text
stringlengths 0
128k
|
|---|
and |
agnim īḷe purohitaṃ yajñasya devam ṛtvijam |
hotāraṃ ratnadhātamam |
agniḥ pūrvebhir ṛṣibhir īḍyo nūtanair uta |
sa devāṃ eha vakṣati |
agninā rayim aśnavat poṣam eva dive-dive |
yaśasaṃ vīravattamam |
agne yaṃ yajñam adhvaraṃ viśvataḥ paribhūr asi |
sa id deveṣu gacchati |
agnir hotā kavikratuḥ satyaś citraśravastamaḥ |
devo devebhir ā gamat |
yad aṅga dāśuṣe tvam agne bhadraṃ kariṣyasi |
tavet tat satyam aṅgiraḥ |
upa tvāgne dive-dive doṣāvastar dhiyā vayam |
namo bharanta emasi |
rājantam adhvarāṇāṃ gopām ṛtasya dīdivim |
vardhamānaṃ sve dame |
sa naḥ piteva sūnave 'gne sūpāyano bhava |
sacasvā naḥ svastaye |
vāyav ā yāhi darśateme somā araṅkṛtāḥ |
teṣām pāhi śrudhī havam |
vāya ukthebhir jarante tvām acchā jaritāraḥ |
sutasomā aharvidaḥ |
vāyo tava prapṛñcatī dhenā jigāti dāśuṣe |
urūcī somapītaye |
indravāyū ime sutā upa prayobhir ā gatam |
indavo vām uśanti hi |
vāyav indraś ca cetathaḥ sutānāṃ vājinīvasū |
tāv ā yātam upa dravat |
vāyav indraś ca sunvata ā yātam upa niṣkṛtam |
makṣv itthā dhiyā narā |
mitraṃ huve pūtadakṣaṃ varuṇaṃ ca riśādasam |
dhiyaṃ ghṛtācīṃ sādhantā |
ṛtena mitrāvaruṇāv ṛtāvṛdhāv ṛtaspṛśā |
kratum bṛhantam āśāthe |
kavī no mitrāvaruṇā tuvijātā urukṣayā |
dakṣaṃ dadhāte apasam |
aśvinā yajvarīr iṣo dravatpāṇī śubhas patī |
purubhujā canasyatam |
aśvinā purudaṃsasā narā śavīrayā dhiyā |
dhiṣṇyā vanataṃ giraḥ |
dasrā yuvākavaḥ sutā nāsatyā vṛktabarhiṣaḥ |
ā yātaṃ rudravartanī |
indrā yāhi citrabhāno sutā ime tvāyavaḥ |
aṇvībhis tanā pūtāsaḥ |
indrā yāhi dhiyeṣito viprajūtaḥ sutāvataḥ |
upa brahmāṇi vāghataḥ |
indrā yāhi tūtujāna upa brahmāṇi harivaḥ |
sute dadhiṣva naś canaḥ |
omāsaś carṣaṇīdhṛto viśve devāsa ā gata |
dāśvāṃso dāśuṣaḥ sutam |
viśve devāso apturaḥ sutam ā ganta tūrṇayaḥ |
usrā iva svasarāṇi |
viśve devāso asridha ehimāyāso adruhaḥ |
medhaṃ juṣanta vahnayaḥ |
pāvakā naḥ sarasvatī vājebhir vājinīvatī |
yajñaṃ vaṣṭu dhiyāvasuḥ |
codayitrī sūnṛtānāṃ cetantī sumatīnām |
yajñaṃ dadhe sarasvatī |
maho arṇaḥ sarasvatī pra cetayati ketunā |
dhiyo viśvā vi rājati |
surūpakṛtnum ūtaye sudughām iva goduhe |
juhūmasi dyavi-dyavi |
upa naḥ savanā gahi somasya somapāḥ piba |
godā id revato madaḥ |
athā te antamānāṃ vidyāma sumatīnām |
mā no ati khya ā gahi |
parehi vigram astṛtam indram pṛcchā vipaścitam |
yas te sakhibhya ā varam |
uta bruvantu no nido nir anyataś cid ārata |
dadhānā indra id duvaḥ |
uta naḥ subhagāṃ arir voceyur dasma kṛṣṭayaḥ |
syāmed indrasya śarmaṇi |
em āśum āśave bhara yajñaśriyaṃ nṛmādanam |
patayan mandayatsakham |
asya pītvā śatakrato ghano vṛtrāṇām abhavaḥ |
prāvo vājeṣu vājinam |
taṃ tvā vājeṣu vājinaṃ vājayāmaḥ śatakrato |
dhanānām indra sātaye |
yo rāyo 'vanir mahān supāraḥ sunvataḥ sakhā |
tasmā indrāya gāyata |
ā tv etā ni ṣīdatendram abhi pra gāyata |
sakhāya stomavāhasaḥ |
purūtamam purūṇām īśānaṃ vāryāṇām |
indraṃ some sacā sute |
sa ghā no yoga ā bhuvat sa rāye sa purandhyām |
gamad vājebhir ā sa naḥ |
yasya saṃsthe na vṛṇvate harī samatsu śatravaḥ |
tasmā indrāya gāyata |
sutapāvne sutā ime śucayo yanti vītaye |
somāso dadhyāśiraḥ |
tvaṃ sutasya pītaye sadyo vṛddho ajāyathāḥ |
indra jyaiṣṭhyāya sukrato |
ā tvā viśantv āśavaḥ somāsa indra girvaṇaḥ |
śaṃ te santu pracetase |
tvāṃ stomā avīvṛdhan tvām ukthā śatakrato |
tvāṃ vardhantu no giraḥ |
akṣitotiḥ saned imaṃ vājam indraḥ sahasriṇam |
yasmin viśvāni pauṃsyā |
mā no martā abhi druhan tanūnām indra girvaṇaḥ |
End of preview. Expand
in Dataset Viewer.
- Downloads last month
- 65