတ်ႈမၼ်းၼၢင်း ၼၼ်ႉယဝ်ႉ။\n\n“ပီႈဢၢႆႈ မႃးၸဝ်ႉလိူဝ်ၵူႊဝၼ်းၼေႃ မိူဝ်ႈၼႆႉ”\n\nလုၵ်ႈလဵင်ႉတီႈႁၢၼ်ႉၼႆႉ ၵႆႉလၢတ်ႈ၊ မေႃမိုတ်ႈပိူၼ်ႈၼႃႇ၊ ပေႃးၶဝ်မႃးထၢမ်တေသင်ႇၵိၼ်သင်ၼႆ ၼၼ်ႉၶဝ်ၵႆႉတူင်ႉတၵ်ႉဝႃႈ “မိူဝ်ႈၼႆႉမႃးၸဝ်ႈၶႃႈၼေႃ။ မိူဝ်ႈၼႆႉမႃးလႃႈၶႃႈၼေႃ”။ ပေႃးႁၼ်မႃးၵေႃႉ လဵဝ်ၵေႃႈၵႆႉဝႃႈ “ၵေႃႉလဵဝ်ၵွၺ်းၶႃႈႁႃႉ မိူဝ်ႈၼႆႉ” ၼႆ ၸိူဝ်းၼႆႉ။ သင်ႇယဝ်ႉလီငၢမ်းသေ ၼင်ႈပႂ်ႉဝႆႉယူႇ။\n\nမိူဝ်ႈၼႆႉ သၢဝ်ၸဝ်ႈႁၢၼ်ႉၼႆႉ လႅပ်ႈသုၵ်ႉသၵ်ႉသေမဵဝ်းမဵဝ်းဝႆႉ။ မီးၵူၼ်းမႃးတၵ်ႉမႃးဢုပ်ႇ မၼ်းတင်းၼမ်။ ၼမ်လိူဝ်ၵူႊ ဝၼ်းလႅပ်ႈတေမႃး လၢတ်ႈၵႂၢမ်း ႁူမ်ၸူမ်းသေမဵဝ်းမဵဝ်း။ ၵဝ်ၶႃႈၵေႃႈ ဝူၼ်ႉဝႆႉဝႃႈ မိူဝ်ႈၼႆႉပေႃးၵိၼ်ယဝ်ႉတႄႉ တေၵႂႃႇတူင်ႉတၵ်ႉ လၢတ်ႈတေႃႇ ဢုပ်ႇၸူးမၼ်းၼၢင်းယဝ်ႉ ၸင်ႇတေမိူဝ်းၼႆ။\n\n“ၵိၼ်ဝၢၼ်ဝၢၼ်ၶႃႈၼႃႉ ပီႈဢၢႆႈ။ မိူဝ်ႈၼႆႉႁဝ်းၶႃႈလဵင်ႉဢေႃႈ။ ၶႂ်ႈသင်ႇထႅင်ႈ ၵေႃႈလႆႈယူႇၶႃႈၼႃႉ”\n\nတူၺ်းၼႃႈလုၵ်ႈလဵင်ႉၵေႃႉၼႆႉ လႅပ်ႈဝႃႈတေႉ ဝႃႈလဵၼ်ႈဝႆႉ။ မၼ်းယွၵ်ႇႁိုဝ်ၼႆ လၢမ်းယၢပ်ႇဝႆႉ။\n\n“လဵင်ႉၵူႈၵေႃႉႁႃႉ”  ၼႆၶႃႈထၢမ်မၼ်းၶိုၼ်း။\n\n“ဢမ်ႇၸႂ်ႈၶႃႈ။ ပီႈၼွင်ႉၸိူဝ်းဢၼ်မိုတ်ႈႁႅင်း လႄႈ  ၵူၼ်းၸိူဝ်းပႃးပၼ်ႁႅင်းတႃႇသေႇၼၼ်ႉ ၵွၺ်းဢေႃႈ။”\n\n“ဢေႃ  ဝႃႈၼၼ်ၵႂႃႈ။ ပေႃႈလဵင်ႉသူတိူဝ်ႉထီႇ ႁႃႉ”\n\nဢမ်ႇထၢင်ႇ၊ ဢမ်ႇထိူမ်၊ ဢမ်ႇမုင်ႈ၊ ဢမ်ႇမွင်း၊  ၵႂၢမ်းၶေႃႈ႞ ၶဝ်ႈႁူမႃး။\n\n“ဢမ်ႇၸႂ်ႈၶႃႈ လုၵ်ႈယိင်းမၼ်းဢေႃႈတိူဝ်ႉ။ ၶမ်ႈဝႃးပိူၼ်ႈမႃးထၢမ်လုၵ်ႈယိင်း ပေႃႈလဵင်ႉႁဝ်း။ ပဵၼ်ၵၼ်ၵႂႃႇ။  မိူဝ်ႈၼႆႉ လဵင်ႉ တႃႇႁူမ်ၸူမ်းလူင်ႈၼႃႈပၢင်ၶႅၵ်ႇၼႆၶႃႈဝႃႇ”\n\nမၢၵ်ႇႁူဝ်ၸႂ်ၼႆႉ ၵိုင်ႉၵၢင်ႉတွတ်ႇႁႅင်းမႃး။ မိူၼ်ႁၢင်ႈငိုၼ်းၶိုၼ်းသဵင်ထူၺ်ႈၸႂ်ၸဝ်ႈၵဝ်ႇၵေႃႈလူဝ်ႇလူဝ်ႇ။ ၼႃႈၵေႃႈပိူင်ႈၵႂႃႇ ၵမ်း႞။ လုၵ်ႈလဵင်ႉတီႈႁၢၼ်ႉၼၼ်ႉ ဢမ်ႇလႅပ်ႈတၼ်းႁၼ်။ ပေႃးမၼ်းႁၼ်တႄႉ ႁိုဝ်တေၸႂ်ႈလၢႆးမၼ်းၼင်ႇၵဝ်ႇ။ ၼႅတ်ႈႁဵတ်း ၵႅင်ႈဢမ်ႇပဵၼ်သင်သေ ယုမ်ႉၼႄမၼ်းဝႆႉ။\n\n“ဢမ်ႇယုမ်ႇၶႃႈႁႃႉ။ ထၢမ်တူၺ်းပီႈၼၢင်းႁဝ်း ၶႃႈလႄႈ “\n\nႁၼ်ၶႃႈယုမ်ႉဝႆႉလႄႈ မၼ်းၸင်ႇဝႃႈႁင်းၶႃႈ ပေႃးဢမ်ႇယုမ်ႇႁႂ်ႈၵႂႃႇထၢမ် လုၵ်ႈယိင်းၸဝ်ႈႁၢၼ်ႉ ၼၼ်ႉႁင်းၵွၺ်းၼႆ။\n\nႁိုဝ်တေၸၢင်ႊတၵ်းသဵင် သင်ထႅင်ႈယဝ်ႉ။  ၶႃႈဢမ်ႇသိုပ်ႇၵႂၢမ်းမၼ်းထႅင်ႈ။ ၼင်ႈၸိူဝ်ႈတူၺ်း တၢင်းၵိၼ်ဢၼ်သင်ႇမႃး ၼၼ်ႉယူႇ။ ယၵ်ႉဝၢႆႇၵႂႃႇ တၢင်းလုၵ်ႈသၢဝ်ၸဝ်ႈႁၢၼ်ႉၼၼ်ႉ။ မၼ်းၼၢင်း ယုမ်ႉၼႄသေ ငွၵ်းႁူဝ်တေႃႇၶႃႈယူႇ။ ၶႃႈၵေႃႈယုမ်ႉ သေငွၵ်းႁူဝ်တေႃႇမၼ်းၼၢင်းၶိုၼ်း။\n\nၼႃႈယုမ်ႉမၼ်းၼၢင်း ပွၵ်ႈၼႆႉ တေၶႆႈဝႃႈ ဢၼ်လုၵ်ႈလဵင်ႉႁဝ်းလၢတ်ႈၼၼ်ႉ ၸႂ်ႈတေႉဢေႃႈ ၼႆႁိုဝ်။ ၵိၼ်ယူႇယႅမ်ႉယူႇၵေႃႈ ၼမ်ႉဝၢၼ်တၢင်း ၵိၼ်ၸိူဝ်းၼႆႉ ႁၢင်ႈဢမ်ႇထိုင်ၼႂ်းဢူၵ်းၸႂ်။ ပပ်ႉဢၼ်ၵဝ်ၸၢႆး ပႃးၼၼ်ႉၶႅၼ်းၼႃႇယဝ်ႉ ယႃႇပေဝႃႈတေ ယုၵ်ႉ ၶိုၼ်ႈမႃးဢၢၼ်ႇလႃႈ။ တမ်ႉဢမ်ႇပဵၼ်ယၵ်ႉတူၺ်းမၼ်းၵွၼ်ႇ။\n\nႁိုဝ်ပဵၼ်ၼင်ႇၸႂ်ယဝ်ႉ။ ဢၼ်ဢၢၼ်းဝႆႉ ၸဵမ်မိူဝ်ႈဝႃးၼၼ်ႉၵေႃႈ ဢမ်ႇပဵၼ်ၵၢၼ်ယဝ်ႉလူး။ ၸိုဝ်ႈမၼ်းၼၢင်းၵေႃႈ ပဵၼ် “မူဝ်” သင်ၼႆၵေႃႈ ႁိုဝ်တေႁတ်းၵႂႃႇထၢမ်ယဝ်ႉ။ တူၵ်းလိုၼ်းယဝ်ႉလူး။ မိူဝ်ႈလဵဝ်တႄႉ ထၢမ်ဢမ်ႇထၢမ် မိုတ်ႈဢမ်ႇမိုတ်ႈၵၼ် တင်းမၼ်းၼၢင်းၵေႃႈ ဢမ်ႇမီးတီႈပွင်ႇ သင်ယဝ်ႉလူး။ ၵူၺ်းၼႃႇ ၸၢင်ႊႁဵတ်းႁိုဝ် ႁူႉၵေႃႈ ႁူႉယဝ်ႉ။ ဢၼ်ၶဝ်ပဵၼ်ၵၼ်ၵေႃႈ ပေႃးပဵၼ်ၵႂႃႇယဝ်ႉလူး တႃႇထိင်းသရေႇၼႃႈတႃ ၵဝ်ၸၢႆးၼၼ်ႉတႄႉ တိုၵ်ႉလူဝ်ႇလႆႈသိုပ်ႇမႃးၼင်ႈၵိၼ်တီႈႁၢၼ်ႉ “ႁူမ်ႈလိုဝ်ႈၸႂ်” ၼႆယူႇထႅင်ႈ လၢႆလၢႆပွၵ်ႈၵွၼ်ႇ။ ၸင်ႇတေၸၢင်ႈ တိုတ်းၶၢတ်ႇၽၢတ်ႇလႆႈမၼ်းယဝ်ႉ။ ၵိုင်ႉၵၢင်ႉတိုတ်း ၵိုင်ႉၵၢင်ႉယိုတ်းၵမ်းလဵဝ် တႄႉ ၼင်ႇပိူၼ်ႈတူၺ်းဢမ်ႇၵျႃႉၼၼ်ႉ တႃႇၵဝ်ၶႃႈ ၵေႃႈဢမ်ႇလီၼင်ႇၵဝ်ႇသႄႈ။\n\n(ၵႅင်လွၼ်း – 30 -9 2017)"
+  },
+  {
+    "title": "လၢႆးၸႂ်ႉတိုဝ်း ၽႅၼ်ႇတူမ်းသူပ်း (Mask)",
+    "content": "မိူဝ်ႈလဵဝ် ယွၼ်ႉၵူၼ်းႁဝ်း မီးပိုၼ်ႉႁူႉ ပၢႆးယူႇလီ ၼမ်မႃးလႄႈ မိူဝ်ႈၵႂႃႇၼႂ်းၵႄႈၵူၼ်းၼမ်၊ ၼႂ်းၵၢတ်ႇ၊ ၸွမ်းတႃႈ ၸွမ်းတၢင်းၸိူဝ်းၼႆႉ လႆႈႁၼ် ဢွၼ်ၵၼ် ဢဝ်ၽႃႈတူမ်းပၢၵ်ႇ၊ တူမ်းၼႃႈ (Mask) ဝႆႉ ႁင်းၽႂ်မၼ်းယူႇယဝ်ႉ။ ၼႆႉတေလႆႈဝႃႈ ပဵၼ်လွင်ႈလီဢၼ်ၼိုင်ႈ။ ပေႃးတူမ်းသူပ်း၊ တူမ်းပၢၵ်ႇ (သႂ်ႇ Mask) ၼႆႉ ၸၢင်ႊႁေႉၵင်ႈ ၽုၼ်ႇမုၵ်ႉ ၽုၼ်ႇလိၼ် ၵွႆးဢမ်ႇၵႃး ႁေႉၵင်ႈလႆႈ တၢင်းမူင်ႈမႅင်း တၢင်းပဵၼ် ဢၼ်ပဵၼ်ၸွမ်းၶၢဝ်း ၼၼ်ႉၵွၼ်ႇယဝ်ႉ။ ၵူၺ်းၵႃႈ ထုၵ်ႇလီ ၸႂ်ႉတိုဝ်း ၽႃႈတူမ်းပၢၵ်ႇ ႁႂ်ႈမႅၼ်ႈ သႅၼ်းမၼ်း လႄႈ ႁႂ်ႈမႅၼ်ႈလၢႆးမၼ်း ၸင်ႇတေမီးၽွၼ်းလီယဝ်ႉ။\n\n(1) လိူၵ်ႈသႅၼ်း ၽႅၼ်တူမ်းသူပ်း (Mask)\n\nယွၼ်းလၢတ်ႈဢွၼ်တၢင်းဝႆႉဝႃႈ ဢမ်ႇဢၢၼ်းယႃႉၵဝ်�� ပၢႆးမၢၵ်ႈမီးၽႂ်၊ ယိူင်းဢၢၼ်းတႃႇ ႁႂ်ႈပဵၼ်ၽွၼ်းလီ ၵူၼ်းပဵၼ်ၵွႆးၶႃႈ။\n\nၽႃႈတူမ်းပၢၵ်ႇ (Mask) ၼႆႉ ပဵၼ်တႃႇၸႂ်ႉတိုဝ်းပွၵ်ႈလဵဝ်ၵွႆး။ ၶိုၼ်းၸႂ်ႉတိုဝ်း ဢၼ်ၸႂ်ႉယဝ်ႉၼၼ်ႉ ဢမ်ႇမီးတီႈပွင်ႇသင်။ မိူဝ်ႈလဵဝ် ၽႃႈတူမ်းပၢၵ်ႇ ဢၼ်ဢဝ်ၽႅၼ်ႇယဵပ်ႉႁဵတ်းဝႆႉၼၼ်ႉၵေႃႈ ဢွၵ်ႇမႃး။ ယွၼ်ႉမၼ်းမီးဝႅပ်ႇယၢင်ႇ၊ မၼ်းႁၢင်ႊလီလႄႈ လႆႈႁၼ်မီးၵူၼ်းၸႂ်ႉတိုဝ်းၼမ်ဝႆႉ။ တီႈတေႉမၼ်း ၽႃႈတူမ်းပၢၵ်ႇဢၼ်ဝႃႈၼႆႉ ၶႂ်ႈဢဝ်ၽႅၼ်သင်ယဵပ်ႉႁဵတ်းၵေႃႈ ႁဵတ်းႁွတ်းလူင်ၵႂႃႇၸိူင်ႉၼၼ်ႉ ဢမ်ႇမႅၼ်ႈ။ ၶမ်ႇပၼီႇ ဢၼ်ႁဵတ်းဢွၵ်ႇယႃႈယႃၶဝ်ၼၼ်ႉ ၶဝ်လႆႈႁဵတ်းႁႂ်ႈႁူးလူမ်းမၼ်းလဵၵ်ႉၼင်ႇၵႃႈလဵၵ်ႉလႆႈ၊ ၼင်ႇႁိုဝ် မူင်ႈမႅင်းတေ ဢမ်ႇၸၢင်ႊၶဝ်ႈ၊ ႁႂ်ႈလႆႈ ၶေႃႈလူတ်းဝၢင်း တီႈၸုမ်းၽၢႆႇပၢႆးယူႇလီၶဝ်ယဝ်ႉ ၸင်ႇႁဵတ်းဢွၵ်ႇလႆႈ။ ယွၼ်ႉၼၼ်ႉ ၶႂ်ႈပၼ်တၢင်းႁၼ်ထိုင်ဝႃႈ ႁႂ်ႈဢွၼ်ၵၼ်ၸႂ်ႉတိုဝ်း ၽႃႈတူမ်းပၢၵ်ႇ ဢၼ်ၶမ်ႇပၼီႇ ႁဵတ်းဢွၵ်ႇမႃး တႃႇတိုဝ်းပွၵ်ႈလဵဝ်ၼၼ်ႉ။\n\nၵွၼ်ႇပႆႇယိပ်းၽႃႈတူမ်းပၢၵ်ႇသေ မႃးတူမ်းပၢၵ်ႇၼၼ်ႉ သုၵ်ႈလၢင်ႉမိုဝ်း ႁႂ်ႈမူတ်းသႂ်ၵွၼ်ႇလႄႈ။\n\nတေလႆႈဢဝ် ဢၼ်မီးသီၼၼ်ႉဝႆႉတၢင်းၼွၵ်ႈ၊ ဢၼ်မီးၶၢဝ်ၼၼ်ႉ ဝႆႉၽၢႆႇတၢင်းၼႂ်း၊ တေလႆႈဢဝ် ၽၢႆႇဢၼ်မီးလဵၵ်းဢွၼ်ႇတႃႇ ပိပ်ႇၸပ်း ၶူႈၼင်ၼၼ်ႉဝႆႉ တၢင်းၼိူဝ်။\n\nၼူင်ႇသၢႆမၼ်းၸပ်းသႂ်ႇ ဝိၼ်ႇႁူႁဝ်းယဝ်ႉ ႁႂ်ႈမၼ်းတိတ်းၸပ်း ပၢၵ်ႇ၊ ၸပ်းၼႃႈ ႁဝ်းဝႆႉၶႃႈလႄႈ။\n\nၼဵၵ်းဝႆႉ လဵၵ်းဢွၼ်ႇၼၼ်ႉ ႁႂ်ႈမၼ်းတိတ်းၸပ်း ၶူႈၼင်ႁဝ်းဝႆႉၶႃႈလႄႈ။\n\nတေဢမ်ႇလႆႈ ၵမ်းၵမ်း ပူတ်း၊ ၵမ်းၵမ်းသႂ်ႇ ၽႃႈတူမ်းပၢၵ်ႇ။\n\nပေႃးၸႂ်ႉယဝ်ႉ ပွၵ်ႈၼိုင်ႈၵေႃႈ ထိုမ်ႈပႅတ်ႈသေ ဢဝ်ဢၼ်မႂ်ႇၸႂ်ႉဢဝ်ၶႃႈလႄႈ။\n\nၽႃႈပူၵ်ႇပၢၵ်ႇ ဢၼ်ၸႂ်ႉတိုဝ်းယဝ်ႉၼၼ်ႉ ပေႃးတူပ်ႉသေ ဢဝ်သိမ်းဝႆႉ ၼႂ်းထူင်ႁဝ်းၸိုင် ယိုင်ႈၶႅၼ်းၸၢင်ႊၸပ်းတၢင်းပဵၼ်ယဝ်ႉ။\n\nသင်ပဵၼ် ၽႃႈတူမ်းပၢၵ်ႇ မဵဝ်းဢၼ်ၸႂ်ႉတိုဝ်းလႆႈ လၢႆလၢႆပွၵ်ႈၼၼ်ႉၵေႃႈ ပေႃးၸႂ်ႉယဝ်ႉၵမ်းၼိုင်ႈၸိုင် သၵ်ႉလွႆးပႅတ်ႈၶႅမ်ႉၶႅမ်ႉယဝ်ႉ ၸင်ႇၸႂ်ႉထႅင်ႈပွၵ်ႈၼိုင်ႈၶႃႈလႄႈ။ ပေႃးဢမ်ႇပႅတ်ႈသေ ၶိုၼ်းၸႂ်ႉတိုဝ်း ထႅင်ႈပွၵ်ႈၼိုင်ႈၸိုင် ၸၢင်ႊတိူဝ်းတၢင်းပဵၼ်ငၢႆႈလိူဝ်မႃး သွင်ပုၼ်ႈၵွၼ်ႇ။\n\nပိၼ်ႇမႃးတီႈ Dr.Zaw Htet Aung ( I am your doctor)"
+  },
+  {
+    "title": "ၶဝ်ဢမ်ႇထၢမ်လူး",
+    "content": "ဢၢႆႈငူဝ်ႉ ၵႂႃႇၵိုတ်းၵႃးမၼ်း ႁိမ်းတႅဝ်းၵၢတ်ႇၼၼ်ႉသေ ႁွင်ႉထၢမ် ပလိၵ်ႈၽၢႆႇသဵၼ်ႈတၢင်းဝႃႈ\n\n“ၵိုတ်းၵႃးတီႈၼႆႈ ၸွင်ႇလႆႈၶႃႈၼႆႉ��\nတီႈမၼ်းမႃးၵိုတ်းသေ ႁွင်ႉထၢမ်ၼၼ်ႉ ယွၼ်ႉပဵၼ်ႁိမ်းတႅဝ်းၵၢတ်ႇ၊ ပဵၼ်တီႈသုၵ်ႉလႄႈ ႁၢမ်ႈတပ်ႉဝႆႉ ဢမ်ႇပၼ်ၵႃးၵိုတ်း၊ ယွၼ်ႉၼၼ်ႉ ပလိၵ်ႈၽၢႆႇသဵၼ်ႈတၢင်း ၸင်ႇတွပ်ႇၶိုၼ်းဝႃႈ\n“ဢမ်ႇလႆႈ။ တီႈၼႆႈဢမ်ႇၵိုတ်းလႆႈ” ၼႆႁင်းမၼ်း။\nၽိူဝ်ႇ ဢၢႆႈငူဝ်ႉ ဝၢႆႇတူၺ်းႁိမ်းၶၢင်ႈၼၼ်ႉ သမ်ႉႁၼ်ပိူၼ်ႈၵိုတ်းဝႆႉယူႇလႄႈ မၼ်းၸင်ႇဝႃႈႁင်းပလိၵ်ႈၽၢႆႇသဵၼ်ႈတၢင်း\n“ႁဵတ်းသင်ပိူၼ်ႈသမ်ႉၵိုတ်းယူႇလႃႇ”\nပလိၵ်ႈၽၢႆႇသဵၼ်ႈတၢင်း ၸင်ႇယုမ်ႉၼႄသေ တွပ်ႇဝႃႇ\n“ၶဝ်ဢမ်ႇႁႃးလူး” ၼႆယဝ်ႉ။"
+  },
+  {
+    "title": "မႂ်းထၢင်ႇဢဝ်ၵႂႃႈ",
+    "content": "ၼႂ်းဝၢၼ်ႈႁဝ်းၼႆႉ လုင်းသွႆးတၵ်​ႉပေႇတၢင်ႇၵႃႇလႃး ၶႅၼ်ႇသေပိူၼ်ႈယဝ်ႉ။ ဢမ်ႇဝႃႈ ဝူဝ်းႁၢႆ ဢမ်ႇဝႃႈ ၵႂၢႆးႁၢႆ ဢွၼ်ၵၼ်မိူဝ်းၸူး လုင်းသွႆးတၵ်ႉမူတ်းမူတ်း၊ ပေႃးလႆႈၸူးလုင်းသွႆးတၵ်ႉယဝ်ႉႁေ မၼ်းလၢတ်ႈၼႄဝႃႈ မီးၸဵင်ႇပုၼ်ႉၸဵင်ႇၼႆႉၼႆၵေႃႈ ၵႂႃႇႁႃတိုၼ်းႁၼ်ၵမ်းလဵဝ်။ တေႃႈၼင်ႇ မၢင်ပွၵ်ႈ ဢၢႆႈၶွၼ်ႇ မႅဝ်းပႃႈသႃႇႁၢႆ တင်းၵႂႃႇၸူးလုင်းသွႆးတၵ်ႉၼၼ်ႉၶႃႈၼႃႇ။\n\nမိူဝ်ႈလိူၼ်ပူၼ်ႉၼႆႉ ၼႂ်းဝၢၼ်ႈႁဝ်း မီးၵူၼ်းမႂ်ႇၶဝ်ႈမႃးယူႇႁိူၼ်းၼိုင်ႈ၊ ဢၢႆႈၵွၼ်းၶႃႈ ၽူဝ်မေးၼၼ်ႉၼႃႇ၊ လုၵ်ႉတၢင်းတႂ်ႈပုၼ်ႉႁေ မႃးယွၼ်းယူႇမႂ်ႇမႂ်ႇ၊ ၵူၼ်းဝၢၼ်ႈႁဝ်းၵေႃႈ ၽႄပၼ် တီႈႁိူၼ်းတီႈႁႆႈ တီႈသူၼ် တႃႇၶႃၽူဝ်မေးႁဵတ်းၵိၼ်ၵမ်ႈၽွင်ႈ။\nၵူၼ်းတင်းဝၢၼ်ႈ ဢွၼ်ယုမ်ႇပေႇတၢင်ႇ လုင်းသွႆးသေတႃႉ ဢၢႆႈၵွၼ်းတႄႉ ဢမ်ႇယုမ်ႇသႄႈ၊ တေပဵၼ်ယွၼ်ႉမၼ်းတိုၵ်ႉမႃးမႂ်ႇမႂ်ႇၵေႃႈ တေပဵၼ်လႆႈယူႇ။\nၽိူဝ်ႇဝၼ်းၼိုင်ႈ ဢၢႆႈၵွၼ်းၶႂ်ႈၸၢမ်းတူၺ်း ၵႃႇလႃး လုင်းသွႆးၼႆႁေ ႁွင်ႉဢဝ် လုၵ်ႈၸၢႆးမၼ်းသွင်ၵေႃႉ မိူဝ်းလႄႇ လုင်းသွႆး၊ လုၵ်ႈၸၢႆးလူင်းမၼ်းတႄႉ လဵၼ်ႈၵေႃႉမႄႈၶဝ် တီႈႁိူၼ်းလႄႈ ဢမ်ႇၸွမ်းၵႂႃႇ။\nလုင်းသွႆးၵေႃႈ ဢဝ်ၼမ်ႉၼဵင်ႈ ၼမ်ႉယိုဝ်ႉတမ်း ဢၢႆႈၵွၼ်းယဝ်ႉ တူင်ႉတၵ်ႉဝႃႈ\nလုင်းသွႆး “ႁႆး… လုၵ်ႈၸၢႆးမႂ်းပေႃးတၼ်းယႂ်ႇတၢၼ်ႇၼႆႉယဝ်ႉၼေႃႈ”\nဢၢႆႈၵွၼ်း “ၸႂ်ႈၶႃႈယဝ်ႉ ၽွင်းလူၼ်းမၼ်းယဝ်ႉဝႃႈ”\nလုင်းသွႆး “ၵတ်ႉၵႃႈ မီးသွင်ၵေႃႉ ၵွႆးလႃႈၼေႃႈ”\nၽိူဝ်ႇလႆႈငိၼ်းၸိူင်ႉၼၼ်ႉ ဢၢႆႈၵွၼ်း ထဵင်လုင်းသွႆး တႃႇမီႇတႃႇၵၢၼ်ႉ ၵမ်းလဵဝ်\nဢၢႆႈၵွၼ်း “သၢမ်ၵေႃႉဢေႃႈ။ လုၵ်ႈၸၢႆးၶႃႈ တိုၼ်းမီးသၢမ်ၵေႃႉ ၶႃႈလႄႈ”\nလုင်းသွႆး “ဢႃ… ၵေႃႉငဝ်ႈတႄႉ မႂ်းထၢင်ႇဢဝ်ၵႂႃႈ” ၼႆယဝ်ႉ။\n😂😂😂😂😂😂😂"
+  },
+  {
+    "title": "သိူဝ်ႈသွင်ၽိုၼ်ပဵၼ်သင်လႃႇ သူဢမ်ႇၶႂ်ႈလႆႈႁႃႉ",
+    "content": "လုင်းသု���ႆႉ တေမီးဢႃႇယု မွၵ်ႈ 75 ပီႊၼႆႉၵႂႃႈ၊ မေးမၼ်းသမ်ႉမီးမွၵ်ႈ 61 ပီႊ။ လုင်းသု ၼႆႉ ပၢႆသလိူဝ်ပဵၼ်ၵူၼ်းယွမ် သမ်ႉတႅမ်ႇ ဢမ်ႇမိူၼ်ၵၼ်တင်းမေးၼၢင်းမၼ်းသေဢိတ်း၊ မေးၼၢင်းမၼ်းသမ်ႉ သုင်သုင်ပီးပီး။\n\nပႃႈလႅင်ႇ ၵေႃႉပဵၼ်ၼၢင်းမေး လုင်းသုၼႆႉ ပဵၼ်ၵူၼ်းလၢတ်ႈၵႂၢမ်းၼမ်၊ ဢမ်ႇသူႈမႅၼ်ႈပိူၼ်ႈၼႂ်းဝၢၼ်ႈ၊ ပႃႈလႅင်ႇၼႆႉ မေႃႁႃတၢင်းၽိတ်းပိူၼ်ႈၼႃႇ၊ ၵူၼ်းၼႂ်းဝၢၼ်ႈဢမ်ႇမီးၽႂ်လွတ်ႈ၊ ဢၼ်ၺႃးၼမ်ႁေပိူၼ်ႈၵေႃႈ ပဵၼ်ၽူဝ်မၼ်းလုင်းသုၼၼ်ႉယဝ်ႉ။\nပႃႈလႅင်ႇ ၵႆႉၵႆႉလၢတ်ႈလွင်ႈၽူဝ်မၼ်း ၼႄၵူၼ်းၼႂ်းဝၢၼ်ႈၶဝ်ဝႃႈ “လုင်းသုၼႆႉ ႁဵတ်းသင်ၵေႃႈ ဢမ်ႇတွၼ်ႉမႅၼ်ႈသေပွၵ်ႈ” ၼႆယူႇတႃႇသေႇ။\nမိူဝ်ႈလိူၼ်ပူၼ်ႉၼၼ်ႉ မၼ်းဝႃႈႁင်းလုင်းသုဝႃႈ “တူၺ်းလူး… သိူဝ်ႈသူၼၼ်ႉၵေႃႈ ပွင်ႇပွင်ႇႁေ။ ပွင်ႇပဵၼ်သွင်ႁူး။ ႁဝ်းတေၵႂႃႇသိုဝ်ႉ ဢၼ်မႂ်ႇမႃးပၼ်ဢဝ်” ၼႆႁေ ၵႂႃႇသိုဝ်ႉသိူဝ်ႈမႂ်ႇမႃး တႃႇသၢမ်ၽိုၼ် ၶမ်ႈၼၼ်ႉၵမ်းလဵဝ်။\nမိူင်းလႅင်းမႃး လုင်းသု ၼိုင်ႈသိူဝ်ႈမႂ်ႇဢၼ်မေးၼၢင်းမၼ်းသိုဝ်ႉပၼ်ၼၼ်ႉၽိုၼ်ၼိုင်ႈသေ လူင်းၵႂႃႇၼႂ်းသိုင်ႇၾႆး၊ မိူဝ်ႈၼၼ်ႉ ပႃႈလႅင်ႇ ၵိုဝ်တႃတူၺ်း လုင်းသုသေ ႁွင်ႉလႃႇတင်းသဵင်ၶႅင်ၶႅင်ဝႃႈ “သိူဝ်ႈထႅင်ႈသွင်ၽိုၼ်ၼ်ႉ သမ်ႉပဵၼ်သင်လႃႇ။ သူဢမ်ႇလႆႈၸႂ်ႁႃႉ” ၼႆယဝ်ႉ။ 😂😂😂😂😂😂"
+  },
+  {
+    "title": "လၢႆးတၢင်း တႃႇယူႇႁႂ်ႈၵတ်းယဵၼ်ၸႂ်",
+    "content": "၁။ ယႃႇၵုမ်ႇဝူၼ်ႉၸွမ်း ဢၼ်ပိူၼ်ႈလၢတ်ႈ/ဝႃႈႁင်း ၸဝ်ႈၵဝ်ႇၼၼ်ႉယူႇတိၵ်းတိၵ်း (တူဝ်ယၢင်ႇ- ပီးဢိူဝ်ႈ၊  ယွမ်ဢိူဝ်ႈ၊  ပွၵ်းဢိူဝ်ႈ၊ ၶၢဝ်ဢိူဝ်ႈ၊ လမ်ဢိူဝ်ႈ) ၸဵမ်ၸိူဝ်းၼႆႉ။\n\n၂။ ယႃႇၵုမ်ႇဝူၼ်ႉ လွင်ႈသုၵ်ႉၸႂ် ဢၼ်​​တေၸၢင်ႊပဵၼ်​​တေႃးသ ​​မေႃးႁ ဢၼ်​​တေဢမ်ႇမီးတၢင်းသိူဝ်း။\n\n၃။ ယႃႇဝူၼ်ႉလူင်ႈၼႃႈ ၶမ်ၸႂ်ၸွမ်း လွင်ႈတၢင်း ဢၼ်ပႆႇပဵၼ်မႃးၼၼ်ႉ။\n\n၄။ တင်ႈၸႂ် ပၵ်းၸႂ် ႁဵတ်းၵၢၼ် ဢၼ်ၸဝ်ႈၵဝ်ႇ သူင်ၼၼ်ႉလႄႈ။\n\n၅။ သင်လႆႈငိၼ်းၶိုၼ်း လွင်ႈပိူၼ်ႈလၢတ်ႈ ၶႃႉၶိူဝ်းၸဝ်ႈၵဝ်ႇၸိုင် ယႃႇဝူၼ်ႉ လႄႈ ၶမ်ၸႂ်ၸွမ်း (ယွၼ်ႉဝႃႈ မၼ်းဢမ်ႇလႆႈလၢတ်ႈတီႈႁဝ်း ​​တေႃႇၼႃႈ​​တေႃႇတႃ)\n\n၆။ ယႃႇၵႆႉၵႆႉၵုမ်ႇဝူၼ်ႉၶမ်ၸႂ်ၸွမ်း လွင်ႈဢၼ်ႁဝ်းလႆႈသုမ်းၵႂႃႇၼၼ်ႉ (ယွၼ်ႉမၼ်း​​တေဢမ်ႇလႆႈသင်မႃးၶိုၼ်းယဝ်ႉလႄႈ ဢဝ်ပဵၼ်တူဝ်ယၢင်ႇ ႁႂ်ႈပဵၼ်တီႈတႅၵ်ႈၼိူင်း တႃႇမိူဝ်းၼႃႈၼၼ်ႉ ​​တေထုၵ်ႇၵႂႃႇ)\n\n၇။ မိူဝ်ႈ​​ၵေႃႉႁၵ်ႉ ႁၵ်းလင် ယႃႉသႅတ်ႉၸႃႇသူၵႂႃႇၼၼ်ႉ ၸူမ်းသိူဝ်းပၼ်​​ႁေလႄႈ ယွၼ်ႉဝႃႈ ႁဝ်းလႆႈႁူ လွင်ႈမၼ်���ၸဝ်ႉၸဝ်ႉ ……….\n\n၈။ တႅၼ်းတၢင်တီႈ ​​တေဢဝ်ၼမ်ၼမ်ၼၼ်ႉ ​​ၶတ်းၸႂ် ႁႂ်ႈမေႃပၼ်ပိူၼ်ႈ ၼမ်ၼမ်လႄႈ\n\n၉။ ယႃႇသူၼ်ၸႂ်ၼိူဝ် တူင်ႇဝူင်းၵူၼ်း ၼမ်လိူဝ်ဢၼ်ထုၵ်ႇလီ်ႁဵတ်း။\n\n၁၀။ ​​မေႃပဵင်း​​ပေႃး ၸွမ်းၼင်ႇ ၸဝ်ႈၵဝ်ႇမီးၼၼ်ႉလႄႈ"
+  },
+  {
+    "title": "လၵ်ႉႁၵ်ႉတဵတ်ႇတဵတ်ႇ",
+    "content": "မိူဝ်ႈဢၼ်ပူၼ်ႉမႃး ထူပ်းၺႃးတင်းၼမ်\nယူႇၸမ်ၽူႈယိင်း ထိင်းၸႂ်လႆႈသေ\nတႃႇတေလၢတ်ႈတၵ်ႉ ဝႃႈႁၵ်ႉၶဝ်ၼႆ\nၼႂ်းၸႂ်ဢမ်ႇတွၼ်ႉ ဝူၼ်ႉဢွၵ်ႇမႃးသေပွၵ်ႈ…။\n\nၵူၺ်းၵႃႈ…\nဝၢႆးမႃးလႆႈႁၼ် ဢၼ်ပဵၼ်ယိင်းၼႆႉ\nထိင်းဝႆႉၸႂ်ၵေႃႈ တေႃႈႁိုဝ်ထိမ်းသဝ်း\nယွၼ်ႉႁဝ်းႁၵ်ႉမႅၼ်ႈယိင်းယဝ်ႉဢိူဝ်ႈ…။\nႁၵ်ႉမႅၼ်ႈယဝ်ႉၼႆၵေႃႈ တေႃႈႁိုဝ်တေႁတ်းတၵ်ႉ\nလၢတ်ႈၵႂၢမ်းႁၵ်ႉဢုပ်ႇၼႄ ၵူဝ်ယိင်းၽႄတၢင်းသဵၼ်ႈ\nဢၼ်မိုတ်ႈလဵၼ်ၵေႃႉၵၼ် ယွၼ်ႉၼၼ်တေလၵ်ႉႁၵ်ႉယူႇတဵတ်ႇတဵတ်ႇ ၵူၺ်းယဝ်ႉ။\n(ဝွၵ်းႁူဝ်ၼႆႉ ယၢမ်ႈႁူမ်ႈၵၼ်တင်းတႆးၵေႃႉသေတႅမ်ႈ တႃႇပၼ်လိၵ်ႈၶဵဝ်ၸူႉမၼ်း။ မိူဝ်ႈၼၼ်ႉယၢဝ်းလိူဝ်ၼႆႉ ဝူၼ်ႉၶိုၼ်းဢမ်ႇတွင်း။ တွင်းလႆႈမွၵ်ႈၼႆႉၵွၺ်း။ တီႈၸိုဝ်ႈ”ယိင်း”ၼၼ်ႉ မိူဝ်ႈၼၼ်ႉပဵၼ် “ၽူၺ်း”။ ၸိုဝ်ႈဝွၵ်းၵေႃႈဢမ်ႇဝႃႈၼႆ။ )\n(ၸၢႆးၸၢႆးဢွၼ်ႇလႅင်း (မိူင်းၼၢႆး) 29/10/ 2017)"
+  },
+  {
+    "title": "ၵွၼ်ႇပႆႇတၢႆၼႆႉ ၶႂ်ႈယၢမ်ႈ  ၶဝ်ႈၶွၵ်ႈတူၺ်း ၼႆလႄႈ လႆႈၶဝ်ႈၶွၵ်ႈ ၼႂ်းဝၼ်းဢႃႇယု တဵမ် 100 ပီႊ",
+    "content": "ၼၢႆးထဝ်ႈ ၼႂ်းၸေႊမိူင်း ၵႃႇရူဝ်ႇလၢႆးၼႃး မိူင်းဢမႄႇရီႇၵၼ်ႇၵေႃႉၼိုင်ႈ  ၶႂ်ႈယၢမ်ႈၶဝ်ႈၶွၵ်ႈတူၺ်း ၵွၼ်ႇမၼ်းပႆႇတၢႆ ၼႆလႄႈ ၸဝ်ႈၼႃႈတီႈပလိၵ်ႈၶဝ်  ၸင်ႇမႃးတီႉၵမ်မၼ်းၵႂႃႇ မိူဝ်ႈဝၼ်းၵိူတ်ႇမၼ်း ထူၼ်ႈတဵမ် 100 ပီႊၼၼ်ႉ ၼႆယဝ်ႉ။\n\nၼႂ်းဝၼ်းၵိူတ်ႇမၼ်း ထူၼ်ႈတဵမ်  100 ပီႊၼၼ်ႉ ပလိၵ်ႈၶဝ် ႁဵတ်းၵႅင်ႈဝႆႉမၼ်း မိူၼ်ၽူႈမီးတၢင်းၽိတ်း ၵေႃႉၼိုင်ႈသေ မႃးတီႉၺွပ်းမၼ်းၵႂႃႇ ၼႆယဝ်ႉ။\n\nပရၢႆႇယၢၼ်ႇၼႆႉ  ယူႇသဝ်းတီႈႁူင်းတူၺ်းထိုင် လုမ်းလႃးၵူၼ်းထဝ်ႈတီႈၼိုင်ႈဝႆႉ၊ မၼ်းၵႆႉလၢတ်ႈဝႃႈ တႃႉၶႂ်ႈယၢမ်ႈၶဝ်ႈၶွၵ်ႈတူၺ်းလႃႈ ၵွၼ်ႇပႆႇတၢႆၼႆႉၼႆတိၵ်းတိၵ်း။ လွင်ႈၼႆႉ ပလိၵ်ႈ  ငိၼ်းဝႃႈ မၼ်းၶႂ်ႈၶဝ်ႈၶွၵ်ႈ ၼႆလႄႈ ၸင်ႇႁဵတ်းၵႅင်ႈ မႃးတီႉၺွပ်းမၼ်းၵႂႃႇသႂ်ႇၶွၵ်ႈ မိူဝ်ႈဝၼ်းၵိူတ်ႇမၼ်း ထူၼ်ႈတဵမ် 100 ပီႊၼၼ်ႉ ၼႆယဝ်ႉ။\n\nပလိၵ်ႈၶဝ်ၵေႃႈ ၶဝ်ႈမႃး တီႉၺွပ်း ပရၢႆႇယၢၼ်ႇသေ လၢတ်ႈဝႃႈ “ယႃႇပေတူင်ႉ။ မႃးၸွမ်းႁဝ်းလီလီလႄႈ”   ၼႆသေ ပလိၵ်ႈသွင်ၵေႃႉၼၼ်ႉ ၶတ်းသေႃးမိုဝ်း ပရၢႆႇယၢၼ်ႇသေ ၽႃၶၢင်ႈမၼ်းၵႂႃႇ တီႈလူတ်ႉပလိၵ်ႈ။ ပိုတ်ႇသဵင်လ���တ်ႉ ပလိၵ်ႈၼၼ်ႉ မေႃး ဝီး…..ဝေႃႈ… ဝီး…. ဝေႃႈ…. ၼႆသေ  ဢဝ်ပရၢႆႇယၢၼ်ႇၵႂႃႇတီႈ ႁူင်းၶွၵ်ႈၶင်တေႉတေႉ။ မိူဝ်ႈၵႂႃႇထိုင် ၼၼ်ႉၵေႃႈ ႁႂ်ႈပရၢႆႇယၢၼ်ႇ လၢႆႈသိူဝ်ႈၶူဝ်းၸိူင်ႉၼင်ႇ ၵူၼ်းၺႃးတူတ်ႈတၢမ်ႇၶွၵ်ႈ ၼၼ်ႉတေႉတေႉသေ ထွတ်ႇထႆႇႁၢင်ႊဝႆႉယဝ်ႉ ႁႂ်ႈၶဝ်ႈၵႂႃႇ ၼႂ်းႁူင်းၶွၵ်ႈၶင်။\n\nမိူဝ်ႈၼၼ်ႉ ပရၢႆႇယၢၼ်ႇ ယုမ်ႉသေလၢတ်ႈဝႃႈ “ယၢမ်ႈၶဝ်ႈၶွၵ်ႈ ယဝ်ႉႁေၵမ်းၼႆႉတႄႉ” ၼႆယဝ်ႉ။\n\nပလိၵ်ႈၶဝ်ၵေႃႈ ၶိုၼ်းဢဝ် ပရၢႆႇယၢၼ်ႇ ၵႂႃႇသူင်ႇဝႆႉတီႈ ႁူင်းလုမ်းလႃး ၵူၼ်းထဝ်ႈယဝ်ႉ သိုပ်ႇၸတ်းႁဵတ်း ပၢင်ပွႆးဝၼ်းၵိူတ်ႇၵႂႃႇ ၼႆယဝ်ႉ။\n\nပီႈၼွင်ႉႁဝ်းၶဝ်ၶႃႈလူး ၸွင်ႇမီးၵူၼ်း ဢၼ်ၶႂ်ႈယၢမ်ႈၶဝ်ႈၶွၵ်ႈ တူၺ်းၶႃႈၼႄႇ ???"
+  },
+  {
+    "title": "ၵူၼ်းႁၵ်ႉၵၼ် ပႅတ်ႇဢၼ်ၼႆႉ ဢမ်ႇလီႁဵတ်း",
+    "content": "1. ႁပ်ႉပၢၵ်ႇ ပၼ်ၵႂၢမ်းမၼ်ႈ၊ ပၼ်တၢင်းမုင်ႈမွင်း ဢၼ်တေဢမ်ႇပဵၼ်မႃးလႆႈတေႉ\n\nယွၼ်ႉၶႂ်ႈႁႂ်ႈၵေႃႉႁၵ်ႉႁဝ်း ထၢင်ႇယႂ်ႇသေ ပၼ်ၵႂမ်းမၼ်ႈ၊ ပၼ်တၢင်းမုင်ႈမွင်း မဵဝ်းတေဢမ်ႇပဵၼ်မႃးလႆႈတေႉတေႉၼၼ်ႉ ဢမ်ႇထုၵ်ႇလီႁဵတ်း။ ပၼ်ၵႂၢမ်းမၼ်ႈ၊ ပၼ်တၢင်းမုင်ႈမွင်း ဢၼ်ႁဝ်းဢမ်ႇႁဵတ်းလႆႈတေႉတေႉၼၼ်ႉ ၸၢင်ႊႁဵတ်းႁႂ်ႈၵေႃႉႁၵ်ႉႁဝ်းတိူဝ်ႉၸႂ်ၵူၺ်းဢမ်ႇၵႃး ၸၢင်ႊႁဵတ်းၶဝ်ထၢင်ႇထိူမ်ၼိူဝ်ႁဝ်းပႃးထႅင်ႈၵွၼ်ႇ။\n\n2. ဢမ်ႇသိုဝ်ႈယူဝ်း\n\nၵၢၼ်လၢတ်ႈၸႃ ၵပ်းသိုပ်ႇၵၼ်ၼႆႉ မၼ်းလွင်ႈယႂ်ႇတႃႇ ၸိူဝ်းပဵၼ်ၸူႉၸူဝ်းၵၼ်တေႉတေႉ။ ထုၵ်ႇလီလၢတ်ႈတေႃႇ ၵေႃႉႁၵ်ႉႁဝ်းသိုဝ်ႈသိုဝ်ႈယူဝ်းယူဝ်း၊ ဢမ်ႇလိင်ႉဢမ်ႇလႅၼ်။ ပေႃးႁဝ်းဢမ်ႇလၢတ်ႈၼႄၸႅင်ႈလႅင်းၸိုင် မိူဝ်းၼႃႈမႃး ၸၢင်ႊပဵၼ်ငဝ်ႈႁၢၵ်ႈပၼ်ႁႃလူင်မႃးယူႇယဝ်ႉ။\n\n3. ပိုင်ႈဢိင်ၵေႃႉႁၵ်ႉ လူၼ်ႉလိူဝ်ႁႅင်း\n\nပေႃးပဵၼ်ၵေႃႉႁၵ်ႉၵၼ်မႃးယဝ်ႉၼႆႉ ၵူၼ်းၵမ်ႈၼမ်ၼမ်ၼႆႉ​ မေႃလိုမ်းပႅတ်ႈ ပိူင်ပဵၼ်တေႉၼၼ်ႉယဝ်ႉ။ မိူဝ်ႈလႂ် ဢမ်ႇမိူဝ်ႈလႂ်ၵေႃႈ ၵုမ်ႇပဵၼ်ၵေႃႉလဵဝ်လႆႈမိုင်ႉ၊ လႆႈႁဵတ်း ယူႇၵူႊလွင်ႈလွင်ႈတႄႉ ပေႃးႁိုင်မႃး ၸၢင်ႊႁိူဝ်ႉသေ ပဵၼ်တၢင်းမႆႈၸႂ်၊ တိူဝ်ႉၸႂ်၊ ၸႂ်လမ် မႃးယူႇယဝ်ႉ။\n\n4. ထီႉတိူဝ်ႉၵၼ်\n\nၼႆႉဢမ်ႇၸႂ်ႈမၢႆထိုင် လွင်ႈၼွၼ်းၸွမ်းၵၼ်ၼၼ်ႉယူႇတိၵ်းတိၵ်း။ ယိိပ်းမိုဝ်းၵၼ်၊ ၵွတ်ႇၵၼ် ပၼ်လွင်ႈဢုၼ်ႇဢူၵ်းဢုၼ်ႇၸႂ် ၸိူဝ်းၼႆႉၵေႃႈ ၸၢင်ႊႁဵတ်းႁႂ်ႈ တၢင်းႁၵ်ႉႁဝ်းတိူဝ်းလိူဝ်မႃးယဝ်ႉ။ ပေႃးလႆႈယူႇၵႆၵၼ်၊ ဢမ်ႇၸၢင်ႊပၼ်လွင်ႈဢုၼ်ႇဢူၵ်း၊ ဢုၼ်ႇၸႂ်ၵၼ်ၸိုင် တၢင်းႁၵ်ႉၵူၼ်းသွင်ၵေႃႉၼၼ်ႉၵေႃႈ ၸၢင်ႊမေႃယူတ်းသဵင်ႈၵႂႃႇလ��ႆးလွႆးယူႇ။ ၵမ်ႈၼမ်ၼမ်ၵေႃႈ ၵူၼ်းႁဝ်းလႆႈၽၢတ်ႇယၢၼ်ၵၼ် ယွၼ်ႉလွင်ႈၼႆႉၵွႆး။\n\n5. ၵုမ်ႇႁႃ တၢင်းၽိတ်းၵၼ်ၵွႆး\n\nၵူၼ်းႁဝ်းၼႆႉ ဢမ်ႇမီးၽႂ် လွတ်ႈလႆႈတၢင်းၽိတ်းလေႃႇ။ ဢၼ်မေႃႁႃတၢင်းၽိတ်း လိူဝ်သေ ႁႃလွင်ႈလီၼၼ်ႉၵေႃႈ ပဵၼ်သၽႃႇဝ ၵူၼ်းႁဝ်းယဝ်ႉ။ တၢင်းႁၵ်ႉၼႆႉၵေႃႈ မိူၼ်ၼႆၵွႆး။ ပေႃးၵႂႃႇႁၼ်မႅၼ်ႈ တၢင်းၽိတ်းဢၼ်ၼိုင်ႈသေ လိုမ်းပႅတ်ႈ ဢၼ်မၼ်းယၢမ်ႈႁဵတ်းလီမႃး ၸိူဝ်းၼၼ်ႉတႄႉ ႁိုဝ်တေမႅၼ်ႈ။ ပေႃးၵုမ်ႇႁႃ တၢင်းၽိတ်းယူႇတိၵ်းတိၵ်းၵေႃႈ တေဢမ်ႇႁၼ်လႆႈ လွင်ႈလီမၼ်းသေပွၵ်ႈယဝ်ႉ။\n\n6. ၵုမ်ႇထဵင်ၵၼ် မႅၼ်ႈ ႁိုဝ် ၽိတ်း\n\nပေႃးပဵၼ်ၸူႉၵၼ် ႁိုင်မႃးယဝ်ႉၼႆ တႃႇတေလၢတ်ႈတေႃႇၼၼ်ႉ ဢမ်ႇပေႃးမီးၵႂၢမ်းသင်ယဝ်ႉ။ ယွၼ်ႉၼၼ် ၸၢင်ႊလၢတ်ႈလွင်ႈ ၵၢၼ်မိူင်း၊ လွင်ႈၽႃႇသႃႇ၊ လွင်ႈၸၢႆးယိင်း ၸိူဝ်းၼႆႉ။ ပေႃးဢုပ်ႇၵၼ်ၸိူင်ႉၼႆၼမ်မႃး ၽႂ်ၵေႃႈ တေဢမ်ႇၶႂ်ႂ်ႈယွမ်းသေ လပ်းႁူလပ်းတႃထဵင် ၼင်ႇႁိုဝ်တေဢမ်ႇသုမ်း။ မၢင်ပွၵ်ႈ တေလိုမ်းလွင်ႈပဵၼ်ၸူူႉၸူဝ်းၵၼ်သေ ဢဝ်လွင်ႈ မႅၼ်ႈ ႁိုဝ် ဢမ်ႇမႅၼ်ႈၼၼ်ႉမႃးပဵၼ်ယႂ်ႇပႅတ်ႈ။ ပေႃးပဵၼ်ၼၼ်ၸိုင် ၸၢင်ႊမႃးတုမ်ႉတိူဝ်ႉ လွင်ႈပဵၼ်ၸူႉၸူဝ်းၵၼ်ၼၼ်ႉယဝ်ႉ။\n\n7. လၢမ်းၶၢတ်ႈ၊ ထၢင်ႇထိူမ်\n\nၸူႉႁၵ်ႉၵၼ်ၼႆႉ ပေႃးလႆႈယူႇႁိမ်းၸမ်ၵၼ်၊ မိူဝ်ႈယူႇႁိမ်းၸမ်ၵၼ်ၼၼ်ႉၵေႃႈ ပေႃးဢုၼ်ႇၸႂ်ၵွၼ်ႇ ၸင်ႇတေၸၢင်ႊၵေႃႇသၢင်ႈလႆႈ တၢင်းႁၵ်ႉ ဢၼ်ၶိူင်ႇၶမ်ႉၼၼ်ႉယဝ်ႉ။ ပေႃးၵေႃႉၼိုင်ႈလၢတ်ႈ ဢမ်ႇၼၼ် ႁဵတ်းသေမဵဝ်းမဵဝ်းၼႆ ၵုမ်ႇလၢမ်းၶၢတ်ႈသေ လၢတ်ႈၸွမ်းဝႃႈ တေပဵၼ်ၼၼ် တေပဵၼ်ၼႆ၊ ထၢင်ႇထိူမ်ဝႃႈ ၸိူင်ႉၼၼ် ၸိူင်ႉၼႆ ယူႇတိၵ်းတိၵ်းၸိုင် ႁိုဝ်တေပဵၼ်ၵၢၼ်။ ၵူၼ်းၵေႃႉၼႆႉ ၶႂ်ႈယူႇလွတ်ႈလႅဝ်း၊ မီးသုၼ်ႇ တႅပ်းတတ်ႈႁင်းၶေႃလႆႈ ၵူႊၵေႃႉၼႆ ယႃႇလုမ်း။\n\n8. လိုမ်းပႅတ်ႈၵႂၢမ်းၾၼ် ဢၼ်ၶႂ်ႈပဵၼ်\n\nၸူႉၸူဝ်း ဢၼ်ဝႃႈၼႆႉ ဢမ်ႇၸႂ်ႈၵေႃႉလဵဝ်။ ပဵၼ်သွင်ၵေႃႉ ၵွၼ်ႇၸင်ႇႁွင်ႉဝႃႈ ပဵၼ်ၸူႉၵၼ်၊ ပဵၼ်ၵေႃႉႁၵ်ႉၵၼ်ယဝ်ႉ။ ၵႂၢမ်းၾၼ်ႁဝ်းၼၼ်ႉၵေႃႈ မၼ်းၵဵဝ်ႇၵၼ်တင်းသွင်ၵေႃႉယဝ်ႉ။ ယွၼ်ႉၼၼ်ႉ ထုၵ်ႇလီႁႃလၢႆးတၢင်း ဢုပ်ႇဢူဝ်းငူပ်ႉငီႉ ပိူဝ်ႈတႃႇႁဵတ်းၸွမ်းၵႂၢမ်းၾၼ် ႁဝ်းၼၼ်ႉယူႇ။ ပေႃးသမ်ႉ ၵေႃႉၼိုင်ႈလႆႈၽႃႈပႅတ်ႈ ၵႂၢမ်းၾၼ်မၼ်းသေ လႆႈၵႂႃႇၸွႆႈထႅမ် ႁဵတ်းသၢင်ႈၸွမ်းၸိူင်ႉၼင်ႇ ထႅင်ႈၵေႃႉၼိုင်ႈၶႂ်ႈပဵၼ်ၼၼ်ႉၼႆၸိုင် ႁိုင်ႁိုင်မႃး ၸၢင်ႊပဵၼ်ပၼ်ႁႃ ယူႇယဝ်ႉ။\n\nၵၢၼ်ပဵၼ်ၸူႉၸူဝ်းၵၼ်ဢၼ်ဝႃႈၼႆႉ ယုင်ႈယၢင်ႈယၢပ်ႇၽိုတ်ႇဝႆ��။ ပဵၼ်ၵူၼ်းသွင်ၵ​ေႃႉ မႃးႁူမ်ႈၵၼ်လူး။ တေႃႈတူဝ်ၵဝ်ႇ မၢင်ပွၵ်ႈယင်းဢမ်ႇမႅၼ်ႈၸႂ် တူဝ်ၵဝ်ႇၶိုၼ်းလူးၼေႃႈ။ ယွၼ်ႉၼၼ် ၽႂ်ၵေႃႈ မေႃႁဵတ်းၽိတ်းယဝ်ႉ။ ဢၼ်လၢတ်ႈမႃးတၢင်းၼိူဝ်ၼႆႉ ၵွႆးပဵၼ်ၵမ်ႈၽွင်ႈၵူၺ်း။ မီးထႅင်ႈတင်းၼမ်ၵွၼ်ႇ။ ပေႃးမေႃသွၼ်ႇတူဝ်၊ ပေႃးဝူၼ်ႉပုၼ်ႈပိူၼ်ႈပုၼ်ႈႁဝ်း၊ မေႃပွင်ႇၸႂ်၊ ယိူၼ်ႉၵၼ်ႈ ၸႂ်ယၢဝ်းတေႃႇၵၼ်ၵွၼ်ႇ ၸင်ႇတေၸၢင်ႊႁပ်ႉၸၢမ်ႇလႆႈ တၢင်းႁၵ်ႉဢၼ်မူၼ်ႈသိူဝ်းၼၼ်ႉယဝ်ႉ။\n\nႁႂ်ႈမေႃပွင်ႇၸႂ် ၸုင်ၸၼ် ႁူမ်ႈမိုဝ်း ပဵၼ်ၵေႃႉႁၵ်ႉၵၼ်လႆႈ တေႃႇၸူဝ်ႈသုတ်းပၢၼ်သေၵမ်း။"
+  },
+  {
+    "title": "ပေႃးလုၵ်ႉၸဝ်ႉၸဝ်ႉၼႆ တေလႆႈၽွၼ်းလီၸိူင်ႉၼႆ",
+    "content": "လုၵ်ႉၸဝ်ႉၸဝ်ႉ ဢၼ်ဝႃႈၼႆႉ ဝႃႈဢဝ်တႄႉ ငၢႆႈငႅမ်ႈၵျႃႉ။ ၵူၺ်းႁဵတ်းယၢပ်ႇပေႇၸႂ်။ ၵူၼ်းၵမ်ႈၼမ်ၼမ်ၼႆႉ မီးၸႂ်ၶႂ်ႈလုၵ်ႉၸဝ်ႉၸဝ်ႉယူႇ။ ၵူၺ်းၵႃႈ ဢၼ်လုၵ်ႉလႆႈတေႉတေႉၼၼ်ႉ မီးၵမ်ႈၽွင်ႈၵွႆး။ ၵူၼ်းၵမ်ႈၼမ်ၼႆႉ ယွၼ်ႉၶႂ်ႈၼွၼ်းဢဝ်ၸေးၸိမ်ႇမၼ်း မိူဝ်ႈယၢမ်းၵၢင်ၼႂ်ၼၼ်ႉယဝ်ႉ။ ၵမ်ႈၽွင်ႈယင်းပၢႆဝႃႈ တင်းၶိုၼ်းၼႆႉ ဢၼ်လီၼွၼ်းမၼ်း မီးယၢမ်းၵၢင်ၼႂ်ၼၼ်ႉၵွႆး ၼႆၵွၼ်ႇယဝ်ႉ။\n\nၽူႈလူင်ႉလႅၼ်ႇၶဝ်တႄႉ ၶူၼ်ႉၶႂႃႉႁၼ်ဝႆႉဝႃႈ ၵူၼ်းၸိူဝ်းလုၵ်ႉၸဝ်ႉၸဝ်ႉၼၼ်ႉ တိူဝ်းၶိုၵ်ႉၶႅမ်ႉလိူဝ် ၵူၼ်းၸိူဝ်းလုၵ်ႉလႃႈၶဝ်ၼၼ်ႉ ၵူႊလွင်ႈလွင်ႈ ဝႃႈၼႆယဝ်ႉ။ ယွၼ်ႉၼၼ်လႄႈ ၸင်ႇဢွၼ်ၵၼ် ပူၵ်းၵၼ်၊ လၢတ်ႈၵၼ် ႁႂ်ႈလုၵ်ႉၸဝ်ႉၸဝ်ႉ။ ပေႃးလုၵ်ႉၸဝ်ႉၼႆ ၽွၼ်းမီးမၼ်း ……..\n\nပဵၼ်တၢင်းၵမ်ႉထႅမ် တႃႇၵိၼ်ယႅမ်ႉ ႁႂ်ႈမႅၼ်ႈၸွမ်းပၢႆးယူႇလီ။\n\nၶဝ်ႈၼႂ်ၼႆႉ ယွၼ်ႉမၼ်းၶိုၵ်ႉလိုၵ်ႉလမ်ႇလွင်ႈ တႃႇႁဝ်းတေမီးဢဵၼ်ႁႅင်း ႁဵတ်းၵၢၼ်လႆႈ တင်းဝၼ်းလႄႈ ပဵၼ်တႃႇၶဝ်ႈဢၼ်ၶိုၵ်ႉလိုၵ်ႉ လိူဝ်ပိူၼ်ႈယူႇယဝ်ႉ။ ပေႃးႁဝ်းလုၵ်ႉၸဝ်ႉၸဝ်ႉၼႆႉ တွင်ႉႁဝ်းၵေႃႈ တေယၢမ်ႈယွၼ်းၵိၼ် ၶဝ်ႈၼႂ်လႄႈ ဢၼ်ဝႃႈ ဢမ်ႇပဵၼ်ၵိၼ်ၶဝ်ႈၼႂ် ဢၼ်ဝႃႈၼၼ်ႉၵေႃႈ တေဢမ်ႇမီးယဝ်ႉ။ ပေႃးႁဝ်းဢမ်ႇ ၵိၼ်ၶဝ်ႈၼႂ်ၼႆ မိူဝ်ႈၵိၼ်ၶဝ်ႈဝၼ်းၼၼ်ႉ ႁဝ်းမေႃၶႂ်ႈၵိၼ်ဢၼ်ဢီႇဢၼ်မၼ်းလႄႈ ၸၢင်ႊႁဵတ်းႁႂ်ႈတူဝ်ၶိင်းႁဝ်း တိူဝ်းပီးမႃးယဝ်ႉ။\n\nမီးၶၢဝ်းယၢမ်းတႃႇ လဵၼ်ႈႁႅင်း\n\nၵူၼ်းၸိူဝ်းဢမ်ႇလဵၼ်ႈႁႅင်းၵၢင်ၼႂ်ၼႆႉ ၶဝ်ဢွၼ်ၵၼ်ၼႄးဝႃႈ ယွၼ်ႉလုၵ်ႉလႃႈ လႄႈ ဢမ်ႇမီးၶၢဝ်းယၢမ်း၊ ဢမ်ႇတၼ်း ၼႆယဝ်ႉ။ ပေႃးႁဝ်းလုၵ်ႉၸဝ်ႉၸဝ်ႉၼႆ တေမီးယၢမ်းတၼ်း တႃႇလဵၼ်ႈႁႅင်းယဝ်ႉ။ ပေႃးဝႃႈၸိူင်ႉၼႆ ၵူၼ်းၵမ်ႈၽွင်ႈတေၶႂ်ႈထဵင်ဝႃႈ လဵၼ်ႈႁႅင်း ယၢမ်းတၢမ်းၶမ်��ၵေႃႈလႆႈယူႇၼႃႇ ၸၢင်ႊပဵၼ်သင် ၼႆယူႇ။ ၵူၺ်းၵႃႈ လဵၼ်ႈႁႅင်းၵၢင်ၼႂ်ၼႆႉ ၸွႆႈထႅမ်ပၼ် ႁႂ်ႈတူဝ်ၶိင်းႁဝ်း ၸိုၼ်ႈၸၢင်ႇလႅတ်းလႅဝ်း တင်းဝၼ်း ယူႇယဝ်ႉ။\n\nၼိူဝ်ႉၼင် တိူဝ်းႁၢင်ႊလီမႃး\n\nၵူၼ်းၸိူဝ်းလုၵ်ႉၸဝ်ႉၸဝ်ႉၼႆႉ ၶဝ်မီးၶၢဝ်းယၢမ်းလိူဝ်၊ ၼႂ်းၶၢဝ်းယၢမ်းလိူဝ်ၼၼ်ႉ ၶဝ်တေၵိၼ်ၼမ်ႉ၊ ပႆတၢင်း၊ လဵၼ်ႈႁႅင်း ၸိူဝ်းၼႆႉလႄႈ ၸၢင်ႊႁဵတ်းႁႂ်ႈၽိဝ်ၼိူဝ်ႉၼင်ၶဝ် တိူဝ်းႁၢင်ႊလီမႃးယူႇယဝ်ႉ။\n\nၸႂ်ၼိမ်\n\nၵူၼ်းၸိူဝ်းလုၵ်ႉတူၺ်းလိၵ်ႈၸဵမ်ယဝ်ႉၼႆႉ တိူဝ်းၶႅမ်ႉ၊ တိူဝ်းတွင်း၊ တိူဝ်းပွင်ႇၸႂ်လီလိူဝ်သေ ၵူၼ်းၸိူဝ်း တူၺ်းလိၵ်ႈ တေႃႇထိုင်ၵၢင်ၶိုၼ်းလိုၵ်းၼၼ်ႉယဝ်ႉ။ ယွၼ်ႉၼၼ်ႉ တႅၼ်းတီႈ တေၶၢမ်ႇႁိူဝ်ႉၼူၼ်းသေ တူၺ်းလိၵ်ႈ တင်းၶိုၼ်းၼၼ်ႉ တႃႉလုၵ်ႉၸဝ်ႉၸဝ်ႉဢဝ်လႃႈ။\n\nၼွၼ်းလပ်းငၢႆႈ\n\nပေႃးႁဝ်းလုုၵ်ႉ၊ ၼွၼ်း ႁႂ်ႈမႅၼ်ႈယၢမ်းမၼ်းၸိုင် တူဝ်ၶိင်းႁဝ်းၼႆ တေတွင်းဝႆႉၶၢဝ်းယၢမ်းမၼ်းသေ ပေႃးထိုင်ၶၢဝ်းမၼ်းၵေႃႈ တေၶႂ်ႈၼွၼ်း၊ တေတိုၼ်ႇႁင်းၵွႆးမၼ်းမႃး ယူႇယဝ်ႉ။\n\nလုၵ်ႉၸဝ်ႉၸဝ်ႉၼႆႉ ဢမ်ႇၸႂ်ႈၵၢၼ်ဢၼ်ႁဵတ်းလႆႈ ငၢႆႈငၢႆႈၼႆသေတႃႉ ယွၼ်ႉမၼ်းမႅၼ်ႈတင်းပၢႆးယူႇလီတေႉတေႉလႄႈ ၸၢမ်းၶတ်းၸႂ် လုၵ်ႉၸဝ်ႉၸဝ်ႉတူၺ်းၶႃႈၼေႃႈ။"
+  },
+  {
+    "title": "တႃႇၵႅတ်ႇၶႄႇ မႅင်းတၢင်းပဵၼ်လႆႈၼၼ်ႉ ႁႅင်းၸင်ႈၶၢမ်ႇၼႂ်းတူဝ်ႁဝ်း လူဝ်ႇလႆႈၶိူင်ႇၶမ်ႉ",
+    "content": "လုမ်ႈၾႃႉလူင်ၼႆႉ  မႆႈႁွၼ်ႈမႃးတိၵ်းတိၵ်းယဝ်ႉ။  ၾိင်ႈၾႃႉၵေႃႈ လႅၵ်ႈလၢႆႈမႃးတိၵ်းတိၵ်း။ ၸိူင်ႉၼၼ်ၼင်ႇၵဝ်ႇ မူင်ႈမႅင်းတၢင်းပဵၼ်ဢၼ်မႂ်ႇ ၸိူဝ်းၼၼ်ႉၵေႃႈ ဢွၵ်ႇမီးမႃးတိၵ်းတိၵ်း၊ မိူဝ်ႈလဵဝ်ၵေႃႈတိုၵ်ႉမီးယူႇ၊ မိူဝ်းၼႃႈၵေႃႈ တေသိုပ်ႇမီးထႅင်ႈယူႇၵွႆး။ မိူဝ်ႈပီႊပူၼ်ႉမႃးၼႆႉ ဢွၼ်ၵၼ်ပဵၼ်ၶႆႊဝတ်းမူႇ၊ ၶႆႊဝတ်းၸၢင်ႉ၊ ၶႆႊဝတ်းယႂ်ႇ ၸိူဝ်းၼႆႉ။ မိူဝ်ႈလဵဝ် တၢင်းပဵၼ်ပွတ်ႇၵႂ်ႈ ဢၼ်တႄႇပဵၼ်မႃး တီႈဝဵင်းဝူႇႁၢၼ်ႉ မိူင်းၶႄႇၼၼ်ႉ မီးမႃးထႅင်ႈမႂ်ႇမႂ်ႇမဵဝ်းၼိုင်ႈ ယူႇယဝ်ႉ။\n\nမႅင်းတၢင်းပဵၼ်ၼႆႉ ၸိူဝ်ႉသႅၼ်းဢၼ်ၵဝ်ႇၸိူဝ်းၼၼ်ႉ​ၵေႃႈယဝ်ႉ ၸိူဝ်ႉသႅၼ်းဢၼ်မႂ်ႇမႂ်ႇ ဢၼ်တေမီးမႃးထႅင်ႈၵေႃႈယဝ်ႉ မၼ်းတေတိတ်းၸပ်း တီႈၵူၼ်းၸိူဝ်းဢၼ် ႁႅင်းၸင်ႈၶၢမ်ႇၼႂ်းတူဝ်ယွမ်းဢေႇ၊ ၵူၼ်းၸိူဝ်းဢမ်ႇမီးႁႅင်း ၸိူင်ႉၼင်ႇ လုၵ်ႈဢွၼ်ႇ လႄႈ ၵူၼ်းထဝ်ႈၶဝ် ၵမ်ႈၼမ်ၼမ်ယဝ်ႉ။\n\nတၢင်းပဵၼ်မၢင်မဵဝ်းၼႆႉ တိူဝ်ႉယိပ်းၵၼ် ၵွႆးၵေႃႈ ၸၢင်ႈၸပ်း၊ မႅင်းတၢင်းပဵၼ်မၢင်မဵဝ်းၵေႃႈ တေမီးၼႂ်းလူမ်း�� မၢင်မဵဝ်းၵေႃႈ ၸပ်းမႃးတီႈတၢင်းၵိၼ်တၢင်းယႅမ်ႉ၊ တီႈတူဝ်သတ်း ၸိူဝ်းၼႆႉ။ ၸိူင်ႉႁိုဝ်ၵေႃႈယဝ်ႉ ဢၼ်ႁဝ်းထုၵ်ႇလီႁူႉ လႄႈ တွင်းၵိုမ်းၵိုမ်းဝႆႉၼၼ်ႉတႄႉ မႅင်းတၢင်းပဵၼ်ၼႆႉ မၼ်းတေၸပ်းတီႈ ၵူၼ်းၸိူဝ်းႁႅင်းၸင်ႈၶၢမ်ႇတူဝ်လဵၵ်ႉဢေႇ ၸိူဝ်းၼၼ်ႉၵမ်ႈၼမ်ၼမ်ၼၼ်ႉယဝ်ႉ။ ယွၼ်ႉၼၼ် ၼင်ႇႁိုဝ် မူင်ႈမႅင်းတေဢမ်ႇၶဝ်ႈၼႂ်းတူဝ်ႁဝ်းလႆႈၼၼ်ႉ ႁႅင်းၸင်ႈၶၢမ်ႇတူဝ်ႁဝ်းၼႆႉ တိုၼ်းလူဝ်ႇလႆႈၶိူင်ႇၶမ်ႉဝႆႉယူႇၵူႊယၢမ်း ၼၼ်ႉယဝ်ႉ။\n\nႁႅင်းၸင်ႈၶၢမ်ႇၼႂ်းတူဝ် ၶိူင်ႇၶမ်ႉ\n\nလွၵ်းလၢႆးဢၼ်လီတီႈသုတ်းတႄႉ လူဝ်ႇလႅၵ်ႈလၢႆႈ လၢႆးယူႇသင်ႈၵိၼ်သဝ်းႁဝ်း ႁႂ်ႈမႅၼ်ႈၸွမ်းပၢႆးယူႇလီၼၼ်ႉယဝ်ႉ။ ပေႃးႁဝ်းယူႇလီ၊ ၵိၼ်တၢင်းၵိၼ် ဢၼ်မီးဢႃႇႁႃႇရ တဵမ်ထူၼ်ႈၼႆၸိုင် ဢဵၼ်ႁႅင်းႁဝ်း တိုၼ်းၶိူင်ႇၶမ်ႉဝႆႉယူႇယဝ်ႉ။ ယွၼ်ႉၼၼ် ပိူဝ်ႈတႃႇတေမီးဢဵၼ်မီးႁႅင်းၼၼ်ႉ လူဝ်ႇလႆႈႁဵတ်းၸိူင်ႉၼင်ႇတၢင်းတႂ်ႈၼႆႉ…..။\n\nၵိၼ်တၢင်းၵိၼ် ဢၼ်တေပဵၼ်ဢႃႇႁႃႇရ ၼႂ်းတူဝ်\n\nတႃႇဢဵၼ်ႁႅင်းႁဝ်း တေတဵမ်ထူၼ်ႈၼၼ်ႉ တၢင်းၵိၼ်ဢၼ်ႁဝ်းၵိၼ်ယူႇၵူႊဝၼ်းဝၼ်းၼၼ်ႉ လမ်ႇလွင်ႈတေႉတေႉ။ ပေႃးၵိၼ်တၢင်းၵိၼ် ဢၼ်မီးဢႃႇႁႃႇရ တဵမ်ထူၼ်ႈၼၼ်ႉၵွၼ်ႇ ၸင်ႇတေမီးဢဵၼ်ႁႅင်းသေ ႁေႉၵင်ႈလႆႈ မူင်ႈမႅင်း ၸိူဝ်းတေမႃးယႃႉၵဝ်းၼႂ်းတူဝ်ႁဝ်းၼၼ်ႉ။ ယွၼ်ႉၼၼ် ထုၵ်ႇလီၵိၼ် ၼိူဝ်ႉ၊ ပႃ၊ ၽၵ်းယိူဝ်ႈၼၢင်းၶဵဝ်၊ ၶႆႇၵႆႇ၊ ထူဝ်ႇ၊ မၢၵ်ႇမႆႉမၢၵ်ႇတွၵ်ႇ၊ ၼမ်ႉၼူမ်း ၸိူဝ်းၼႆႉ ႁႂ်ႈၸေးၸေးယူႇယဝ်ႉ။\n\nပေႃးၶႂ်ႈႁႂ်ႈ ႁႅင်းၸင်ႈၶၢမ်ႇၼႂ်းတူဝ် တူဝ်းၼမ်လိူဝ်ၼႆႉတႄႉ ထုၵ်ႇလီၵိၼ် တၢင်းၵိၼ်မီးထၢတ်ႈ ဝီႇတႃႇမိၼ်ႇၸီႇ ၼမ်ၼမ်၊  မၢၵ်ႇမႆႉ ၸိူဝ်းမီးသၢႆသူမ်ႈ ၸိူင်ႉၼင်ႇ မၢၵ်ႇၸွၵ်း၊ မၢၵ်ႇၽႃႈ၊ မၢၵ်ႇဢိုၼ်ႈ၊ မၢၵ်ႇဢိတ်ႇ၊ ၽၵ်းၵၢတ်ႇပီ၊ ၼမ်ႉၼူမ်းသူမ်ႈ၊ ၽၵ်းမီႇၶၢဝ်၊ မၢၵ်ႇသၢင်းၽေႃး ၸိူဝ်းၼႆႉ။\n\nဝႆႉၵၢၼ်ၼွၼ်း ပဵၼ်လွင်ႈယႂ်ႇ\n\nၵူၼ်းၼိုင်ႈၵေႃႉၼႆႉ တီႇဢေႇသုတ်း လူဝ်ႇလႆႇၼွၼ်းႁိုင် ၸဵတ်း တေႃႇ ပႅတ်ႇၸူဝ်ႈမူင်း။ ပေႃးလႆႈၼွၼ်းမွၵ်ႈၼႆႉၵွၼ်ႇ ႁႅင်းၸင်ႈၶၢမ်ႇၼႂ်းတူဝ်ၸင်ႇတေလီသေ ၸင်ႇတေၸိုၼ်ႈၸၢင်ႇပၢင်ႇသႂ်ဝႆႉ။ ပေႃးတႃၼွၼ်းလူႉ၊ ပေႃးၶၢၼ်တႃၼွၼ်း ၸိူဝ်းၼႆႉၸိုင် ၼႂ်းတူဝ်ႁဝ်းၼႆႉ တေဢမ်ႇႁဵတ်းၵၢၼ်လီလီသေ ႁႅင်းၸင်ႈၶၢမ်ႇၼႂ်းတူဝ်ႁဝ်းၵေႃႈ တေတူၵ်းလူင်းၵႂႃႇ။ ၶၢဝ်းၼွၼ်းဢၼ်ဝႃႈၼႆႉ  ၼပ်ႉသွၼ်ႇတႃႇၵၢင်ၶမ်ႈၵွႆး၊ ဢၼ်ၼွၼ်းၵၢင်ၼႂ်၊ ယွၼ်ႉတႃၼွၼ်းလူႉလႄႈ ၶိုၼ်းၼွၼ်းဝၼ်း ၸိူဝ��းၼၼ်ႉ ဢမ်ႇသွၼ်ႇပႃး။\n\nၵၢၼ်ဢၼ်ဢမ်ႇလီတႃႇ ပၢႆးယူႇလီၼၼ်ႉ ဝႄႈပႅတ်ႈသဵင်ႈသဵင်ႈ\n\nၵၢၼ်ဢၼ်တေတုမ်ႉတိူဝ်ႉပၢႆးယူႇလီ၊ ဢၼ်တေပဵၼ်ၽေးတႃႇႁဝ်းၼၼ်ႉ ဝႄႈလႆႈၵႃႈႁိုဝ်ၵေႃႈ ထုၵ်ႇလီဝႄႈ။  ၵၢၼ်ဢၼ်ၸၢင်ႊႁဵတ်းႁႂ်ႈႁႅင်းၸင်ႈၶၢမ်ႇၼႂ်းတူဝ်ယွမ်း ၸိူင်ႉၵိၼ်လဝ်ႈ၊ လုတ်ႇလႅၼ်းယႃႈ ၸိူဝ်းၼႆႉ ဝႄႈဝႆ့ၼႆႉ လီလိူဝ်ပိူၼ်ႈယဝ်ႉ။\n\nလူတ်းယွမ်း ၸႂ်ႁိပ်ႇႁွမ်ႈၽွင်ႈ\n\nၸႂ်ႁိပ်ႇႁွမ်ႈၼႆႉၵေႃႈ မၼ်းၵပ်းၵၢႆႇ တုမ်ႉယွၼ်ႉၵၼ်တင်း ပၢႆးယူႇလီတေႉတေႉ။ ၵူၼ်းၵေႃႉဢၼ် ၸႂ်ႁိပ်ႇႁွမ်ႈယူႇၼၼ်ႉ ၼႂ်းတူဝ်မၼ်း တေႁဵတ်းဢွၵ်ႇ ႁေႃႇမုၼ်း ထၢတ်ႈၶူဝ်ႇတီႇသေႃႇ (Cortisol) တင်းၼမ်တင်းလၢႆ။ ထၢတ်ႈႁ​ေႃႇမုၼ်း ဢၼ်ၼႆႉ မၼ်းၸၢင်ႈၵႂႃႇ သုၵ်ႉသၵ်ႉ ၶၵ်ႉၵၢၼ်ဢၼ်ၼႂ်းတူဝ်ၶိင်းႁဝ်း လူဝ်ႇႁဵတ်းၼၼ်ႉယဝ်ႉ။ ၸိူင်ႉၼင်ႇ ၼွၼ်းဢမ်ႇလပ်းဝႃႇ၊  ဢမ်ႇၶႂ်ႈၵိၼ်ၶႂ်ႈယႅမ်ႈဝႃႇ၊ ၶၢဝ်းၵိၼ်ၶၢဝ်းယႅမ်ႉၵေႃႈ ဢမ်ႇၽဵၼ်ႈ၊ ၵူၼ်းၵေႃႈၼိုၵ်းထိူင်း ၸိိူဝ်းၼႆႉ။ ပေႃးပဵၼ်ၼႆမႃးယဝ်ႉၵေႃႈ ၽွၼ်းႁၢႆႉမၼ်းၵႂႃႇတုမ်ႉယွၼ်ႉ ႁႅင်းၸင်ႈၶၢမ်ႇၼႂ်းတူဝ်ၶိင်းႁဝ်း ၵမ်းလဵဝ်ယဝ်ႉ။ ယွၼ်ႉၼၼ် ၼင်ႇႁိုဝ်တေယူတ်းယွမ်းလႆႈ ၸႂ်ႁိပ်ႇႁွမ်ႈၼၼ်ႉ ၼင်ႈတြႃးလႄႈ၊ ၽိုၵ်းလဵၼ်ႈယေႃးၵႃႉ၊ လဵၼ်ႈႁႅင်း ၸိူဝ်းၼႆႉၶႃႈလႄႈ။\n\nလဵၼ်ႈႁႅင်း\n\nၵူၼ်းၵေႃႉဢၼ်လႆႈၼင်ႈယူႇတင်းဝၼ်းတင်းဝၼ်းၼၼ်ႉ တေပီးသေ ပၢႆးယူႇလီၵေႃႈ တေၸုတ်ႈယွမ်းၼႆ  ႁဝ်းႁူႉၵၼ်ယူႇၵေႃႉယူႇလူး။ ယွၼ်ႉၼၼ် ပိူဝ်ႈတႃႇပၢႆးယူႇလီႁဝ်းၼၼ်ႉ လူဝ်ႇႁဵတ်းၽိုၵ်းသၼ်း၊ လဵၼ်ႈႁႅင်းၸိူဝ်းၼႆႉယဝ်ႉ။ ၵႂႃႇလဵၼ်ႈၵျိမ်ႇ (Gym)၊ ပႆတၢင်းဝႆးဝႆး၊ လႅၼ်ႈ၊ ၶီႇလူတ်ႉထိပ်ႇ (လႅင်)၊ လုၺ်းၼမ်ႉ၊ ၶိုၼ်ႈလွႆ၊ ၵႃႈ၊ လဵၼ်ႈမၢၵ်ႇၼင် ၸိူဝ်းၼႆႉ။ ပေႃးတိုၵ်ႉမီး တၢင်းယၢမ်ႈဢၼ် ၼင်ႈယဵတ်ႇ ၼွၼ်းလိူၼ်း ယူႇၼႂ်းႁိူၼ်းၼၼ်ႉၵေႃႈ ထုၵ်ႇလီပႅတ်ႈယဝ်ႉဝႃႈ။\n\nယူႇႁႂ်ႈသႅၼ်ႈသႂ်\n\nယွၼ်ႉလႆႈယိပ်းလႆႈၵမ် ၵူႊမဵဝ်းမဵဝ်းလႄႈ မိုဝ်းႁဝ်းၼႆႉ ဢမ်ႇသႅၼ်ႈသႂ်၊ မူင်ႈမႅင်း ဢၼ်ႁဝ်းတူၺ်းဢမ်ႇႁၼ်လႆႈၼၼ်ႉ ၸၢင်ႈၸပ်းဝႆႉ။ ယွၼ်ႉၼၼ်ႉ ၼိုင်ႈၸူဝ်ႈမူင်းၼိုင်ႈပွၵ်ႈၼႆႉ ထုၵ်ႇလီသုၵ်ႈလၢင်ႉပၼ်မိုဝ်းႁဝ်း ႁႂ်ႈသႅၼ်ႈသႂ်ယူႇ၊ ပေႃးဢမ်ႇၸၢင်ႊသုၵ်ႈမိုဝ်းလႄႈ ထုၵ်ႇလီဢဝ် ၼမ်ႉယႃလၢင်ႉမိုဝ်းၼၼ်ႉ သုၵ်ႈလၢင်ႉပၼ်မိုဝ်းယဝ်ႉ။ ဢမ်ႇထုၵ်ႇလီ ဢဝ်မိုဝ်းဢၼ်ဝူၺ်ႇႁင်ႈႁဝ်းၼၼ်ႉ ၵႂႃႇသီတႃ၊ သီသူပ်း၊ ၶွၵ်းၶူႈၼင် ၸိူဝ်းၼႆႉသေဢိတ်း။\n\nၵိၼ်ၼမ်ႉ ၼမ်ၼမ်\n\nထၢတ်ႈၼမ်ႉ ၼႂ်းတူဝ်ႁဝ်းၼႆႉ ၸၢင်ႊမေ���ယွမ်းလူင်းၵႂႃႇလႆႈၵူႊၶၢဝ်း။ ပေႃးထၢတ်ႈၼမ်ႉၼႂ်းတူဝ်ႁဝ်းႁႅင်ႈၼႆ  ၼႂ်းၶူႈၼင်၊ ၵူင်ၶေႃး ၸိူဝ်းၼႆႉ မီးၶီႈတူဝ်ႇမႃး။ မူင်ႈမႅင်းၸိူဝ်းၼႆႉ ၶဝ်ၸၢင်ႈၸပ်းၸွမ်း ၶီႈတူဝ်ႇၸိူဝ်းၼႆႉသေ ၶဝ်ႈၵႂႃႇၼႂ်းတူဝ်ၶိင်းႁဝ်းလႆႈ ဝႆးဝႆးယူႇယဝ်ႉ။ ယွၼ်ႉၼၼ် တီႈဢေႇသုတ်း ၵိၼ်ၼမ်ႉမွၵ်ႈ သၢမ်လီႇတႃႇၼႆႉလႄႈ။ ယႃႇပေပႂ်ႉႁႂ်ႈတွင်ႉမႆႈၼမ်ႉၵွၼ်ႇၸင်ႇၵိၼ်။ မွၵ်ႈၶိုင်ႈၸူဝ်ႈမူင်းၼႆႉ ၵိၼ်ပၼ်ၼမ်ႉၼိုင်ႈပွၵ်ႈလႃႈ။\n\nဢၼ်လၢတ်ႈဝႃႈ တၢင်းၼိူဝ်ၼႆႉ ပဵၼ်လၢႆးႁဵတ်းႁႂ်ႈႁႅင်းၸင်ႈၶၢမ်ႇၼႂ်းတူဝ်ႁဝ်း ၶိူင်ႇၶမ်ႉၼၼ်ႉယဝ်ႉ။ ​ေပႃးႁႅင်းၸင်ႈၶၢမ်ႇၼႂ်းတူဝ်ႁဝ်း ၶိူင်ႇၶမ်ႉယူႇၸိုင် မူင်ႈမႅင်းတၢင်းပဵၼ်သင်ၵေႃႈ  တေဢမ်ႇၸၢင်ႈၶဝ်ႈမႃး ၼႂ်းတူဝ်ၶိင်းႁဝ်းလႆႈငၢႆႈငၢႆႈ။"
+  },
+  {
+    "title": "ၼင်ႇႁိုဝ်တေတေႃႇသူႈလႆႈ တၢင်းပဵၼ်ပွတ်ႇၵႂ်ႈ Covid-19 ၼၼ်ႉ ႁဵတ်းၸွမ်းၶေႃႈၸိူဝ်းၼႆႉလႄႈ",
+    "content": "မိူဝ်ႈဝၼ်းတီႈ 23 ယၢမ်းၵၢင်ၶိုၼ်း 11 မူင်း 45 မိၼိတ်ႉ လိူၼ်မၢတ်ႈၼၼ်ႉ ထၢၼ်ၽွင်းလူင် ၵၢၼ်ပၢႆးယူႇလီ လႄႈ ၵၢၼ်လဵၼ်ႈႁႅင်း ၼႂ်းမိူင်းမၢၼ်ႊ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ထူပ်းႁၼ် ၵူၼ်းၸပ်းတၢင်းပဵၼ် ပွတ်ႇၵႂ်ႈ Covid-19 (ႁိုဝ်) မႅင်းဝူႇႁၢၼ်ႉ၊ ၵူၼ်းၸိူဝ်းလီထၢင်ႇထိူမ်ႇဝႃႈ ၸပ်းတၢင်းပဵၼ်ပွတ်ႇၵႂ်ႈၼႆသေ ၺႃးၸဝ်ႈၼႃႈတီႈၶဝ် ၵုမ်းၶင်ဝႆႉၶေႃၶေႃ ပၵ်းတႃပႂ်ႉတူၺ်းယူႇၼၼ်ႉၵေႃႈ ၼႂ်းမိူင်းမၢၼ်ႊ မီးၵႂႃႇ 200 ၵေႃႉလိူဝ်ယဝ်ႉ။ ၵွပ်ႈၼၼ် ၸိူဝ်းႁဝ်းႁႃးၵူႊၵေႃႉ ထုၵ်ႇလီၾၢင်ႉယူႇ ၾၢင်ႉၵိၼ် ၾၢင်ႉၵႂႃႇ ၾၢင်ႉပႆ လႄႈ မီးသတိလိူဝ်ၵဝ်ႇၼၼ်ႉယဝ်ႉ။\n\nလၢႆးတၢင်းဢၼ်ၸၢင်ႊ ၵႅတ်ႇၶႄႁေႉၵင်ႈလႆႈ တၢင်းပဵၼ်ပွတ်ႇၵႂ်ႈ Covid-19 ၼႆႉတႄႉ ပဵၼ်ၵၢၼ်ႁဵတ်းႁႂ်ႈ တူဝ်ၶိင်းမီးလွင်ႈမူတ်းသႂ်၊ ႁဵတ်းႁႂ်ႈ ႁႅင်းၶၢမ်ႇတူဝ် ၵႅၼ်ႇၶႅင်လီပဵင်းပေႃး။ ၸိူင်ႉၼၼ်ၸင်ႇ တေၸၢင်ႊႁေႉၵင်ႈလႆႈ တၢင်းပဵၼ် Covid-19 ၵွႆးဢမ်ႇၵႃး ႁေႉၵင်ႈပႃးလႆႈ မူင်ႈမႅင်းၵူႊလွင်ႈလွင်ႈၼၼ်ႉယဝ်ႉ။\n\nၼႂ်းမိူင်းၶႄႇ၊ ဢီႇတလီႇ၊ ဢီႇရႅၼ်ႇ၊ သပဵၼ်ႇ၊ ၵူဝ်းရီးယႃးၸၢၼ်းၸိူဝ်းၼႆႉ တၢင်းပဵၼ် ပွတ်ႇၵႂ်ႈ Covid-19 ၽႄႈတိူၼ်းၸွတ်ႇတူဝ်ႈၵႂႃႇဝႆးတေႉတေႉ။ ယွၼ်ႉတၢင်းပဵၼ်ၼႆႉသေ ႁဵတ်းႁႂ်ႈၵူၼ်းတၢႆၵႂႃႇ တင်းၼမ်ၼၼ်ႉယဝ်ႉ။ ၵူၺ်းၵႃႈ ပေႃးၼပ်ႉတူၺ်း ႁူဝ်ၼပ်ႉၵူၼ်းၼႂ်းလုမ်ႈၾႃႉတင်းသဵင်ႈတႄႉ ၵူၼ်းၸိူဝ်းတၢႆၵႂႃႇ တိုၵ်ႉမီး 4.4% ၵွႆးလႄႈ လႆႈဝႃႈ ၵူၼ်းၸိူဝ်းတၢႆၵႂႃႇယွၼ်ႉတၢင်းပဵၼ်ၼႆႉ တိုၵ်ႉဢေႇလိူဝ် တၢင်းပဵၼ်တၢင်ႇဢၼ်တေႉတေႉယူႇ။\n\nၾၢႆႇၼိုင်ႈတၢင်းၼိုင်ႈၵေႃႈ လွင်ႈတၢင်းဢၼ်ၸၢင်ႊႁဵတ်းႁႂ်ႈ တၢင်းပဵၼ်ပွတ်ႇၵႂ်ႈ ၽႄႈတိူၼ်းဝႆးၼၼ်ႉ တႄႇမႃးတီႈ ပၢင်ၵူၼ်းၵိုၼ်းၶွၼ်ႈၼမ်၊ ၸႂ်ႉတိုဝ်းၶူဝ်းၶွင်ႁူမ်ႈၵၼ်သေ ဢမ်ႇယူႇႁႂ်ႈတူဝ် မီးလွင်ႈသႅၼ်ႈသႂ် ၸဵမ်ၸိူဝ်းၼႆႉဢေႃႈ။ ၵွပ်ႈၼၼ် သင်မီးသတိသေ ၾၢင်ႉလွင်ႈၵၢၼ်ယူႇၵၢၼ်ၵိၼ် လွင်ႈၵႂႃႇမႃးၵၼ်ၵူႊၵေႃႉတႄႉ တေလီတီႈသုတ်းယဝ်ႉၶႃႈ။\n\nယွၼ်ႉၼၼ် ၼင်ႇႁိုဝ် တၢင်းပဵၼ်ၼႆႉ တေဢမ်ႇၽႄႈတိူၼ်းၵႂႃႇ ၼႂ်းတူင်ႇဝူင်းႁိမ်းႁွမ်း ဢွင်ႈတီႈၸိူဝ်းဢၼ်ၸဝ်ႈၵဝ်ႇယူႇသဝ်းၼၼ်ႉ မိူဝ်ႈလဵဝ် ထုၵ်ႇလီၸွႆႈၵၼ်ႁေႉႁၢမ်ႈ လႄႈ ၵႅတ်ႇၶႄႇၵႂႃႇယဝ်ႉဢေႃႈ။ သင်တေႁဵတ်းသၢင်ႈ လွင်ႈၵႅတ်ႇၶႄႁေႉၵင်ႈတၢင်းပဵၼ် ပွတ်ႇၵႂ်ႈၼႆၸိုင် မီးလၢႆးတၢင်းဢၼ်ထုၵ်ႇမႅၼ်ႈမၼ်း လၢႆလၢႆလွင်ႈလႄႈ ထုၵ်ႇလီႁဵတ်းၸွမ်းၵႂႃႇ ၼင်ႇပႃႈတႂ်ႈၼႆႉယူႇၶႃႈ။\n\nတေလႆႈဝႄႈသင် လႄႈ တေလႆႈၾၢင်ႉဝႆႉၸိူင်ႉႁိုဝ်\n\nDO- လွင်ႈထုၵ်ႇလီႁဵတ်း- လၢင်ႉသုၵ်ႈသီမိုဝ်း ႁႂ်ႈမူတ်းသႂ်လႄႈ။ တီႈဢေႇသုတ်း ထုၵ်ႇလီ လၢင်ႉပၼ်မိုဝ်း ႁႂ်ႈႁိုင်မွၵ်ႈ 20 သႅၵ်ႉၵၢၼ်ႉ။ ပေႃးဢဝ် ၼမ်ႉ လႄႈ ၼမ်ႉယႃႈယႃလၢင်ႉမိုဝ်း သုၵ်ႈသီပၼ် ယိုင်ႈၶႅၼ်းၶႅမ်ႉ။ သင်ဢမ်ႇႁဵတ်းပၼ်လႆႈ ၸိူင်ႉၼႆၸိုင် တေလႆႈဢဝ် ၼမ်ႉဢႄႇၵူဝ်ႇႁေႃး ဢၼ်ပႃးထၢတ်ႈလဝ်ႈ 60% ၶိုၼ်ႈၼိူဝ်Hand Sanitizer/Hand Gel ၼၼ်ႉ သုၵ်ႈသီပၼ်မိုဝ်းၸဝ်ႈၵဝ်ႇ။ တေလႆႈလၢင်ႉသုၵ်ႈသီမိုဝ်းပၼ် ၶၢဝ်းလႂ်ၼႆၸိုင် မိူဝ်ႈၽွင်းတေၵိၼ်တၢင်းၵိၼ်၊ မိူဝ်ႈၶဝ်ႈႁွင်ႈၼမ်ႉ ၶိုၼ်ႈထၢင်ယဝ်ႉ၊ မိူဝ်ႈၶီႇၸၢမ်ႇ၊ ဢႆယဝ်ႉ၊ မိူဝ်ႈယိပ်းမႅၼ်ႈ ၶူဝ်းၶွင်ႁူမ်ႈၵၼ်တင်း ၵူၼ်းတင်းၼမ်ယဝ်ႉၼၼ်ႉ ထုၵ်ႇလီသုၵ်ႈသီလၢင်ႉပၼ်မိုဝ်းၸဝ်ႈၵဝ်ႇ ႁႂ်ႈမူတ်းသႂ်ၼၼ်ႉယဝ်ႉ။ DON’T – လွင်ႈဢမ်ႇထုၵ်ႇလီႁဵတ်း- ထုၵ်ႇလီဝႄႈ ၵၢၼ်တီႈဢဝ်မိုဝ်းယိပ်း ၶူႈလင်၊ သူပ်း လႄႈ ဢဝ်မိုဝ်း သီတႃၸိူဝ်းၼႆႉယူႇ။ သင်ဝႃႈ တီႈမိုဝ်းၸဝ်ႈၵဝ်ႇၼၼ်ႉ မီးမူင်ႈမႅင်းၸပ်းဝႆႉၸိုင် ပေႃးဢဝ်မိုဝ်းၵႂႃႇတိုဝ်ႉၺႃးတီႈ မၢၵ်ႇတႃၼႆ တၢင်းပဵၼ်ၸၢင်ႊၸပ်းၶဝ်ႈၵႂႃႇ ၼႂ်းတူဝ်ႁဝ်းငၢႆႈၼၼ်ႉယဝ်ႉ။ DO – ဢၼ်ႁဵတ်းလႆႈ– ၵူတ်ႇထတ်းၾၢင်ႁၢင်ႈ လၵ်ႉၶၼႃႇ တၢင်းပဵၼ်ၸဝ်ႈၵဝ်ႇလႄႈ။ ဢႆ၊ ၶီႇၸၢမ်၊ ၼၢဝ်၊ ၸဵပ်း၊ ထူၺ်ႈၸႂ်ၵပ်ႉၸိူဝ်းၼႆႉ ပဵၼ်ၾၢင်ႁၢင်ႈ လၵ်ႉၶၼႃႇ တၢင်းပဵၼ် ၶူဝ်းဝိတ်ႈ-19 ယဝ်ႉ။သင်ဝႃႈ ၽၢင်ႁၢင်ႈ တၢင်းပဵၼ်ၸိူဝ်းၼႆႉ မီးတီႈတူဝ်ၸဝ်ႈၵဝ်ႇယဝ်ႉၼႆ တေလႆႈပွင်ႇၶၢဝ်ႇပၼ်တီႈ ၸဝ်ႈၼႃႈတီႈ ၽၢႆႇပၢႆးယူႇလီၶဝ်သေ ႁဵတ်းသၢ���်ႈၵၢၼ်ၵူတ်ႇထတ်းၵႂႃႇၵမ်းသိုဝ်ႈလႄႈ။ DON’T – လွင်ႈဢမ်ႇထုၵ်ႇလီႁဵတ်း- ပေႃးဢမ်ႇလူဝ်ႇ ယႃႇသႂ်ႇၽႅၼ်ႇတူမ်းသူပ်း။ ၽႅၼ်ႇတူမ်းသူပ်းၼႆႉ ၵႅတ်ႇၵင်ႈပၼ်လႆႈ ယႃႇႁႂ်ႈတၢင်းပဵၼ်ၸဝ်ႈၵဝ်ႇ ၵႂႃႇၸပ်းလႆႈတီႈပိူၼ်ႈ မွၵ်ႈၼၼ်ႉၵွႆး။ သင်ဝႃႈ သႂ်ႇၽႅၼ်ႇတူမ်းသူပ်းဝႆႉၵူႊၶၢဝ်းၸိုင် ၸၢင်ႊတုမ်ႉတိူဝ်ႉပႃးပၢႆးယူႇလီၸဝ်ႈၵဝ်ႇၵွၼ်ႇ။ DO – လွင်ႈလီႁဵတ်းသၢင်ႈ- ၶတ်းၸႂ်ဝႄႈ ပၢင်ၵူၼ်းၼမ် လႄႈ ဢွင်ႈတီႈဢၼ်မီးၵူၼ်းၼမ်ၼၼ်ႉလႄႈ။ သင်ဝႃႈ တီႈႁိူၼ်းၸဝ်ႈၵဝ်ႇ မီးၵူၼ်းထဝ်ႈ ဢႃႇယု 60 ပီႊၶိုၼ်ႈၼိူဝ်ၸိုင် လုမ်းလႃးပၼ်ၶဝ်ႁႂ်ႈလီတီႈသုတ်းသေ ပၼ်ၶဝ်ယူႇဝႆႉၼႂ်းႁိူၼ်း ယႃႇပၼ်ဢွၵ်ႇတၢင်းၼွၵ်ႈၼႆႉ ၶႅမ်ႉတႃႇပၢႆးယူႇလီၶဝ်ယဝ်ႉၶႃႈ။ ၵူၼ်းထဝ်ႈၼႆႉ တၢင်းပဵၼ်ၸၢင်ႊၸပ်းငၢႆႈလိူဝ် ၵူၼ်းတၢင်ႇသႅၼ်းယဝ်ႉ။ သင်ပဵၼ်ၵူၼ်းမီးတၢင်းပဵၼ် ပိုၼ်ႉၶၢမ်ႇတူဝ်ဝႆႉ မိူၼ်ၼင်ႇ လိူတ်ႈလိူဝ်၊ ယဵဝ်ႈဝၢၼ်၊ တၢင်းပဵၼ်ႁူဝ်ၸႂ်ၸိူဝ်းၼႆႉၸိုင် ယိုင်ႈၶႅၼ်းလီၾၢင်ႉ ၶတ်းၸႂ်တူၺ်းထိုင်ပၼ် ပၢႆးယူႇလီၶဝ် ႁႂ်ႈလီတီႈသုတ်းယဝ်ႉ။ DON’T – လွင်ႈဢမ်ႇထုၵ်ႇလီႁဵတ်း- သင်ဝႃႈ ၸဝ်ႈၵဝ်ႇဢမ်ႇယူႇလီ ဢမ်ႇၼၼ် ပဵၼ်ဝတ်း၊ ပဵၼ်ဢၢၼ် လႄႈ ဢႆၼႆၸိုင် ယႃႇပေဢွၵ်ႇၶၢဝ်းတၢင်းၵႂႃႇတၢင်းလႂ်။ သင်ဝႃႈ ဢွၵ်ႇၶၢဝ်းတၢင်းၵႂႃႇ ၶၢဝ်းဢမ်ႇယူႇလီၼၼ်ႉၸိုင် ၸၢင်ႊပဵၼ်ၽေးတႃႇၸဝ်ႈၵဝ်ႇၵွႆးဢမ်ႇၵႃး ၸၢင်ႊပၼ်ၽေး တႃႇၵူၼ်းႁိမ်းႁွမ်း ထႅင်ႈၵွၼ်ႇ။ DO – လွင်ႈလီႁဵတ်း- သင်ဝႃႈ ၸဝ်ႈၵဝ်ႇ ဢွၵ်ႇၶၢဝ်းတၢင်းၵႂႃႇ တီႈမိူင်း၊ ၸေႊဝဵင်း၊ ဢွင်ႈတီႈ ဢၼ်မီးၵူၼ်းၸပ်းတၢင်းပဵၼ် ၶူဝ်းဝိတ်ႈ-19 ၼၼ်ႉမႃးၸိုင် ထုၵ်ႇလီႁဵတ်းၸွမ်း ၼင်ႇဢၼ် ၸဝ်ႈၼႃႈတီႈ ၽၢႆႇပၢႆးယူႇလီၶဝ် တမ်းဝၢင်းပိူင်ဝႆႉၼၼ်ႉယူႇ။ ၼႂ်းမိူင်းမၢၼ်ႊတႄႉ ၽၢႆႇလူင်ပွင်ၸိုင်ႈ ပိုၼ်ၽၢဝ်ႇ ဢွၵ်ႇၶေႃႈသင်ႇဝႆႉ ႁႂ်ႈယူႇၼႂ်းႁိူၼ်း တႃႇၶၢဝ်းႁိုင် 14 ဝၼ်း။ DON’T – လွင်ႈဢမ်ႇလီႁဵတ်း- ယႃႇပေၵူဝ်လူၼ်ႉႁႅင်း။ တၢင်းပဵၼ်ၼႆႉ လီၵူဝ် ပဵၼ်မိူင်း ပဵၼ်မိူင်းၸိူင်ႉၼၼ်ၵွႆး။ တီႈမိူင်းၵမ်ႈၼမ်တႄႉ ဢမ်ႇပေႃးလီၵူဝ်ၵႃႊႁိုဝ်ၼင်ႇၵဝ်ႇ။ တၢင်းၼမ်ၵူၼ်းၸိူဝ်းတၢႆယွၼ်ႉတၢင်းပဵၼ်ၼႆႉၵေႃႈ မီးဢေႇယူႇ။ ယွၼ်ႉၼၼ် ယႃႇပေႁႅင်ႉၵူဝ်လူၼ်ႉၵူဝ်လိူဝ်။ လမ်ႇလွင်ႈသုတ်းတႄႉ လူဝ်ႇလႆႈမီးသတိသေ ၶုၵ်းၸႂ်လႆႈမိူဝ်ႈလႂ်ၵေႃႈ ၶတ်းၸႂ်သုၵ်ႈလၢင်ႉသီမိုဝ်းၵၼ် ႁႂ်ႈၶႅမ်ႉလႅပ်ႈ၊ ယႃႇပေယူႇဝူၺ်ႇႁၢင်ႈ။ DO –လွင်ႈထုၵ်ႇလီႁဵတ်း- ၶတ်းၸႂ်ႁႂ်ႈမေႃယူႇႁင်းၵွႆးသေ ဝႄႈဢွင်ႈတီႈဢၼ်မီးၵူၼ်းၼမ်လႄႈ။ သင်ဝႃႈ ယူႇၼႂ်းၵႄႈၵူၼ်းၼမ်ၵေႃႈ ၼိုင်ႈၵေႃႉ လႄႈ ၼိုင်ႈၵေႃႉၼႆႉ ယူႇႁၢင်ႇၵၼ် ဢေႇသုတ်း မွၵ်ႈ သၢမ်ထတ်း၊ ၼမ်သုတ်း မွၵ်ႈ ႁူၵ်းထတ်းသေ ဢုပ်ႇလၢတ်ႈတေႃႇၵၼ်လႆႈယူႇ။ DON’T – လွင်ႈဢမ်ႇလီႁဵတ်း- သင်ဝႃႈပဵၼ်ၶႆႈဝတ်းၼၢဝ်ယဝ်ႉၼႆၸိုင် ၶတ်းၸႂ်ယူတ်းယႃ ႁႂ်ႈမႅၼ်ႈၸွမ်းပိူင်မၼ်းသေ ၵႂႃႇယူတ်းယႃတီႈ ႁွင်ႈၵၢၼ်ၽၢႆႇယူႇလီၵမ်းသိုဝ်ႈလႄႈ။ DO – လွင်ႈလီႁဵတ်း- လုမ်းလႃးပၢႆးယူႇလီႁႂ်ႈၶႅမ်ႉလႅပ်ႈလႄႈ။ ၽွင်းယၢမ်းမိူဝ်ႈလဵဝ်ၼႆႉ ထုၵ်ႇလီၵိုတ်းပႅတ်ႈ လွင်ႈဢွၵ်ႇဢဵၼ်ႁႅင်းလူၼ်ႉလိူဝ်၊ ၵၢၼ်လူတ်းၼမ်ႉၼၵ်းတူဝ်ၸိူဝ်းၼႆႉယူႇ။ ၼင်ႇႁိုဝ် တေမီးႁႅင်းၶၢမ်ႇတူဝ် တဵမ်ထူၼ်ႈၼၼ်ႉ ထုၵ်ႇလီၵိၼ်ပၼ် တၢင်းၵိၼ်တၢင်းယႅမ်ႉ ဢၼ်ၸၢင်ႊပၼ်တၢင်းၵမ်ႉၸွႆႈပၢႆးယူႇလီၼၼ်ႉ လမ်ႇလွင်ႈတီႈသုတ်းယဝ်ႉ။ DON’T – လွင်ႈဢမ်ႇထုၵ်ႇလီႁဵတ်း-  တွၼ်ႈတႃႇတေယိပ်း ၶူဝ်းၶွင်သေဢၼ်ဢၼ်ၼႆႉ ယႃႇပေၵူဝ်။ မႅင်းတၢင်းပဵၼ်ၼႆႉ ပႅၵ်ႉသမ်ႉဝႃႈ မၼ်းၸၢင်ႊမီးသၢႆၸႂ်ၶီးလႆႈ ၼိူဝ်ၶူဝ်းၶွင်ၼႆသေတႃႉ ၽၢႆႇႁွင်ႈၵၢၼ်ပၢႆးယူႇလီၶဝ် ဢမ်ႇလႆႈမၵ်းတတ်းဝႆႉဝႃႈ တေဢမ်ႇလႆႈယိပ်း တိူဝ်ႉၶူဝ်းၶွင်သင် ၼႆယဝ်ႉ။ ၵူၺ်းၵႃႈ သင်ဝႃႈ ယိပ်းၶူဝ်းၶွင် သေဢၼ်ဢၼ်ဝႆႉၼႆၸိုင် ထုၵ်ႇလီ လၢင်ႉသုၵ်ႈသီမိုဝ်းပၼ် ႁႂ်ႈမူတ်းသႂ်ၵမ်းလဵဝ်ယူႇ။ DO – လွင်ႈလီႁဵတ်း- လွင်ႈပၢႆးယူႇလီ ၵူၼ်းႁိမ်းႁွမ်းၵေႃႈ ထုၵ်ႇလီလဵပ်ႈႁဵၼ်း ႁႂ်ႈႁူႉပႃး ငဝ်းလၢႆးမၼ်းယူႇ။ သင်ဝႃႈ ႁၼ်မႅၼ်ႈ ငဝ်းလၢႆးပၢႆးယူႇလီ ႁိမ်းႁွမ်း ပိူင်ႈယဝ်ႉၼႆၸိုင် ထုၵ်ႇလီပွင်ႇၶၢဝ်ႇပၼ်တီႈ ႁွင်ႈၵၢၼ် ၽၢႆႇယူႇလီၶဝ်ၵမ်းသိုဝ်ႈ။"
+  },
+  {
+    "title": "ပေႃးမီးလုၵ်ႈယိင်းၼႆႉ တွင်းမၢႆးဝႆႉ လွင်ႈၸိူဝ်းၼႆႉတႃႉ",
+    "content": "🔸🔸🔸🔸🔸🔸🔸🔸🔸🔸🔸\n\n(၁) လုၵ်ႈယိင်းၼႆႉ ၶႂ်ႈလႆႈတၢင်းႁၵ်ႉ တီႈၵေႃႉပဵၼ်ဢူႈၼၼ်ႉယူႇ ၵူႊၶၢဝ်းယဝ်ႉ။ ၵေႃႉပဵၼ်ဢူႈ ယႃႇၼၵ်းၸႂ်တႃႇလၢတ်ႈၼႄလုၵ်ႈ လွင်ႈဝႃႈဢူႈႁၵ်ႉလုၵ်ႈယူႇၼႆၼၼ်ႉ။ တႅၼ်းတီႈတေသိုဝ်ႉပၼ်ၶူဝ်းၶွင် ၶဝ်သေလွင်ႈလွင်ႈယူႇတိၵ်းတိၵ်းၼၼ်ႉ ပၼ်တၢင်းႁၵ်ႉ လွင်ႈဢုၼ်ႇၸႂ်ၶဝ် ႁႂ်ႈတဵမ်ထူၼ်ႈတႃႉ။\n\n🔸 ( ၂) ၵေႃႉၵူႊ ဢၼ်တေမႃးႁူမ်ႈၸၢတ်ႈပၢၼ်ၸွမ်း လုၵ်ႈယိင်းၼၼ်ႉ ၵႆႉမိူၼ်ၵၼ်တင်း ၵေႃႉပဵၼ်ဢူႈယဝ်ႉ။ လုၵ်ႈယိင်း\n\nၶဝ်ၼႆႉ ယွမ်းႁပ်ႉဝႆႉဝႃႈ ၵူၼ်းၵေႃႉဢၼ်မိူၼ်ဢူႈၶဝ်ၼၼ်ႉၵွႆး တေၵိုင်ႇငမ်ႇၵၼ်တင်း ၸၢတ်ႈပၢၼ်ၶဝ်ၼႆယူႇ။\n\n🔸 (၃) ထုၵ်ႇလီထွမ်ႇၽဵင်းၵႂၢမ်း ဢၼ်လုၵ်ႈယိင်းၶဝ် ႁပ်ႉထွမ်ႇၼၼ်ႉယူႇ။ မိူဝ်ႈယၢမ်း ၶီႇၵႃးၸွမ်းလုၵ်ႈယိင်းၼၼ်ႉၵေႃႈ ထုၵ်ႇလီဝႆႉၼမ်ႉၼၵ်းသေ ႁပ်ႉထွမ်ႇၽဵင်းၵႂၢမ်းၸွမ်းလုၵ်ႈယိင်း။ ပေႃးႁဵတ်းၼၼ်ၼင်ႇ တေႁူႉလႆႈဝႃႈ မိူဝ်ႈလဵဝ် ၽဵင်းၵႂၢမ်းသင် လိုဝ်းလင်ဝႆ့ယူႇသေ တေႁႃတၢင်းသိူဝ်းၸွမ်းလုၵ်ႈယိင်းလႆႈ။\n\n🔸 (၄) လုၵ်ႈယိင်းၶဝ်ၼႆႉ ပႂ်ႉတူၺ်းဝႆႉ လၢႆးဢူႈလၢတ်ႈတေႃႇ ၵေႃႉပဵၼ်မႄႈယူႇတႃႇၵူႊၶၢဝ်း၊ ဝႃႈၸွင်ႇၵေႃႉပဵၼ်ဢူႈ လၢတ်ႈတေႃႇ သိူၵ်ႈသမ်ႇၼိူဝ် ၵေႃႉပဵၼ်မႄႈ လီငၢမ်းယူႇႁိုဝ်။ လုၵ်ႈယိင်းၼႆႉ ဢမ်ႇလႆႈၸႂ် ဢူႈဢၼ်ဢမ်ႇမေႃလုမ်းလႃးမႄႈ လီလီ။\n\n🔸 (၅) ၵေႃႉပဵၼ်လုၵ်ႈယိင်း ယႂ်ႇမႃႈၵႃႊသုင်မႃးၵႃႊႁိုဝ်ၵေႃႈ ၶတ်းၸႂ်ယူႇႁိမ်းၸမ်ပၼ်လုၵ်ႈယိင်း ၼမ်ၼမ်လႄႈ။ ယွၼ်ႉဝႃႈ လုၵ်ႈယိင်းၼႆႉ ယိုင်ႈၶဝ် ဢႃႇယုယႂ်ႇမႃး ယိုင်ႈဢမ်ႇပေႃးသူႈလၢတ်ႈတေႃႇဢူႈၼၼ်ႉယဝ်ႉ။\n\n🔸 (၆) ယႃႇလိုမ်း ဢွၵ်ႇဢဵၼ်ႁႅင်းၸွမ်းလုၵ်ႈယိင်း။ ပဵၼ်လုၵ်ႈယိင်းၼႆႉ ပႅၵ်ႉသမ်ႉဝႃႈ ၶဝ်လႆႈၸႂ် ၶိူင်ႈၶူဝ်း တၢင်းႁၢင်ႊလီ လႄႈ သိူဝ်ႈၶူဝ်း ဢိင်ႇတင်း ၵၢၼ်ဢၢၼ်ႇလိၵ်ႈလၢႆးၼႆသေတႃႉ ယႃႇႁႂ်ႈၶဝ်လိုမ်း ဢွၵ်ႇဢဵၼ်ႁႅင်းပႃး။\n\n🔸 (၇) ယႃႇလိုမ်းႁဵတ်းသၢင်ႈပၼ် ႁႂ်ႈပဵၼ်တီႈမၢႆတွင်း။ တီႈမၢႆတွင်းၼႆႉ မၼ်းလမ်ႇလွင်ႈတေႉတေႉ။ တႃႇပဵၼ် တီႈမၢႆတွင်း ၼႃႈႁိူၼ်းၼၼ်ႉ ပၼ်ၶၢဝ်းယၢမ်း လုၵ်ႈယိင်းၶဝ်လႄႈ။ မိူၼ်ၼင်ႇ ၼႂ်းဝၼ်းၵိူတ်ႇလုၵ်ႈ ဢွၵ်ႇၶၢဝ်းတၢင်းၵႂႃႇသေတီႈတီႈသေ\n\nႁဵတ်းပၼ်ႁႂ်ႈပဵၼ်တီႈမၢႆတွင်းၵႂႃႇ သေလွင်ႈလွင်ႈၸဵမ်ၸိူဝ်းၼႆႉ။\n\n🔸 (၈) ယႃႇလိုမ်းသင်ႇသွၼ် သပ်းလႅင်းပၼ် လွင်ႈတူဝ်ထူပ်း ၼႂ်းၸၢတ်ႈပၢၼ်ၽၢႆႇၼွၵ်ႈၼၼ်ႉ ပၼ်တီႈလုၵ်ႈယိင်း။\n\n🔸 ( ၉) ယႃႇလိုမ်း လႄႈ ၼၵ်းၸႂ် တႃႇၵႂႃႇ ပၢင်ပွႆးဢၼ်လုၵ်ႈယိင်း တေၶဝ်ႈပႃးၸိူဝ်းၼၼ်ႉလႄႈ။ သင်လုၵ်ႈယိင်း ၶဝ်ႈပႃးၼႂ်း ၸုမ်းတၢင်းၵႃႊ တီႈႁူင်းႁဵၼ်းၸိုင် ၵေႃႉပဵၼ်ဢူႈ ထုၵ်ႇလီၵႂႃႇႁူမ်ၸူမ်းၸွမ်းယူႇ။\n\n🔸 (၁၀) ပၼ်ၶၢဝ်းယၢမ်းတႃႇ လုၵ်ႈယိင်းလႄႈ။ ၵၢၼ်ၼမ်ၵႃႊႁိုဝ်ၵေႃႈယဝ်ႉ ပေႃးႁွတ်ႈၽႅဝ်ႁိူၼ်း တႅၼ်းတၢင်တီႈတေယူႇၵေႃႉလဵဝ်သေ တူၺ်းၾူၼ်း၊ တူၺ်းထီးဝီးယူႇၼၼ်ႉ ႁႃလွင်ႈတၢင်း ဢုပ်ႇလၢတ်ႈၸွမ်း လုၵ်ႈယိင်းလႄႈ။\n\n🔸 (၁၁) သင်ႇသွၼ်ပၼ် ႁႂ်ႈၶဝ်မေႃဝႆႉၼမ်ႉၸႂ်လီလႄႈ။ ၵဵဝ်ႇလူၺ်ႈ ၽႃႇသႃႇၵိူဝ်းယမ် ပႅၵ်ႇပိူင်ႈၵၼ်ၵေႃႈလီ၊ လွင်ႈၼႃႈႁိူၼ်း ဢမ်ႇမိူၼ်ၵၼ်ၵေႃႈယဝ်ႉ တေလႆႈသင်ႇသွၼ်ပၼ် ႁႂ်ႈၶဝ် မေႃယူႇ၊ ယႃႇႁႂ်ႈပဵၼ် လွင်ႈသုၵ်ႉတႃႇပိူၼ်ႈ။ သွၼ်ပၼ် ယႃႇႁႂ်ႈၶဝ်မေႃ ၶၢႆၶၢႆၸိုဝ်ႈသဵင်ပ��ူၼ်ႈ လူၺ်ႈဢၼ်ဢမ်ႇထုၵ်ႇမႅၼ်ႈၼၼ်ႉ။\n\n🔸 (၁၂) ယႃႇယူႇမိူၼ်ဢမ်ႇႁူႉဢမ်ႇႁၼ်ၸွမ်းသင်။ မိူဝ်ႈၽွင်း လုၵ်ႈယိင်းၶဝ် ႁဵတ်းၽိတ်းမႅၼ်ႈၼၼ်ႉ ၵေႃႉပဵၼ်ဢူႈ မီးပုၼ်ႈၽွၼ်း တႃႇမူၼ်ႉမႄးပၼ်လႄႈ ယႃႇယူႇမိူၼ်ဢမ်ႇႁူႉဢမ်ႇႁၼ်ၸွမ်းသင်။"
+  },
+  {
+    "title": "ဢူၺ်းၵေႃႉ ဢၼ်ၸႅတ်ႈၸၢင်ႇ ဢၼ်ဝႃႈၼၼ်ႉ",
+    "content": "ပေႃးတေဝႃႈတေႉမၼ်း ဢူၺ်းၵေႃႉဢၼ်ဝႃႈၼႆႉ ပဵၼ်ၵူၼ်းဢၼ်ဢမ်ႇၸၢပ်ႈၼိူဝ်ႉလိူတ်ႈၸဝ်ႈၵဝ်ႇ ဢမ်ႇၸႂ်ႈပီႈၼွင်ႉၸဝ်ႈၵဝ်ႇသေဢိတ်းသေ ပဵၼ်ၵူၼ်းဢၼ်မီးလွင်ႈၸမ်ၸႂ်ၵၼ်တင်းၸဝ်ႈၵဝ်ႇ မိူၼ်ၼင်ႇၼိူဝ်ႉလိူတ်ႈၸဝ်ႈၵဝ်ႇၼၼ်ႉယဝ်ႉ။\n\nၶဝ်ဢမ်ႇၸႂ်ႈၵေႃႉႁၵ်ႉႁဝ်းသေတႃႉ\n\nၶဝ်ပွင်ၸႂ်ပၼ်ႁဝ်းလႆႈၼမ်လိူဝ်ပိူၼ်ႈတေႉတေႉယူႇ။\n\nၶဝ်ဢမ်ႇၸႂ်ႈၽူႈလူင်ႉလႅၼ်ႇၽၢႆႇပၼ်တၢင်းၶႆႊၸႂ်သေတႃႉ\n\nသင်မီးလွင်ႈလူဝ်ႇမႃးတေႉတေႉၸိုင်\n\nၶဝ်ၼႆႉ ပဵၼ်ၽူႈၵိူဝ်းၵုမ်လီ လႄႈ ႁပ်ႉထွမ်ႇသဵင်ႁူဝ်ၸႂ်ႁဝ်းလႆႈ တဵမ်ထူၼ်ႈယူႇယဝ်ႉ။\n\nၶဝ်ဢမ်ႇၸႂ်ႈၽူႈၶႅင်ႇႁဝ်းသေတႃႉ\n\nထဵင်ၶဝ်လႆႈ၊ ၶိုၼ်ႈသဵင်တေႃႇၶဝ်လႆႈ လႄႈ ၵႂၢမ်းၼမ်ၸွမ်းၶဝ်လႆႈယူႇ။\n\nယွၼ်ႉဝႃႈၶဝ်ၼႆႉ ပဵၼ်ဢူၺ်းၵေႃႉႁၵ်ႉႁဝ်း\n\nဢၼ်ႁူႉၼႂ်းၸႂ်လိုၵ်ႉလိုၵ်ႉႁဝ်း\n\nၵႂၢမ်းၼမ်တေႃႇၵၼ်မိူဝ်ႈလႂ်ၵေႃႈ ဢမ်ႇမေႃၸႂ်လမ်တေႃႇသူ။\n\nဢူၺ်းၵေႃႉႁၵ်ႉဢၼ်ဝႃႈၼၼ်ႉ\n\nသင်ဢူၺ်းၵေႃႉၸဝ်ႈၵဝ်ႇ ႁွတ်ႈၽႅဝ်တီႈယိူင်းမၢႆသုင်သုတ်း\n\nဢၼ်ၸဝ်ႈၵဝ်ႇဢမ်ႇႁွတ်ႈလႆႈၼၼ်ႉဝႆႉၸိုင်\n\nမေႃလၢတ်ႈပၼ်ႁႅင်းဝႃႈ “ႁဵတ်းၼႆၵႂႃႈ ဢူၺ်းၵေႃႉၵဝ်” ၼႆႁေ\n\nယုၵ်ႉယွင်ႈဢဝ်ၵုင်ႇမုၼ်ၸွမ်းဢူၺ်းၵေႃႉၼၼ်ႉယဝ်ႉ။\n\nပႅၵ်ႉသမ်ႉဝႃႈ ႁဝ်းမီးဢူၺ်းၵေႃႉ ဢၼ်ၶဝ်ႈၸိုဝ်ႈဝႃႈ ဢူၺ်းၵေႃႉၼႆလၢႆလၢႆၵွႆးၼၼ်ႉ ၼမ်တၢၼ်ႇႁိုဝ်ၵေႃႈယဝ်ႉ သင်ဝႃႈ ပႆႇမီးဢူၺ်းၵေႃႉ ဢၼ်ႁဝ်းပိုတ်ႇဢူၵ်းလၢတ်ႈၼႄ လွင်ႈတၢင်းယၢပ်ႇႁဝ်း မိူဝ်ႈႁဝ်းႁူပ်ႉလွင်ႈတုၵ်ႉသေ ဝႆႉဝၢင်းၸႂ်မၼ်းလႆႈၸိုင် ပွင်ႇဝႃႈ ဢူၺ်းၵေႃႉဢၼ်မီးႁိမး်ၸမ်ႁဝ်း ဢၼ်ႁဝ်းႁွင်ႉၶဝ်ဝႃႈဢူၺ်းၵေႃႉၼၼ်ႉ ပႆႇၸႂ်ႈဢူၺ်းၵေႃႉၸႅတ်ႈၸၢင်ႇ တွၼ်ႈတႃႇႁဝ်းၵွၼ်ႇ။\n\n🙂"
+  },
+  {
+    "title": "ပေႃးမီးတၢင်းယၢမ်ႈ ၶွၵ်းၶူႈၼင်ၼႆ တိုတ်းပႅတ်ႈၵမ်းလဵဝ်လႃႈ",
+    "content": "ၸွင်ႇယၢမ်ႈဢဝ်မိုဝ်းၶွၵ်ႈၶူႈၼင်၊ ၶွၵ်းၶီႈမုၵ်ႈၶႃႈၼႄႇ….။ ထၢင်ႇတႄႉ တေဢမ်ႇလွတ်ႈၽႂ်သႄႈၼေႃႈ။ ယႃႇလႅၼ်ၶႃႈလႃႈ ၶႃႈႁူႉယူႇ သူၸဝ်ႈႁဝ်းၶွၵ်ႈၵူႊၵေႃႉ။ မိူဝ်ႈယႂ်ႇၼႆႉ ဢမ်ႇၶွၵ်းသေတႃႉ မိူဝ်ႈတိုၵ်ႉလဵၵ်ႉၼၼ်ႉတႄႉ တိုၼ်းၶွၵ်းယူႇသႄႈ။\n\nပေႃးမီးတၢင်းယၢမ်ႈ ဢၼ်ဢဝ်ၼိဝ်ႉမိုဝ်း ၶွၵ���ႈၶီႈမုၵ်ႈ၊ ၶွၵ်းၶူႈၼင်ၼၼ်ႉၼႆၸိုင် ယႃႇသိုပ်ႇႁဵတ်းထႅင်ႈယဝ်ႉ။ ဝိုတ်ႉပႅတ်ႈ တၢင်းယၢမ်ႈၼၼ်ႉႁေၶႃႈလႃႈ။ ယွၼ်ႉဝႃႈ တၢင်းယၢမ်ႈၼႆႉ ပဵၼ်တၢင်းယၢမ်ႈ ဢၼ်မီးၽေး၊  ဢၼ်ဢမ်ႇမႅၼ်ႈၸွမ်း ပၢႆးယူႇလီတေႉတေႉ။\n\nၶူႈၼင်ၼႆႉ ပဵၼ်ဝူၺ်ႇႁင်ႈလိူဝ်ပိူၼ်ႈၼႆၶႃႈဝႃႇ။ ယွၼ်ႉၼႆ ၼိဝ်ႉမိုဝ်းႁဝ်း ဢၼ်ၶွၵ်ႈၶီႈမုၵ်ႈ၊ ဢၼ်ၶွၵ်းၶူႈၼင်ၼၼ်ႉၵေႃႈ  ဢမ်ႇသႅၼ်ႈသႂ်ယဝ်ႉ။ မူင်ႈမႅင်းၸပ်းၸွမ်းမႃးယဝ်ႉဢေႃႈ။  ၼင်ႇႁိုဝ် မူင်ႈမႅင်း၊ ၽွင်မုၼ်ႈ ၸိူဝ်းၼႆႉ တေဢမ်ႇၶဝ်ႈၵႂႃႇထိုင် ၼႂ်းပွတ်ႇႁဝ်းၼၼ်ႉ ၶူႈၼင်ၼႆႉပဵၼ်တီႈ ၵူတ်ႇထတ်းမၼ်းၼႆယဝ်ႉ။\n\nယွၼ်ႉၼၼ် ဢၼ်ဝူၺ်ႇႁင်ႈ တင်းသဵင်ႈၵေႃႈ တေၵိုတ်းၶင်ႉဝႆႉ ၼႂ်းၶူႈၼင်ႁဝ်းၼၼ်ႉ။ ပေႃးၶွၵ်ႈၶူႈၼင်ယဝ်ႉသေ ဢမ်ႇသုၵ်ႈမိုဝ်းပႅတ်ႈၵမ်းလဵဝ်ယဝ်ႉ သမ်ႉၶိုၼ်းၵႂႃႇယိပ်း၊ ၵႂႃႇတိူဝ်ႉ တၢင်ႇဢၼ်၊ တၢင်ႇၵေႃႉ တၢင်ႇၵူၼ်းထႅင်ႈၼႆ မူင်ႈမႅင်းၼၼ်ႉၵေႃႈ တေၽႄႈၵႂႃႇၸွမ်းထႅင်ႈ ၼႆယဝ်ႉ။\n\nပေႃးၼႆ တေႁဵတ်းႁိုဝ် သုၵ်ႈလၢင်ႉႁႂ်ႈၶူႈၼင်ႁဝ်း မူတ်းသႂ်လႃႇ…။ ယႃႇမႆႈၸႂ်ၶႃႈ…. ၼၼ်ႉတႄႉမီးလၢႆးမၼ်းယူႇ။ တႃႇသုၵ်ႉလၢင်ႉ ၶူႈၼင်ႁဝ်းၼၼ်ႉ လီဢဝ်ၽႅၼ်ႇဢၼ်ဢူၼ်ႈၼူၼ်း ဢၼ်ပဵၼ်မဵဝ်းတႃႇၸႂ်ႉတိုဝ်းပွၵ်ႈလဵဝ်ၼၼ်ႉ​သေ လၢင်ႉပၼ်လႆႈယူႇ။ ပေႃးဢဝ်ၼိဝ်ႉမိုဝ်းႁဝ်း ၶွၵ်းၶူႈၼင်ၸိုင်  မိုဝ်းႁဝ်းတေဝူၺ်ႇႁင်ႈ၊ မူင်ႈမႅင်း တေၸပ်းၸွမ်းမိုဝ်းႁဝ်းသေဢမ်ႇၵႃး သၢႆလိူတ်ႈလဵၵ်ႉလဵၵ်ႉဢွၼ်ႇ ဢၼ်မီးၼႂ်းၶူႈၼင်ႁဝ်းၼၼ်ႉၵေႃႈ တေလူႉလႅဝ်။ ၶူႈၼင် ၸၢင်ႊဢွၵ်ႇလိူတ်ႈၸိူဝ်းၼႆႉ။\n\nၵူၼ်းၵမ်ႈၼမ်ၼမ်ၵေႃႈ ဢွၼ်ၵၼ်လၢတ်ႈဝႃႈ  ဢမ်ႇလီၶွၵ်ႈၶူႈၼင် ၽၢႆႇၼႃႈပိူၼ်ႈၼႆၼင်ႇၵဝ်ႇ။ ယွၼ်ႉဝႃႈ မၼ်းပဵၼ်ၵၢၼ်ဝူၺ်ႇႁင်ႈဢၼ်ၼိုင်ႈၼၼ်ႉယဝ်ႉ။ ဢၼ်လမ်ႇလွင်ႈ လိူဝ်ၼၼ်ႉတႄႉ တၢင်းယၢမ်ႈၶွၵ်းၶူႈၼင်ၼႆႉ  ပဵၼ်တၢင်းယၢမ်ႈၵႅၵ်း ဢၼ်ၸၢင်ႊတုမ်ႉတိူဝ်ႉပၢႆးယူႇလီၼၼ်ႉယဝ်ႉ။ ယွၼ်ႉၼၼ်ႉ တၢင်းယၢမ်ႈၶွၵ်းၶူႈၼင်ၼၼ်ႉ တိုတ်းပႅတ်ႈ၊ ထိုမ်ႈပႅတ်ႈသေၶႃႈလႃႈ။"
+  },
+  {
+    "title": "သႅၼ်ႁူႉ",
+    "content": "ယိၼ်ၸူမ်းၶွပ်ႈ  ၵူႊၵေႃႉ  ဢၼ်မႃးလူဢၢၼ်ႇ၊ ပၼ်တၢင်းႁၼ်ထိုင် သႅၼ်ႁူႉတေႉတေႉယူႇဢေႃႈ။  သႅၼ်ႁူႉမုင်ႈမွင်း ၶေႃႈပၼ်တၢင်းႁၼ်ထိုင်၊ ၶေႃႈမုၼ်ႉမႄး တီႈၽူႈလူလိၵ်ႈႁဝ်းၶဝ်ယူႇ ၵူႊယၢမ်းဢေႃႈ။"
+  }
+]
\ No newline at end of file